Tangata Foʻou

Naʻá ku ongoʻi faingataʻaʻia ʻi heʻeku ongoʻi ʻoku ʻikai tali aú. Ne toki hiki mai pē hoku fāmilí mei he tafaʻaki ʻe taha ʻo e fonuá. Ko e uooti ne mau hiki atu ki aí naʻe tokolahi ʻaupito hono toʻu tupú, ka ko e fuofua taimi ʻeni ke u hoko ai ko ha “taha foʻou.” Ko e kovi tahá he naʻe pau ke u ʻalu ki ha ʻapiako foʻou, pea naʻe haʻu he taimi pē ko iá ʻa e fakakaukau ko ʻení kiate au, “Ko hai te u nofo fakataha mo ia ʻi he taimi maʻu-meʻatokoni hoʻataá?” Mahalo pē te u feʻiloaki ai mo ha taha mei he lotú, ka naʻe ʻikai foki ke u fie kaunoa atu ki ha tēpile maʻu-meʻatokoni hoʻatā ʻa ha taha, ʻo tautautefito he naʻe ʻikai ke u ʻiloʻi pe te nau fie tali au!

Naʻe hangē pē he ʻikai toe ʻosí ʻa e ʻuluaki ʻaho he akó. Faifai pea tā ʻa e fafangu ki he maʻu-meʻatokoni hoʻataá. Ko e taimi ne u hū māmālie atu ai ki he loki kaí, naʻá ku lotu ki he Tamai Hēvaní ke tokoni mai muʻa ke u ʻiloʻi ha taha ʻokú ma maheni. Naʻá ku siosio holo pe ʻoku ou ʻiloʻi ai ha taha. Hala ʻatā. Ko ia, ne u ʻalu leva ki he tēpile ʻi he tafaʻaki ʻe taha ʻo e loki kaí ʻo maʻu ai ʻeku meʻatokoni hoʻataá.

ʻI he konga kimui ʻo e ʻaho ko iá he lolotonga ʻo e kalasi fiká, ne u fakatokangaʻi ha fofonga ʻoku ou maheni mo ia. Ne u ʻosi fakatokangaʻi ʻa Tēvita ʻi he kalasi semineli he pongipongi ko iá. Naʻá ne kole mai ke sio ʻi heʻeku taimi tēpilé ʻo ne ʻiloʻi ai ʻokú ma kai-hoʻatā ʻi he taimi tatau. Naʻá ne pehē mai leva, “ ʻEi, naʻá ke ʻi fē he kai hoʻataá he ʻahó ni?”

Ne u tali ange, “Naʻá ku kai au he tuliki ʻe taha ʻo e lokí.”

Naʻá ne pehē mai, “Sai, haʻu ke ta tangutu fakataha he kai hoʻataá ʻapongipongi.”

ʻOku ou fakafetaʻi koeʻuhí ko ha Tamai Hēvani ʻofa, ʻokú Ne ʻafioʻi ʻetau ngaahi fie maʻú mo Ne tali ʻetau ngaahi lotú taki taha. ʻOku ou toe fakamālō foki ki ha taha naʻe fie anga fakakaumeʻa. ʻE lava ʻe ha kiʻi meʻa faingofua hangē ko ha fakaafe ʻo fakaleleiʻi ʻa e meʻa kotoa pē.