Ko e hā ʻoku fai ai ʻe he Siasí ʻa e faʻahinga fakamamafa pehē ki he ngāue tokoní? Ko e hā ʻoku ʻikai lava ai ke tau fiefia peé?

ʻOku fakamamafaʻi lahi ʻe he ongoongolelei ʻo Sīsū Kalaisí ʻa e tokoniʻi hotau kāingá. ʻOku ʻikai feʻunga ke fakaʻofaʻia pē ʻi ha taha ʻoku faingataʻaʻiá—ko hotau fatongiá ke tokoni. “Ka ke fai ʻe kimoutolu ki he folofolá, pea ʻoua naʻa ngata ʻi he fanongó” (Sēmisi 1:22).

Naʻe akoʻi ʻe he Fakamoʻuí, “Ko e meʻa ʻi hoʻomou fai ia ki ha taha ʻoku kihiʻi siʻi hifo ʻi hoku kāinga ní, ko hoʻomou fai ia kiate aú” (Mātiu 25:40), pea naʻe akoʻi ʻe he Tuʻi ko Penisimaní “ ʻo ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá” (Mōsaia 2:17). ʻOku fakahaaʻi ʻe heʻetau tokoniʻi ʻa e kakai kehé ʻa ʻetau līʻoa ki he ʻEikí pea mo e lelei ʻo ʻEne fānaú.

ʻOku ʻikai tokoniʻi ʻataʻatā pē kitautolu ʻe he ngāue tokoní. Te ne toe lava foki ʻo tataki ke tau tupulaki fakalaumālie. Ko e taimi ʻoku tau ngāue ai ʻi ha ngaahi fatongia mo fakahoko ha ngaahi ngāue tokoni kehé, ʻoku ʻikai ngata pē ʻi heʻetau fakamālohia ʻa e kakai kehé ka ʻoku tau toe hoko ai ko ha kakai lelei ange.¹

Ko e meʻa ʻoku mahulu haké, ko e lava ko ia ke fakafiefia ange ʻa e ngāue tokoní ʻo kapau te ke fakahoko ia ʻi he loto hangamālie. Fakakaukau ki ho ngaahi talēnití mo ho ngaahi pōtoʻi ngāué pea mo ha founga te ke lava ai ʻo fakaʻaongaʻi ke tokoniʻi ʻa e niʻihi kehé. Ko e ngāue tokoni fakafoʻituituí ʻoku fakanonga, pea te ke toe lava foki ai ke fiefia ʻi he ngāue mo e ngaahi kaungāmeʻá! Fakatahatahaʻi ha falukunga kakai, pea mou fevahevaheʻaki ha ngaahi founga te mou lava ai ke tokoni ʻi ha founga foʻou mo fakatupulakí. Te ke fakatumutumu ʻi he lahi ʻo e meʻa ʻe lavaʻi ʻe he ngāue tokoní.