Ko e ʻAlu ki he Temipalé

Talu mei he taimi ne mau papitaiso ai ʻi he 2001, mo e lahi haʻaku faʻa talanoa mo hoku husepānití ʻo fekauʻaki mo e ō ki he temipalé mo homa fāmilí ke silaʻi fakataha kimautolu ki ʻitāniti. Neongo ia, naʻe motuhia ʻemau palaní ʻi he taimi ne ʻilo ai ʻoku mahakiʻia hono ʻaté pea siʻi mālōlō ʻoku teʻeki ai ke mau ō.

Naʻá ku loto mamahi, ka naʻe fakaʻau ʻo mālohi ange ʻeku fakaʻamu ke silaʻi homau fāmilí ki ʻitānití ʻi he hili e mālōlō hoku husepānití. Neongo ia, ʻi heʻeku hoko ko ha faʻē uitou mo e fānau ʻe toko faá, naʻá ku ʻilo he ʻikai faingofua ke tānaki e paʻanga naʻe fie maʻu ke ʻave ʻaki hoku fāmilí mei Kemipoutia ki he Temipale Hongo Kongo Siainá—ʻoku meimei maile ʻe 1,000 (kilomita ʻe 1,600) hono mamaʻó.

Neongo ʻene siʻi ʻemau kiʻi paʻanga hū maí, ka naʻá ku ʻilo mo ʻeku fānaú ʻoku fie maʻu ke mau aʻu ki he temipalé koeʻuhí ke lava ʻo silaʻi kimautolu ko e fāmili ki ʻitāniti. Naʻe hokohoko atu pē ʻeku ngāue mālohí ʻo fai e fō ʻi ha hōtele kae fakahoko ʻe heʻeku fānaú ha ngaahi ngāue kehekehe. Naʻe kamata māmālie leva ke mau tātānaki ha kiʻi paʻanga ki heʻemau folaú, ka naʻe ʻikai fuoloa kuo mau fakatokangaʻi ʻoku ngalingali he ʻikai ke mau teitei lava ʻo tānaki ha paʻanga feʻunga.

Koeʻuhí ko ʻemau ʻiloʻi ʻoku mahuʻinga ange ʻa e fāmili taʻengatá ʻi ha toe faʻahinga meʻa te mau ala maʻu he māmaní, ne mau pehē leva ke fakatau ʻa e kiʻi meʻa mahuʻinga pē taha ne mau maʻú—ko e paiki siʻoku husepāniti kuo mālōloó. Hili ʻemau fakatau atu ia ki ha paʻanga lahi, ne fiefia homau lotó ke ʻilo ʻe vavé ni pē ha silaʻi kimautolu ki heʻemau tamai mo e husepāniti ʻofeiná.

Ka ne taimi nounou pē ʻemau fiefiá. Hili ha uike ʻe taha mei hono fakatau atu ʻo e paikí, kuo mau foki mai mei he lotú ʻo ʻiloʻi ne fakahoko ha kaihaʻa ʻi homau ʻapí. Ne mau loto mamahi lahi he taimi ne mau ʻilo ai kuo mole ʻa e paʻanga mei hono fakatau ʻo e paikí. Ne ʻosi ha ngaahi māhina hili e kaihaʻá, mo e kei hokohoko atu pē ʻemau lotu ke mau maʻu ha founga ke ō ai ki he temipalé.

Hili ha ngaahi māhina ʻo ʻemau lotú, ne tali mai ia ʻi hano fakahā mai te mau lava ʻo maʻu ha tokoni mei he Paʻanga Tokoni Fakalūkufua ʻa e Siasí ki he Kau Pataloni ʻo e Temipalé (Churchʻs General Temple Patron Assistance Fund).* Naʻá ku fuʻu fiefia ʻaupito mo ʻeku fānaú ʻi he ongoongó pea ʻikai fuoloa kuo mau fakahoko e folau ki he temipalé ne mau ʻamanaki ki aí.

Mālō mo e ʻofa ʻa e Kāingalotu kehe ʻo e Ngaahi ʻAho Kimui Ní, kuo mau hoko ai he taimí ni ko ha fāmili taʻengata.