“Ang Anak nga mga Babaye sa Akong Gingharian”: Ang Kasaysayan ug ang Buhat sa Relief Society

Lain nga sister nagpuyo nga nag-inusara sa usa ka gamay nga apartment sa ika-80 nga andana sa usa ka building sa Hongkong. Siya adunay pipila ka pisikal nga mga kalisud apan siya malipayong nagkinaugalingon. Siya lamang ang miyembro sa Simbahan sa iyang pamilya. Diha sa gamay nga estante ang iyang mga kasulatan, ang iyang mga manwal sa Relief Society, ug uban nga mga libro sa Simbahan. Nakamugna siya og puno sa espiritu nga dangpanan sa iyang panimalay, ug siya usa ka kahayag ngadto sa tanan sa iyang branch.

Nasayud kita nga daghang mga sister ang nagpuyo sa mapintas o kuyaw nga mga sitwasyon. Ang uban sa kanunay gigutom, ug ang uban kinahanglan nga magbaton kada adlaw og kaisug sa pagpadayon sa hugot nga pagtuo bisan pa sa mga kapakyasan ug pagbudhi sa uban. Tungod kay kita nagpuyo sa katapusang mga adlaw niini nga kalibutan, adunay mga timaan sa usa ka dako nga pakigbisog bisan diin. Mga hinimo-himong istorya ug sayup nga mga panabut kalabut sa kalig-on, katuyoan, ug katungdanan sa Santos sa Ulahing Adlaw nga mga babaye midagsang. Ang nagpadayong hinimo-himo nga istorya nagpasabut nga kita mas ubos og importansya kay sa mga lalaki, nga kita sa kinatibuk-an nindot apan walay kahibalo, ug bisan unsa pa ang atong buhaton, kita dili gayud igo nga madawat sa atong Langitnong Amahan. Ingon nga gisulti ni Apostol Pedro, adunay mga “mini nga mga magtutudlo taliwala ninyo, kinsa tago nga nagpasulod sa makapadaut nga mga herejia [sulti-sulti], ug nagapanghimakak pa gani sa Agalon nga maoy nagpalit kanila”¹

Ang Basahon ni Mormon mihulagway unsa ang nahitabo:

“Kay tan-awa, niana nga adlaw si [Satanas] mohimo og kayugot sa mga kasingkasing sa mga katawhan, ug mokutaw kanila ngadto sa kasuko batok niana nga maayo.

“Ug ang uban siya mohupay ug mopakatulog kanila ngadto sa kalibutanon nga kasiguroan, nga sila moingon; oo, ang Zion mouswag, ang tanan maayo—ug sa ingon ang yawa motikas sa ilang mga kalag, ug modala kanila nga mabinantayon paingon sa impyerno.

“Ug tan-awa, ang uban siya moulog-ulog, ug mosulti kanila nga walay impyerno; ug siya moingon ngadto kanila: Ako dili yawa, kay walay yawa—ug sa ingon siya mohunghong sa ilang mga dunggan, hangtud siya mogunit kanila uban sa iyang makalilisang nga mga kadena.”²

Sa nagtubo nga kahimtang sa pagka adunay katungod, pamalibad, katapulan, ug pagpangdani, ang mga anak nga babaye sa Dios kinsa dili mabinantayon, dili mainampoon, wala madasig nahimutang sa nagkadugang nga risgo nga mahimong sama sa unsay gihulagway sa mga kasulatan nga “mahuyang nga mga babaye”³ kinsa nagsimba og nagkalain-laing “laing mga dios.”⁴ Subo nga palandungon, isip resulta sa mga kalisud sa kinabuhi ug sa inila nga mga sulti-sulti, daghang mga sister motuo sa mga tradisyon kay sa kamatuoran. Ang ilang pagsimang sa plano sa Dios makita nga daghan ang wala magbuhat sa importante nga mga butang sama sa pag-ampo ug pagbasa sa mga kasulatan. Ang Ginoo Mismo nag-ingon nga kini mao “ang adlaw sa pasidaan ug dili usa ka adlaw sa daghan nga mga pulong”⁵

Aron manalipod, motudlo, ug modasig sa Iyang anak nga mga babaye niining makuyaw nga mga panahon, gihatagan og awtoridad sa Dios si Propeta Joseph Smith sa pagpundok sa mga babaye sa Simbahan. Kining balaan nga gipahimutang ug gipangulohan sa priesthood nga organisasyon gitawag og Relief Society.

Ang katuyoan sa Relief Society mao ang pag-andam sa anak nga mga babaye sa Dios alang sa mga panalangin sa kinabuhing dayon samtang sila nagtubo sa hugot nga pagtuo ug personal nga pagkamatarung, naglig-on sa mga pamilya ug mga panimalay, ug nangita ug nagtabang sa uban kinsa nanginahanglan.

Ang Relief Society nagtataw sa atong mga buluhaton ug naghiusa kanato isip anak nga mga babaye sa Dios sa pagpanalipod sa Iyang plano. Niini nga panahon sa sayop nga pag-ila sa tawo, kalibug, ug kalinga, ang Relief Society gihimo nga mahimong usa ka kompas ug giya sa pagtudlo sa kamatuoran ngadto sa matinud-anong mga babaye. Ang matarung nga mga babaye karon nagtinguha og daghang personal nga pagpadayag sa pagbatok sa mga kalinga, pakig-away sa dautan ug espirituhanon nga kalaglagan, ug mobarug labaw sa personal nga mga kagul-anan pinaagi sa pagdugang sa ilang hugot nga pagtuo, paglig-on sa ilang mga pamilya ug mga panimalay, ug paghatag og kahupayan ngadto sa uban.

Ang among kapangulohan nag-ampo, nagpuasa, namalandong, ug nagpakitambag sa mga propeta, mga manalagna, ug mga tigpadayag aron makat-on unsa ang gusto sa Dios nga among buhaton sa pagtabang sa Iyang mga anak nga babaye nga mahimong lig-on sa pag-atubang sa ‘kalamidad nga moabut sa mga lumulupyo sa yuta.”⁶ Ang tubag miabut nga ang mga sisters sa Simbahan kinahanglang makahibalo ug makat-on gikan sa kasaysayan sa Relief Society. Ang pagsabut sa kasaysayan sa Relief Society naglig-on sa gigikanan sa pagkatawo ug sa bili sa matinud-anon nga mga babaye.

Agi og sangputanan niini, usa ka kasaysayan sa Relief Society alang sa Simbahan gikompleto ug atong magamit sa sunod tuig. Agi og pagpaabut niini, ang kasaysayan sa Relief Society nagdawat og nagtubo nga atensyon sama sa anaa sa pahina sa visiting teaching sa Liahona. Ang pag-andam sa kasaysayan usa ka nadasig ug napadayag nga kasinatian.

Sa atong pagtuon sa kasaysayan sa Relief Society, atong nakat-unan nga ang panan-awon sa Ginoo ug ang katuyoan sa Relief Society dili usa ka katulugon nga miting sa Dominggo. Anaa sa Iyang hunahuna ang usa ka butang nga mas dako, dako pa sa usa ka pundok sa babaye o grupo sa espesyal og interes nga kalingawan sa grupo.

Katuyoan Niya sa Relief Society sa pagtabang sa paglig-on sa Iyang mag katawhan ug sa pag-andam kanila alang sa mga panalangin sa templo. Gitukod Niya kini nga organisasyon sa pag-abin sa Iyang anak nga mga babaye ngadto sa Iyang buhat ug sa pagkuha sa ilang tabang sa pagtukod sa Iyang gingharian ug sa paglig-on sa mga panimalay sa Zion.

Atong gitun-an ang atong kasaysayan aron makat-on kinsa kita. Adunay tibuok kalibutan nga kagutom taliwala sa maayo nga mga babaye nga mailhan ang ilang pagkatawo, bili, ug importansya. Ang pagtuon ug paggamit sa kasaysayan sa Relief Society naghatag og pagsabut ug pagbati kon kinsa kita isip mga disipulo ug mga sumusunod sa atong Manluluwas, si Jesukristo. Ang atong pagkamaunungon ug pagserbisyo mga timailhan sa atong pagkakabig ug pasalig sa paghinumdom ug pagsunod Kaniya. Niadtong Hulyo sa 1830, sa sinugdanan sa Pagpahiuli sa Iyang Simbahan, mipili ang Ginoo sa Iyang unang lider nga babaye ug miingon diha sa pagpadayag ngadto kaniya, Siya miingon “Ako namulong nganha kanimo, Emma Smith, akong anak nga babaye; kay sa pagkatinuod Ako moingon nganha kanimo, kadtong tanan kinsa nakadawat sa akong ebanghelyo sila anak nga mga lalaki ug anak nga mga babaye sa akong gingharian.”⁷

Ang kasaysayan sa Relief Society nagtudlo kanato nga ang atong Langitnong Amahan nakaila sa iyang anak nga mga babaye. Siya naghigugma kanila, Siya naghatag kanila og piho nga mga responsibilidad, ug Siya nakigsulti ngadto ug naggiya kanila sa panahon sa ilang mortal nga misyon. Dugang pa, ang kasaysayan sa Relief Society nagpataas ug naglig-on sa kahimtang sa mga babaye ug nagpakita kon unsa sila motrabaho sa pakig-uban sa maunungon nga mga priesthood lider.

Atong gitun-an ang atong kasaysayan aron makat-on kon unsay angay natong buhaton. Pinaagi sa atong kasaysayan aton makat-unan unsaon sa pag-andam alang sa mga panalangin sa kinabuhing dayon. Ang Relief Society isip usa ka organisasyon sa kanunay adunay responsibilidad sa pagpundok sa mga kakugi sa mga sister diha sa mga ward ug mga branch sa Zion. Pinaagi sa mga miting sa Relief Society, sa pangalagad sa mga visiting teacher, ug sa ilang gihiusa nga serbisyo ang anak nga mga babaye sa Dios gitudloan, gipanalipdan, ug gidasig sa ilang mga responsibilidad diha sa buhat ug sa gingharian sa Ginoo. Ang mga Presidente sa ward ug branch gi-set apart aron sa paggiya niana nga buhat.

Usa ka tuig ang milabay dinhi niini nga miting, ang mga palisiya kalabut sa mga miting sa Relief Society gianunsyo. Malipayon kaming moreport nga kasagaran diha sa mga ward ug mga branch sa tibuok kalibutan, ang mga kapangulohan sa Relief society ug mga sister misagop niadtong mga palisiya ug sa espiritu nga nagpaluyo niini. Kalipay nga makita ang usa ka pagpabag-o sa makasaysayanong katuyoan ug buluhaton sa Relief Society. Amo usab nga nakita ang pagtubo diha sa dignidad, pagkatawo, ug kalabutan sa Relief Society tungod kay ang tanan nga mga miting sa mga sister sa karon yano nga gitawag ug gi-anunsyo kon unsa kini—ang mga miting sa Relief Society. Among nakita ang pagtubo sa hugot nga pagtuo ug personal nga pagkamatarung, paglig-on sa mga pamilya ug mga panimalay, ug dugang nga mga kahupayan nga gitanyag sa mga sister sa Relief Society pinaagi sa mga miting sa Relief Society. Ang tanan nga mga palisiya kalabut sa mga miting sa Relief Society, visiting teaching, ug ang uban nga buluhaton sa Relief Society nagbutang sa ilang pundasyon diha sa kasaysayan sa Relief Society ug giaprobahan sa Unang Kapangulohan.

Kini responsibilidad kanunay sa Relief Society sa pag-apil sa buhat sa kaluwasan. Sukad sa sinugdanan sa gipahiuli nga Simbahan, ang mga sister anaa sa una, sa katapusan, ug kanunay sa pagtubag ngadto sa mga panghitabo sa kada adlaw nga kinabuhi. Gikan sa Relief Society ang mga sister nagpadayon sa pag-alagad sa Primary, Young Women, Sunday School, ug uban nga mga paningkamot, ug sila mga kahayag ug hiyas ngadto sa nagtubo nga henerasyon. Ang personal nga pagserbisyo naglig-on sa matag usa ka sister, ug ang naghiusa nga pagserbisyo sa minilyon nga matinud-anon nga mga babaye nagmugna og lig-on nga pwersa sa hugot nga pagtuo diha sa buhat sa Ginoo. Ang kasaysayan nagpakita nga sukad sa sinugdanan sa Pagpahiuli, ang mga sister diha kanunay sa unahan sa pagpakigbahin sa ebanghelyo, ug sila nagpadayon niini nga paningkamot samtang sila nagserbisyo og mga misyon, nag-andam og batan-on nga mga lalaki ug babaye sa pagserbisyo og mga misyon, ug sa pagdapit sa ilang mga higala, mga silingan ug mga sakop sa pamilya sa pagpakigbahin diha sa mga panalangin sa ebanghelyo. Nakat-unan usab nato gikan sa kasaysayan nga si Propeta Joseph Smith migamit sa mga miting sa Relief Society sa pagtudlo sa mga sister sa ilang pagpangandam alang sa templo. Karon, ang family history, ug buhat sa templo nagpadayon nga pipila sa unang mga obligasyon sa Relief Society.

Ang pagsabut sa atong masaysayanong katuyoan makatabang sa mga babaye nga makat-on sa pag-una sa saktong paagi aron sila “dili mogasto og salapi alang niana nga walay bili, ni ang inyong kahago niana nga dili makatagbaw.”⁸ Ang Relief Society sa kanunay adunay responsibilidad sa pagbuhat unsa ang gitudlo ni Apostol Pablo—sa pagtudlo sa batan-ong mga babaye nga magmaligdong, mapanagan-on, ug putli ug sa pagtudlo niadtong kinsa mga minyo sa paghigugma sa ilang mga bana, paghigugma sa ilang mga anak, ug sa paglig-on sa ilang mga panimalay.⁹ Ang kasaysayan sa Relief Society nagtudlo kanato sa pag-atiman sa importante nga mga butang nga makaluwas ug makabalaan kanato ug sa mga butang nga gikinahanglan aron kita mahimong mapaningkamuton sa kaugalingon ug mapuslanon diha sa gingharian sa Ginoo.

Ang kanunay nga tema sa tibuok natong kasaysayan mao nga ang mga sister kinsa naggamit sa gahum sa Espiritu Santo naglihok uban sa inspirasyon sa Ginoo diha sa ilang mga kinabuhi ug nagdawat og mga pagpadayag alang sa ilang mga responsibilidad.

Gitun-an nato ang atong kasaysayan tungod kay naghiusa kini sa matinud-anong mga babaye. Ang kasaysayan sa Relief Society usa ka puno sa Espiritu nga istorya sa lig-on, matinud-anon, ug may tumong nga mga babaye. Isip kabahin sa gipahiuli nga Simbahan sa Ginoo, ang Relief Society makaplagan karon sa labaw sa 170 ka mga nasud. Bisan asa sa kalibutan ang hingkod nga babaye diha sa Simbahan sa Ginoo mahatagan og lisud ug importante nga mga responsibilidad.

Ang gagmay nga mga babaye ug ug batan-ong mga babaye sa Simbahan makat-on sa paghimo og mga tumong pinaagi sa mga programa sa Hugot nga Pagtuo diha sa Dios ug sa Personal nga Kauswagan, nga nag-focus nila ngadto sa templo ug sa ilang umaabut nga mga responsibilidad. Sa Relief Society magpadayon sila sa pag-uswag ngadto sa mga panalangin sa templo ug kinabuhing dayon ug personal nga pagkamatarung, paglig-on sa ilang mga pamilya ug mga panimalay, ug sa pagpangita ug pagtabang niadtong nanginahanglan. Ang matinud-anong mga sister makat-on sa pagbuhat niini nga wala kaayo dayga o pahalipayi sa buhat nga ilang gibuhat. Mao kana tungod ang Relief society nag-uswag sa pagtulun-an ni Ginoong Jesukristo, kinsa miingon nga kon kita mohatag sa atong limos (o mga halad) sa tago, ang atong Amahan sa Langit, kinsa nakakita sa tago, moganti kanato sa dayag.¹⁰

Pinaagi sa kasaysayan ug buhat sa Relief Society, kita gisumpay ngadto sa usa ka dakong tibuok kalibutan nga sisterhood sa batan-on ug tigulang, adunahan ug kabus, may kinaadman o wala, dili minyo ug minyo, lig-on ug dili matarug nga anak nga mga babaye sa Dios.

Atong gitun-an ang atong kasaysayan tungod kay kini makatabang nga kita mag-usab. Sa katapusan, ang bili sa kasaysayan dili kaayo sa mga petsa, mga panahon, o mga dapit niini. Kini mahinungdanon kay kini nagtudlo kanato sa mga baruganan, mga katuyoan, ug mga sumbanan nga atong kinahanglan nga sundon, ug kini nagtabang kanato nga makaila kon kinsa kita kon unsa ang atong buhaton ug naghiusa kanato sa paglig-on sa mga panimalay sa Zion ug sa pagtukod sa gingharian sa Dios dinhi sa yuta. Ang Relief Society, kon kini naglihok sa dinasig nga paagi, makapapuli sa kahadlok, pagduda, ug pagkahakog ngadto sa hugot nga pagtuo, paglaum, ug putling gugma. Samtang atong ipadayon ang buhat sa Ginoo, ang kasaysayan sa Relief Society mapadayon nga isulat sa matinud-anon nga mga sister sa tibuok kalibutan. Ang Ginoo naglig-on sa Relief Society sa karon nga panahon ug nag-andam og mahimayaon nga kaugmaon alang sa Iyang anak nga mga babaye.

Ako magpamatuod kaninyo sa katinuod sa atong Langitnong Amahan ug sa Iyang Anak, si Jesukristo. Pinaagi ni Propeta Joseph Smith, ang ebanghelyo, ang maayong balita sa atong pagkatawo ug katuyoan, gipahiuli dinhi sa kalibutan. Sa pangalan ni Jesukristo, amen.