Pagkahimong usa ka Maayo Kaayo nga Tawo Karon

Ang usa ka dekalidad nga kinabuhi mao ang gusto kaayo sa Dios alang kanato. Ang kinabuhi pagahimuslan og maayo sa bisan unsang panghitabo nga maanaa kita. Walay panahon alang sa paglangay-langay. …

Kitang tanan kinahanglan nga magpuyo uban sa hustong mga prayoridad ug mga katuyoan. Ayaw og pagdali-dali sa paghatag og bili sa inyong kaugalingon. Hinoon, sukda ang inyong kaugalingon kon kamo ba mosunod o dili mosunod sa ebanghelyo ni Jesukristo.

Ako ganahan sa gipahayag kabahin sa paagi sa kinabuhi sa akong higala, si Carol Clark, … sa dihang siya miingon nga ang personal nga hagit dili mao ang magpaabut nga magmalampuson apan sa pagpuyo nga mabungahon, puno, ug may hingpit nga kalipay. Ang tumong mao ang dili magpaabut sa sakto nga tawo apan mamahimong sakto nga tawo.

“Ang tinuod nga kalipay sa kinabuhi anaa sa pagbuntog sa mga pagsulay samtang malipayon gihapon nga naglaum nga ang tanan mamaayo ra. … Moangkon gyud ko nga ang pagpuyo uban sa akong mga damgo nga wala matuman nagpamatuod nga makapahumok, makapaubos nga impluwensya tungod kay kini sakit kaayo. Apan anaa kanato ang lig-ong pundasyon, ug tungod niini, makalambo ako, bisan karon nga wala ako magmalampuson sa gugma—ang usa ka butang nga gusto kaayo nako sa kinabuhi kaysa bisan unsang butang gawas lamang sa pagkamatarung niini. …

“Sa miaging ting-init ako mireklamo sa usa ka higala nga dili–miyembro sa Simbahan nga ako gikapoy, wala malingaw, nagpuyo sama sa usa ka robot. Sa walay pagbati, siya mitubag, ‘Unsay hunahuna nimo niini? Usa ka dress rehearsal? Kini imong kinabuhi, Carol. Ayoha kini.’ Ako nagdahum og usa ka pik-pik ug mabinationg pulong. Hinoon, ako nakaamgo sa kamatuoran. Siya, siyempre, medyo sakto. Wala ako maghatag sa akong kinabuhi og bili, busa wala ako mobati nga kini adunay bili. Miuli ako sa balay, mibasa og balik sa mga sambingay sa magpupugas ug sa mga talanton, ug mibuhat og kausaban sa akong kinabuhi” (A Singular Life, ed. Carol L. Clark ug Blythe Darlyn Thatcher [1987], 35–36).

Mga kaigsoonan, pag-usab, kon kana mao ang gikinahanglan. Ayaw og paabut. Hinoon pun-a ang inyong kinabuhi uban sa serbisyo, edukasyon, paglambo sa personalidad, gugma alang sa tanan, ug uban pang makahuluganong mga kinaiya. Pagpuyo nga may katuyoan matag adlaw. …

… Ako mosugyot nga kamo moduol aron masayud kabahin sa inyong Langitnong Amahan. Higugmaa Siya. Hinumdumi kanunay nga Siya nahigugma kaninyo ug mogiya ug mosuporta kon kamo mohatag Kaniya og kahigayunan. Iapil Siya sa inyong paghimo og desisyon. Iapil Siya sa inyong mga kasakit ug mga kasubo. Iapil Siya kon kamo mamalandong sa inyong personal nga bili. “Kay tan-awa, kini nga kinabuhi mao ang panahon alang sa mga tawo sa pagpangandam sa pagsugat sa Dios; oo, tan-awa ang adlaw niini nga kinabuhi mao ang adlaw alang sa mga tawo sa paghimo sa ilang mga buluhaton” (Alma 34:32).

Samtang kamo naningkamot nga mahimong usa ka maayo kaayo nga tawo, pangamuyo matag adlaw uban sa inyong Langitnong Amahan kinsa nasayud kaninyo labaw sa tanan. Siya nasayud sa inyong mga talento, sa inyong mga kalig-on, ug sa inyong mga kahuyang. Anaa kamo dinhi sa yuta niining higayona aron sa pagpalambo ug paghas-has niining mga kinaiya. Mosaad ako kaninyo nga Siya motabang kaninyo. Siya kahibalo sa inyong mga panginahanglan.