Moral nga Kaisug

Usa sa mga katuyoan niining mortal nga kinabuhi mao ang pagpakita ngadto sa Ginoo kon kita mosunod sa Iyang mga sugo kon kini nanginahanglan na og kaisug. Kita mipasar niadtong pagsulay sa kinabuhi sa wala pa dinhi sa yuta. Apan ang ikatulo nga panon sa langit mirebelde batok sa plano nga sila pagasulayan sa mortal nga kahimtang diin adunay risgo nga sila basin mapakyas.

Sa wala pa kita matawo, kita nakaila sa Dios Amahan ug sa Iyang Anak, nga si Jesukristo, sa personal nga paagi. Nakakita kita Kanila ug nakapaminaw Kanila samtang Sila mitudlo ug midasig kanato. Karon usa ka tabil ang nag-ali sa atong mga hunahuna ug mga panumduman. Si Satanas, ang amahan sa mga bakak, nakabintaha tungod kay kita kinahanglan nga makakita kon si kinsa gayud kita pinaagi sa mga mata sa hugot nga pagtuo, samtang ang atong mga lawas makapahimo natong ubos sa kalibutanong pagtintal ug sa pisikal nga kahuyang.

Kita adunay dakong panabang nga naghatag kanato og kaisug niining kinabuhi. Ang labing dako mao ang Pag-ula ni Jesukristo. Tungod sa Iyang gibuhat, ang mga sala mahimong mapasaylo diha sa mga tubig sa bunyag. Atong mabag-o kana nga panalangin kon kita moambit sa sakrament nga may hugot nga pagtuo ug may mahinulsolon nga kasingkasing.

Ang esprituhanong mga gasa lain usab nga tabang. Atong nadawat ang Espiritu ni Kristo sa atong pagkatawo. Kana naghatag kanato og gahum aron masayud kon ang usa ka pagpili nga atong nabuhat modala kanato ngadto sa kinabuhing dayon. Ang mga kasulatan usa ka sigurado nga giya kon kita mobasa niini uban sa Espiritu Santo isip atong kompanyon.

Ang Espiritu Santo moimpluwensya kanato sa pagpahayag og mga pasalamat ug sa pagpangayo og tabang diha sa pag-ampo inubanan ang pagkaklaro ug pagsalig nga sa makausa atong natagamtam kauban ang atong Langitnong Amahan ug diin atong masinati pag-usab kon kita mobalik ngadto Kaniya. Ang pagpakig-istorya uban sa Dios makatabang sa pagwagtang sa kahadlok gikan sa atong mga kasingkasing kay kini nagpalig-on sa pagtuo ug gugma sa Langitnong Amahan ug ni Jesukristo.

Ang balaang priesthood naghatag kanato og kaisug sa atong pagserbisyo. Sa mga ordinansa niini atong madawat ang gahum sa pagserbisyo sa mga anak sa Dios ug mosagang sa impluwensiya sa yawa. Sa dihang Siya nagtawag kanato sa pagserbisyo, kita aduna niini nga saad: “Ug kinsa kadto nga modawat kaninyo, didto atua usab Ako, kay Ako molakaw diha sa inyong atubangan. Ako anaa sa inyong tuo nga kamot ug sa inyong walà, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo” (D&P 84:88).

Ang Propeta nga si Joseph Smith sa iyang pagserbisyo adunay rason nga mahadlok. Apan ang Dios mihatag kaniya og kaisug uban niining kasigurohan sa ehemplo sa Agalon:

“Ug kon ikaw ihulog ngadto sa lungag, o ngadto sa mga kamot sa mamumuno, ug ang silot sa kamatayon ipahamtang diha kanimo; kon ikaw itambug ngadto sa ilawom; kon ang dagko nga mga balod nagkunsabo batok kanimo; kon ang mapintas nga mga hangin mahimo nga imong kaaway; kon ang mga langit mopundok og kangitngit, ug ang tanan nga mga elemento magkahiusa nga mobabag sa agianan; ug labaw sa tanan, kon ang mga apapangig gayud sa impyerno mobuka ug moabli sa ba-ba og dako diha kanimo, ikaw masayud, akong anak, nga kining tanan nga mga butang makahatag kanimo og kasinatian, ug alang sa imong kaayohan.

“Ang Anak sa Tawo mikunsad ubos kanilang tanan. Labaw pa ba ikaw kaniya?” (D&P 122:7–8).

Ang Dios naghatag kanato og labaw pa kaysa atong gikinahanglang tabang aron sa pagwagtang sa kahadlok ug sa paghatag og kaisug, bisan unsa nga atong atubangon sa kinabuhi. Samtang kita mangayo sa Iyang panabang, Siya makabayaw kanato ngadto sa kinabuhing dayon nga atong gipangandoy.