James E. Talmage (1862–1933)

Si James Edward Talmage nag-edad og 13 anyos sa dihang ang iyang pamilya mibalhin gikan sa ilang natawhang dapit nga mao ang England ug mipuyo sa Provo, Utah.

Intelihente ug uhaw sa kahibalo, si James usa ka part-time nga sakop sa mga magtutudlo sa Brigham Young Academy sa Provo, Utah, sa dihang siya 17 ang pangidaron. Siya nagpadayon sa pagtuon og chemistry ug geology sa Lehigh University sa Pennsylvania ug sa Johns Hopkins University sa Baltimore, Maryland. Ang pagkamiyembro sa daghang inila nga mga grupo kabahin sa siyensya naghatag kang James Talmage og dalan [access] ngadto sa importanting mga tawo ug mga publikasyon ug mitabang kaniya sa pagpakigbatok sa daghang mga pagpangdaut nga giatubang sa mga Santos sa Ulahing mga Adlaw niadtong panahona.

Pagka 1888 iyang giminyoan si Mary May Booth. Sila nahimong mga ginikanan sa walo ka mga anak. Gikan sa 1894 hangtud 1897 siya ang presidente sa University of Deseret [Unibersidad sa Deseret] sa Siyudad sa Salt Lake (karon ang University of Utah [Unibersidad sa Utah]). Niadtong higayona siya mipalit og usa ka sikat nga bag-ong de kadenang bisikleta ug kanunayng magsakay-sakay niini. Usa ka gabii siya miabut sa balay nga naulahi og usa ka oras para sa panihapon, samaran, dugoan, ug hugaw. Duol sa iyang balay adunay taytayan nga may usa lang ka tabla tabok sa kanal. Kasagaran, siya manaog sa bisikleta ug molabang nga maglakaw. Apan niining higayona siya mibati nga siya makalabang nga magsakay. Siya nagpadayon niini, kanunay nga mabangga, hangtud siya nahanas sa pagmaniobra.

Si Elder Talmage usa ka epektibong magtutudlo, ug ang pipila sa iyang mga pakigpulong ug mga leksyon nahimong basihan sa pipila ka mga libro diin siya naila, lakip na ang The Articles of Faith. Sa wala pa ang iyang tawag ngadto sa Korum sa Napulog Duha ka mga Apostoles niadtong 1911, ang Unang Kapangulohan mihangyo kaniya sa pagsulat og libro kabahin sa kinabuhi ug pangalagad sa Manluluwas. Sa wala madugay, usa ka lawak ang gilain sa Templo sa Salt Lake diin makapokus si Elder Talmage sa iyang pagsulat. Ang iyang 700-ka pahinang libro nga, Jesus the Christ, gimantala niadtong 1915 ug naimprinta kadaghan sukad niadto.