Tambag ngadto sa Batan-ong mga Babaye kabahin sa Pagpakig-date

Mahimo ninyong sugdan karon sa pagpalambo niadtong mga kinaiya nga makapahimo kaninyong madanihon ug makapaikag.

• Pahiyum! Oo, pahiyum ug pagmalipayon. Ug ang inyong pahiyum makatakud ug makatabang sa uban nga malingaw sa inyong panag-uban.

• Pagpakatakus sa espirituhanong paagi. Buhata kadtong mga butang nga makapaduol kaninyo ngadto sa Espiritu Santo aron Siya kanunay ninyong makauban.

• Pagpabaskog sa pisikal nga paagi. Atimana ang inyong lawas, pag-aktibo, ug batasana ang pagkaon og himsog nga mga pagkaon. Pagpakalimpyo sa inyong lawas.

• Palamboa ang inyong mga tinguha ug mga talento. Eskwela kutob sa inyong mahimo. Mahimo kamong mobasa og nindot nga mga libro, maminaw sa maayong mga musika, makahibalo sa mga panghitabo karon, o magkat-on og laing pinulongan.

• Paglihok sama sa usa ka anak nga babaye sa Dios. Ayaw pag-una-una, pagbinulgar, pag-agresibo, o pagmasugyuton. Mahimong makita ni ninyo nga mga lihok sa mga salida sa sine, apan kini dili angay sa usa ka batan-ong babaye kinsa nakasabut sa iyang pagkatawo isip usa ka anak sa Dios.

• Palamboa ang inyong sosyal nga mga kahanas. Pagmabination, pagmatinagdanon, ug pagmanggihunahunaon sa uban. Praktisa ang pagpakig-istorya sa uban. Pagkat-on sa saktong pamatasan. Kining tanan makatabang kaninyo nga mahimong matang sa tawo nga gustong makauban sa uban.

• Pagpakita nga interesado kamo sa mga tawo. Pagpakita og interes sa uban ug sa mga butang nga ilang gipangbuhat. Hatag og pangutana nga makatabang kanila mga mobati nga komportable ug motabang kaninyo nga mas makaila kanila.

• Paghimo og mga limitasyon. Ayaw tuguti ang uban sa pagpahimulos kaninyo. Ipabilin ang inyong kaligdong.

• Pagsunod sa mga sumbanan diha sa Alang sa Kalig-on sa mga Kabatan-onan. Ayaw og pagduha-duha sa pagpakigbahin niini ngadto sa inyong ka-date. Ayaw ipaubos ang inyong mga sumbanan ngadto kang bisan kinsa. Kon ang usa ka tawo magdahum nga inyo kining buhaton, siya dili angay sa inyong pagpakighigala ug pagpakig-uban.

• Tabangi ang uban nga mahimo silang labing maayo. Himoa silang mas maayo pinaagi sa pagpakig-date uban kaninyo. Bisan kon kamo walay daghang mga oportunidad sa pakig-date, mahimo kamong mopahiyum ug makighigala. Pilia nga mahimong malaumon. Bisan ang mga kasubo sa pagpakig-date makatabang kaninyo sa pagtubo. Ang matag tawo nga inyong mahimamat makapanindot sa inyong kinabuhi, ug kamo makapanalangin kanila samtang inyong ipakigbahin ngadto kanila ang labing maayo sa inyong kaugalingon.

Ang pagpakig-date usa ka kahigayunan aron maila-ila ang mga batan-ong lalaki sa pagpangandam sa kaminyoon. Pagmabinantayon niadtong inyong pilion nga ika-date. Kon kamo maghunahuna sa pagpanuroy uban sa usa ka batan-ong lalaki, siguradoha nga siya adunay taas nga mga sumbanan ug kanunay motabang kaninyo sa pagsunod sa ebanghelyo ni Jesukristo. Ania ang pipila ka mga pangutana nga mahimo ninyong ipangutana sa inyong kaugalingon:

• Siya ba adunay lig-on ug maayo nga kinaiya?

• Siya ba kasaligan ug masaligan?

• Siya ba matinuoron?

• Siya ba matinahuron ug mabination sa uban ug ngari kanako?

• Siya ba dili hakog?

• Siya ba morespeto sa akong mga ginikanan ug motahud sa iyang mga ginikanan?

• Siya ba motahud sa iyang priesthood?

• Siya ba modasig kanako sa pagbuhat sa akong labing maayo?

• Siya ba takus sa pagtambong sa templo?

Paglingaw ug himoang makalingaw ang mga date samtang inyong ila-ilahon ang uban. Pagplano og mga kalihokan nga mag-uban. Ang pipila sa labing makalingaw nga mga date mahimong sama ka yano sa pagluto og pagkaon. O paghunahuna og usa ka oportunidad sa pagserbisyo. Makaobserbar ug mas makaila kamo sa ubang tawo pinaagi sa pagbuhat og mga kalihokan kaysa maglingkod ug magtan-aw lang og salida sa sine.

Ang atong propeta miingon, “Sa pagpakig-date, respetohi ang inyong ka-date, ug paabuta nga ang inyong ka-date mopakita sa samang respeto diha kaninyo.”³ Kami nasayud nga kamo mahimong usa ka positibong impluwensya sa mga kinabuhi sa tanang mga batan-ong lalaki nga inyong ika-date—ug sa tanan ninyong mga higala kinsa nakakita sa inyong matarung nga ehemplo.

Samtang kamo mopadayon sa pagpalambo sa inyong mga gasa ug mga talento, pagmaalamon sa pagpili sa inyong pagpakighigala sa uban, ug mahimong usa ka matarung nga impluwensya, ang inyong mga tuig sa pagpakig-date mahimong usa ka positibo, mabungahon, ug makalingaw. Kini mao ang higayon sa pagpataas sa inyong mga panglantaw, pagpaabut sa labing maayo, ug mamahimo sa tanan nga buot sa Langitnong Amahan nga kamo mamahimo. Kamo mga anak nga babaye sa atong Langitnong Amahan; Siya nahigugma kaninyo, ug kami usab.