Mituo Ka ba sa Basahon ni Mormon?

Nianang panahona nga ako mipasakop sa Simbahan, nawad-an ako og trabaho tungod sa lisud nga kondisyon sa ekonomiya sa Nigeria. Nagtuo ko nga ang akong kalibutan natapos na, bisan pa misalig ako sa Dios—nag-ampo ug nagpuasa nga Siya unta motabang kanako nga makakita og laing trabaho.

Sulod sa usa ka bulan aduna akoy interbyu sa usa ka malamboon nga kompanya sa konstraksyon sa Nigeria. Akong nahimamat ang grupo sa tulo ka mga tig-interbyu: ang tigdumalang direktor, ang general manager, ug ang konsultant. Dali ra nakong natubag ang banos-banos nilang mga pagpangutana, apan ang konsultant, nga usa ka pastor sa usa ka lokal nga simbahan, mihatag og wala damha nga makapakurat nga pangutana: “Kristiyano ka ba, Muslim, o Traditionalist?” siya nangutana.

Nga nagpahiyum, mitubag ako, “Ako usa ka Kristiyano.”

“Unsa ang ngalan sa inyong simbahan?” siya mipadayon.

Giingnan nako siya, “Ang Simbahan ni Jesukristo sa mga Santos sa Ulahing mga Adlaw.”

“Unsa! Kana nga simbahan?” siya misiyagit. “Ayaw ko og ingna nga buot nimong ipasabut nagtambong ka niana nga simbahan, diin tanang mga kalihokan puno sa mga tinaguan?” Mitan-aw siya nako tumong sa akong mga mata, miingon siya, “Isulti nga kini dili tinuod.”

“Tinuod kini,” dali akong mitubag. Dayon midugang ako, “Ang among mga miting wala gipahigayon o napuno sa mga tinaguan. Tambungi ang among mga miting karong sunod Dominggo ug makita nimo sa imong kaugalingon.”

“Dili ako moanha sa ingon niana nga panagpundok,” siya mitubag. Nakabantay sa direksyon sa interbyu, ang tigdumalang direktor mitawag sa atensyon sa konsultant ug mipasalamat kanako sa pagtungha.

Paglabay sa tulo ka adlaw gihangyo ako sa pagbalik alang sa ikaduhang interbyu. Ang tigdumalang direktor, ang general manager, ug ang konsultant tanan didto. Human namo mahisguti ang kabahin sa pag-purchase ug ang pag-supply, ang konsultant nangutana, “Ikaw ba usa ka Mormon?”

“Oo,” mitubag ako.

“Mituo ka ba sa Basahon ni Mormon?”

Sigurado gayud! Mituo ako,” ako mitubag.

“Mituo ka ba nga si Joseph Smith nakahimamat sa Dios nga Amahan ug sa Iyang Anak, nga si Jesukristo, sa dihang usa siya ka batan-on nga nag-edad og 14?”

“Oo,” ako mitubag. “Nasayud ako nga kini tinuod.”

Sa katapusan sa interbyu, gisultihan ako nga daghan kaayong aplikante ang gipang-interbyu. Paglabay sa pipila ka semana, sa dako nakong kasurprisa, nakadawat ako og tawag gikan sa tigdumalang direktor. Miingon siya nga nagmalampuson ako sa duha ka interbyu, ug mihangyo siya kanako sa pag-adto aron mopirma sa sulat alang sa pagka-empleyado.

Sa paghinumdom sa mao nga kasinatian, mapasalamaton ako sa akong wala paglimod sa Simbahan o sa akong pagtuo. Ang Dios mitubag sa akong mga pag-ampo ug gipanalanginan ako og usa ka trabaho. Nasayud ako nga kon padayon kitang makanunayon, Siya moganti kanato og daghan gayud.