Makanunayon ug Dili Matarug

Mapasalamaton ako nga mahimong kabahin niining panagpundok sa matinud-anong mga babaye sa tibuok kalibutan. Nahimamat nako ang liboan kaninyo sa nagkalainlaing mga nasud. Ang inyong pagkamatinud-anon ug debosyon nakapalig-on kanako. Ang inyong mga ehemplo sa kabuotan ug pasalig sa ebanghelyo nakapadasig kanako. Ang inyong hilum nga mga buhat sa walay paghinakog nga serbisyo ug ang inyong mga pulong sa pagpamatuod ug pagtuo nakapahimo nako nga mapainubsanon.

Akong pangutan-on ang matag usa kaninyo karong gabhiona sa samang mga pangutana nga akong napangutana sa kadaghanan ninyo sa atong panagsultihanay.

1. Unsa ang nakatabang kaninyo nga mahimong makanunayon ug dili matarug samtang kamo nag-atubang sa mga hagit nga nagsulay sa inyong hugot nga pagtuo?

2. Unsa ang nakapatunhay kaninyo lahus sa mga pagsulay ug kalisdanan?

3. Unsa ang nakatabang kaninyo nga makalahutay ug mahimong tinuod nga disipulo ni Kristo?

Pipila sa mga tubag nga inyong gihatag kanako naglakip sa:

1. Inyong kahibalo nga ang Langitnong Amahan nahigugma ug nagpakabana kaninyo.

2. Inyong paglaum nga pinaagi sa maulaon nga sakripisyo ni Jesukristo ang tanang mga panalangin nga gisaad ngadto sa matinud-anon matuman.

3. Inyong kahibalo sa plano sa katubsanan.

Ang akong mensahe karon mopalapad niining mga pagpamatuod nga gikan sa inyong kasingkasing.

Mga Taga-Roma 8:16 nag-ingon, “Ang Espiritu gayud mao gayud ang magapanghimatuod ubang sa atong espiritu nga kita mga anak sa Dios.” Ang unang higayon nga ako nahinumdom nga mibati sa nakasiguro gayud nga ang Langitngong Amahan nakaila kanako, nahigugma kanako, ug nagpakabana alang kanako sa dihang gibunyagan ako sa edad nga 15. Sa wala pa niana, ako nasayud nga ang Dios buhi ug si Jesukristo mao ang Manluluwas sa kalibutan. Ako mituo Kanila ug nahigugma Kanila, apan wala gayud nako batia ang ilang gugma ug pag-amuma kanako, sa tinagsa, hangtud nianang higayuna samtang ako nagmaya sa akong kahigayunan sa paghimo og mga pakigsaad diha sa bunyag.

Nakaamgo ako sa ka dako nga milagro nga nakaplagan ug natudloan sa mga misyonaryo, ilabi na nga may pipila lamang ka mga misyonaryo tali sa duha ka milyon ka mga tawo! Nasayud na akong daan nga ang Langitnong Amahan nakaila kanako ug nahigugma kanako sa talagsaong paagi sa paggiya Niya sa mga misyonaryo ngadto sa akong panimalay.

Nasayud na ako karon nga ang Dios usa ka Dios sa gugma. Tinuod kini tungod kay kita Iyang mga anak ug tinguha Niya nga kitang tanan makabaton ug hingpit nga kalipay ug mahangturong kalipay. Ang Iyang buhat ug ang Iyang Himaya aron nga kita makaangkon og pagka-imortal ug kinabuhi nga dayon.¹ Mao nga Siya mihatag og mahangturong plano sa kalipay alang kanato. Ang atong katuyoan sa kinabuhi mao ang pagbaton og kinabuhing dayon ug kahimayaan alang sa atong mga kaugalingon, ug sa pagtabang sa uban nga mobuhat sa ingon. Siya milalang niini nga yuta alang kanato aron makabaton og pisikal nga lawas ug aron masulayan ang atong hugot nga pagtuo. Iyang gihatag kanato ang bililhon nga gasa sa kabubut-on, diin makapili kita sa agianan paingon sa walay katapusan nga kalipay. Ang plano sa katubsanan sa Langitnong Amahan alang kaninyo ug kanako, alang kini sa tanan Niyang mga anak.

“Ug gibuhat sa Dios ang tawo sa iyang kaugalingong dagway, sa dagway sa Dios gibuhat niya sila; lalaki ug babaye iyang gibuhat sila.

“Ug gipanalanginan sila sa Dios, ug miingon ang Dios kanila, Sumanay ug dumaghan kamo, ug pun-on ninyo ang yuta.”²

“Ug siya mihatag ngadto kanila og sugo, nga sila mosimba sa Ginoo nga ilang Dios. … Ug si Adan nagmasulundon ngadto sa mga sugo sa Dios.”³

Si Adan ug si Eva nanganak, ug ang plano nagpadayon nga gipatuman.

Ako nasayud nga ang matag usa kanato adunay mahinungdanon nga tahas isip anak nga babaye sa Dios. Iyang gitugyan diha sa Iyang anak nga mga babaye ang balaan nga mga kinaiya alang sa katuyoan sa pagpadayon sa Iyang buhat. Gitugyanan sa Dios ang mga babaye og sagradong buhat sa pagpanganak ug pagmatuto sa mga anak. Walay laing trabaho nga mas importante. Balaan kini nga calling. Ang halangdon kaayo nga katungdanan sa usa ka babaye mao ang sagrado nga buhat sa pagtukod og mahangturon nga mga pamilya, sa sulundon nga paagi sa pakigtambayayong uban sa iyang bana.

Akong naamgohan nga pipila sa atong mga sister wala pa makadawat og mga panalangin sa kaminyoon o mga anak. Ako mopasalig kaninyo nga sa tukmang panahon kamo makadawat sa tanang mga panalangin nga gisaad ngadto sa matinud-anon. Kinahanglang kamong “mopadayon sa unahan uban sa pagkamakanunayon kang Kristo, magbaton sa sa usa ka hingpit nga paglaum, … ug molahutay hangtud sa katapusan” aron makaangkon og kinabuhing dayon.⁴ Sa mahangturong panglantaw, ang nawala nga mga panalangin “sulod lamang sa mubo nga panahon.”⁵

Agig dugang, dili kinahanglan nga kamo minyo aron sa pagsunod sa mga sugo ug sa pag-amuma og mga pamilya, mga higala, ug mga silingan. Ang inyong mga gasa, talento, kahanas, ug espirituhanon nga mga kalig-on gikinahanglan kaayo sa pagtukod sa gingharian. Ang Ginoo nag-agad sa iyong pagkaandam sa pagbuhat niining mahinungdanon nga mga katungdanan.

Ang Ginoo miingon:

“Ako dili [gayud] malimot kanimo.

“Ania karon, ako na ikaw nga gisilsil sa mga palad sa akong mga kamot; ang imong kuta ania kanunay sa akong atubangan.”⁶

Ang Ginoo nahigugma kaninyo. Siya nasayud sa inyong mga paglaum ug sa inyong mga kahigawad. Dili Siya makalimot kaninyo tungod kay ang inyong mga kasakit ug ang inyong pag-antus kanunay nga anaa sa Iyang atubangan.

Ang pinakadako nga pagpakita og gugma sa Dios alang kanato mao ang Iyang pagkaandam sa pagpadala sa Iyang hinigugma nga Anak, si Jesukristo, aron motubos sa atong mga sala, aron mahimo nga atong Manluluwas ug Manunubos.

Sa Juan 3:16 atong mabasa, “Kay gihigugma gayud sa Dios ang kalibutan nga tungod niana gihatag niya ang iyang bugtong Anak, aron ang tanan nga mosalig kaniya dili malaglag, kondili may kinabuhing dayon.”

Ang Manluluwas miingon: “Sama sa paghigugma kanako sa Amahan, ako sa ingon nahigugma kaninyo.”⁷

Ang pagkaandam ni Jesukristo nga mahimong sakripisyo nga kordero mao ang usa ka pagpahayag sa Iyang gugma alang sa Amahan ug sa Iyang walay kinutuban nga gugma alang sa matag usa kanato.

Gihulagway ni Isaias ang pag-antus sa Manluluwas:

“Sa pagkamatuod gipas-an niya ang atong kasakit, ug gipas-an niya ang atong mga kasub-anan. …

“… siya gisamaran tungod sa atong kalapasan, siya napangos tungod sa atong mga kasal-anan: … tungod sa Iyang mga labod, kita nangaayo.”⁸

Ang Ginoo sa Iyang kaugalingon mipahayag: “Ako, ang Dios, nag-antus niini nga mga butang alang sa tanan, nga sila unta dili mag-antus kon sila maghinulsol.”⁹

Iyang gibugto ang mga higot sa kamatayon ug gihimo niini nga posible alang sa tanang mga tawo nga mabanhaw. Iyang gihatag kanato ang gasa sa pagka-imortal.

Giangkon ni Jesukristo sa Iyang kaugalingon ang atong mga sala, miantus, ug namatay aron motagbaw sa mga gipangayo sa kaangayan nga kita unta dili mag-antus kon kita maghinulsol.

Kita nagpahayag sa atong pagdawat ni Jesukristo isip atong Manluluwas kon atong isalig ang atong hugot nga pagtuo diha Kaniya, maghinulsol sa atong mga sala, ug modawat sa makaluwas nga mga ordinansa nga gikinahanglan aron makasulod sa presensya sa Dios. Kining makaluwas nga mga ordinansa mao ang mga simbolo sa mga pakigsaad nga atong gihimo. Ang mga pakigsaad sa pagkamasulundon sa Iyang mga balaod ug mga sugo nagbugkos kanato ngadto sa Dios ug molig-on sa atong hugot nga pagtuo. Ang atong hugot nga pagtuo ug pagkamakanunayon kang Kristo makahatag kanato og kaisug ug pagsalig nga atong gikinahanglan sa pag-atubang sa mga hagit sa kinabuhi, nga kabahin sa atong mortal nga kasinatian.

Wala madugay human ang akong bana gitawag aron sa padumala sa Paraguay Asuncion Mission niadtong 1992, kami mitambong og komperensya sa branch sa usa ka hilit nga komunidad didto sa Paraguayan Chaco.¹⁰ Kami mibiyahe og upat ka oras sa gisemento nga karsada ug dayon pito pa ka oras sa usa ka karaan nga karsada. Ang mga kakuyaw ug ka dili komportable sa biyahe nakalimtan dayon sa dihang kami gisugat sa malipayon ug maabi-abihon nga mga miyembro sa Mistolar.

Si Julio Yegros ang batan-ong presidente sa branch ug ang iyang asawa nga si Margarita, mao ang pipila sa mga pamilya nga nabugkos sa templo. Gihangyo nako sila sa pagpakigbahin sa ilang kasinatian sa ilang biyahe ngadto sa templo.

Nianang higayuna, ang labing duol nga templo mao ang templo sa Buenos Aires sa Argentina. Ang biyahe gikan sa Mistolar molungtad og 27 ka oras paingon lamang sa templo ug nangadto sila kuyog sa duha ka gagmayng mga anak. Tunga-tunga kini sa hilabihan ka bugnaw nga tingtugnaw, apan tungod sa hilabihan nga pagsakripisyo nakaabut ra sila sa templo ug nabugkos isip usa ka mahangturong pamilya. Sa pagpauli, ang duha ka gagmayng mga bata nangasakit ug namatay. Ilang gilubong ang mga bata sa dapit nga ilang giagian ug namauli nga wala na ang ilang mga anak. Sila nasubo ug gimingaw, apan katingalahan nga mibati nga nahupay ug malinawon. Sila miingon sa kasinatian: “Ang among mga anak nabugkos ngari kanamo sa balay sa Ginoo. Kami nasayud nga maangkon namo sila og balik sa tibuok kahangturan. Kini nga kahibalo nakahatag namo og kalinaw ug kahupayan. Kinahanglan nga magpabilin kita nga takus ug matinud-anon sa atong mga pakigsaad nga atong gihimo sulod sa templo, ug dayon magkahiusa kita og balik uban kanila.”

Unsaon nato sa pagpalambo sa atong hugot nga pagtuo ug paglaum nga mahimong sama niining matinud-anon nga mga miyembro gikan sa Paraguay?

Unsaon nato sa paglig-on sa atong tinuohan diha sa pagpamatuod nga balikbalik nakong nadunggan gikan sa kadaghanan ninyo, nga kamo mituo sa gugma sa Dios alang kaninyo, nga kamo misalig nga kamo makadawat sa Iyang mga panalangin, ug nga kamo nakasabut sa plano sa katubsanan pinaagi sa Manluluwas nga si Jesukristo ug sa inyong importanteng bahin sa Iyang plano?

Ako mosugyot og upat ka butang nga nakatabang kanako: pag-ampo, pagtuon sa kasulatan, pagkamasulundon ug pagserbisyo.

Pag-ampo

Ang pag-ampo mao ang buhat sa pagpakigsulti ngadto sa Langitnong Amahan. Kon kita mag-ampo, atong giangkon ang atong hugot nga pagtuo diha Kaniya ug sa Iyang gahum sa pagpanalangin kanato.

Sa Alma 37:37 atong mabasa: “Pakitambag uban sa Ginoo sa tanan nimo nga buhaton, ug siya moagak kanimo alang sa kaayohan; oo, kon ikaw mohigda sa gabii higda ngadto sa Ginoo, nga siya mobantay diha kanimo sa imong pagkatulog; ug kon ikaw mobangon sa buntag himoa nga ang imong kasingkasing puno sa mga pasalamat ngadto sa Dios; ug kon ikaw mobuhat niini nga mga butang, ikaw pagabayawon sa katapusan nga adlaw.”

Pagtuon sa Kasulatan

Ang kahibalo ug pagsabut sa plano sa Langitnong Amahan makatabang kanato nga masayud kon kinsa kita ug unsa ang atong pagadangatan.

Ang Ginoo misugo: “Kamo nagasusi sa mga kasulatan kay nagahunahuna man kamo nga pinaagi niini makakaplag kamo sa kinabuhing dayon: ngani kini mao ang nagapanghimatuod mahitungod kanako.”¹¹

Adunay dakong panginahanglan alang sa matag babaye sa pagtuon sa mga kasulatan. Samtang kita makasinati sa mga kamatuoran sa mga kasulatan, kita makagamit niini ngadto sa atong mga kinabuhi ug makabaton og labaw pa nga gahum sa pagtuman sa mga katuyoan sa Dios. Ang matag adlaw nga personal nga pag-ampo ug pagtuon sa kasulatan makadapit usab sa impluwensya ug gahum sa Espiritu Santo sa atong mga kinabuhi.

Pagkamasulundon

Ang Ginoo miingon, “Kon nahigugma kamo kanako, inyong pagatumanon ang akong mga sugo.”¹² Ang atong matinud-anong pagsunod makatabang nato sa pagpalambo sa mga hiyas sa pagkadiosnon ug makapausab sa atong kasingkasing.

Sa Doktrina ug mga Pakigsaad gitambagan kita:

“Hupot ngadto sa mga pakigsaad nga ikaw mihimo. …

“Paghupot sa akong mga sugo kanunay, ug ang korona sa pagkamatarung ikaw makadawat.”¹³

Ang atong pasalig sa pagpuyo sa ebanghelyo moamuma sa atong pagtuo ug paglaum diha ni Jesukristo.

Pagserbisyo

Kita adunay daghang mga kahigayunan sa pagserbisyo Kaniya. Ang matag sister gihangyo sa pagsiksik ug sa pagtabang sa atong kabus ug timawa nga anaa sa atong palibut. Ang “kabus ug ang timawa” naglakip niadtong adunay espirituhanon ug emosyonal nga mga panginahanglan usab. Ang matag usa gisangunan usab sa pagluwas sa atong mga patay, diin mahimo pinaagi sa pagtrabaho sa family history o paghimo sa buhat sa templo. Kita gisugo sa pagpakigbahin sa ebanghelyo ngadto sa uban, ug adunay daghang mga paagi sa pag-apil sa misyonaryo nga buhat. Kining tanan nga mga butang mga paagi aron makaserbisyo kita sa Ginoo. Ang atong Langitnong Amahan naglaum niadtong kinsa lig-on sa paglig-on sa mahuyang, ug ang imong hugot nga pagtuo mapalig-on samtang kamo nagpalig-on ug nag-atiman sa Iyang mga anak.

Ako nasayud nga ang Langitnong Amahan nahigugma sa matag usa sa Iyang mga anak sa hingpit ug tinagsa-tagsa, ug sa makanunayon nga paagi. Ako nasayud nga isip usa ka babaye, kita adunay mahinungdanong bahin sa plano sa kalipay. Ang atong pinakamaayo lamang nga paningkamot mao ang Iyang gikinahanglan ug ang matag usa kanato gikinahanglan sa pagtukod sa gingharian. Ang Pag-ula tinuod. Si Jesukristo mao ang atong Manluluwas ug Manunubos. Ako mopamatuod nga kon kita matinud-anon ug molahutay hangtud sa katapusan, kita makadawat sa tanang mga panalangin sa Langitnong Amahan, bisan ang kinabuhing dayon ug kahimayaan. Sa pangalan ni Jesukristo, amen.