Ko e Hā Naʻe ʻOmi ʻe he Kau Paioniá?

Koeʻuhí ke mahino ʻa e kau paioniá mo ʻenau ngaahi lavameʻá, kuo pau ai ke tau vakaiʻi ʻenau ngaahi taumuʻá … Naʻa nau omí ke maʻu ha tauʻatāina mo ha nonga, ʻo hangē ko ia ne fai ʻe he niʻihi kehé. Ne nau omi ke langa hanau ngaahi ʻapi moʻonautolu, ʻo hangē ko ia ne fai ʻe he niʻihi kehé. Naʻa nau omi ke hū ki he ʻOtuá mo fakahoko ʻenau lotú ʻo fakatatau mo honau konisēnisí, ʻo hangē ko ia ne fai ʻe he niʻihi kehé; ka ko ha toe meʻa ʻeni ʻe taha naʻa nau omi aí, fakatatau mo ʻeku ʻiló, ʻoku ʻikai hano tatau ʻi ha toe faʻahinga fononga paionia pehē: naʻa nau omi mo ha taumuʻa pau ke fokotuʻu ha sōsaieti ke nau lava ai ʻo toe fakafoki mai ʻa e sivilaise ne nau hola mei aí, ʻio, naʻa mo honau kau fakatangá, ʻa e ngaahi tefitoʻi moʻoni ʻo e moʻuí mo e ʻulungāanga naʻe hoko ko honau maʻuʻanga tataki fakalaumālié, ʻa e uouangatahá, lavameʻá, pea mo e fiefiá. …

Ko e hā leva ʻa e meʻa naʻe ʻomi ʻe he kau paioniá? Naʻa nau ʻomi ʻa e nimameaʻá ʻi ha tuʻunga kuo hāhāmolofia ke toe fakatataua. Naʻa nau akoʻi mo moʻui ʻaki ʻa e ongoongolelei ʻo e ngāué ko ha fakavaʻe ia ki he ikuná mo e fiefiá. …

Naʻa nau ʻomi ʻa e akó mo e manako ʻi he ngaahi meʻa fakaʻātí mo e fakaʻofoʻofá. …

Naʻa nau ʻomi mo kinautolu ha tuʻunga moʻui māʻolunga ange pea mo ha ivi lahi ange ke līʻoa moʻoni ki he ngāue naʻa nau fakahokó. …

Kuó u aʻu mai ʻeni ki he meʻa maʻongoʻonga taha ʻi he meʻa kotoa pē naʻe ʻomi ʻe he kau paioniá mo kinautolú, pea te u lau ia ko e poto, poto fekauʻaki mo e ngaahi meʻa mahuʻinga ʻi he moʻuí. …

ʻUluakí, fakakaukau ki he sino ʻo e tangatá. … Naʻe ʻomi ʻe he kau paioniá ha fakakaukau foʻou ki he sinó ʻo ne ʻoange ki ai ha mahuʻinga toputapu. Naʻa nau akoʻi ko e sinó ko ha tāpanekale fakamāmani ia ʻoku faʻo ai ʻa e laumālie ʻo e tangatá, ko e fānau moʻoni ʻa e ʻOtuá, pea he ʻikai ke lava ke fakakoviʻi pe ʻuliʻi pe ngaohikoviʻi ‘a e sinó ʻaki hano ʻai ki ai ha ngaahi meʻa kona pe meʻa fakatuʻutāmaki ʻo taʻe fakatupu houhau ai ki he ʻOtuá, he ʻoku ʻafio ʻi loto ai ʻa Hono Laumālié. … Naʻa nau ʻomi mo kinautolu ha fono ko e ngaahi lao ki he moʻui leleí. …

Uá—ko e ʻulungāanga pe tōʻongá. … Naʻe ʻikai ngata pē ʻi hono akoʻi ʻe he [kau paioniá] ko e tangatá ko e fānau ia ʻa e ʻOtuá, ko e hako fakaʻeiʻeiki tahá ia, ka ʻoku toe fakataumuʻa pē foki, ʻo kapau ʻe moʻui taau mo ia, ke fengāueʻaki mo ʻEne Tamai Hēvaní ʻi hono fakahoko ʻEne ngaahi ngāue taʻengatá ʻi he kuonga kotoa ka hoko maí. …

Hokó—ko e fāmilí. … Ko e hā ʻa e poto ne ʻomi ʻe he kau paioniá fekauʻaki mo e fāmilí? He ko e hā, ne nau ʻai ki ai ʻa e tuʻunga fakaʻeiʻeiki mo hākeakiʻi taha kuo hoko ki ai ʻi he hisitōlia kotoa ʻo e māmaní. Naʻa nau akoʻi ʻoku ʻikai ngata pē ʻi heʻene hoko ko e tefitoʻi ʻiuniti ʻo e moʻui fiefia ʻi he māmani ko ʻení ka ʻoku kau ki ai ʻa e fakavaʻe ʻo ʻetau ʻamanaki leleí mo e hakeakiʻí ʻi he puleʻanga fakasilesitiale ʻo hotau ʻOtuá. ʻIo, ko e moʻoni ko e hēvani ʻoku tau fekumi ki aí ko hono fakafōtunga pē ia ʻo hotau ʻapi ʻi ʻitānití. Hono ʻikai kehekehe mo lahi ʻa e ngaahi kovi fakamamahi ʻoku hoko ʻi he moʻui fakaʻapí mo e fāmilí he ʻaho ní—ʻa e vete malí, maumau ʻo e ngaahi fāmilí, liʻekiná, ʻa e lahi ange e fakaʻofa ʻa e fānau ʻoku liʻekiná ʻi hono ngaohikoviá koeʻuhí ko e movete ʻa e moʻui fakafāmilí. … ʻOiauē, kapau pē ā ʻe lava ʻo ʻaonga ʻa e poto ne ʻomi ʻe he siʻi kau paionia masivá ni ki he ngaahi fāmili ʻo e māmaní, hono ʻikai ke lahi ange hono ʻaonga ki hono fakafiemālié mo e fiefiá pea mo e fakalakalaka ʻa e faʻahinga ʻo e tangatá.

Fakaʻosí, … ko e ongoʻi fakatokouá. Naʻa nau akoʻi ʻi ha founga mahino, ʻa e foʻi fakakaukau ʻo e kau ʻa e ngaahi puleʻangá, faʻahinga, lea, pea mo e kakai kotoa pē ki he fāmili ʻo e ʻOtuá. … Naʻa nau tui … ko e ʻutaʻanga moʻoni pē taha ki ha melino fakalūkufua he māmaní ko hano ʻoatu ʻo e tokāteline ʻo e ongoʻi fakatokouá ki he funga ʻo e māmaní. …

… Ko e ngaahi tokoni fakapotopoto ko ʻeni ʻoku ou lau ki aí pea mo ha toe ngaahi meʻa lahi ange, ko e ngaahi tefitoʻi moʻoni ia ʻo e ongoongolelei ʻa e ʻEiki ko Sīsū Kalaisí ʻa ia naʻe toe fakafoki mai ʻi he Palōfita ko Siosefa Sāmitá. … Naʻe tuʻunga ʻi he tui taʻe-toe veiveiua ʻa e kau paioniá ki he pōpoaki mahino ʻo e moʻuí mo e moʻoní, ne nau fokotuʻu ai ʻa e fale ʻo e ʻEikí ʻi he “tumuʻaki ʻo e ngaahi moʻungá” [ʻĪsaia 2:2]. Ko ha meʻa maʻongoʻonga ke fokotuʻu ha kominiueli mo liliu ʻa e toafá ko ha ngaahi kolo lalahi (cities), fanga kiʻi tukui kolo (towns), pea mo ha fanga kiʻi kolo iiki (villages), pea ki he ngaahi ʻapí, ngaahi ʻapiakó, mo e ngaahi fale ko ia ʻoku tau maʻu he ʻaho ní. Ko ha lavameʻa lahi ange hono fokotuʻu ʻo e puleʻanga ʻo e ʻOtuá pea mo hono ʻoatu mei Saioné ʻa e pōpoaki ʻaonga ʻo e ʻamanaki leleí mo e tuí pea mo e poto taʻengata mo fakalangí ki he faʻahinga kotoa ʻo e tangatá. Ko e tukufakaholo moʻoni ʻeni naʻe ʻomai ʻe hotau kau paioniá mo tuku mai maʻatautolu mo hotau ngaahi kaungāmeʻá. … Ko e meʻaʻofa mahuʻinga taha ia ʻi he moʻuí. ʻOfa ke tokoni mai ʻa e ʻOtuá ke tau fakamahuʻingaʻi, moʻui ʻaki, pea mo fakamafola ia.