Siya Modala diha Kaniya sa Ilang mga Sakit

Pipila ka tuig human ang akong asawa, si Gisèle, ug ako miuli gikan sa pagdumala sa Fiji Suva Mission, si Gisèle nahibaloan nga adunay kanser sa tiyan. Ang mapait nga kaagi sa ngadto-ngadto naglakip og tulo ka delikado nga mga pag-opera ug mga komplikasyon nga misangput sa pagtangtang sa kanser sa iyang tiyan. Kadto ang labing lisud nga panahon nga nagsud-ong sa pag-antus nga gisagubang sa akong asawa nga ako mas nakasabut sa Pag-ula ni Jesukristo.

Akong nahinumduman ang hingpit nga kasubo tungod sa nasinati ni Gisele. Unsa man ang iyang nahimo aron mag-antus og ingon niana? Wala ba niya serbisyohi ang Ginoo uban sa kamatinud-anon? Wala ba niya sunda ang Pulong sa Kaalam? Nganong wala man Niya pugngi kini nga sakit? Ngano?

Usa ka gabii gibubu nako ang akong kasingkasing ug akong mga pagbati sa pag-ampo samtang akong giasoy ngadto sa Ginoo ang tanan nakong mga kapakyasan. “Dili na nako maagwanta nga magsud-ong sa akong pinalanggang asawa nga nagsagubang sa ingon niana ka sakit!” Miingon ako Kaniya. Dayon nakahukom ako nga moabli sa mga kasulatan. Akong nakit-an kining makahupay nga mga bersikulo kabahin ni Jesukristo diha sa Alma 7:11–12:

“Ug siya magpadayon, mag-antus sa mga sakit ug mga kasakit ug mga pagtintal sa matag matang; ug kini aron ang pulong matuman nga nag-ingon nga siya modala diha kaniya sa mga sakit ug mga balatian sa iyang mga katawhan.

“Ug siya modala diha kaniya sa kamatayon, nga siya mahimo nga mohubad sa mga higot sa kamatayon diin naghigot sa iyang mga katawhan; ug siya modala diha kaniya sa ilang mga kahuyang, nga ang iyang kasingkasing mahimo nga mapuno uban sa kalooy, sumala sa unod, nga siya mahimo nga masayud sumala sa unod unsaon pagtabang ang iyang mga katawhan sumala sa ilang mga kahuyang.”

Hangtud nianang panahona wala nako mahunahuna ang tanan nga nalakip niadtong talagsaong Pag-ula sa Manluluwas. Wala gayud ako makasabut nga si Jesukristo ang modala diha Kaniya sa mga sakit ni Gisèle—o sa akong kasakit. Akong gibalhin ang akong kasakit ug kahadlok ngadto Kaniya kinsa modala “sa mga sakit ug mga balatian sa iyang mga katawhan.” Tungod niining bag-o nga panabut, akong gibati nga migaan ang bug-at nga palas-anon!

Karon, si Gisèle maayo na ang kahimtang, nga daw wala siya magkasakit og kanser. Sa iyang regular nga mga pagpahiling, ang iyang doktor misulti kaniya nga siya “usa ka milagro.” Mapasalamaton kaayo ko sa pisikal niya nga pagkaayo, apan mapasalamaton usab ako sa pagkaayo nga akong nasinati, usa ka pagkaayo sa kasingkasing. Ang kahupayan nga anaa lamang sa Manluluwas nakahatag kanako og malinawon nga kasiguroan nga ang tanan mamaayo ra.

Karon sa matag higayon nga mag-atubang ako og kalisdanan, ang akong mga hunahuna kanunayng mabalhin nianang gamhanan nga leksyon ug kon unsay gisulti sa Ginoo kang Propeta Joseph Smith: “Ang Anak sa Tawo mikunsad ubos kanilang tanan. Labaw pa ba ikaw kay kaniya?” (D&P 122:8). Ang paghinumdom sa sakripisyo ni Jesukristo sa walay pagkausab mihupay kanako.

Hangtud sa hangtud akong mapasalamaton sa kaandam sa atong Manluluwas sa paglatas Niya niadtong daw dili maantus nga mga kasakit. Mopamatuod ako sa Iyang gugma, sa Iyang kalooy, ug sa maamumahon Niyang pagbantay sa Iyang mga anak. Siya atong Manluluwas, ug Siya akong gihigugma.