Nag-anunsyo ang Unang Kapangulohan og kausaban sa Kapangulohan sa Area sa Silangang Uropa, epektibo diha-diha dayon. Si Elder Kevin W. Pearson, Unang Magtatambag diha sa Kapangulohan sa Area, gibalhin ngadto sa mga punoang buhatan sa Simbahan alang sa usa ka linain nga buluhaton diha sa Departamento sa Misyonaryo. Mopadayon si Elder Wolfgang H. Paul isip Presidente sa area, uban ni Elder Gregory A. Schwitzer sa Seventy isip Unang Magtatambag ug Elder Alexsandr N. Manzhos, Area Seventy, isip Ikaduhang Magtatambag.

Sa Nobyembre 2009 ang Unang Kapangulohan mianunsyo nga ang Templo sa Philadelphia Pennsylvania ipahiluna sa 1739 Vine Street sa downtown sa Philadelphia. Ang luna kasikbit ngadto sa Vine Street Expressway ug kasilinganan nga Courts Building ug nahiluna nga nagbanday tabok sa dalan gikan sa Logan Square, usa ka bantugan nga timailhan sa Philadelphia. Gianunsyo ni Presidente Thomas S. Monson ang templo niadtong Oktubre 2008. Sa pagkakaron adunay 130 nga gigamit nga mga templo sa tibuok kalibutan, uban sa lain nga 21 nga gianunsyo o gitukod.

Ang open house sa Templo sa Vancouver British Columbia pagahimoon gikan sa Abril 9 ngadto sa Abril 24, 2010, walay labut ang mga Dominggo, ug usa ka kultural nga pagsaulog pagahimoon sa Mayo 1. Ang pagpahinungod mahitabo sa tulo ka sesyon sa Dominggo, Mayo 2, sa alas 9:00 sa buntag, alas 12:00 sa udto, ug sa alas 3:00 sa hapon. Ang tulo ka mga sesyon sa pagpahinungod isibya ngadto sa tanan nga mga unit sa Simbahan sulod sa distrito sa templo. Moabli ang templo alang sa mga ordinansa sa pagkasunod nga adlaw.