Usa ka Sinina nga Pangkasal ug usa ka Plano

Si Lori milingkod sa kama sa iyang magulang nga babaye samtang si Karyn nagtiwas og impake sa iyang temple bag. Si Karyn magminyo karong adlawa.

Si Lori naghinam-hinam sa pag-adto sa salo-salo sa kasal nianang gabhiona, apan siya mibati usab og kaguol. Ang iyang magulang nga lalaki, kinsa nakaalagad na og misyon, makasulod sa templo uban ni Karyn. Ang iyang mga ginikanan makasulod usab. Apan si Lori ug ang iyang duha ka manghud nga lalaki dili makasulod.

“Nanghinaut ko nga unta makasulod ko sa templo uban kanimo,” miingon si Lori.

Si Karyn mitan-aw kaniya samtang nag-impake. “Ganahan usab ko, apan ikaw anha lang sa gawas. Ug usa unya ka adlaw ako moadto sa templo uban kanimo kon ikaw maminyo.”

Si Lori wala na kaayo mobati og kaguol, apan siya naghunahuna kabahin sa lain nga butang. “Giunsa nimo pagkasayud nga imo nang gustong minyoan si Matt?” nangutana siya.

Si Karyn milingkod tupad ni Lori. “Sa dugay nang panahon nakat-unan nako nga ang Langitnong Amahan adunay plano alang kanako. Sa dihang nahimamat nako si Matt, akong nasabtan nga matuman namo kadtong plano nga mag-uban.

“Natuman na ba ninyo kadto nga plano?” nangutana si Lori.

Si Karyn milingo-lingo sa iyang ulo. “Si Matt ug ako gusto nga makabaton og mga anak, mohuman sa among pag-eskwela, ug daghan pa.”

Gitan-aw ni Lori ang nindot kaayong puting sinina nga pangkasal nga gisab-it sa pultahan sa kabinet ni Karyn. “Ang imong sinina hilabihan ka nindot,” siya miingon.

Mipahiyum si Karyn. “Kana lain usab nga bahin sa plano,” siya miingon. “Ganahan gyud ko nga maminyo sa templo, mao nga ang akong sinina kinahanglan nga tarung.”

Human sa pipila ka oras si Lori mitan-aw nila ni Karyn ug Matt nga nanggawas sa templo. Misanag ang ilang mga nawong.

Si Lori midagan padulong kang Karyn ug migakos kaniya.

Pipila ka mga semana ang milabay si Lori nakadawat og litrato diha sa huluganan og sulat. Litrato kini nila ni Karyn ug Matt nga nagbarug atubangan sa templo. Si Karyn misulat niini sa ibabaw, “Ang Langitnong Amahan adunay plano alang kanimo.”

Gibutang ni Lori ang litrato sa iyang butanganan og sinina. Siya misaad sa iyang kaugalingon nga sa umaabot siya moadto sa templo ug mosinati sa samang kalipay nga misanag sa nawong sa iyang igsoong babaye.