Ayaw Gayud Pagbiya Kaniya

Ang Ginoo wala mobiya nato sa atong panaw sa pagbalik ngadto Kaniya. Paminaw sa Iyang mga pulong sa pagpasidaan nga nagpahibalo nato sa umaabut nga mga kakuyaw: “Pagbantay … pagtukaw, pagtan-aw ug pag-ampo.”¹ “Pagbantay kay tingali unya og kamo … malimbungan.”² “Pagbantay ug pag-amping.”³ “Pagbantay kamo basi bayag … mawad-an kamo sa inyong kalig-on.”⁴

Walay usa kanato ang dili apektado sa mga impluwensya sa kalibutan. Ang tambag sa Ginoo nakahimo kanato nga kanunayng mabinantayon.

Kamo makahinumdom sa kasinatian ni Jesus sa Capernaum nga ang mga disipulo kinsa misunod sa Manluluwas dili modawat nga Siya mao ang Anak sa Dios. Sa kasulatan mabasa, “Tapus niini daghan sa iyang mga tinun-an … wala na managpanglakaw uban kaniya.”⁵

Si Jesus milingi ngadto sa Napulog Duha ug nangutana, “Buot ba usab kamong mobiya kanako?”⁶

Sa akong hunahuna ako nakatubag na niana nga pangutana sa makadaghan: “Dili gayud! Dili gyud ko! Dili gayud nako Siya biyaan! Ania ako hangtud sa hangtud!” Nasayud ko nga kamo mitubag sa samang paagi.

Apan ang pangutana nga “Mobiya ba usab kamo?” makapahunahuna nato kabahin sa atong kaugalingong pagkahuyang. Ang kinabuhi dili sayon sa espirituhanong paagi. Ang mga pulong sa mga Apostoles sa laing panghitabo hinayhinay nga miabut sa atong hunahuna: “Ako ba, Ginoo?”⁷

Kita nagpabunyag uban sa hingpit nga kalipay ug paghinam-hinam. Ang Manluluwas nag-awhag, “Duol ngari kanako,”⁸ ug kita mitubag, nagdala sa Iyang pangalan ngari kanato. Walay usa kanato nga gusto niini nga panaw nga mubo ra sa espirituhanon nga paagi o gani usa ka halandumon apan lumalabay nga higayon. Ang dalan sa pagkadisipulo dili alang sa luya og kasingkasing sa espirituhanong paagi. Si Jesus miingon: “Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan.”⁹ “Kon adunay buot mosunod kanako, kinahanglan magadumili siya sa iyang kaugalingon, ug magpas-an sa iyang krus, ug magasunod kanako.”¹⁰

Sa atong pagsunod sa Manluluwas, walay pangutana adunay mga hagit nga moabut kanato. Atubangon uban sa hugot nga pagtuo, kining makapalig-on nga mga kasinatian moresulta sa mas lawom nga pagkakabig sa katinuod sa Manluluwas. Atubangon sa kalibutanon nga paagi, kining sama nga mga kasinatian makapahanap sa atong panan-aw ug makapahuyang sa atong desisyon. Ang pipila nga atong gimahal ug gipangga nawala sa tul-id ug pig-ot nga dalan, ug “wala na [managpanglakaw] uban kaniya.”

Unsaon nato sa pagpabilin nga matinud-anon sa Manluluwas, sa Iyang ebanghelyo, ug sa mga ordinansa sa Iyang priesthood? Unsaon nato sa pagpalambo og hugot nga pagtuo ug kalig-on nga dili gayud mobiya Kaniya?

Si Jesus miingon, “Gawas kon mangausab kamo, ug mangahimong sama sa mga gagmayng bata, dili gayud kamo makasulod sa gingharian sa langit.”¹¹ Kita nagkinahanglan og matuohong kasingkasing sa usa ka bata.

Pinaagi sa gahum sa Iyang Pag-ula, kita mamahimong “sama sa usa ka bata, manunuton, maaghup, mapainubsanon, mapailubon, puno sa gugma, mauyunon sa pagdawat sa tanan nga mga butang diin ang Ginoo makakita nga angay ipahamtang ngari [kanato], bisan ingon sa usa ka bata nga motugyan sa iyang kaugalingon ngadto sa iyang amahan.”¹² Kini mao ang dako nga kausaban sa kasingkasing.¹³

Sa dili madugay atong makita kon nganong kinahanglan ang kausaban sa kasingkasing. Duha ka mga pulong ang nagtimaan nga adunay kakuyaw sa unahan: ang mga pulong mao ang kasilo ug kaulaw.

Niadtong nagduhaduha sa pagka-diosnon sa Manluluwas, si Jesus nangutana: “Nakapaluya ba kini kaninyo?”¹⁴ Sa sambingay sa magpupugas, si Jesus mipasidaan: “Siya … [mopabilin] og makadiyot: [apan] inig-abut sa kasakitan o pagpanglutos tungod sa pulong, siya mobiya dayon sa pagtuo.”¹⁵

Ang kasilo moabut sa daghang porma ug padayong mangita og agianan sa atong hunahuna. Ang mga tawo nga atong gituohan nakapahigawad kanato. Kita nakasinati og wala damhang mga kalisud. Ang atong kinabuhi wala mahimong sama sa atong gilauman. Kita makahimo og mga sayop, mobati nga dili angay, ug mabalaka nga dili mapasaylo. Kita maghunahuna og usa ka isyu sa doktrina. Kita makahibalo og usa ka butang nga gipamulong diha sa pulpito sa Simbahan mga 150 na ka tuig ang milabay nga nakapahasol kanato. Ang atong mga anak gitratar nga dili patas. Kita wala panumbalinga o gipakaubos. Kini mahimong usa ka gatus ka mga butang, ang matag usa tinuod gayud alang kanato nianang panahona.¹⁶

Sa mga higayon nga kita huyang, ang kaaway magtinguha sa pagkuha sa atong espirituhanong mga saad. Kon kita dili mabinantayon, ang atong nasakitan, nga susama sa bata nga espiritu mobalik ngadto sa bugnaw, mangitngit nga kanhi bayanan sa atong garbo, mobiya sa kainit, makaayo nga kahayag sa Manluluwas.

Sa dihang si Parley P. Pratt, niadtong 1835, nahukman sa dili makiangayong paagi, naghatag og kaulawan kaniya ug sa iyang pamilya, si Propeta Joseph Smith mitambag, “[Parley], … ayaw hatagig bili kining mga butanga … [ug] ang Gamhanang Dios magauban kanimo.”¹⁷

Laing ehemplo: Niadtong 1830, si Frederick G. Williams, usa ka inila nga doktor sa medisina, nabunyagan. Diha-diha dayon iyang gihatag ang iyang mga talento ug kaadunahan ngadto sa Simbahan. Siya nahimong usa ka lider sa Simbahan. Siya midonar sa gipanag-iyang luna alang sa Templo sa Kirtland. Niadtong 1837, nakasinati og mga kalisud sa panahon, si Frederick G. Williams nakahimo og grabe nga mga sayop. Ang Ginoo mipahayag sa usa ka pagpadayag nga “isip sangputanan sa [iyang] pagpakasala ang [iyang] posisyon kaniadto [sa pagpangulo sa Simbahan] gikuha gikan [kaniya].”¹⁸

Ang nindot nga leksyon nga atong makat-unan gikan ni Frederick G. Williams mao nga “bisan unsa ang iyang personal nga mga kahuyang, siya adunay lig-ong kinaiya sa [pagbag-o] sa iyang pagkamaunungon sa [Ginoo,] sa Propeta ug … sa Simbahan, nga unta sayon lang kaayo ang pagpalayo paingon sa kapaitan.”¹⁹ Sa tingpamulak niadtong 1840, iyang gipresentar ang iyang kaugalingon sa kinatibuk-ang komperensya, mapainubsanong nangayo og pasaylo sa iyang binuhatan sa nangagi ug nagpahayag sa iyang determinasyon sa pagbuhat sa kabubut-on sa Dios sa umaabut. Ang iyang kaso gipresentar ni Hyrum Smith, ug siya gipasaylo dayon. Siya namatay isip usa ka matinud-anong miyembro sa Simbahan.

Bag-ohay lang nakong nahimamat ang presidente sa Templo sa Recife Brazil, nga ang ngalan mao si Frederick G. Williams. Siya misaysay pag-usab kon sa unsang paagi nga ang desisyon sa pag-usab sa kinaiya sa iyang apohan sa tuhod mipanalangin sa pamilya ug sa gatusan sa iyang kaliwatan.

Ang kasilo adunay makadaut nga kauban nga gitawag og kaulaw.

Sa Basahon ni Mormon, kita nakakat-on sa panan-awon ni Lehi sa kahoy sa kinabuhi. Ang panan-awon naghisgut niadtong halangdong mga kalag kinsa “[mipadayon] paingon sa unahan lahus sa gabon sa kangitngit, nanggunit sa gunitanan nga puthaw,” miabut ug “[mikaon] sa bunga sa kahoy.”²⁰

Gihulagway ni Nephi ang kahoy nga “gugma sa Dios,”²¹ nga namunga nga “mipuno [sa] kalag og hingpit nga kalipay.”²²

Human sa pagtilaw sa prutas, si Lehi nakakita og “dako ug lapad nga gambalay … napuno sa mga katawhan … mga tigulang ug mga batan-on, … mga lalaki ug mga babaye; ug ang ilang … panaput hilabihan kanindot; ug sila … nagbiay-biay ug nagtulisok sa ilang tudlo [nga mabiay-biayon] ngadto kanila kinsa … mikaon sa bunga.”²³ Ang anghel mipasabut nga ang pagbiay-biay, pagbugal-bugal, ang mga tudlo nga mabiay-biayon nagrepresentar sa garbo ug kaalam sa kalibutan.²⁴

Si Nephi yanong mipahayag, “Kami wala maminaw kanila.”²⁵

Makaguol, adunay pipila kansang kaisug nahunong. Sa kasulatan mabasa, “Human sila makatilaw sa bunga sila nangaulaw, tungod niadtong [kinsa] nagbugal-bugal kanila; ug sila nangahulog ngadto sa gidili nga mga dalan ug nangawala.”²⁶

Isip mga disipulo ni Kristo, kita mopalayo sa mga kalibutanon. Mahimong adunay mga higayon nga kita mobati nga dili komportable samtang ang mga tudlo nga mabiay-biayon nagbugal-bugal ug nagsalikway sa unsa ang sagrado alang kanato.²⁷ Si Presidente Thomas S. Monson mipasidaan, “Gawas kon ang mga gamot sa inyong pagpamatuod lig-on nga pagkatanom, malisud alang kaninyo sa pagbarug sa pagbiay-biay niadtong kinsa mohagit sa inyong hugot nga pagtuo.”²⁸ Si Nephi miingon, “Ayaw [paminaw] kanila.”²⁹ Si Pablo mipahimangno, “Kay kita wala sa Dios hatagig espiritu sa katalaw; … Ayaw … ikaulaw ang pagpanghimatuod alang sa atong Ginoo.”³⁰ Dili gayud nato Siya biyaan.

Samtang nag-uban ni Presidente Uchtdorf ngadto sa Eastern Europe sa miaging tuig, ako nahingangha sa hugot nga pagtuo ug kaisug sa mga Santos. Usa ka priesthood lider sa Ukraine misaysay kanamo sa pagkatawag sa kapangulohan sa branch niadtong tingpamulak sa 1994, mga unom pa lang ka bulan human sa iyang bunyag. Kini nagkinahanglan nga mahibaloan sa publiko ang iyang tinuohan ug motabang sa pagparehistro sa Simbahan sa siyudad sa Dnipropetrovs’k. Kadto usa ka panahon sa walay kasiguroan sa Ukraine, ug ang dayag nga pagpakita og hugot nga pagtuo ni Kristo ug sa gipahiuli nga ebanghelyo nagpasabut og kalisud, lakip ang posibilidad nga mawad-an sa iyang trabaho isip usa ka piloto.

Ang priesthood lider miingon kanamo, “Nagsige ko og ampo. Ako adunay pagpamatuod, ug ako mihimo og pakigsaad. Nasayud ko unsa ang ipabuhat sa Ginoo kanako.”³¹ Sa maisugong paagi, siya ug ang iyang asawa mipadayon uban sa hugot nga pagtuo, wala gikaulaw ang ebanghelyo ni Jesukristo.

Ang uban nangutana, “Kinahanglan ba nga malahi gayud ako sa uban?” “Dili ba ako mahimong usa ka disipulo ni Kristo nga dili kaayo maghunahuna sa akong batasan?” “Dili ba ako makahigugma ni Kristo nga dili mosunod sa balaod sa kaputli?” “Dili ba ako makahigugma Kaniya ug mobuhat sa akong gusto sa Dominggo?” Si Jesus mihatag og yano nga tubag: “Kon nahigugma kamo kanako, inyong pagatumanon ang akong mga sugo.”³²

Ang uban nangutana, “Dili ba adunay daghan sa laing mga tinuohan nga naghigugma ni Kristo?” Siyempre aduna! Apan, isip mga miyembro sa Ang Simbahan ni Jesukristo sa mga Santos sa Ulahing mga Adlaw, kay nakabaton og pagsaksi sa Iyang katinuod dili lang gikan sa Biblia apan gikan usab sa Basahon ni Mormon; nasayud nga ang Iyang priesthood napahiuli na sa yuta; nakahimo na og sagradong mga pakigsaad sa pagsunod Kaniya ug nakadawat na sa gasa sa Espiritu Santo; natugahan na og gahum diha sa Iyang balaan nga templo; ug nahimong kabahin sa pagpangandam alang sa Iyang mahimayaong pagbalik nganhi sa yuta, dili kita makatandi kon unsa kita ngadto sa uban nga wala pa nakadawat niining mga kamatuoran. “Alang kaniya ngadto kinsa daghan ang gihatag daghan ang gikinahanglan.”³³

Ang Ginoo miingon, “Ikaw mahimo nga makapili alang sa imong kaugalingon.”³⁴

Mosaad ako kaninyo, samtang kamo mopili nga dili masilo o maulaw, inyong mabati ang Iyang gugma ug pagtugot. Inyong mahibaloan nga kamo nahimong mas nahisama Kaniya.³⁵

Masabtan ba nato ang tanang butang? Siyempre dili. Ipadaplin lang una nato ang pipila ka mga isyu aron masabtan inig-abut sa panahon.

Ang tanan ba mahimong patas? Dili. Atong dawaton ang pipila ka mga butang nga dili nato maayo ug mopasaylo sa uban kon kini makasakit.

Kita ba mobati nga malahi usahay gikan niadtong nagpalibut kanato? Tinuod gayud.

Kita ba matingala usahay nga makita ang kasuko sa pipila ngadto sa Simbahan sa Ginoo ug sa ilang mga paningkamot sa pagpaubos sa nanlimbasug nga hugot nga pagtuo sa mahuyang?³⁶ Oo. Apan kini dili makapugong sa kalamboan o kapaingnan sa Simbahan, ni makapahunong sa espirituhanong pag-uswag sa matag usa kanato isip mga disipulo ni Ginoong Jesukristo.

Nindutan kaayo ko sa mga pulong gikan sa usa ka paborito nga himno:

Ang pagkahingpit dili mahitabo niining kinabuhia, apan kita mogamit sa hugot nga pagtuo diha ni Ginoong Jesukristo ug motuman sa atong mga pakigsaad. Misaad si Presidente Monson, “Ang inyong pagpamatuod, kon kanunay nga giamumahan, makaluwas kaninyo.”³⁸ Atong paladmon ang atong espirituhanong mga gamot, magbusog sa matag adlaw sa mga pulong ni Kristo diha sa mga kasulatan. Kita mosalig diha sa mga pulong sa buhing mga propeta, nga anaa sa atong atubangan aron ipakita kanato ang agianan. Kita mag-ampo kanunay ug maminaw sa hinayng tingog sa Espiritu Santo nga naggiya kanato ug naghunghong og kalinaw sa atong kalag. Bisan unsa pa nga mga hagit ang motumaw, kita dili ug dili gayud mobiya Kaniya.

Ang Manluluwas nangutana sa Iyang mga Apostoles: “Buot ba usab kamong mobiya kanako?”³⁹

Si Pedro mitubag:

“Ginoo, kang kinsa man kami moadto? Ikaw mao ang may mga pulong mahitungod sa kinabuhing dayon.

“… Kami nagatuo ug among nasinati nga ikaw mao ang Kristo, ang Anak sa buhing Dios.”⁴⁰

Ako anaa usab niana nga pagsaksi. Sa ingon ako mopamatuod sa pangalan ni Jesukristo, amen.