Garbo ug ang Priesthood

Nakahinumdom usab ko sa usa ka makaikag nga epekto sa makaimpluwensya nga pakigpulong ni Presidente Benson. Sulod sa panahon hapit gidili kini tali sa mga miyembro sa Simbahan sa pagsulti nga “garbo” nila ang ilang mga anak o ang ilang nasud o “garbo” nila ang ilang trabaho. Ang pinakapulong nga garbo maingon og gisalikway sa atong bokabularyo.

Sa mga kasulatan makakita kita og daghang ehemplo sa mga maayo ug matarung nga mga tawo kinsa magmaya sa pagkamatarung ug sa samang higayon nagmaya sa pagkamaayo sa Dios. Ang atong Langitnong Amahan mismo mipaila sa Iyang pinalangga nga Anak uban sa mga pulong nga “kinsa Ako nahimuot kaayo.”²

Si Alma nagmaya sa paghunahuna nga tingali siya “mahimo unta nga himan diha sa mga kamot sa Dios.”³ Si Apostol Pablo nagmaya sa kamatinud-anon sa mga miyembro sa Simbahan.⁴ Ang talagsaong misyonaryo nga si Ammon nagmaya sa kalampusan nga iyang nasinati ug sa iyang mga igsoon isip mga misyonaryo.⁵

Ako nagtuo nga adunay kalainan tali sa pagkamapasigarbuhon kabahin sa mga piho nga butang ug sa pagkagarbuso. Mapasigarbuhon ako sa daghang butang. Mapasigarbuhon ako sa akong asawa. Mapasigarbuhon ako sa akong mga anak ug sa mga apo.

Mapasigarbuhon ako sa mga kabatan-onan sa Simbahan, ug nagmaya ako sa ilang pagkamaayo. Mapasigarbuhon ako kaninyo, minahal kong mga igsoon. Mapasigarbuhon akong gikauban kamong magbarug isip tighupot sa balaan nga priesthood sa Dios.

Busa unsa man ang kalainan tali niini nga matang sa pagbati ug sa garbo nga gitawag ni Presidente Benson og “sala sa tanan [universal sin]”?⁶ Ang garbo sala, sigun sa gitudlo ni Presidente Benson nga mahinumduman kaayo, tungod kay makapalambo kini og kapungot o pagdumot ug nagkapahimo kanato sa pagsupak sa Dios ug sa atong isigkatawo. Ang kahulugan gayud niini, ang garbo usa ka sala sa pagkumpara, bisan tuod og kini sa kasagaran nagsugod sa “Tan-awa kon unsa ko kangilngig ug unsa kangilngig ang akong nahimo,” ingon og kanunay kining matapos sa “Busa, mas maayo pa ko kay nimo.”

Kon ang atong mga kasingkasing napuno sa garbo, nakahimo kita og dako nga sala, kay atong gisupak ang duha ka dagko nga sugo.⁷ Imbis mosimba sa Dios ug mohigugma sa atong silingan, atong gipakita ang tinuod nga tuyo sa atong pagsimba ug gugma—sa panagway nga atong makita sa samin.

Ang garbo usa ka dako nga sa sala sa pagkamapahitas-on. Kini sa kadaghanan, usa ka personal nga Rameumptom, usa ka balaan nga tinduganan nga maghatag og katarungan sa kasina, kadawo, ug paghambog.⁸ Sa pagsabut, ang garbo mao ang orihinal nga sala, kay sa wala pa ang katukuran niini nga yuta, ang garbo mipukan ni Lucifer, ang anak sa kabuntagon “kinsa may pagtugot diha sa atubangan sa Dios.”⁹ Kon ang garbo makadaut sa tawo nga makahimo ug makadani sama niini, dili ba angay sab natong sutaon ang atong kaugalingon?

Ang garbo usa ka makamatay nga kanser. Usa kini ka sala nga ganghaan padulong sa laing hut-ong sa tawhanong mga kahuyang. Sa pagkatinuod, masulti nga ang matag sala, sa pagsabut, usa ka pagpakita sa garbo.

Kini nga sala daghan og aspeto. Makadala kini sa uban sa pagmaya sa kaugalingon nilang pagsabut sa bili sa kaugalingon, mga kalampusan, mga talento, katigayunan, o posisyon. Giihap nila kini isip ebidensya sa pagka “pinili,” “superyor,” o “labaw nga matarung” kay sa uban. Mao kini ang sala sa “Salamat Dios ako mas imong pinalabi.” Sa kahulugan gayud niini mao ang tinguha nga madayeg o masinahan. Sala kini sa paghimaya sa kaugalingon.

Alang sa uban, ang garbo mahimo nga kasina: mapungot silang magtan-aw niadtong mga mas maayo og posisyon, daghang talento, o mas daghang kabtangan kay sa kanila. Tinguha nila ang pagpasakit, pagpaminus, ug sa pagdaut sa uban pinaagi sa dili pinasubay ug dili takus nga paningkamot sa pagpataas sa kaugalingon. Kon kadtong ilang gikasinahan mahagsa na o mag-antus, hilum sila nga maglipay.

Tingali walay mas maayo nga laboratoryo sa pagpaniid sa sala sa garbo kay sa kalibutan sa sports. Sa kanunay ganahan akong moapil ug motambong og mga sports. Apan akong ikumpisal adunay mga higayon nga ang kakulang sa pagkasibilisado sa sports makauulaw. Ngano man nga ang normal nga maayo ug manggiloy-on nga binuhat dili makaagwanta ug mapuno sa kasuko ngadto sa kontra nga team ug sa mga tigsuporta [fans] niini?

Nakatan-aw ako og sports diin ang mga tigsuporta mopakaulaw ug mobalikas sa ilang mga kaatbang. Mangita sila og sipyat ug padak-on kini. Hatagan nila og katarungan ang ilang kapungot nga apilon ang tanan ug gamiton nila kana sa tanang anaa sa team. Kon adunay masakitan sa ilang kaatbang, mangalipay sila.

Mga igsoon, subo kaayo nga atong makita karon ang kasagaran nga samang matang sa kinaiya ug batasan iyagyag kini atol sa usa publiko nga diskurso sa politika, kaliwatan, ug relihiyon.

Mga minahal kong kaigsoonan sa priesthood, minahal kong mga isigka disipulo sa malumong si Kristo, dili ba angay kanato ang paghupot sa mas taas nga sumbanan? Isip mga tighupot sa priesthood, angay natong hibaloan nga ang tanang anak sa Dios nagsul-ob sa sama ra nga uniporme. Ang atong team mao ang panag-igsoonay. Kining mortal nga kinabuhi mao ang atong dulaanan. Ang atong tumong mao ang pagkat-on sa paghigugma sa Dios ug sa paghatod nianang sama nga gugma ngadto sa atong isigkatawo. Ania kita nagkinabuhi sumala sa Iyang balaod ug nagtukod sa gingharian sa Dios. Ania kita sa pagtukod, pagbayaw, makiangayong pagtagad, ug pagdasig sa tanang mga anak sa Langitnong Amahan.

Sa dihang gitawag ako isip usa ka General Authority, napanalanginan ako nga matudloan sa daghang mga senior nga Kaigsoonan sa Simbahan. Usa ka adlaw nakahigayon ako sa pagdrayb ni Presidente James E. Faust ngadto sa stake conference. Atol sa mga oras nga diha mi sa sakyanan, si Presidente Faust migahin og panahon sa pagtudlo kanako sa pipila ka importanting mga baruganan mahitungod sa akong buluhaton. Iyang gipasabut kon unsa ka maabi-abihon ang mga miyembro sa Simbahan, ilabi na ngadto sa mga General Authority. Miingon siya, “Tagdon ka nila sa hilabihan ka mabination. Maanindot nga butang ang ilang isulti mahitungod kanimo.” Mikatawa siya og gamay ug miingon, “Dieter, pasalamati kini. Apan ayaw gayud og pagpadala sa negatibong paagi niini.”

Usa kana ka maayong leksyon alang kanatong tanan, mga igsoon, sa bisan unsang calling o sitwasyon sa kinabuhi. Mahimo kitang magpasalamat sa atong kahimsog, katigayunan, mga kabtangan, o posisyon, apan kon magsugod kita sa pagpadala niini—kon malinga kita sa atong kahimtang; kon mag-focus kita sa kaugalingon natong importansya, gahum, o reputasyon; kon magkinabuhi kita sumala sa unsay gituohan sa uban kanato ug motuo sa unsay gisulti sa uban mahitungod kanato—magsugod diha ang problema; diha ang garbo magsugod sa paghaylo.

Adunay daghang pahimangno mahitungod sa garbo diha sa mga kasulatan: “Tungod sa pagka-mapahitas-on modangat lamang ang panagbingkil: apan sa maayong tinambagan mao ang kaalam.”¹⁰

Si Apostol Pedro mipasidaan nga ang “Ang Dios magabatok sa mga mapahitas-on, apan sa mga mapaubsanon siya magahatag og grasya.”¹¹ si Mormon mipasabut, “Walay madawat sa atubangan sa Dios, gawas sa maaghup ug mapainubsanon nga kasingkasing.”¹² Ug sa plano, ang Ginoo mipili “sa ginapakaboang sa kalibutan aron sa pagpakaulaw sa mga manggialamon.”¹³ Gihimo kini sa Ginoo aron sa pagpakita nga ang Iyang kamot anaa sa Iyang buluhaton, basin unya og kita “mosalig sa gahum sa tawo.”¹⁴

Kita mga sinugo sa atong Ginoo ug Manluluwas, si Jesukristo. Wala kita hatagi sa priesthood aron sa pagdawat og pasidungog ug magtagbaw sa pagdawat og mga pagdayeg. Ania kita dinhi sa tinuoray nga pagtrabaho. Lakip kita sa dili kasarangan nga tahas. Gitawag kita sa pag-andam sa kalibutan alang sa pag-anhi sa Ginoo ug Manluluwas, si Jesukristo. Nagtinguha kita dili sa kaugalingon natong dungog apan sa pagdayeg ug sa paghimaya sa Dios. Nasayud kita nga ang kaugalingon natong ikatampo gamay ra; hinoon, kon atong gamiton ang gahum sa priesthood sa katarung, ang Dios makahimo og usa ka talagsaon ug katingalahang buhat nga mahitabo pinaagi sa atong mga paningkamot. Kinahanglan kitang magkat-on, sama kang Moises, “nga ang tawo walay bili”¹⁵ sa kaugalingon apan “sa Dios ang tanan mahimo.”¹⁶

Niini, sa tanang mga butang, si Jesukristo ang atong hingpit nga ehemplo. Sa laing bahin si Lucifer misulay sa pag-usab sa plano sa kaluwasan sa atong Amahan ug pag-angkon og dungog alang sa iyang kaugalingon, ang Manluluwas miingon, “Amahan, ang imong pagbuot mao ang matuman, ug ang himaya imo sa kahangturan.”¹⁷ Bisan pa sa Iyang hilabihan nga kahanas ug mga kalampusan, ang Manluluwas kanunay nga malumo ug mapaubsanon.

Mga igsoon, atong gihuptan “ang Balaan nga Pagkapari, sunod sa Kapunongan sa Anak sa Dios.”¹⁸ Mao kini ang gahum sa Dios nga gihatag sa tawo dinhi sa yuta sa paglihok alang Kaniya. Aron sa paggamit sa Iyang gahum, kinahanglang maningkamot kita nga mahimong sama sa Manluluwas. Nagpasabut kini nga sa tanang butang atong tinguhaon ang pagsunod sa kabubut-on sa Amahan, sama sa gibuhat sa Manluluwas.¹⁹ Nagpasabut kini nga atong ihatag ang tanang himaya ngadto sa Amahan, sama sa gibuhat sa Manluluwas.²⁰ Nagpasabut kini nga atong kalimtan ang atong kaugalingon alang sa pagserbisyo sa uban, sama sa gibuhat sa Manluluwas.

Ang garbo usa ka switch nga mopalong sa gahum sa priesthood.²¹ Ang pagpaubos mao ang switch sa pagpasiga niini.

Busa unsaon man nato sa pagbuntog kini nga sala sa garbo nga dayag kaayo ug makadaot? Unsaon man nato sa pagkahimong mapainubsanon?

Ingon og imposible ang pagpataas sa garbo kon ang atong mga kasingkasing mapuno sa gugmang putli. “Walay bisan usa nga makatabang niini nga buhat gawas kon siya magpaubos ug puno sa gugma.”²² Kon atong makita ang kalibutan sa atong palibut pinaagi sa lens sa tiunay nga gugma ni Kristo, magsugod kita og kasabut unsa ang pagpaubos.

Ang uban nagtuo nga ang pagpaubos usa ka pagpaantus sa kaugalingon. Ang pagpaubos wala magpasabut sa pagkombinsir sa atong kaugalingon nga kita walay pulos, walay kahulugan, o gamay ra og bili. Wala kini magpasabut sa paglimud o sa pagpugong sa mga talento nga gihatag sa Dios kanato. Dili nato madiskubrihan ang pagpaubos pinaagi sa dili kaayo paghunahuna sa atong kaugalingon, atong madiskubrihan ang pagpaubos pinaagi sa dili kaayo paghunahuna kabahin sa atong kaugalingon. Moabut kini samtang magbuhat kita sa atong buluhaton uban sa kinaiya sa pagserbisyo sa Dios ug sa atong isigkatawo.

Ang pagpaubos mogiya sa atong atensyon ug gugma ngadto sa uban ug ngadto sa katuyoan sa Langitnong Amahan. Ang garbo mohimo sa sukwahi niini. Ang garbo mokuha og enerhiya og kusog gikan sa mga atabay sa kahakog. Sa higayon nga mohunong kita sa pagpasulabi sa kaugalingon ug kalimtan ang kaugalingon alang sa pagserbisyo, ang atong garbo mominus ug anam-anam nga mamatay.

Minahal kong kaigsoonan, adunay daghan kaayong tawo nga nanginahanglan natong hunahunaon imbis ang atong kaugalingon. Ug palihug ayaw gayud kalimti ang inyong pamilya, ug inyong asawa. Adunay daghan kaayong paagi nga kita makaserbisyo. Wala kitay panahon sa pagkapuliki alang lamang sa atong kaugalingon.

Kaniadto aduna koy usa ka ganahan kaayo nakong gamiton nga ballpen atol sa akong panarbaho isip kapitan sa eroplano. Sa pagliso lamang sa lawas niini, makapili na ako og usa sa upat ka kolor. Ang ballpen walay reklamo kon gusto kong mogamit og pula kay sa blue. Wala kini moingon kanako nga, “Dili ako mosulat paglapas sa alas 10 sa gabii, atol sa baga nga gabon, o sa taas kaayong paglupad.” Ang ballpen wala moingon nga, “Gamita lamang ako alang sa importanting mga dokumento, dili sa inadlaw nga makapuol nga tahas.” Sa dakong pagsalig gihimo niini ang matag tahas nga akong gikinahanglan, bisan unsa man kini ka importante o dili. Kanunay kining andam sa pagserbisyo.

Sa sama nga paagi, kita mga himan sa mga kamot sa Dios. Kon anaa sa tukmang dapit ang atong kasingkasing, dili kita moreklamo kon ang gipabuhat kanato dili haum sa atong mga abilidad. Malipayon kitang moserbisyo sa bisan unsa nga gisugo. Kon kita mobuhat niini, ang Ginoo mogamit kanato sa mga paagi nga lapas sa atong panabut sa pagtuman sa Iyang buluhaton.

Tapuson ko kini uban sa mga pulong nga gikan sa dinasig nga mensahe ni Presidente Ezra Taft Benson 21 ka tuig nang milabay:

“Ang garbo mao ang dakong babag sa Zion.

“Kinahanglang unahon nato sa paglimpyo ang atong kaugalingon pinaagi sa pagbuntog sa garbo. …²³

“Kinahanglan kita nga ‘motugyan ngadto sa mga pagdani sa Balaang Espiritu,’ ug isalikway ang iyang ‘kinaiyanhon nga pagkatawo,’ ug mahimo nga ‘usa ka santos pinaagi sa pag-ula ni Kristo ang Ginoo,’ ug mahimo nga ingon sa ‘usa ka bata, manunuton, maaghup, mapainubsanon.’’ …²⁴

“Ang Dios makabaton og mapaubsanong mga tawo. … ‘Bulahan sila kinsa magpaubos sa ilang kaugalingon nga walay pagpugos sa pagpaubos.’ …²⁵

“Atong pilion ang pagpaubos. Mahimo nato kini. Nasayud akong makahimo kita.”²⁶

Minahal kong mga igsoon, atong sundon ang ehemplo sa atong Manluluwas ug molihok sa pagserbisyo kay sa magtinguha sa pagdayeg ug pasidungog sa tawo. Akong pag-ampo nga kita makahibalo ug mowagtang sa dili matarung nga garbo nga naa sa atong mga kasingkasing ug pulihan nato kini sa “pagkamatarung, pagkadiosnon, pagtuo, paghigugma, pagkamainantuson, [ug] pagkaaghup.”²⁷ Sa sagradong pangalan ni Jesukristo, amen.