Ang Balaod sa Puasa

Ang Iyang balaod gipamatud-an og usab sa atong panahon, kay pinaagi sa moderno nga propeta … , Siya miingon, “Ako mohatag nganha kaninyo og usa ka sugo nga kamo mopadayon diha sa pag-ampo ug pagpuasa gikan niini nga higayon” [D&P 88:76]. Dayon sa pinakasunod nga bersikulo Iyang gisulti nga ang pagtudlo sa ebanghelyo ingon og maoy pinakauna nga produkto sa proseso sa pag-ampo ug sa pagpuasa. Diha sa mga pulong sa Ginoo:

“Ug ako mohatag nganha kaninyo og usa ka sugo nga kamo motudlo sa usag usa sa doktrina sa gingharian.

“Pagtudlo kamo nga makugihon ug ang akong grasya mouban kaninyo, aron kamo matudloan nga labaw sa hingpit diha sa teyoriya, diha sa baruganan, sa doktrina, diha sa balaod sa ebanghelyo, diha sa tanan nga mga butang mahitungod ngadto sa gingharian sa Dios, nga angay alang kaninyo sa pagsabut” (D&P 88:77–78).

Walay tawo ang makalaum nga makatudlo sa mga butang nga espirituhanon gawas kon siya gitudloan niana nga espiritu, kay “ang Espiritu ihatag nganha kaninyo pinaagi sa pag-ampo diha sa hugot nga pagtuo; ug kon kamo dili makadawat sa Espiritu kamo dili motudlo.

“Ug tanan niini kamo magsunod sa pagbuhat ingon nga Ako misugo mahitungod sa inyong pagpanudlo, hangtud ang kahingpitan sa akong kasulatan ihatag.

“Ug samtang kamo mopabati sa inyong mga tingog pinaagi sa Maghuhupay, kamo mamulong ug managna ingon nga maayo kanako;

“Kay, tan-awa ang Maghuhupay nasayud sa tanan nga mga butang, ug nagpamatuod sa Amahan ug sa Anak” (D&P 42:14–17).

O, ang matag magtutudlo unta makaangkon sa espiritu niini nga saad ug makapangangkon niining gitanyag nga pakig-uban, nga mahimong maangkon sa tanan kinsa manggilabut sa pagtudlo sa kamatuoran.

Walay laing mas maayo nga mga ehemplo sa pagtudlo pinaagi sa Espiritu kay sa anak nga mga lalaki ni Mosiah. Ang Basahon ni Mormon nagsulti kanato kon giunsa nga nagkaanam sila og “kalig-on diha sa kasayuran sa kamatuoran; kay sila mga tawo nga mabuot og salabutan ug sila misiksik sa mga kasulatan sa kakugi, nga sila unta masayud sa pulong sa Dios.

“Apan kini dili ang tanan; sila naghatag ngadto sa ilang kaugalingon ngadto sa tuman nga pag-ampo, ug pagpuasa; busa sila adunay espiritu sa pagpanagna, ug espiritu sa pagpadayag; ug kon sila nagtudlo, sila nagtudlo uban sa gahum ug pagtugot sa Dios.” (Alma 17:2–3).

Aduna bay usa ka priesthood o lider sa auxiliary bisan asa dinhi sa Simbahan kinsa dili mohatag sa tanan aron makaangkon sa ingon nga gahum, sa ingon nga kasiguroan? Hinumdumi kini, labaw sa tanan, nga, sumala pa ni Alma, sila naghatag ngadto sa ilang kaugalingon ngadto sa tuman nga pag-ampo, ug pagpuasa. Tan-awa, adunay mga piho nga mga panalangin nga matuman lamang kon mosunod kita sa usa ka partikular nga balaod. Ang Ginoo miklaro gayud niini pinaagi kang Propeta Joseph Smith dihang Siya mipahayag, “Alang sa tanan kinsa may panalangin sa akong mga kamot kinahanglan nga motuman sa balaod nga gitudlo alang niana nga panalangin, ug sa mga kinahanglanon niini, ingon nga gitukod sa wala pa ang katukuran sa kalibutan” (D&P 132:5).

Karon, ang Ginoo dili unta makapamulong og mas klaro sa mao nga kahimtang, ug, sa akong kaugalingong hunahuna, daghan kaayong mga ginikanan nga Santos sa Ulahing mga Adlaw karon ang mihikaw sa ilang mga kaugalingon ug sa ilang mga anak sa usa ka pinakatam-is nga espirituhanong mga kasinatian nga giandam sa Amahan alang kanila.

Agi og dugang sa panagsa nga kasinatan sa pagpuasa alang sa usa ka espesyal nga katuyoan, ang matag miyembro sa Simbahan gilauman nga dili mokaon sa duha ka [sunod-sunod] nga kan-anan atol sa Dominggo sa pagpuasa ug pagpamatuod. …

Ang kasaligan nga mga awtoridad sa medikal nag-ingon kanato nga ang atong lawas makabenipisyo pinaagi sa panagsa nga pagpuasa. Mao kana ang numero uno nga panalangin ug tingali ang minus og importansya. Ikaduha, atong ihatag ang kwarta nga wala nato magasto sa duha ka kan-anan isip halad sa puasa ngadto sa bishop alang sa mga kabus ug timawa. Ug ikatulo, moani kita og usa ka piho nga esprituhanong kaayohan nga moabut kanato sa walay laing pamaagi. Usa kini ka pagbalaan sa kalag alang kanato karon sama ra usab sa pipila ka mga pinili nga tawo kaniadto nga nagpuyo mga 2,000 ka tuig nang milabay. Basahon nako sa makadiyot gikan sa Basahon ni Mormon: “Bisan pa niana sila nagpuasa ug nag-ampo sa kanunay, ug nag-anam sa pagkalig-on ug pagkalig-on diha sa ilang pagpaubos, ug nagkalig-on ug nagkalig-on diha sa hugot nga pagtuo ni Kristo, ngadto sa pagpuno sa ilang mga kalag uban sa hingpit nga kalipay ug kahupayan, oo, ngadto sa paglimpyo ug pagbalaan sa ilang mga kasingkasing, diin nga pagbalaan moabut tungod sa ilang pagtugyan sa ilang mga kasingkasing ngadto sa Dios” (Helaman 3:35). Dili ba kamo gusto nga mahitabo kini kaninyo? Mahitabo kini, nahibalo kamo!

Inyo bang namatikdan kini nga nag-ingon nga kadtong si kinsa mohimo niini ang ilang mga kalag mapuno sa “hingpit nga kalipay ug kahupayan? Tan-awa, ang kalibutan sa kinatibuk-an nagtuo nga ang pagpuasa maoy usa ka panahon alang sa “pagsaput sa sako ug mga abo,” usa ka panahon nga makita nga nagmasulub-on, isip usa nga angay kaloy-an. Sa sukwahi niini, ang Ginoo mipahimangno:

“Ug sa magpuasa kamo, ayaw kamo pagpadayag nga masulub-on, ingon sa mga maut: kay sila magapadautdaut sa ilang mga nawong, aron lamang makita sa mga tawo nga sila nagpuasa. “Sa pagkatinuod magaingon Ako kaninyo, nga sila nakadawat na sa ilang balus.

“Apan kamo, kon magapuasa, kinahanglan manghiso kamo hinoon sa inyong ulo ug manghilam-os kamo sa inyong nawong;

“Aron ang inyong pagpuasa dili makita sa mga tawo, kondili sa inyong Amahan nga anaa sa tago; ug ang inyong Amahan nga nagatan-aw sa tago magabalus kaninyo” (Mateo 6:16–18).

Karon, moadto kita sa pinakaimportanting bahin niining importante nga balaod. Sa pagkakaron nahisgutan pa lang nato ang mga dapit nga mopanalangin kanato. Ang hingpit nga kalipay moabut kauban sa panalangin sa mga kabus ug timawa. Kay tungod sa katumanan niini nga talagsaong buhat nga sama kang Kristo diin atong gihimo ang “putli ug dili bulingon nga relihiyon” nga gipamulong ni Santiago [tan-awa sa Santiago 1:27]. Makahunahuna ba kamo og usa ka mas maayo o mas perpekto nga linihokan sa pagka-Kristiyano kay sa “putli ug dili bulingon nga relihiyon”? Ako dili.

Ang Ginoo, nga namulong pinaagi ni Moises, nakamatikod:

“Kong diha kanimo may tawong kabus usa sa imong mga igsoon sa sulod sa bisan unsa sa imong mga ganghaan diha sa imong yuta nga gihatag kanimo sa Ginoo nga imong Dios, dili mo pagapagahion ang imong kasingkasing, kon pagakumkumon ang imong kamot gikan sa imong igsoon nga kabus:

“Hinonoa pagabuklaron mo kaniya ang imong kamot ug magatabang ka kaniya” (Deuteronomio 15:7–8).

Dayon padayon Siya nga misaad kaniya kinsa mohatag: “Ang Ginoong Dios manalangin kanimo sa tanan mong buhat, ug sa tanan nga pagabutangan sa imong kamot” (Deuteronomio 15:10). Siya mitapos: “Tungod niana nagasugo ako kanimo, nga nagaingon: Pagabuklaron mo ang imong kamot sa imong igsoon, sa nagkinahanglan kanimo, ug sa imong kabus, diha sa imong yuta” (Deuteronomio 15:11). …

Oo, ang balaod sa puasa usa ka hingpit nga balaod, ug dili nato masugdan ang pagkahingpit hangtud nga mohukom kita sa paghimo niini nga usa ka bahin sa atong kinabuhi. Kon inyong sugdan ug putlon ang puasa anaa ra kana kaninyo, apan dili ba nindot nga humanon gayud kini ug kab-uton ang kinatas-ang pagkaespirituhanon alang sa miting sa puasa ug pagpamatuod?

Kon pila ang inyong ihatag sa bishop isip donasyon mag-agad ra kana kaninyo, apan dili ba kulbahinam nga masayran nga sa inyong pagsubay unya uban ang Ginoo kabubut-on mo ug husto ang pagbayad niini?

… Namatikdan ba ninyo kon unsa ka dako ang katagbawan niini ngadto sa kinahiladman sa matag higayon nga kamo motuman sa mga tinguha sa Langitnong Amahan? Walay makatupong sa kalinaw sa hunahuna nga kanunayng moabut isip ganti sa pagkamasulundon sa kamatuoran.

Ang kalibutan nanginahanglan og disiplina sa kaugalingon. Inyo kanang makaplagan diha sa pagpuasa ug sa pag-ampo. Ang atong henerasyon nagmasakiton tungod sa kakulang sa pagpugong sa kaugalingon. Ang puasa ug ang pag-ampo makatabang nga mapahinabo kini nga hiyas.

Ang kaugmaon sa kalibutan nag-agad sa dinalian nga pagbalik sa kahiusahan sa pamilya. Ang puasa ug ang pag-ampo makatabang sa paggarantiya niini. Ang matag tawo adunay mas dakong panginahanglan niini alang sa balaanong giya. Walay laing mas maayo pa nga paagi. Kitang tanan adunay panginahanglan sa pagbuntog sa mga gahum sa kaaway. Ang iyang impluwensya dili haum sa puasa ug sa pag-ampo. …

… mouyon ako sa pagpamatuod ni Alma nga tigulang sa dihang siya namahayag:

“Tan-awa, ako mopamatuod nganha kaninyo nga ako nasayud nga kini nga mga butang diin ako namulong mga tinuod. Ug giunsa ninyo sa pagdahum nga ako nasayud sa ilang kasiguroan?

“Tan-awa, ako moingon nganha kaninyo nga sila gihimo nga mabutyag ngari kanako pinaagi sa Balaang Espiritu sa Dios. “Tan-awa, ako nagpuasa ug nag-ampo sa daghan nga mga adlaw nga ako unta masayud niini nga mga butang sa akong kaugalingon. Ug karon ako nasayud sa akong kaugalingon nga kini mga tinuod; kay ang Ginoong Dios mihimo kanila nga makita ngari kanako pinaagi sa iyang Balaang Espiritu” (Alma 5: 45–46).