Ko ha Tukupā ʻa ha Palōfita

ʻI he faʻahitaʻu failau ʻo e 1848, naʻe mavahe ai ʻeku ongo kui tolú, ʻa Sālesi Sitīuati Mila mo Mele Makaueni Mila mei hona ʻapí ʻi Sikotilani ʻo fononga ki Seni Luisi ʻi Mīsuli, fakataha mo ha falukunga kakai ko ha Kāingalotu, ʻo nau tūʻuta mai ki ai ʻi he 1849.

Lolotonga ʻo e ʻi Seni Luisi ʻa e fāmilí ʻo ngāue ke maʻu ha paʻanga feʻunga ke fakakakato ʻaki ʻenau fononga ki he Teleʻa Sōlekí, kuo kapu ʻe he mahaki fakaʻauha ko e kōlelá ʻa e feituʻú. ʻI ha uike pē ʻe ua, kuo siʻi mālōlō ha toko fā ʻo e kau mēmipa ʻo e fāmilí. Ko e fānau ne kei moʻuí ne ohi kinautolu, ʻo kau ai ʻeku kui ua fefine ko Makalitá, ʻa ia naʻe taʻu 13 pē he taimi ko iá.

Naʻe hoko atu pē e ngāue ʻa e kiʻi fānau ʻe toko hiva ʻa e fāmili Milá ne kei moʻuí ke tānaki ha paʻanga ki he fononga ne ʻikai lava ʻe heʻenau ongomātuʻá mo e ngaahi tuongaʻané ke fakahokó. Naʻa nau mavahe mei Seni Luisi ʻi he faʻahitaʻu failau ʻo e 1850 mo ha pulu tangata ʻe fā pea mo ha saliote ʻe taha, ʻo fāifai pea nau tūʻuta ki he Teleʻa Sōlekí ʻi he taʻu tatau pē.

Naʻe ʻi ai mo ha niʻihi ʻo ʻeku ngaahi kuí ne nau fehangahangai mo ha ngaahi faingataʻa tatau. Ka neongo ia, ʻi he ngaahi meʻá ni kotoa, naʻe tuʻu taʻe ueʻia ʻenau ngaahi fakamoʻoní mo mālohi. Naʻá ku maʻu meiate kinautolu kotoa ha tukufakaholo ʻo e līʻoa kakato ki he ongoongolelei ʻo Sīsū Kalaisí.

ʻOku ou fakahā ʻaki hoku lotó kotoa mo e ivi kotoa ʻo hoku laumālié, ʻoku moʻui ʻa e ʻOtuá. Ko Sīsū ko Hono ʻAló, ko e ʻAlo pē taha Naʻe Fakatupu ʻo e Tamaí ʻi he kakanó. Ko Ia hotau Huhuʻí; ko Ia hotau Fakalaloa ki he Tamaí. ʻOkú Ne ʻofa ʻiate kitautolu ʻaki ha ʻofa he ʻikai ke lava ia ʻo mahino kakato kiate kitautolu, pea koeʻuhí ko ʻEne ʻofa ʻiate kitautolú, naʻá Ne foaki ai ʻEne moʻuí maʻatautolu. ʻOku ʻikai ke lava ʻo fakamatalaʻi ʻa ʻeku fakahoungaʻi Iá.

ʻOku ou fakatukupaaʻi ʻa ʻeku moʻuí mo hoku iví ke tauhi kiate Ia pea mo hono tataki ʻo e ngaahi ngāue ʻo e Siasí ʻo fakatatau mo Hono finangaló pea mo ʻEne tataki fakalaumālié.