Naʻá Ne Talamai Kiate Au, “He ʻIkai Teitei Lava Ia”
“Kapau ʻe inu uaine pe inu mālohi ʻe ha taha ʻiate kimoutolu, vakai ʻoku ʻikai lelei pe taau ia ʻi he ʻao ʻo hoʻomou Tamaí” (T&F 89:5).
Naʻá ku faʻa fakakaukau ʻe fakahoko ʻe hoku kaungāmeʻa mamae ko Sesí ha meʻa pē. Ko e taimi naʻá ku poleʻi ai ke puna mei he sitepu taupotu ki ʻolunga homau fakafaletoló, naʻe ʻikai ke ngata pē heʻene fakahoko iá, ka naʻe tomuʻa lele pea toki puna!
Ko e taimi naʻá ku poleʻi ai ke heka ʻi he lola kousitā (roller coaster) ʻoku vilo ʻo foʻohifó, naʻe ʻikai ngata pē ʻi heʻene heka aí, ka naʻe toe tangutu ʻi he sea muʻomuʻá foki!
Pea ko e taimi naʻá ku talaange ai he ʻikai teitei lava ia ʻo fakalea kia Sūliá—ʻa e taʻahine talavou taha ʻi homau ʻapiakó kotoá—naʻe ʻikai ngata pē heʻene fakalea mālō ē lelei ki aí, ka naʻe toe tangutu ʻo fakatalanoa ki ai ʻi ha miniti ʻe nima!
Naʻá ku pehē ʻe lava ʻe Sesi ha faʻahinga meʻa pē. Tuku kehe ʻa e ʻahó ni.
ʻOku haʻu ʻa Sesi ki hoku ʻapí ʻi he meimei ʻaho kotoa pē. ʻOku mau nofo fuʻu vāofi ʻaupito. Ko e fale pē taha ʻoku ʻi homa vahaʻa ʻapí. Ka ʻoku ʻikai ke haʻu ʻa Sesi ia ʻi he ʻaho Sāpaté pe Mōnité. ʻOku ʻalu ia ki he lotú he Sāpaté. ʻI he ngaahi ʻaho Mōnité ʻoku ʻi ai ʻenau faʻahinga meʻa ko e efiafi fakafāmili. Naʻá ne faʻa fakaafeʻi au. Ne mau kai keke palauni mo vaʻinga ha ngaahi vaʻinga. Naʻe fakafiefia moʻoni.
ʻOku faʻa haʻu ʻa Sesi ki hoku ʻapí ke ma vaʻinga ʻi he tuku ʻa e akó. ʻOku sai ke ʻi ai he naʻe kei ʻi he ngāué ʻeku fineʻeikí mo ʻeku tangataʻeikí. ʻOku fakafiefia ke vaʻinga mo Sesi. ʻOkú ma manako ke tūkuhua. ʻOku kaungāmeʻa ʻa Sesi ia mo e taha kotoa pē. Naʻe teʻeki ai ke u teitei fanongo ʻoku lau kovi ki ha kakai—neongo kapau ʻoku fai ia ʻe hono toé.
Ko e ʻaho ní naʻá ku vaʻinga pasiketipolo ai mo Sesi. Naʻe kiʻi ʻafu, peá u ʻeke ange ai kia Sesi pe ʻokú ne fie maʻu ha inu.
Naʻe talamai ʻe Sesi, “ ʻIo,” mo ne tekaʻi atu ʻa e foʻi pulú ki he loto musié pea lele ki homau fakafaletolo ʻi muʻá.
Ne ma hū atu ʻo lue ki he peitó. ʻI heʻeku fakaava ʻa e ʻaisí, naʻe hanga ʻe he maʻili mai ʻa e ʻea momokó ʻo ʻai ke ma tuʻutuʻukina. Ko e taimi naʻá ku fuofua fakasiosio ai ki he loto ʻaisí, ko e meʻa pē naʻá ku sio ki aí ko e huhuaʻi fuaʻiʻakau pea mo e huʻakau. Ka ne maʻu ʻeku tokangá ʻe ha kapa ne ʻosi fakaava ʻi he tulikí.
Ne tuku ai heʻeku tamaí ha kapa pia ne ʻosi fakaava. He ʻikai ke ne teitei ʻilo kapau te ma kiʻi ʻahiʻahiʻi. Ne u toʻo mai leva ʻa e kapá.
Naʻá ku ʻeke ange leva, “ ʻOkú ke fie ʻahiʻahiʻi?”
ʻEke mai ʻe Sesi, “Ko e hā ia?”
Peá u talaange, “Ko e pia. ʻOku inu maʻu pē ia heʻeku tangataʻeikí. He ʻikai ke ne ʻilo ʻe ia kapau te ta kiʻi ʻahiʻahiʻi.”
Ne sio mai ʻa Sesi kiate au. Fakamāhiki hono kemó pea tekevakavaka. Peá ne talamai ha meʻa naʻe ʻikai ke u teitei fakakaukau te u fanongo ʻokú ne lea ʻaki.
Naʻe talamai ʻe Sesi ia, “He ʻikai teitei hoko ia!”
Peá u ʻeke ange, “Naʻá ke pehē maí ʻikai ?”
Pehē mai leva ia, “ ʻOku ʻikai sai ʻa e piá kiate koe. ʻOku ʻikai totonu ke ta inu ia. Te ne ʻai koe ke ke fai ha ngaahi meʻa ngalivale.”
Peá u talaange leva, “He ʻikai pehē ia kapau te ke kiʻi inu pē ha maʻanga ʻe taha. Sio, te u fakahinohinoʻi atu.”
Naʻá ku ʻai leva ʻa e kapá ki hoku ngutú, ʻai ha kiʻi maʻanga, peá u malimali. Naʻe taʻe-oli hono ifó, ka naʻá ku taʻe-fie-tō.
Naʻá ku ʻeke ange leva, “Sio, ʻoku ou toe ʻasi ngalivale lahi ange kiate koe?”
Naʻe talamai leva ʻe Sesi, “Mahalo te u ʻalu ā au ki ʻapi. ʻOua te ke toe inu e meʻa ko iá. ʻOku ʻikai ko ha fakakaukau lelei ia.”
ʻI heʻeku sio ki he hū atu ki tuʻa ʻa Sesi ʻi he matapaá ʻo lele atu he saitiuoká ki hono ʻapí, naʻá ku fifili pe ko e hā ʻokú ne lava ai ke fai ʻa e meimei meʻa kotoa pē kae ʻikai ko ha kiʻi maʻanga pia pē tahá.
Naʻá ku toe ʻai ha kiʻi maʻanga ʻi he hili ʻo e ʻalu ʻa Sesí. Naʻá ku fakakaukau heni mo fakafoki ʻa e kapá ki he tuliki ʻo e ʻaisí, “Mani! ʻOku kovi ʻaupito ʻa e meʻá ni.”
Mahalo ʻoku fai ʻe Sesi ha meʻa.
Tā fakatātaaʻi ʻe John Zamudio; Sīsū Kalaisi, tā ʻe Harry Anderson, angalelei ʻa e Musiume Hisitōlia ʻo e Siasí