Mga Pagtesting sa Pagsalig sa Kaugalingon Gikan sa Kahadlok ngadto sa Hugot nga Pagtuo sa Desisyon nga Magminyo

Dili ako sigurado sa tanang mga rason nga ingon niini ang mahitabo, apan dinhi, nagtuo ko, ang pipila niini mao ang:

• Kasayon sa paglingaw-lingaw kaysa sa pagpakig-date. Daghan sa mga batan-on ang “mosubay sa laing dalan” sa pagpangita sa tukma nga kompanyon pinaagi sa sobrang sosyal nga mga kalihokan. Tungod kay kini nga paglingaw-lingaw mahitabo sa nagkasagul-sagol nga mga grupo sa mga lalaki ug mga babaye, ang pipila sayop sa ilang pagtuo nga sila naghimo og sakto nga pamaagi sa pagpili og mahinungdanon kaayo aron sa pagpangita sa ilang mahangturon nga kompanyon. Apan dili kini mao. Ang sosyal nga kalihokan uban sa grupo makapugong sa usa ka tawo sa oportunidad sa pagsuta og maayo sa kinaiya ug sa personalidad niana nga espesyal nga tawo kon unsa kaimportante ang paghimo og usa ka maalamon nga pagpili.

• Kahadlok nga makahimo og sayop. Ang mga estatistika sa diborsyo naila kaayo. Ang ubang kabatan-onan nagpuyo inubanan sa mga kasakit nga makita nga pakyas ang kaminyoon sa ilang mga ginikanan o sa mga higala o sila mismo ang nadiborsyo. Ilang nasinati ang hilabihan nga trauma nga dala sa panagbulag. Usahay, ang epekto mao nga sila mahadlok na nga magminyo basin unya og masayop sila sa pagpili sa tawo.

• Mosibug sa responsibilidad sa pagkahamtong. Hinoon alang sa pipila, anaa ang pagduha-duha sa pagtipon og mga tinguha sa usa ka tawo ug sa mga interes sa uban. Ang ingon niana nga paghinakog adunay pamaagi sa pag-aghat sa pipila nga ipaulahi ang desisyon nga magminyo.

Bisan unsa pay rason aron mahadlok sa pagdesisyon nga magminyo, kini mogiya ngadto sa pipila ka sayop nga panghunahuna, ngadto sa “pagsalikway” sa pagsalig sa usa ka tawo. Kini, hinoon, maoy hinungdan sa kapakyasan sa usa ka tawo sa pagsabut sa iyang kaugalingong responsibilidad sa paghimo niana nga desisyon. Bisan og ang ingon nga pagkahadlok dili moresulta sa pagpaulahi o gani sa paglikay nga magminyo, makadugang kini og lain pang sayop. Sama pananglit, ang pipila kalagmitan motan-aw niini nga desisyon isip puro na lang espiritwal. Ang pagpakyas sa kaugalingon nilang obligasyon sa pagpangatarungan niini, maghulat kanila nga daw sama sa usa ka balaang tudlo nga mosulat sa tubag diha sa bong-bong o mobahin sa dagat o sa pipila ka katingalahang panghitabo nga mopahibalo kanila nga sa walay pagpangutana moingon nga mao “na kini.”

Ang uban mangita pa og laing tawo nga mohukom alang kanila. Usa ka stake president sa Brigham Young University miingon kanako nga komon alang sa pipila ka mga babaye ang mopalangan og dawat sa opinyon sa kasamtangan nga hinigugma sa pagsulti kaniya nga “siya mao na.” Ang uban mag-agad sa hukom sa usa ka ginikanan—kasagaran ang amahan—kinsa mihimo og mga desisyon alang kanila kaniadto. Sa bisan unsang kahimtang, adunay kapakyasan sa responsibilidad alang sa labing mahinungdanon nga pagpili nga buhaton sa usa ka tawo sa iyang kinabuhi.

Ang tambag gikan sa mga ginikanan, mga bishop, ug sa ubang takus nga mga tawo bililhon usab. Apan sa katapusan, walay bisan kinsa—o ang angay nga—mosulti kaninyo unsay buhaton. Ang desisyon kon si kinsa ang minyoan usa ka personal kaayo nga butang.

“Ayaw ninyo pagwad-a ang inyong pagsalig, kay kini aduna ra unyay dakong balus!” Hinumdumi nga mianhi kita niining kinabuhia nga gidesinyo nang daan, pagaingnon pa, nga mahigugma. Ayaw kini himoa nga mas lisud pa kay sa unsa kini! Hinumdumi unsay inyong nahibaloan, ug padayon uban sa pagsalig diha sa Langitnong Amahan ug sa dapit nga inyong natagamtam isip Iyang mga anak.

Ang pagpangulitawo usa ka panahon aron magkaila ang duha ka tawo. Panahon kini nga maila-ila ang usa ka tawo, sa iyang mga interes, mga kinaiya, ug mga panglantaw sa kinabuhi ug sa ebanghelyo. Usa kini ka panahon sa pagpaambit og mga ambisyon ug mga damgo, mga paglaum ug mga kahadlok. Usa kini ka panahon sa pagtesting sa pasalig sa usa ka tawo sa pagsunod sa ebanghelyo.

Si Elder David A. Bednar sa Korum sa Napulog Duha ka mga Apostoles naghisgot mahitungod sa usa ka returned missionary kinsa nakig-date sa usa ka espesyal nga babaye. Siya mipangga kaniya sa hilabihan ug matinud-anon gayud nga nagtanyag og kaminyoon kaniya. Kini nahitabo human si Presidente Gordon B. Hinckley (1910–2008) mitambag sa mga babaye sa pagsul-ob og usa lamang ka parisan nga ariyos. Kining batan-on nga lalaki mapailubong naghulat, miingon si Elder Bednar, aron tangtangon sa batan-ong babaye ang sobra nga parisan sa ariyos nga iyang gisul-ob. Apan wala kini mahitabo. Alang niini ug sa ubang mga rason, sa dakong kasubo nga pagbati, mihunong siya sa pagpakig-date kaniya.

Sa pag-asoy niini nga kasinatian, si Elder Bednar miingon: “Ako nagdahum nga ang pipila kaninyo … tingali magtuo nga ang batan-ong lalaki labihan ka mahukmanon o nagbasi sa usa ka importanteng mahangturon nga desisyon, bisan gani sa usa ka bahin, diha nianang gipakaingon og gamay ra nga butang usa ka hinanggaw o sobra ka panatiko. Tingali kamo nalibug tungod kay ang ehemplo nagpunting ngadto sa usa ka batan-ong babaye kinsa napakyas sa pagtuman sa usa ka propetikanhong tambag imbis diha sa batan-ong lalaki. [Apan tuguti akong mohisgot nga] ang isyu dili ang mga ariyos!”¹

Aniay lain nga tip. Isip usa ka bahin niini nga kasinatian sa pagpangulitawo, pag-amping nga dili ninyo mabasi ang inyong mga paghukom sa “pagtan-aw lang sa mga kalampusan kay sa pagsusi sa tanan sa usa ka tawo.” Pinaagi niana, buot nakong ipasabut nga ayaw lamang ibasi ang inyong mga desisyon kon ang usa nakaserbisyo ba og misyon o naghupot ba og usa ka calling sa inyong ward. Kini posibli nga, kinahanglan nga, ug sa kasagaran mga indikasyon sa debosyon, pagkamatinud-anon ug integridad. Apan dili sa kanunay. Kana ang hinungdan ngano nga kinahanglan kamong magkailhanay. Ilha ang usa ka tawo og maayo igo nga inyo mismong mailhan ang iyang kasingkasing ug kinaiya ug dili lamang sa iyang “résumé sa ebanghelyo.”

Usa ka ideya nga susama gayud niini mao kini: likayi ang pagkamahukmanon ngadto sa uban hangtud nga siya inyo na gayud nga mailhan. Ang dinali-dali nga mga negatibong paghukom posibling masayop ug makadaot sama sa usa ka dinali-dali nga positibong paghukom. Kinahanglan nga alerto kamo sa daw diyamante nga kinaiya nga dili dayon makita ingon man kamo kinahanglang magmatngon sa makita nga naggilak-gilak nga bulawan apan gamay ra diay og bili.

Human lamang sa paggamit sa kaugalingon ninyong paghukom ug sa maayong pagbati niana nga relasyon paglabay sa igo nga panahon kamo kinahanglan nga mag-ampo alang sa kumpirmasyon. Hinumdumi, nga sama sa tanan nga importanting desisyon, ang kaminyoon inyo nga pagpili. Ang Ginoo naglaum kaninyo sa paggamit sa inyong paghukom. Sama sa Iyang giingon ngadto kang Oliver Cowdery, “Tan-awa, ikaw wala makasabut; ikaw nagdahum nga Ako mohatag niini nganha kanimo, samtang ikaw wala maghunahuna gawas sa pagpangutana kanako” (D&P 9:7). Kon inyo nang nabuhat ang inyong bahin pinaagi sa usa ka tukma nga pagpangulitawo ug sa paghimo og tentatibo nga desisyon, pagbaton og pagsalig nga ang Langitnong Amahan motubag sa inyong mga pangamuyo.

Ang Ginoo naglaum nga inyong gamiton ang kaugalingon ninyong maayo nga pagbati. Naglaum Siya kaninyo nga mosalig sa kaugalingon ninyong natural nga mga pagbati sa lalaki ug babaye nga atraksyon nga nakatanom nang daan diha kaninyo sukad sa pagkatawo. Kon kamo may pagbati ngadto sa usa ka babaye o sa usa ka lalaki, nakatagamtam og igong panahon sa pagpakighigala—pagpangulitawo—kaniya, ug mibati og katagbawan sa kaugalingon nga siya miambit sa inyong mga mithi ug siya ang makahatag kaninyo sa pinakaimportante nga pakigrelasyon—dayon ipadangat sa Langitnong Amahan kana nga butang. Kon bation ninyo nga walay pagsupak sa hukom nga gipili sa kaugalingon ninyong pagbati tingali kana ang Iyang pamaagi sa pagpahibalo kaninyo nga Siya walay supak sa inyong pagpili.

Mga tuig na ang milabay karon sukad niadtong mahagiton nga panahon sa akong pagbansay isip Ranger. Daghan akong mga kasinatian nga miabut sa akong kinabuhi gumikan sa pagtesting sa akong pagsalig sa kaugalingon sa kapanahunan sa akong pagkasundalo. Apan ang ilang mga handumanan ug ang ilang mga leksyon nagpabilin. Makahimo kita sa paglahutay sa mga kalisdanan sa kinabuhi ug sa paghimo niini nga mas epektibo pa kay sa atong gihunahuna. Usa lamang kini ka butang nga kanunayng hinumduman kon unsay atong nahibaloan.

“Ayaw ninyo pagwad-a ang inyong pagsalig, kay kini aduna ra unyay dakong balus.” Batoni ang pagsalig sa unsay inyong nahibaloan! Dayon inyong maangkon ang kaugalingon ninyong pagtesting sa pagsalig sa kaugalingon uban ang kaisug ug grasya, ug ang Ginoo sigurado nga mogiya sa inyong mga agianan.