Paghinlo sa Pinakasulod sa Templo

Kini nga kinatibuk-ang komperensya gipahigayon sa usa ka panahon nga adunay daghan kaayo nga kalibug ug mga peligro nga ang atong mga kabatan-onan naglibug na unsaon nila sa pagpakabuhi. Gipasidan-an nang daan pinaagi sa mga pagpadayag nga maingon ani gayud, ang mga propeta ug mga apostoles sa kanunay gipakitaan unsa ang buhaton.

Ang Ginoo mipadayag kang Propeta Joseph Smith “nga ang matag tawo unta mamulong sa ngalan sa Dios nga Ginoo, gani ang Manluluwas sa kalibutan.”¹ Sa dihang gipahiuli ang mga yawe, gihatag nila ang awtoridad sa priesthood aron maanaa kini sa matag panimalay pinaagi sa mga apohan nga lalaki, mga amahan, ug sa mga anak nga lalaki.

Kinse ka tuig nang milabay, uban sa kalibutan nga anaa sa kasamok, ang Unang Kapangulohan ug ang Korum sa Napulog Duha ka mga Apostoles mihatag sa “Ang Pamilya: Usa Ka Pamahayag ngadto sa Kalibutan,” ang ikalima nga pamahayag sa kasaysayan sa Simbahan. Kini nahimong sarang sumala sa eskriptural nga pagpasabut isip usa ka pagpadayag, usa ka giya nga angay basahon ug sundon sa mga miyembro sa Simbahan.

Sa usa ka tipik kini nag-ingon: “Kami, ang Unang Kapangulohan ug Konseho sa Napulog Duha ka mga Apostoles sa Ang Simbahan ni Jesukristo sa mga Santos sa Ulahing mga Adlaw, sa maligdong nga paagi mopahayag nga ang kaminyoon tali sa usa ka lalaki ug usa ka babaye gi-orden sa Dios ug ang pamilya mahinungdanon ngadto sa plano sa Tiglalang alang sa walay katapusan nga destinasyon sa Iyang mga anak.”²

“Ang mga Dios nanaog aron maghimo og tawo diha sa ilang kaugalingon nga hitsura, diha sa hitsura sa mga Dios nag-umol sila kanila, lalaki ug babaye sila nag-umol kanila.

“Ug ang mga Dios miingon: Kita mopanalangin kanila. Ug … kita mosugo kanila nga magmabungahon ug magpasanay, ug mopuno sa yuta, ug mobuntog niini.”³

Kini nga kasugoan wala pa gayud mausab.

“Ug kita mosulay kanila dinhi, aron pagsuta kon sila mobuhat ba sa tanan nga mga butang bisan unsa ang isugo sa Ginoo nga ilang Dios ngadto kanila.”⁴

Gituyo kini nga kita magmalipayon, kay “ang mga tawo naingon, nga unta sila makabaton og hingpit nga kalipay.”⁵

Si Lehi mitudlo nga ang mga tawo gawasnon ug kinahanglan nga “gawasnon … sa pagbuhat alang sa ilang mga kaugalingon ug nga dili pagaaghaton, gawas kon kini mao ang silot sa balaod sa mahinungdanon ug katapusan nga adlaw.”⁶

Ang karaan nga panultihon nga, “Ang Ginoo mobotar alang kanako, ug si Lucifer mobotar batok kanako, apan ang akong boto maoy mahinungdanon,” naghulagway og usa ka doktrinal nga kasiguroan nga ang atong kabubut-on mas gamhanan kaysa kabubut-on sa yawa. Ang kabubut-on bililhon. Kita sa binuang, sa binuta nga paagi mohatag niini, apan dili kini mapugos sa pagkuha gikan kanato.

Usab adunay karaan na kaayo nga pangatarungan, “Gipugos man gud ko sa yawa nga buhaton kadto.” Dili kaayo! Siya makalingla kaninyo ug makalipat kaninyo, apan siya walay gahum nga mopugos kaninyo o ni bisan kinsa sa paglapas o sa paghimo nga diha na lang kamo sa pagpakasala.

Ang pagkahimong kasaligan sa gahum sa paglalang og kinabuhi nagdala og hilabihang kalipay ug makuyaw kaayo nga mga pagtintal. Ang gasa sa mortal nga kinabuhi ug ang kapasidad sa paghimo og laing mga kinabuhi usa ka balaang panalangin. Pinaagi sa matarung nga paggamit niini nga gahum, ingon nga wala nay lain pa, mahimo kita nga mopaduol ngadto sa atong Amahan sa Langit ug makasinati og kahingpitan sa himaya. Kini nga gahum dili usa ka gamay nga bahin sa plano sa kalipay. Kini mao ang yawe—ang mao gayud nga yawe.

Bisan kon gamiton man nato kini nga gahum subay sa gikinahanglan sa mahangturon nga mga balaod o isalikway ang balaan nga katuyoan niini kini sa hangtud ang motino kon unsa kita sa umaabut. “Wala ba kamo masayud nga kamo templo sa Dios, ug nga ang Espiritu sa Dios nagapuyo diha sa sulod kaninyo?”⁷

Adunay usa ka butang nga makapagawasnon kaayo kon ang usa ka tawo motino sa iyang kaugalingong kabubut-on nga magmasulundon ngadto sa atong Amahan ug atong Dios ug mopahayag nianang pagkaandam nga mag-ampo ngadto Kaniya.

Kon kita motuman, makatagamtam kita niini nga mga gahum nga anaa sa pakigsaad sa kaminyoon. Gikan sa atong mga tuburan sa kinabuhi moabut ang atong mga anak, ang atong pamilya. Ang gugma tali sa bana ug asawa mahimong magkanunayon ug magdala og katumanan ug katagbawan sa tanang adlaw sa atong kinabuhi.

Kon ang usa ka tawo gihikawan man niini nga mga panalangin dinhi sa mortalidad, ang saad mao nga sila hatagan niini sa umaabut nga kalibutan.

Ang gugmang putli naglaum nga human lamang sa pagsaad og mahangturon nga pag-unong, sa usa ka legal ug pinasubay sa balaod nga seremonya, ug sa kasagaran human ang ordinansa sa pagbugkos sulod sa templo, kana nga makahatag og kinabuhi nga mga gahum gamiton alang sa hingpit nga pagpahayag sa gugma. Kini pagaambitan ug ngadto lamang tali sa lalaki ug babaye, bana ug asawa, uban niana nga tawo nga maoy atong kompanyon sa kahangturan. Niini ang ebanghelyo tin-aw kaayo.

Kita gawasnon sa pagbaliwala sa mga sugo, apan kon ang mga gipadayag nagsulti sa ingon niana nga pintok nga mga pulong, sama sa “dili ka,” angay kita nga mohatag og pagtagad.

Ang yawa masinahon ngadto sa tanan kinsa adunay gahum sa pagmugna og kinabuhi. Si Satanas dili makamugna og kinabuhi; siya dili makapaanak. “Kay siya nagtinguha nga ang tanan nga mga tawo unta mahimo nga mauyamot sama ngadto kaniya.”⁸ Siya nagtinguha sa pagpaut-ut sa matarung nga paggamit niining makahatag og kinabuhi nga gahum pinaagi sa pagtintal kaninyo ngadto sa mga imoral nga pakigrelasyon.

Ang Ginoo migamit sa ekspresyon nga “sama sa” aron sa paghimo og hulagway nga masabtan sa Iyang mga sumusunod, sama sa:

“Ang gingharian sa langit sama sa usa ka magpapatigayon.”⁹

“Ang gingharian sa langit sama sa usa ka bahandi nga nalubong ilalum sa usa ka uma.”¹⁰

Sa atong panahon, ang makalilisang nga impluwensya sa pornograpiya sama sa usa ka sakit nga mikuyanap sa tibuok kalibutan, mitakboy dinhi sa usa ug ngadto sa usa, nagpunay og sulay sa pagdasdas sa matag panimalay, labi na gayud ngadto sa bana ug amahan. Ang epekto niini nga sakit mahimo nga, sa walay palad kasagaran, makamatay sa pagka-espirituhanon. Si Lucifer nagtinguha sa pagbalda “sa dako nga laraw sa katubsanan,”¹¹ “sa mahinungdanon nga laraw sa kalipay.”¹²

Ang pornograpiya, sa kanunay, mopasibug sa Espiritu ni Kristo ug mopakgang sa komunikasyon tali sa atong Langitnong Amahan ug sa Iyang mga anak ug mobalda sa malumo nga relasyon tali sa bana ug asawa.

Ang priesthood naghupot sa kinatas-an nga gahum. Kini makapanalipod kaninyo gikan sa makadaot nga pornograpiya—ug kini makadaot gayud—kon kamo monunot sa impluwensya niini. Kon ang usa masulundon, ang priesthood mopakita unsaon sa pagputol sa usa ka kinaiya ug gani pagpapas sa usa ka pagkaadik. Ang mga tighupot sa priesthood aduna nianang awtoridad ug kinahanglan nga gamiton kini sa pag-abog niini nga impluwensya.

Kami mopataas sa alarma ug mopahimangno sa mga miyembro sa Simbahan sa pagmata ug pagsabut sa unsay nanghitabo. Mga ginikanan, pagmaabtikon, kanunay magmabinantayon basin unya ang kadautan mohulga sa inyong tibuok pamilya.

Kita nagtudlo og sumbanan sa moral nga pamatasan nga manalipod kanato gikan sa daghang ipanghulip ni Satanas isip pangkontra sa kaminyoon. Angay ninyong masabtan nga ang bisan unsa nga pagdani sa pagsulod ngadto sa bisan unsang relasyon nga dili uyon sa baruganan sa ebanghelyo sayop gayud. Gikan sa Basahon ni Mormon atong nakat-onan nga “ang pagkadautan dili mahitabo nga mahimo nga kalipay.”¹³

Ang uban nagtuo nga ingon niana na gayud silang daan ug dili na sila makabuntog sa unsay ilang gituohan nga dala sa ilang pagkatawo nga mga kalagmitan kabahin sa pagkadili putli ug dili natural. Dili kaayo! Ngano nga buhaton man kana sa atong Langitnong Amahan ngadto ni bisan kinsa? Hinumdumi Siya ang atong Amahan.

Si Pablo misaad nga “Ang Dios … dili motugot nga kamo pagapanulayon sa labaw sa inyong kaarangan; apan uban sa pagpanulay siya magatagana usab og lutsanan sa paglikay, aron kamo makahimo sa pag-antus niini.”¹⁴ Kamo makahimo, kon buot ninyo, putla kana nga kinaiya ug buntuga ang pagkaadik ug palayo gikan nianang dili takus alang ni bisan kinsa nga miyembro sa Simbahan. Sama sa pagpahimangno ni Alma, kita kinahanglan nga “magbantay ug mag-ampo sa kanunay.”¹⁵

Si Isaias mipahimangno, “Alaut kanila nga nagangalan sa dautan nga maayo, ug sa maayo nga dautan; nga nagabutang sa kangitngit nga ilis sa kahayag, ug sa kahayag nga ilis sa kangingit; ug nagabutang sa mapait nga ilis sa matam-is, ug sa matam-is nga ilis sa mapait!”¹⁶

Mga katuigan nang milabay, mibisita ako og usa ka eskwelahan sa Albuquerque. Ang magtutudlo misugilon kanako kabahin sa usa ka batan-on nga nagdala og gamayng iring sa klase. Kon mahunahuna ninyo, kadto mibalda sa tanan. Iyang gipagunitan kaniya ang gamayng iring sa atubangan sa mga bata.

Maayo ra ang nahitabo hangtud ang usa sa mga bata nangutana, “Laki ba kana nga iring o baye nga iring?”

Kay dili gusto mosulod niadto nga leksyon, ang magtutudlo miingon, “Dili na kana importante. Kana usa lang ka gamayng iring.”

Apan sila namugos. Sa katapusan, usa ka bata miingon, “Nakahibalo ko unsaon sa pag-ila.”

Tungod kay dili na makalikay, ang magtutudlo miingon, “Unsaon man nimo pag-ila?”

Ug ang estudyante mitubag, “Pwede nato kana nga botohan!”

Kamo tingali magkatawa niini nga sugilanon, apan kon dili kita magbantay, anaa karon kadtong kinsa dili lang kay mouyon apan mopasiugda nga botohan ang pag-usab sa mga balaod aron mahimong legal ang imoralidad, nga daw ang pagboto makahimo sa pag-usab sa mga desinyo sa mga balaod sa Dios ug kinaiyahan. Ang usa ka balaod batok sa kinaiyahan imposible nga mapatuman. Sama pananglit, ang pagboto kaha aron pagwagtang sa balaod sa gravity adunay kaayohan nga mahimo?

Adunay moral ug pisikal nga mga balaod “dili mausab nga sugo didto sa langit sa wala pa ang mga katukuran niini nga kalibutan” kana dili gayud mahimong usbon.¹⁷ Ang kasaysayan nagbalik-balik sa pagpakita nga ang mga moral nga sumbanan dili mausab pinaagi sa pakigsangka ug dili mausab pinaagi sa balota. Ang paghimong legal sa butang nga sayop nang daan o dautan dili makapugong sa kasakitan ug mga silot nga nagsunod sama sa kasigurado sa pag-abut sa kagabhion human sa adlaw.

Dili igsapayan ang mga pagbatok, kita determinado nga magpadayon sa agianan. Atong huptan ang mga baruganan ug mga balaod ug mga ordinansa sa ebanghelyo. Kon sila nasaypan sa pagsabut sa inosenting paagi o tinuyo man, wala tay mahimo. Kita dili mahimong makausab; dili nato usabon ang moral nga sumbanan. Kita dali ra nga mawala sa atong dalan kon kita mosupak sa mga balaod sa Dios. Kon dili nato panalipdan ug amumahon ang atong pamilya, ang sibilisasyon ug ang atong mga kagawasan mahanaw gayud.

“Ako, ang Ginoo, mapugos sa pagtuman kon kamo mobuhat sa unsa nga Ako misulti; apan kon kamo dili mobuhat sa unsa nga Ako misulti, kamo dili makaangkon og saad.”¹⁸

Ang matag kalag nga nasulod sa bilanggoan sa kasal-anan ug pagkahiwi adunay yawe ngadto sa ganghaan. Ang yawe gimarkahan og “paghinulsol.” Kon kamo nakahibalo unsaon sa paggamit niini nga yawe, ang kaaway dili makahupot kaninyo. Ang duha ka baruganan sa paghinulsol ug pagpasaylo labaw og kalig-on kaysa bantugang gahum sa maninintal. Kon kamo nabugkos sa usa ka kinaiya o sa pagkaadik nga dili angay, kamo kinahanglan nga mohunong sa pamatasan nga makadaut. Ang mga anghel motudlo kaninyo,¹⁹ ug ang mga lider sa priesthood mogiya kaninyo agi nianang mga malisud nga panahon.

Wala kini bisan asa nga ang kamanggihatagon ug pagkamabination ug ang kalooy sa Dios mas gipakita kaysa paghinulsol. Inyo bang nasabtan ang hingpit nga makahinlo nga gahum sa Pag-ula nga gibuhat sa Anak sa Dios, atong Manluluwas, atong Manunubos? Siya miingon, “Ako, ang Dios, nag-antus niini nga mga butang alang sa tanan, nga sila unta dili mag-antus kon sila maghinulsol.”²⁰ Nianang langitnong buhat sa gugma, ang Manluluwas mibayad sa mga silot alang sa atong mga sala aron kita dili na magbayad.

Alang niadtong kinsa tinuod nga nagtinguha niini, adunay dalan pabalik. Ang paghinulsol sama sa usa ka sabon nga panglaba. Bisan ang mituhop nga mga lama sa sala matangtang.

Ang mga tighupot sa priesthood nagdala uban kanila nianang tambal nga makatangtang sa grabe nga matang sa pornograpiya ug makahugas sa mga sala. Ang priesthood adunay gahum sa pag-abli sa mga impluwensya sa atong mga naandang kinaiya, bisan ang pagtangtang sa kadena sa pagkaadik, bisan unsa ka hugot ang pagkupot niini. Kini makaayo batok sa mga uwat sa nangagi nga mga sayop.

Wala akoy nahibaloan nga mas matahum ug makamaymay nga mga pulong sa tanang pinadayag gawas niini: “Tan-awa, siya kinsa naghinulsol sa iyang mga sala, ang mao gipasaylo, ug Ako, ang Ginoo, dili na mohinumdom kanila.”²¹

Usahay, bisan sa pagkahuman sa pagkumpisal ug pagbayad sa mga silot, ang pinakalisod nga bahin sa paghinulsol mao ang pagpasaylo sa kaugalingon. Kamo kinahanglan nga makahibalo nga ang pasaylo nagpasabut og pagpasaylo.

“Ingon sa kanunay nga ang akong mga katawhan maghinulsol Ako mopasaylo kanila sa ilang mga kalapasan batok kanako.”²²

Si Presidente Joseph Fielding Smith misugilon kanako kabahin sa usa ka nagbasol nga babaye nga naningkamot nga makakita sa iyang dalan pagawas sa usa ka imoral kaayo nga kinabuhi. Siya nangutana kaniya unsa ang angay niyang buhaton karon.

Agig tubag, siya mihangyo sa babaye sa pagbasa ngadto kaniya gikan sa Daan nga Tugon sa kasaysayan ni Lot ug sa asawa ni Lot kinsa nahimong haligi nga asin.²³ Unya siya nangutana sa babaye, “Unsa man ang leksyon niadto nga mga bersikulo alang kanimo?”

Siya mitubag, “Ang Ginoo molaglag niadtong kinsa mga dautan.”

Dili kaayo! Si Presidente Smith miingon nga ang leksyon alang niining naghinulsol nga babaye ug alang kaninyo mao kini ‘Ayaw paglingi sa luyo!”²⁴

Katingalahan, nga ang pinakayano ug pinakagamhanan nga pagsanta ug pag-ayo alang sa pornograpiya, o bisan unsa nga mahugaw nga buhat, mao ang pagbaliwala ug paglikay niini. Papasa gikan sa inyong hunahuna ang bisan unsa nga dili takus nga hunahuna nga mosulay sa paggamot. Kon makahukom na sa pagpabilin nga limpyo, inyo nga gipatigbabaw ang kabubut-on nga hinatag sa Dios. Ug unya, sa gitambag ni Presidente Smith, “Ayaw paglingi sa luyo.”

Ako mosaad nga sa inyong unahan adunay kalinaw ug kalipay alang kaninyo ug sa inyong pamilya. Ang labing mahinungdanong tumong sa tanang kalihokan sa Simbahan mao nga ang lalaki ug ang iyang asawa ug ilang mga anak magmalipayon diha sa panimalay. Akong iampo ang mga panalangin sa Ginoo nganha kaninya kinsa nakigbisog batok niining makalilisang nga kadaot, sa pagkaplag sa tambal nga anaa alang kanato sa priesthood sa Ginoo. Akong ihatag ang pagsaksi niana nga gahum sa pangalan ni Jesukristo, amen.