Pagkat-on ug Pagtudlo sa Ebanghelyo

Isip sakop sa kinatibuk-ang kapangulohan sa Sunday School, akong gibati nga kinahanglan nakong sugdan ang akong pakigpulong niining buntaga pinaagi sa pag-ingon og, “Maayong buntag, class.”

Ang akong mensahe karon mao ang alang sa tanan niadtong kinsa gitawag sa pagtudlo, sa bisan unsang organisasyon nga inyong giserbisyohan o kon kamo bag-o pa nga nakabig sa Simbahan o magtutudlo nga may dugay na nga kasinatian.

Dili ko maghisgut mahitungod “kon unsaon” sa pagtudlo kondili mahitungod sa “pamaagi” sa pagkat-on. Mahimong adunay dakong kalainan tali sa unsay gisulti sa magtutudlo ug unsay nadungog o nakat-unan niadtong naa sa klase.

Hunahunaa sa makadiyot ang kabahin sa usa ka magtutudlo kinsa nakahimo gayud og kalainan sa inyong kinabuhi. Unsay anaa kaniya nga nakahimo kaninyo sa paghinumdom kon unsay gitudlo, sa pagkagusto nga modiskobre sa kamatuoran nga kamo mismo, sa paggamit sa inyong kabubut-on ug sa pagbuhat ug dili lamang sa pagbuhat nga adunay magsugo—sa laing pagkasulti, sa pagkat-on? Unsay anaa niini nga magtutudlo nga nakalahi kaniya sa uban?

Usa ka malampuson nga magtutudlo ug tigsulat miingon: “Ang labing importante sa pagkat-on mao ang kinaiya. Ang kinaiya sa magtutudlo.”¹

Timan-i nga ang labing importante sa pagkat-on dili ang gidugayon sa tuig nga namiyembro sa Simbahan ang usa ka magtutudlo o unsa ka lapad ang kasinatian sa pagtudlo sa usa ka tawo o bisan ang kahibalo sa magtutudlo sa ebanghelyo o mga pamaagi sa pagtudlo. Ang labing importante mao ang kinaiya o ang espiritu nga sa ingon nga paagi nagtudlo ang magtutudlo.

Sa tibuok kalibutan nga miting sa pagbansay sa pagpangulo, si Elder Jeffrey R. Holland miasoy niini nga istorya: “Sa daghang katuigan, giganahan ko sa istorya nga giistorya ni Presidente Packer mahitungod sa magtutudlo sa Sunday School niadtong bata pa si William E. Berrett. Usa ka edaran nga Danish nga gitawag aron sa pagtudlo og klase sa mga lalaki nga bugoy. … Dili kaayo siya maayo nga mosulti sa pinulongan; duna gihapon siyay bug-at nga linitokan nga Danish; mas magulang siya kaayo, may dagkong mga kamot sa mag-uuma. Bisan pa man siya patudloon niining mga batan-on, badlongon nga mga 15 anyos. Sa tanang tinguha ug katuyoan, daw dili gayud kini bagay. Apan si Brother Berrett miingon—ug mao kini ang bahin nga gikutlo ni Presidente Packer—nga kining tawhana mitudlo pa gihapon kanila; nga bisan sa tanan niadtong mga babag, bisan sa tanan niadtong mga limitasyon, natandog niining tawhana ang mga kasingkasing niadtong bugoy nga 15 anyos nga batang mga lalaki ug miusab sa ilang mga kinabuhi. Ug ang pagpamatuod ni Brother Berrett mao ‘Ato untang painiton ang atong mga kamot sa kalayo sa iyang hugot nga pagtuo.’”²

Ang malampuson nga mga magtutudlo sa ebanghelyo nahigugma sa ebanghelyo. Mahinamon sila niini. Ug tungod kay gimahal nila ang ilang mga estudyante, gusto nila nga ang mga estudyante mobati sama sa ilang gibati ug mosinati sa ilang nasinati. Ang pagtudlo sa ebanghelyo mao ang pagpakigbahin sa inyong gugma sa ebanghelyo.

Mga kaigsoonan, ang kinaiya sa magtutudlo dili makita sa tinudloan; kini makita sa binuhatan.³

Nan, sa unsang paagi nga kita makapalambo og kinaiya nga gikinahanglan aron mahimong malampuson nga magtutudlo? Gusto kong mohisgut og upat ka nag-unang mga baruganan sa pagtudlo sa ebanghelyo.

Una, pagtuon og maayo sa mga kasulatan. Dili kita mahigugma sa wala nato mahibaloi. Pagpalambo og matag adlaw nga kinaiya sa pagtuon sa kasulatan, ayaw idungan sa inyong pag-andam sa leksyon. Sa dili pa kita motudlo sa ebanghelyo, kinahanglan gayud nga kita nasayud sa ebanghelyo.

Si Presidente Thomas S. Monson sa gihapon naghambin sa handumanan sa iyang magtutudlo sa Sunday School niadtong bata pa siya. Miingon siya: “Nakasinati ako isip usa ka gamayng batang lalaki nga anaa ubos sa impluwensya sa labing epektibo ug dinasig nga magtutudlo kinsa naminaw kanamo ug kinsa nahigugma kanamo. Ang iyang ngalan mao si Lucy Gertsch. Sa among klase sa Sunday School, mitudlo siya kanamo kalabut sa Paglalang sa kalibutan, sa Pagkapukan ni Adan, sa maulaong sakripisyo ni Jesus. Iyang gidala sa iyang klasehanan isip pinasidunggang mga dinapit sila si Moises, Josue, Pedro, Tomas, Pablo, ug siyempre, si Kristo. Bisan og wala namo sila makita, among nakat-unan ang paghigugma, pagtahud, ug pagsunod kanila.”⁴

Si Lucy Gertsch nakahimo sa pagdapit niining pinasidunggang mga dinapit ngadto sa iyang klasehanan tungod kay siya nakaila kanila. Sila mao ang iyang gihambin nga mga higala. Tungod niana, ang iyang klase nakat-on usab sa “paghigugma, pagtahud, ug pagsunod kanila.”

Ang Ginoo miingon ngadto ni Hyrum Smith, “Ayaw pagtinguha sa pagpahayag sa akong pulong, apan unaha ang pagbaton sa akong pulong.”⁵ Kini nga pahimangno alang sa matag usa kanato.

Ang Ginoo misugo kanato sa pagsiksik sa mga kasulatan,⁶ sa pagbusog diha niini,⁷ ug sa pagmahal niini.⁸ Samtang matinguhaon kita sa pagsiksik ug pagpamalandong sa pulong sa Ginoo, makabaton kita sa Iyang Espiritu uban kanato. Mahimo kitang masinati sa Iyang tingog.⁹

Wala madugay human ako gitawag nga mahimong presidente sa stake, ang among kapangulohan sa stake gibansay sa usa ka Area Seventy. Atol sa pagbansay, may gipangutana ako diin siya mitubag, “Maayo kana nga pangutana. Atong ablihan ang Handbook sa mga Panudlo sa Simbahan alang sa tubag. Kami dayon mipakli sa handbook, ug didto ang tubag sa akong pangutana. Pagkataud-taud sa among pagbansay, nangutana na usab ko. Sa makausa pa siya mitubag, “Maayo nga pangutana. Atong paklion ang handbook.” Wala na gayud ako mangahas pa sa pagpangutana og bisan unsang mga pangutana. Akong gihunahuna nga labing maayo pa nga mobasa na lang sa handbook.

Ako nakahunahuna sukad niana nga ang Ginoo makahatag og sama nga tubag sa matag usa kanato samtang moduol kita Kaniya uban sa mga problema o mga pangutana. Siya makaingon, “Maayo kana nga pangutana. Kon inyong basahon pag-usab ang Alma kapitulo 5 o Doktrina ug mga Pakigsaad seksyon 76, kamo makahinumdom nga nakasulti na ko kaninyo mahitungod niini.”

Mga kaigsoonan, supak kini sa mga lagda sa langit alang sa Ginoo nga balik-balikon ngari sa matag usa kanato ang unsay napadayag na Niya kanato sa tiningub nga paagi. Ang mga kasulatan naglangkob sa mga pulong ni Kristo. Kini mga tingog sa Ginoo. Ang pagtuon sa mga kasulatan nagbansay kanato sa pagpaminaw sa tingog sa Ginoo.

Ikaduha, gamita sa inyong kinabuhi ang mga butang nga inyong nakat-unan. Sa dihang si Hyrum Smith nagtinguha nga mahimong kabahin niining mahinungdanon nga buhat sa ulahing mga adlaw, ang Ginoo miingon ngadto kaniya “Tan-awa, kini mao ang imong buhat, sa paghupot sa akong mga sugo, oo, uban sa imong tibuok nga gahum, hunahuna ug kusog.”¹⁰ Ang atong trabaho, una ug labaw sa tanan isip mga magtutudlo, mao ang pagsunod sa mga sugo sa tibuok natong gahum, hunahuna, ug kusog.

Ikatulo, tinguhaa ang panabang sa langit. Pangamuyo sa Ginoo alang sa Iyang Espiritu uban sa tibuok kusog sa inyong kasingkasing. Ang mga kasulatan namahayag, “Kon kamo dili makadawat sa Espiritu kamo dili motudlo.”¹¹ Kini nagpasabut nga bisan pa kon kamo naggamit sa husto nga mga pamaagi sa pagtudlo ug ang inyong gitudlo tinuod, kon wala ang Espiritu ang tinuod nga pagkat-on dili mahitabo.

Ang tahas sa magtutudlo mao ang “pagtabang sa mga indibidwal nga modawat og responsibilidad sa pagkat-on sa ebanghelyo—sa pagdasig kanila og tinguha sa pagtuon, pagsabut, ug pagsunod sa ebanghelyo.”¹² Kini nagpasabut nga isip mga magtutudlo kinahanglan nga dili kita mo-focus og hilabihan sa atong pagpahigayon sa pagtudlo kondili unsaon nato sa pagtabang sa uban nga makat-on ug mosunod sa ebanghelyo.¹³

Kanus-a man kamo katapusang miluhod sa pag-ampo ug mihangyo sa Ginoo sa pagtabang kaninyo dili lamang sa inyong leksyon kondili tabangan kamo nga masayud ug matubag ang mga panginahanglan sa matag estudyante sa inyong klase? Walay klase nga dako kaayo nga dili kita makapangamuyo alang sa inspirasyon kalabut kon unsaon sa pagtabang sa matag estudyante.

Natural lamang alang sa mga magtutudlo nga mobati og dili angayan. Kinahanglan gayud nga kamo makasabut nga “ang edad ug pagkahingkod ug pagbansay sa salabutan sa bisan unsang paagi o sa bisan unsang matang dili mahinungdanon ngadto sa pagpakigsulti sa Ginoo ug sa Iyang Espiritu.”¹⁴

Ang mga saad sa Ginoo sigurado. Kon matinguhaon kamo nga magsiksik sa mga kasulatan ug mahalon sa kanunay diha sa inyong mga hunahuna ang mga pulong sa kinabuhi, kon sundon ninyo ang mga sugo sa tibuok ninyong kasingkasing ug mag-ampo alang sa matag estudyante, inyong matagamtaman ang pakig-uban sa Espiritu Santo ug inyong madawat ang pagpadayag.¹⁵

Ikaupat, mga kaigsoonan, pinakaimportante kini nga atong gamiton ang atong kabubut-on ug mobuhat, sa walay paglangan, sumala sa espirituhanong mga pag-aghat nga atong madawat.

Si Presidente Thomas S. Monson nagtudlo: “Magbantay kita. Maghulat kita. Maminaw kita nianang ligdong, hinay nga tingog. Kon kini mosulti, ang maalamon nga mga lalaki ug mga babaye mosunod. Ang mga pag-aghat sa Espiritu dili mahimo nga langanon.”¹⁶

Kinahanglan nga dili kamo mahadlok sa paggamit sa inyong kabubut-on ug mobuhat sa mga hunahuna ug mga pagbati nga gibutang sa Espiritu sa Ginoo sa inyong kasingkasing. Mahimo nga bation ninyo sa sinugdanan ang kasalikwaut, apan mosaad ako kaninyo nga ang maanindot kaayo ug labing makatagbaw nga mga kasinatian nga inyong maangkon isip magtutudlo mahitabo kon kamo monunot sa kabubut-on sa Ginoo ug mosunod sa mga pag-aghat nga inyong madawat gikan sa Espiritu Santo. Ang inyong mga kasinatian mopalig-on sa inyong pagtuo ug mohatag kaninyo og mas dakong kaisug sa pagbuhat niini sa umaabut.

Minahal nga mga magtutudlo, kamo usa sa mahinungdanon nga mga milagro niining Simbahan. Kamo adunay sagrado nga pagsalig. Gimahal namo kamo ug adunay pagsalig kaninyo. Nasayud ako nga kon kita mosiksik sa mga kasulatan ug mosunod aron mahimo kitang takus sa pakig-uban sa Espiritu Santo, ang Ginoo mopalambo kanato diha sa atong mga calling ug mga responsibilidad aron mahimong matuman nato ang atong buluhaton gikan sa Ginoo. Nga kita untang tanan mobuhat sa ingon mao ang akong pag-ampo sa pangalan ni Jesukristo, amen.