Sayo sa Dominggo sa Buntag

Sabado kadto sa gabii sa Waila Ward sa Nausori Fiji Stake. Ang mga responsibilidad sa maong adlaw natuman na, ug ang mga tighupot sa Aaronic Priesthood nangandam na alang sa Igpapahulay ug karon nagtapok na sa balay ni Brother ug Sister Maiwiriwiri. Kini usa ka oportunidad alang kanila nga adunay diyutayng pagkaon og sa dili pa magsugod sa ilang puasa—paga-sundan sa pagpangatulog diha sa mga banig sa balay sa mga Maiwiriwiri.

Ang kabuntagon sayong moabut alang niining batan-ong lalaki sa Aaronic Priesthood. Sa dili pa mosubang ang adlaw, sila mamangon dayon, mag-ilis sa ilang mga puti nga polo ug mga korbata ug ilang itom nga mga pantalon, ug inigka alas 6:00 sa buntag sila nakabiya na sa balay nila ni Brother ug Sister Maiwiriwiri nga magparis—sama gayud sa mga misyonaryo. Ang matag kompanyon adunay pihong rota nga agian aron makaabut sa simbahan mga alas 10:00 sa buntag, sa panahon nga magsugod ang miting sa priesthood. Ang ilang responsibilidad mao ang paghunong sa balay sa matag miyembro nga ilang maagian ug dapiton sila sa paghatag sa ilang mga halad sa puasa.

Kining batan-ong mga lalaki maglakaw og tulo ka milya (5 km) gikan sa balay sa mga Maiwiriwiri ug sa tibuok lugar nga nasakop sa utlanan sa ward. Kini mao ang oportunidad sa pagtuman sa ilang katungdanan ug sa pagdapit sa mga miyembro sa Simbahan nga moapil sa talagsaong buluhaton sa pag-atiman sa mga nabiyuda ug sa ilang mga kaigsoonan pinaagi sa paghatag og mga halad sa puasa. Si Presidente Alipate Tagidugu sa Nausori Fiji Stake mikomento nga isip resulta niining paningkamot sa Aaronic Priesthood, ang mga kontribusyon sa halad sa puasa misaka og 20 porsyento.

Sa sama kaimportante, kining batan-ong mga lalaki makaangkon og oportunidad sa pagtuman sa ilang buluhaton ug sa pagtabang sa mga miyembro sa ward sa paghupot sa ilang mga pakigsaad nga gihimo panahon sa bunyag:

“Ingon nga kamo mga matinguhaon sa pag-ipon ngadto sa panon sa Dios, ug pagatawgon nga iyang mga katawhan, ug andam sa pagtambayayong sa usag usa nga mga alantuson, nga sila mahimo nga magaan;

“Oo, ug mga andam sa pagbangutan uban niadto nga nagbangutan; oo, ug sa paghupay niadto nga nagkinahanglan sa kahupayan, ug mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit nga kamo mahimo nga maanaa, bisan hangtud sa kamatayon, nga kamo mahimo nga matubos sa Dios, ug malakip uban niadto nga diha sa unang pagkabanhaw, nga kamo makabaton og kinabuhi nga dayon” (Mosiah 18:8–9).

Alang niining talagsaong batan-on nga mga lalaki, ang pagpangolekta sa mga halad sa puasa dili usa ka palas-anon kon dili usa ka panalangin. Sila malipayong nagsul-ob sa ilang puti nga mga polo ug mga korbata, naghinam-hinam nga mobangon og sayo, ug andam kaayong manuktok sa mga pultahan sa mga miyembro sa oras sa sayong kabuntagon aron sa pagdapit kanila sa pag-ambit sa mga panalangin nga nagagikan sa paghatag og ubay-ubay nga halad sa puasa.

Samtang nag-tan-aw ako niining batan-ong mga lalaki nga nag-andam ug nagtuman sa ilang mga buluhaton isip mga tighupot sa priesthood, naghunahuna ako kon unsa ka dako nga panalangin kini ngadto kanila sa ilang tibuok kinabuhi sa pagsabut sa kaimportante sa ilang mga paningkamot sa pagdapit sa mga miyembro sa Simbahan nga mas maduol sa Manluluwas pinaagi sa paghatag og mga halad sa puasa. Sila mahimong mas maayong mga misyonaryo sa umaabut, ug sila mahimong mas maayong mga bana ug mga amahan sa umaabut isip resulta sa ilang mga paningkamot sa priesthood.

Sila mas makasabut niining kasulatan kabahin sa katawhan sa Ginoo: “Ug ang Ginoo mitawag sa Iyang mga katawhan og Zion, tungod kay sila usa sa kasingkasing ug usa sa hunahuna, ug nagpuyo diha sa pagkamatarung; ug walay kabus taliwala kanila” (Moises 7:18).