Usa ka Talagsaon nga Buhat sa Dios

Sento otsenta na ka tuig ang milabay, si Joseph Smith, Oliver Cowdery, ug ang pipila nagpundok aron sa pag-organisar sa Ang Simbahan ni Jesukristo sa mga Santos sa Ulahing mga Adlaw. Sumala sa asoy sa panghitabo kini usa ka yano apan espiritwal nga miting. Si Joseph mirekord nga pagkahuman sa sakrament, “ang Espiritu Santo gibubo ngari kanamo sa gamhanan kaayo nga matang—ang uban nanagna, samtang kami nagdayeg sa Ginoo, ug nagmaya sa hilabihan.”¹

Ang mga panghitabo niining adlawa wala himatikdi sa kalibutan; wala kini mabalita sa mantalaan o sa mga mensahero. Bisan pa, unsa kadako ang kamaya sa kalangitan ug sa paghimaya sa Dios—kay niana nga adlaw, ang Simbahan ni Jesukristo gibalik na sa yuta!

Gikan nianang adlawa hangtud karon, minilyon ka mga anak sa Langitnong Amahan nga puno sa hugot nga pagtuo minunot sa pag-aghat sa Espiritu Santo ug misulod ngadto sa sagrado nga mga tubig sa bunyag. Usa niana nga tawo mao si Solomon Chamberlain.

Si Solomon usa ka espirituhanon nga tawo ug migahin og daghang oras sa pag-ampo, nangita og kapasayloan sa iyang mga sala ug nangamuyo sa iyang Langitnong Amahan sa paggiya kaniya ngadto sa kamatuoran. Niadtong mga 1816, si Solomon gisaaran pinaagi sa usa ka panan-awon nga padayon siyang mabuhi aron makakita sa panahon diin maorganisar ang Simbahan ni Jesukristo human ang apostolikanhong pamaagi maestablisar og balik dinhi sa kalibutan.

Paglabay sa pipila ka tuig si Solomon nagbiyahe sakay sa barko padulong sa Canada dihang ang iyang gisakyan mihunong sa gamay nga lungsod sa Palmyra, New York. Didto iyang gibati ang gahum nga nag-aghat kaniya sa pagkanaog. Wala masayud nganong siya naabut didto, gisugdan niya ang pagpakigsulti sa mga tawo sa lungsod. Dili pa dugay nakabati siya sa gipanagsultihan mahitungod sa usa ka“bulawan nga Biblia.” Miingon siya nga kadtong duha ka pulong midala og “gahum nga daw elektrisidad [nga] misulod sugod sa akong ulo padulong sa kinatumyan sa akong mga tudlo sa tiil.”

Ang iyang mga pangutana migiya kaniya ngadto sa panimalay sa mga Smith, diin nakaistorya niya ang mga tawo nga nakatambong mahitungod sa maanindot nga mga balita sa gipahiuli nga ebanghelyo. Human sa paggahin og duha ka adlaw didto ug sa pagdawat og usa ka pagpamatuod sa kamatuoran, si Solomon mipadayon sa iyang panaw ngadto sa Canada, nagdala og 64 ka bag-ong giimprinta, nga wala pa matahi nga mga pahina sa Basahon ni Mormom. Bisan asa siya moadto, siya mitudlo sa mga tawo, “ngadto sa mga adunahan ug sa mga kabus, … aron sa pag-andam alang sa talagsaong bubat sa Dios nga nagsingabut na.”²

Sukad niadtong adlawa sa Abril 1830, minilyon ang nakadiskubre sa kamatuoran sa gipahiuli nga ebanghelyo ug misulod ngadto sa mga tubig sa bunyag. Akong ipamatuod nga kining “talagsaong buhat sa Dios” ania na karon sa yuta. Ako mohatag sa akong pagsaksi nga ang Ginoo nagbantay sa Iyang Simbahan ug nagdumala niini pinaagi sa Iyang propeta, nga si Presidente Thomas S. Monson. Dili ordinaryo nga panalangin ang pagpuyo niining ulahi nga mga adlaw. Mao kini ang mahimayaong kapanahunan, nga nakita sa karaang mga propeta ug inubanan sa mabinantayong, mga panon sa anghel. Ang Ginoo mahunahunaon sa Iyang Simbahan. Siya usab mahunahunaon niadtong kinsa, sama kang Solomon Chamberlain, misunod sa mga pag-aghat sa Espiritu Santo ug mitipon sa iyang mga kaigsoonan sa tibuok kalibutan sa pagtabang nga magpadayon kining talagsaong buhat sa Dios.