Sa dihang akong nabasa nga sugod sa Enero 2010 kita adunay bag-o nga Liahona ako naguol. Ang magasin nahimo nako nga angkla sa ebanghelyo sukad ako gibunyagan sa edad nga 17. Ang akong huyang nga pagpamatuod nalig-on samtang nagbasa ako sa mga kasinatian sa uban nga mga sakop ug nasayud nga ako wala mag-inusara. Gimahal nako ang mga magasin nga akong gikolekta, tungod kay kini naglangkob og dinasig nga mga mensahe nga nagtabang kanako sa mga panahon sa kasakit ug panginahanglan.

Karon kamo naghatag ngari kanamo og usa ka Liahona nga mas hingpit ug mas lain-lain, apan ingon ka tinuod sama sa una nga akong gibasa sa 1992. Salamat gikan sa mga kahiladman sa akong kasingkasing.

Ang Liahona usa ka dako kaayo nga panalangin ug kalipay ngari kanako. Kini nagtabang kanako nga makahimamat og mga miyembro sa tibuok kalibutan, pagkat-on mahitungod sa ilang nasud ug kultura, ug pag-angkon og kaayohan gikan sa ilang hugot nga pagtuo. Ang magasin usa ka tinubdan sa dako nga pagka-espirituhanon ug kalig-on, ug kini nagtabang kanako nga mahimong mas maayo.

Diha sa akong ward ang among visiting teaching kulang ug ang pagtambong sa templo diyutay. Isip ang lider sa visiting teaching ug usa ka temple worker, nag-ampo ako nga kini mausab. Gigamit nako ang pakigpulong sa komperensya ni Elder Richard G. Scott, “Pagsimba sa Templo: ang Tinubdan sa Kalig-on ug Gahum sa mga Panahon sa Panginahanglan” (Liahona, Mayo 2009, 43) sa pagpamulong diha sa miting sa sakrament ug sa Relief Society. Ang mga miyembro sa ward nangatandog. Ang visiting teaching karon hapit anaa sa 100 porsiyento, ug daghan ang nagtambong sa templo ug nagbansay sa mga lakang ng gilatid ni Elder Scott diha sa iyang mensahe. Liboan ka mga pasalamat ngadto ni Elder Scott alang sa iyang nindot nga mensahe ug kaninyo alang sa Liahona.