Ang Tulo ka mga K sa Pagpili

Akong minahal nga mga kaigsoonan sa priesthood, ang akong kinasingkasing nga pag-ampo karong gabhiona mao nga matagamtaman nako ang panabang sa atong Langitnong Amahan sa pagpahayag niadtong mga butang nga akong gibati nga nadasig nga ipakigbahin kaninyo.

Naghunahuna ko bag-ohay lang kalabut sa mga pagpili ug sa mga sangputanan niini. Panagsa ra kaayo nga molabay ang oras sa adlaw nga dili kita mohimo og mga pagpili sa bisan unsa nga matang. Ang uban dili kaayo importante, ang uban mahinungdanon kaayo. Ang uban dili makahimo og kalainan sa mahangturong kahimtang sa mga butang, ug ang uban makahimo sa tanang kalainan.

Samtang namalandong ko sa nagkadaiyang mga aspeto sa pagpili, ako kining ibutang sa tulo ka mga kategorya: Una, ang katungod sa pagpili; ikaduha, ang kapangakohan sa pagpili; ug ikatulo, ang kapadulngan [mga resulta] sa pagpili. Ako kining gitawag nga tulo ka mga K sa pagpili.

Akong gihisgutan og una ang katungod sa pagpili. Mapasalamaton kaayo ko sa usa ka mahigugmaong Langitnong Amahan alang sa Iyang gasa sa kabubut-on, o ang katungod sa pagpili. Si Presidente David O. McKay, ikasiyam nga Presidente sa Simbahan, miingon, “Human sa pagtugyan sa kinabuhi mismo, ang katungod sa paggiya niana nga kinabuhi mao ang pinakaimportante nga gasa sa Dios ngadto sa tawo.”¹

Nasayud kita nga anaa na kanato ang atong kabubut-on sa wala pa kini nga kalibutan ug si Lucifer misulay sa pagkuha niini gikan kanato. Siya walay pagsalig sa baruganan sa kabubut-on o kanato ug nangatarungan alang sa pinugos nga kaluwasan. Miinsister siya nga gamit kini nga plano walay usa ang mawala, apan daw wala siya makabantay—o wala magpakabana—nga agig dugang, walay usa ang mahimong mas maalamon, mas lig-on, mas maloloy-on o mas mapasalamaton kon ang iyang plano mao ang nasunod.

Kita kinsa mipili sa plano sa Manluluwas nasayud nga kita mohimo og usa ka makuyaw, lisud nga panaw, kay maglakaw man kita sa mga dalan sa kalibutan ug makasala ug madagma, nga makapahilayo kanato gikan sa atong Amahan. Apan ang Unang Natawo sa Espiritu mihalad sa Iyang kaugalingon isip usa ka sakripisyo sa pag-ula alang sa mga sala sa tanan. Pinaagi sa dili mapahayag nga pag-antus nahimo Siyang ang Bantugang Manunubos, ang Manluluwas sa tanang katawhan, sa ingon nakahimong posible alang sa atong malampusong pagbalik ngadto sa atong Amahan.

Si propeta Nephi nagsulti kanato, “Busa, ang mga tawo gawasnon sumala sa unod; ug ang tanan nga mga butang gihatag kanila diin angay ngadto sa tawo. Ug sila gawasnon sa pagpili sa kalingkawasan ug sa kinabuhi nga dayon, pinaagi sa halangdon nga Tigpataliwala sa tanan nga mga tawo, o pagpili sa pagkabihag ug sa kamatayon, sumala sa pagkabihag ug sa gahum sa yawa; kay siya nagtinguha nga ang tanan nga mga tawo unta mahimo nga mauyamot sama ngadto kaniya.”²

Mga kaigsoonan, sulod sa mga limitasyon sa atong bisan unsang kahimtang, kanunay kitang adunay katungod sa pagpili.

Sunod, uban sa katungod sa pagpili moabut ang kapangakohan sa pagpili. Dili kita mahimong anaa sa tunga; walay dapit diha sa tunga. Ang Ginoo nasayud niini; si Lucifer nasayud niini. Samtang nagpuyo pa kita niini nga yuta, si Lucifer ug ang iyang mga kaubanan dili gayud mobiya sa paglaum nga maangkon ang atong mga kalag.

Ang atong Langitnong Amahan wala mopasugod kanato sa atong mahangturong panaw nga wala maghatag og mga pamaagi diin makadawat kita og gikan Kaniya nga hinatag sa Dios nga giya aron sa pag-abag sa atong luwas nga pagbalik sa katapusan sa mortal nga kinabuhi. Ako namulong mahitungod sa pag-ampo. Ako namulong usab mahitungod sa mga paghunghong gikan nianang ligdong, hinay nga tingog sa sulod sa matag usa kanato, ug wala nako kalimti ang balaang mga kasulatan, nga gisulat sa mga manlalawig kinsa malampusong nakalawig sa mga dagat nga kinahanglan gayud usab natong labangon.

Ang matag usa kanato miabut niini nga yuta uban sa tanang mga himan nga gikinahanglan aron makahimo og sakto nga mga pagpili. Si propeta Moroni nagsulti kanato, “Ang Espiritu ni Kristo gihatag ngadto sa matag tawo, siya masayud sa maayo gikan sa dautan.”³

Kita gilibutan—gani usahay giataki—sa mga mensahe sa yawa. Paminaw sa pipila niini; kini walay duda pamilyar kaninyo: “Ang paggamit lang niini og kausa dili makahimo og kalainan.” “Ayaw kabalaka; walay usa ang makahibalo.” “Makahunong ka sa pagpanigarilyo o pag-inum o paggamit og mga druga bisan kanus-a nimo gusto.” “Ang tanan nagbuhat niini, mao nga dili kana ingon niana ka makadaut.” Ang mga bakak walay kinutuban.

Bisan kon sa atong panaw kita makasugat og nagsanga-sanga nga agianan ug magliko-liko diha sa dalan, dili gayud kita makatugot sa pagsimang diin mahimong dili na gayud kita makabalik pa. Si Lucifer, kanang hanas na kaayo sa pagpanglingla, nagdani sa wala magduda palayo sa luwas nilang napili nga dalan, palayo sa tambag sa mahigugmaong mga ginikanan, palayo sa kasiguroan sa mga pagtulun-an sa Dios. Wala lang siya magtinguha sa nianang gitawag og mga walay pulos sa katilingban; siya nagtinguha kanatong tanan, lakip na ang labing pinili sa Dios. Si Haring David naminaw, nagduha-duha, ug dayon misunod ug napukan. Mao usab si Cain sa sayong kapanahonan ug si Judas Iscariote sa kaulahiang panahon. Ang iyang mga pamaagi makapalingla; ang iyang mga biktima, daghan kaayo.

Atong mabasa sa 2 Nephi: “Ang uban siya mohupay, ug mopakatulog kanila ngadto sa kalibutanon nga kasiguroan.”⁴ “Ang uban siya moulog-ulog, ug mosulti kanila nga walay impyerno … hangtud siya mogunit kanila uban sa iyang makalilisang nga mga kadena.”⁵ “Ug sa ingon ang yawa motikas sa ilang mga kalag, ug modala kanila nga mabinantayon paingon sa impyerno.”⁶

Kon mag-atubang kita og mahinungdanong mga pagpili, unsaon man nato sa paghukom? Mouyon ba kita sa saad sa temporaryo nga kalingawan? Sa atong mga gana ug mga kahinam? Sa pagpamugos sa atong isigkatawo?

Dili kita angayang makit-an nga ingon kawalay abilidad sa paghimo og desisyon sama ni Alice sa Alice in Wonderland ni Lewis Carroll. Inyong mahinumduman nga miabut siya sa usa ka kinasang-an nga adunay duha ka dalan sa iyang atubangan, ang matag usa padulong sa managlahi nga direksyon. Giatubang siya sa iring nga si Cheshire, kinsa gipangutana ni Alice, “Hain nga dalan ang akong subayon?”

Ang iring mitubag, “Depende kana kon asa ka gustong mopaingon. Kon wala ka masayud asa ka paingon, dili igsapayan kon hain nga dalan ang imong subayon.”⁷

Dili sama ni Alice, kitang tanan nasayud kon asa kita gustong moadto, ug kini makahimo og kalainan kon asa nga dalan kita moadto, kay pinaagi sa pagpili sa atong dalan, atong gipili ang atong padulngan.

Ang mga desisyon kanunay anaa sa atong atubangan. Aron sa paghimo niini sa maalamong paagi, gikinahanglan ang kaisug—ang kaisug nga mosulti og dili, ang kaisug nga mosuti og oo. Ang mga desisyon mao ang motino sa kapalaran.

Nangamuyo ako kaninyo sa paghimo og determinasyon dinhi mismo, karon mismo, nga dili mosimang gikan sa dalan nga padulong ngadto sa atong tumong: kinabuhing dayon uban sa atong Amahan sa Langit. Kauban niana nga tul-id ug tinuod nga dalan adunay uban pang mga tumong: misyonaryo nga pagserbisyo, kaminyoon sa templo, pagkaaktibo diha sa Simbahan, pagtuon sa kasulatan, pag-ampo, buhat sa templo. Adunay dili maihap nga angayan nga mga tumong nga kab-uton samtang nagbiyahe kita sa kinabuhi. Ang gikinahanglan mao ang atong pasalig sa pagkab-ot niini.

Sa katapusan, mga kaigsoonan, ako mamulong mahitungod sa kapadulngan [mga resulta] sa pagpili. Ang tanan sa atong mga pagpili adunay mga sangputanan, ang uban niini adunay gamay o walay kalabutan sa atong mahangturong kaluwasan ug ang uban niini adunay kalabutan sa tanan.

Nagsul-ob man kamo og T-shirt nga green o blue dili kini makahimo og kalainan sa ngadto-ngadto. Apan, kon makahukom kamo sa pag-on sa inyong computer nga modala ninyo ngadto sa pornograpiya makahimo kini sa tanang kalainan sa inyong kinabuhi. Nakahimo na kamo og usa ka lakang palayo sa higpit, luwas nga dalan. Kon ang usa ka higala mopugos kaninyo sa pag-inum og alkohol o sa pagsulay og druga ug monunot kamo sa pagpamugos, misimang na kamo diin mahimong dili na kamo makabalik pa. Mga kaigsoonan, ma-12 anyos man kita nga mga deacon o hingkod nga mga high priest, nameligro kita. Unta atong i-focus ang atong mga mata, atong mga kasingkasing, ug atong determinasyon nianang tumong nga mahangturon ug angayan sa bisan unsa nga bugti nga atong ibayad, bisan unsa pa man nga sakripisyo ang gikinahanglan natong himoon aron makab-ot kini.

Walay tintasyon, walay pagpamugos, walay pagdani ang makabuntog kanato gawas kon tugutan nato kini. Kon mohimo kita sa sayop nga pagpili, wala kitay laing mabasol gawas sa atong kaugalingon. Si Presidente Brigham Young makausa mipahayag niini nga kamatuoran pinaagi sa pagpasabut gamit ang iyang kaugalingon. Miingon siya, “Kon si Brother Brigham mosubay sa sayop nga agianan, ug dili makasulod sa Gingharian sa langit, walay tawo ang mabasol gawas ni Brother Brigham. Ako lamang ang bugtong tawo sa langit, sa yuta, o sa impyerno nga mabasol.” Mipadayon siya, “Kini alang usab sa tanang mga Santos sa Ulahing mga Adlaw. Ang kaluwasan usa ka indibidwal nga paningkamot.”⁸

Si Apostol Pablo mipasalig kanato, “Kaninyo walay nakaabut nga bisan unsang pagpanulay nga dili maantus sa tawo. Ang Dios kasaligan, ug dili niya itugot kamo nga pagapanulayon sa labaw sa inyong kaarangan, apan uban sa pagpanulay siya magatagana usab ug lutsanan sa paglikay, aron kamo makahimo sa pag-antus niini.”⁹

Kitang tanan nakahimo og sayop nga mga pagpili. Kon wala pa nato makorihii kana nga mga pagpili, mopasalig ako kaninyo nga adunay paagi sa pagbuhat sa ingon. Ang proseso gitawag og paghinulsol. Nangamuyo ako kaninyo sa pagkorihir sa inyong mga sayop. Ang atong Manluluwas namatay aron sa paghatag kaninyo ug kanako nianang balaan nga gasa. Bisan tuod ang dalan dili sayon, ang saad tinuod: “Bisan pa ang inyong mga sala mapula, sila pagapution ingon sa nieve.”¹⁰ “Ug Ako, ang Ginoo, dili na mahinumdom kanila.”¹¹ Ayaw ibutang sa peligro ang inyong kinabuhing dayon. Kon nakasala kamo, ang ingon ka dali sa pagsugod ninyo sa pagbalik, ingon usab ka dali nga inyong makaplagan ang nindot nga kalinaw ug kalipay nga moabut uban sa milagro sa pagpasaylo.

Mga kaigsoonan, kamo adunay halangdon nga kaliwatan, Ang kinabuhing dayon sa gingharian sa atong Amahan mao ang inyong tumong. Ang ingon nga tumong dili makab-ot sa usa ka mahimayaong pagsulay apan mao ang resulta sa tibuok kinabuhi nga pagkamatarung, usa ka pagtigum sa maalamong mga pagpili, gani pagkamakanunayon sa katuyoan. Sama sa bisan unsang tinud-anay nga bililhon, ang ganti nga kinabuhing dayon nagkinahanglan og paningkamot.

Ang mga kasulatan klaro:

“Magabantay kamo sa pagbuhat … sumala sa gisugo kaninyo sa Ginoo nga inyong Dios: dili kamo motipas ngadto sa tuo ni ngadto sa wala.

“Magalakaw kamo sa tanan nga dalan nga gisugo kaninyo sa Ginoo nga inyong Dios.”¹²

Agig panapos akong ipakigbahin kaninyo ang usa ka ehemplo mahitungod sa usa ka tawo kinsa determinado sa sayong pangedaron sa kinabuhi kon unsa ang iyang mga tumong. Nagpasabut ako kang Brother Clayton M. Christensen, usa ka miyembro sa Simbahan kinsa usa ka propesor sa business administration sa business school sa Harvard University.

Sa dihang 16 anyos pa siya, si Brother Christensen nakahukom, lakip sa uban pang mga butang, nga dili siya modula kon Dominggo. Mga katuigan ang milabay, sa dihang mieskwela siya sa Oxford University sa England, midula siya nga sentro sa team sa basketbol. Nianang tuiga sila adunay season nga walay pildi ug nakasulod sa torneyo sa basketbol sa Britain, nga susama sa torneyo sa NCAA sa Estados Unidos.

Ilang nadaug ang ilang mga dula sa torneyo nga sayon ra, nga nakasulod sa final four. Nianang higayuna nga si Brother Christensen mitan-aw sa eskedyul ug, sa iyang kasagmuyo, nakita nga ang katapusang dula sa basketbol gi-eskedyul nga dulaon sa usa ka Dominggo. Siya ug ang iyang team nagtrabaho og maayo aron makaabut kon asa sila, ug siya ang starting center. Miadto siya sa iyang coach sa paghisgut kalabut sa iyang kalibug. Ang iyang coach wala mosabut ug gisultihan si Brother Christensen nga gilauman niya nga modula siya.

Sa wala pa ang katapusang dula, bisan pa man niana, adunay semifinal game. Walay swerte, ang back-up center napiangan sa iyang abaga, nga nakadugang sa pressure ni Brother Christensen nga modula sa final game. Miadto siya sa iyang kwarto sa hotel. Siya miluhod. Siya nangutana sa iyang Langitnong Amahan kon okay ra ba, kausa ra bitaw, nga modula niana nga game pagka Dominggo. Miingon siya nga sa wala pa siya mahuman sa pag-ampo, nakadawat siya og tubag: “Clayton, unsa pa may imong gipangayo kanako? Nahibalo na ka sa tubag.”

Miadto siya sa iyang coach, misulti kaniya kon unsa siya kaguol nga dili siya makadula sa final game. Dayon miadto siya sa mga miting sa Dominggo sa local nga ward samtang ang iyang team nagdula nga wala siya. Nag-ampo siya pag-ayo alang sa ilang kalampusan. Nakadaug sila.

Kanang mahinungdanon, lisud nga desisyon gihimo sobra na sa 30 ka tuig ang milabay. Si Brother Christensen miingon nga sa paglabay sa katuigan, iya kining gikonsiderar nga usa sa labing importante nga mga desisyon nga iyang nahimo sukad. Sayon ra gayud unta ang pag-ingon, “Kahibalo mo, sa kinatibuk-an, ang pagbalaan sa adlawng Igpapahulay sakto nga sugo, apan sa akong eksepsyonal nga mga kahimtang, okay ra, kausa ra bitaw ni, kon dili ni nako buhaton.” Apan, miingon siya nga ang iyang tibuok kinabuhi napuno sa walay katapusang eksepsyonal nga mga kahimtang, ug kon mihimo pa siya og usa ka eksepsyon bisan kausa ra, nan sa sunod higayon nga adunay lain nga moabut nga labihan ka grabe ug ka kritikal, mahimong mas sayon ang paghimo pag-usab og eksepsyon Ang leksyon nga iyang nakat-unan mao nga mas sayon ang pagsunod sa mga sugo 100 porsyento sa matag higayon kay sa 98 porsyento matag higayon.¹³

Akong minahal nga mga kaigsoonan, unta mapuno kita sa pasalamat alang sa katungod sa pagpili, modawat sa kapangakohan sa pagpili ug mas mahunahunaon sa kapadulngan [mga resulta] sa pagpili. Isip mga tighupot sa priesthood, kitang tanan nga nahiusa mahimong sarang alang sa magiyahong impluwensya sa atong Langitnong Amahan samtang nagpili kita sa mabinantayon ug sa saktong paagi. Naapil kita sa buhat ni Ginoong Jesukristo. Kita, sama niadtong sa karaang panahon, mitubag sa Iyang tawag. Nagbuhat kita sa Iyang buluhaton. Molampus kita sa balaanong mando: “Panaghinlo kamo sa inyong kaugalingon, kamo nga nanagdala sa mga sudlanan sa Ginoo.”¹⁴ Nga kini unta mahitabo mao ang akong balaanon ug mapainubsanong pag-ampo, sa pangalan ni Jesukristo, atong Agalon, amen.