Ako e Kau Palesitenisī ʻo e Lautohi Faka-Sāpaté ki ha Fatongia Mahuʻinga

ʻI he ʻaho Sāpate kotoa pē ʻi he Uooti Haileni ʻIutā 30, ʻoku fakahoko ʻe Lisiate Kalisitianiseni mo hono ongo tokoní ha ngāue ʻoku maheni ki ai ʻa e ʻiuniti kotoa pē ʻo e Siasí. ʻOku nau fakapapauʻi ʻoku ʻi ai ha faiako ʻi he kalasi takitaha mo tokoniʻi ʻa e fānau akó ke nau ʻalu mei he holó ki he loki akó.

Kae kehe, kuo maʻu ʻe Misa Kalisitianiseni ʻa e vīsone ʻoku ʻikai fakangatangata hono ngaahi fatongiá ki hono tānaki ʻo e fānau akó mo hono tā ʻo e fafangú.

Ko e taha ʻo e ngaahi fatongia mahuʻinga ʻo e kōlomu mo e houalotu takitaha ko hono akoʻi ki he kāingalotú ʻa e ngaahi tefitoʻi moʻoni ʻo e ongoongoleleí ʻa ia ʻoku mahuʻinga ki honau fakamoʻuí. Ko e fatongia ʻo ha kau palesitenisī ʻo e Lautohi Faka-Sāpaté, ʻo hangē ko Misa Kalisitianiseni mo hono ongo tokoní, ko hono tokoniʻi e kau taki ʻi he houatolú mo e lakanga fakataulaʻeikí ʻaki ʻenau hoko ko ha kau mataotao fakafaiako ʻi he uōtí.

Naʻe pehē ʻe Lāsolo T. ʻOsikātoa, ko e palesiteni lahi ʻo e Lautohi Faka-Sāpaté, “Ko e faiakó ko e tefitoʻi founga ia ʻa e Siasí ki hono fakamālohia ʻa e kāingalotú, tokoniʻi kinautolu ke toe loloto ange ʻenau fakamoʻoni ki he ongoongolelei kuo toe Fakafoki maí, mo maʻu ʻa e fakamoʻuí mo e hākeakiʻí.”

ʻI heʻene hoko ko e palesiteni Lautohi Faka-Sāpate ʻo e uōtí, ko e fatongia ia ʻo Misa Kalisitianiseni ke hoko ko e maʻuʻanga tokoni maʻá e mātuʻá, kau takí, mo e kau faiakó ke fakaleleiʻi e feakoʻaki ʻoku hoko ʻi ʻapi mo e Siasí.

Naʻe pehē ʻe Misa Kalisitianiseni, “Ko e meʻa ʻoku mahuʻingá ko e faiakó, pea ʻoku hoko ʻa e faiako ola leleí ke ne tokoniʻi ʻa e niʻihi kehé ke nau fie ako.”

Ko e taha ʻo e ngaahi meʻa ʻe lava ke ngāue ʻaki ʻe he kau palesitenisī ʻo e Lautohi Faka-Sāpaté ko e lēsoni fakalakalaka fakafaiakó, ʻa ia ʻe lava ke fakahoko lolotonga ʻa e Lautohi Faka-Sāpaté. ʻOku ʻi ai ha ngaahi lēsoni ʻe 12 ʻi he tohi lēsoni ʻOku ʻIkai Ha Ui ʻe Mahuʻinga Ange ʻi he Faiakó pea ʻe lava ke faiako ai ha taha ʻo e kau palesitenisī ʻo e Lautohi Faka-Sāpaté ʻi he malumalu ʻo e pīsopé.

Naʻe pehē ʻe Misa ʻOsikātoa, “ ʻE lava ke tokoni ʻa e lēsoni ko ʻení ki ha taha pē ʻi he kāingalotú ʻoku fie fakalakalaka ʻene founga fakafaiakó” ʻi he ʻapí pe ko e loki akó. “ ʻOku tokoniʻi ʻe he ngaahi lēsoní ʻa e kau akó ke nau lava ʻo faiako ʻaki ʻa e Laumālié, founga ki hono fakaafea e faʻa akó mo e ako fakamātoató, pea mo e founga ke faiako ʻakí koeʻuhí ke vēkeveke ʻa e kāingalotú ke fakaʻaongaʻi ʻa e ngaahi tefitoʻi moʻoni ʻo e ongoongoleleí ʻi heʻenau moʻuí.”

Fakatatau kia Misa ʻOsikātoa, ʻoku kau ʻa e palesiteni Lautohi Faka-Sāpaté ʻi he fakataha alēlea ʻo e uōtí, ʻo hangē ʻoku hā ʻi he Tohi Tuʻutuʻuni ʻo e Siasí, Tohi Fika 2, koeʻuhí ke nau lava ʻo ʻiloʻi ʻa e ngaahi taumuʻa ʻa e pīsopé ki he kāingalotu ʻi he uōtí pea ke lava ʻo fealēleaʻaki ʻi he founga ʻe lava ai ke fakalakalaka ʻa e founga fakafaiakó koeʻuhí ke lava ʻo aʻusia ʻa e ngaahi taumuʻa ko iá.

Lolotonga ʻa e fealēleaʻaki faka-uōtí pe faka-koló ʻe lava ke fakaafeʻi ʻe he pīsopé pe palesiteni faka-koló ʻa e palesiteni ʻo e Lautohi Faka-Sāpaté ke fai ha ako ʻi he ngaahi tefitoʻi moʻoni fekauʻaki mo hono akoʻi mo ako e ongoongoleleí. ʻOku fokotuʻu ʻe Misa ʻOsikātoa te ne toe lava pē ʻo līpooti ki he maʻu kalasi ʻa e toʻu tupú mo e kakai lalahí ʻi he Lautohi Faka-Sāpaté mo fakaafeʻi ʻa e kau taki faka-uooti kehé ke nau tokoniʻi kinautolu ʻoku faingataʻaʻiá.

Naʻe pehē ʻe Misa ʻOsikātoa, “ ʻOku hoko ʻa e ako mahuʻinga taha ʻi he Siasí ʻi he ngaahi ʻapi ʻo e mātuʻa faivelenga ʻoku nau moʻui ʻaki ʻa e ngaahi tefitoʻi moʻoni ʻo e ongoongoleleí pea akoʻi ia ki heʻenau fānaú. ʻOku tokoniʻi ʻe he ngaahi houalotú ʻa e ʻapí ʻi he ngaahi fatongia toputapu moʻoni ko ʻení. Ko e kau palesitenisī ʻo e Lautohi Faka-Sāpaté ko ha maʻuʻanga tokoni ia ʻi he uōtí ke tokoniʻi ʻa e mātuʻá mo e kau faiakó ke nau fakahoko honau ngaahi fatongiá.”

Naʻá ne pehē, ʻe lava ke hanga ʻe hono akoʻi lelei ʻo e ongoongoleleí ʻe he mātuʻá mo e kau taki ʻo e Siasí ʻo fakamālohia e fakamoʻoni ʻa e kāingalotú mo tokoniʻi kinautolu ke haʻu kia Kalaisi.

“Ko e founga lelei taha pē ke fua ʻaki e ʻaonga ʻo hono akoʻi ʻo e ongoongoleleí [ʻi ha uooti] ko hono vakaiʻi e faivelenga ʻa e kāingalotú. Kapau ʻoku tokolahi ange ʻa e kau talavou ʻoku ngāue fakafaifekaú, kapau ʻoku tokolahi ange ʻa e toʻu tupu ʻoku [lahi hake ʻo] mali ʻi he temipalé, kapau ʻoku tokolahi ange ʻa e mātuʻa ʻoku faʻa lau ʻa e folofolá, fakahoko ʻa e efiafi fakafāmili ʻi ʻapí, mo hū maʻu pē ʻi he temipalé, ʻoku fakalakalaka leva ʻa e akoʻí.”