Si Presidente Monson Mitawag sa mga Misyonaryo, Mipahibalo og Lima ka Bag-ong mga Templo
Si Presidente Thomas S. Monson mibukas sa ika-80 nga Tunga sa Tuig nga Kinatibuk-ang Komperensya sa Simbahan, nga gipahigayon sa Sabado ug Dominggo, Oktubre 2 ug 3, 2010, pinaagi sa pagtawag og daghang mga miyembro sa pagserbisyo og misyon ug pagpahibalo og lima ka bag-ong mga templo.
Si Presidente Monson misubli sa tawag sa “matag takus, makahimo nga batan-ong lalaki” sa pag-andam sa pagserbisyo; mi-welcome sa batan-ong mga babaye kinsa nagtinguha sa pagserbisyo; ug mipahayag sa panginahanglan sa Simbahan sa “daghan, daghan pang senior nga mga magtiayon” sa pagserbisyo.
“Ang misyonaryo nga pagserbisyo usa ka katungdanan sa priesthood usa ka obligasyon nga gipaabut sa Ginoo kanato kinsa gihatagan og hilabihan ka daghan.”
Si Presidente Monson mipahibalo nga ang lima ka mga templo giplano nga tukuron sa Hartford, Connecticut, USA; Indianapolis, Indiana, USA; Lisbon, Portugal; Tijuana, Mexico; ug Urdaneta, Philippines.
Ang bag-ong mga templo makapahimo ngadto sa 23 ang gidaghanon sa mga templo nga gipahibalo o gipadayon og tukod. Kon mahuman, kining 23 ka mga templo makapaabut sa tanang gidaghanon sa mga templo sa tibuok kalibutan sa Simbahan ngadto sa 157.
“Kita nagpadayon sa pagtukod og mga templo,” miingon si Presidente Monson. “… Unta padayon kitang magmatinud-anon sa atong pagtambong sa mga templo, nga gipangtukod nga mas nagkaduol sa atong mga miyembro” (“Samtang Kita Nagkatigum Pag-usab,” Liahona ug Ensign, Nob. 2010, 4).
Ang bag-ong mga templo mao ang una sa Simbahan sa Portugal, Indiana, ug Connecticut. Ang Templo sa Urdaneta mao ang ikatulo sa Simbahan sa Pilipinas ug ang Templo sa Tijuana mao ang ika-trese nga templo sa Mexico.
Sa unom ka bulan sa kinatibuk-ang komperensya gikan sa Abril ug Oktubre, ang Simbahan nakapahinungod og upat ka bag-ong mga templo: Ang Gila Valley Arizona, Vancouver British Columbia, Cebu City Philippines, ug Kyiv Ukraine nga mga Templo. Ang Templo sa Laie Hawaii nakaiskedyul nga ipahinungod pag-usab karong Nobyembre 21, 2010, human miagi og makuting pag-ayo.