O Kanang Maliputon Nga Laraw sa Usa ka Dautan

Mga kaigsoonan, ang pagsugod sa panahon sa tinglarag dinhi sa Rocky Mountains nagdala uban niini og mahimayaong mga kolor sa mga dahon nga nangausab gikan sa pagka-green ngadto sa masilabon nga mga orange, mga pula, ug mga dalag. Sa panahon sa tinglarag ang tanang kinaiyahan anaa sa kahimtang sa kausaban, nangandam alang sa mabugnaw, mapig-ot nga kaanyag sa tingtugnaw.

Ang tinglarag usa ka labing makapahinam nga panahon alang sa mga tigpamasol og isda, kay mao kini ang panahon nga ang mga isda nadasig sa ingon og walay katagbawan nga pagpabusog aron sa pagpalig-on sa ilang mga lawas agi og pangandam sa kakulang sa mga pagkaon sa tingtugnaw.

Ang tumong sa tigpamasol og isda mao ang pagpakubit sa isda pinaagi sa inantigo nga pagpanglingla. Ang hanas nga mangingisda magkat-on sa kinaiya sa mga isda, kahimtang sa panahon, sulog sa tubig, ug ang mga matang sa insekto nga kaonon sa isda ug kanus-a kadto nga mga insekto mapiso. Siya sa kasagaran mohimo sa mga paon nga iyang gamiton. Nakahibalo siya nga kining artipisyal nga mga insekto nga gipaskan og gagmay nga mga taga kinahanglang hingpit nga makapanglingla tungod kay ang isda makaila bisan gamay kaayo nga sayop ug yam-iran lang ang pasol.

Kulba-hinam ang pagtan-aw sa isda nga molukso gikan sa tubig, motukob sa pasol ug makigbatok hangtud nga kini sa katapusan maluya ug mabira. Ang pakigsangka mao ang pagparang sa kahibalo ug kahanas sa mangingisda batok sa halangdong isda.

Ang paggamit sa artipisyal nga mga paon sa paglingla ug pagdakop sa isda usa ka ehemplo sa kasagaran nga paagi ni Lucifer sa pagtintal, paglingla, ug pagsulay sa paglit-ag kanato.

Sama sa tigpamasol og isda kinsa nakahibalo nga ang isda naagni sa kagutom, si Lucifer nakahibalo sa atong “kagutom,” o mga kahuyang ug motintal kanato pinaagi sa peke nga mga paon nga, kon kuhaon, maoy hinungdan nga kita mabira gikan sa sapa sa kinabuhi ngadto sa iyang walay kalooy nga impluwensya. Ug dili sama sa usa ka mangingisda kinsa modakop ug mobuhi sa isda nga walay kadaut balik ngadto sa dagat, si Lucifer dili boluntaryo nga mobuhi. Iyang tumong ang paghimo sa iyang mga biktima nga mauyamot sama kaniya.

Si Lehi miingon: “Ug tungod sa iyang [Lucifer] pagkahulog gikan sa langit, ug nahimo nga uyamut sa kahangturan, siya usab nagtinguha sa kauyamot sa tanan nga mga katawhan” (2 Nephi 2:18).

Akong idugang ang akong tingog karon ngadto sa mga tingog sa akong Kaigsoonan nga si Lucifer usa ka abtik ug maliputon nga espiritu. Ang usa sa nag-unang mga pamaagi nga iyang gigamit batok kanato mao ang iyang abilidad sa pagpamakak ug paglingla aron pagdani kanato nga ang dautan maayo ug ang maayo dautan. Gikan pa gayud sa sinugdanan didto sa halangdon nga Konseho sa Langit, si Satanas “nagtinguha sa paglaglag sa kabubut-on sa tawo, diin Ako, ang Ginoong Dios, mihatag ngadto kaniya. …

Ug siya nahimo nga Satanas, oo, gani ang yawa, ang amahan sa tanan nga mga bakak, sa pag-ilad ug pagbuta sa mga tawo, ug pagdala kanila nga ulipon sa iyang pagbuot” (Moises 4:3–4).

Ang pakig-away kabahin sa kabubut-on sa tawo nga hinatag sa Dios nagpadayon karon. Si Satanas ug ang iyang mga sumusunod nagbutang sa ilang mga paon libut kanato, sa panghinaut nga kita mawala ug motukob sa iyang mga paon aron kita iyang makabig pinaagi sa malinglahon nga pamaagi. Siya mogamit sa pagkaadik aron makawat ang kabubut-on. Sumala sa diksyonaryo, ang bisan unsang matang sa pagkaadik nagpasabut sa pagtugyan ngadto sa usa ka butang, sa ingon niini gibiyaan ang kabubut-on ug magpangita sa makadaot sa kinabuhi nga mga butang o kinaiya.¹

Ang mga tig-research nagsulti kanato nga adunay mekanismo sa atong utok nga gitawag og sentro sa kalingawan.² Kung kini mapaaktibo pinaagi sa pipila ka mga druga o mga kinaiya, kini mobuntog niana nga parte sa atong utok nga nagdumala sa atong gahum sa kabubut-on, paghukom, pangatarungan, ug moralidad. Kini mogiya sa usa ka naadik sa pagsalikway sa unsa nga nahibaloan niya nga matarung. Ug kon kini mahitabo man, nakakubit ang taga, ug si Lucifer ang magkontrol.

Si Satanas nakahibalo unsaon sa pagpahimulos ug paglit-ag kanato uban sa mga artipisyal nga mga kabtangan ug mga kinaiya sa lumalabay nga kalingawan. Ako nakamatikud sa kadako sa epekto kon ang usa manlimbasug nga mabalik ang pagkontrol, nga mahimo nga gawasnon gikan sa mga makapalaglag nga abuso ug pagkaadik, ug makuha pagbalik ang bili sa kaugalingon ug ka-independente.

Ang pipila sa pinaka makapaadik nga mga druga nga, kon abusuhon, makaapekto sa utok ug mowagtang sa kabubut-on nga naglakip sa nicotine; opioids–heroin, morphine ug uban pa nga mga painkillers; tranquilizers; cocaine; alkohol; marijuana; ug methamphetamines.

Mapasalamaton ako sa mga doktor nga nabansay sa pagresita og tukma nga mga tambal sa pagpahuwas sa kasakit ug pag-antus. Subo lang, sobra ra kadaghan dinhi sa atong komunidad karon, naglakip sa pipila sa atong kaugalingon nga mga miyembro, nangaadik ug dayon miabuso sa mga gipangresita nga mga tambal. Si Lucifer, ang amahan sa tanang bakak, nakahibalo niini ug migamit sa iyang impluwensya aron pagkawat sa kabubut-on sa usa ug pagsikop sa nang-abuso uban sa iyang makalilisang nga mga kadena (tan-awa sa 2 Nephi 28:22).

Bag-ohay lang nakigsulti ako sa usa ka sister kinsa anaa sa psychiatric unit sa usa ka lokal nga hospital. Iyang gipaambit kanako ang iyang subo nga biyahi gikan sa kompleto nga panghunahuna ug pisikal nga kahimsog, usa ka maanindot nga kaminyoon ug pamilya, ngadto sa sakit sa panghunahuna, dili maayo nga panglawas, ug ang pagkatibulaag sa iyang pamilya—nga ang tanan nagsugod sa pag-abuso sa usa ka giresita nga painkiller.

Duha ka tuig sa wala pa ang among panagsulti, nadaut ang iyang likod sa usa ka aksidente sa sakyanan. Ang iyang doktor miresita og tambal nga makahupay sa ingon og dili maagwanta nga kasakit. Nagtuo siya nga nagkinahanglan siya og mas labaw pa, mao nga naghimo-himo siya og mga resita ug sa katapusan midangop siya sa pagpamalit og heroin. Nisangput kini ngadto sa iyang pagkadakop ug pagkabilanggo. Ang iyang pagpakabuang sa druga maoy hinungdan sa pagkapakyas sa iyang kaminyoon. Ang iyang bana nakigdeborsyo kaniya ug miatiman sa mga anak. Siya misulti kanako nga gawas sa tabang sa pagpaminos sa iyang kasakit, ang mga druga mihatag usab og hamubo apan mausbawong pagbati sa pagmaya ug kaayohan. Pero ang matag dosis sa mga tambal molungtad lang og pipila ka oras, ug sa matag gamit ang kadugayon sa pagkahupay nagkamubo. Siya ningsugod pagtumar og nagkadaghan nga mga druga ug nisangput sa mapintas nga liyok sa pagkaadik. Ang drugas nahimo na nga iyang kinabuhi. Nianang gabii sa wala pa ako makig-istorya kaniya, misulay siya sa paghikog. Miingon siya nga dili na niya maagwanta ang pisikal, emosyonal ug espirituhanong kasakit. Siya mibati nga daw nalit-ag og walay agianan pagawas—uban sa kawala nay paglaum.

Ang problema niini nga sister kabahin sa pag-abuso sa giresita ug uban pa nga mga druga dili talagsa; nanghitabo kini libut kanato. Sa uban nga mga dapit daghang tawo ang namatay gikan sa pag-abuso sa giresita nga tambal kay sa namatay gikan sa mga aksidente sa sakyanan.³ Mga kaigsoonan, palayo gikan sa bisan unsa nga butang nga molit-ag kaninyo. Bisan ang usa ka suyop sa butang o usa ka tableta o usa ka yarok sa alkohol modala sa pagkaadik. Usa ka nagkaayo nga alcoholic nagsulti kanako nga usa lamang ka inom ang diperensya tali sa pagkaadik o dili na moinom. Si Satanas nakahibalo niini. Ayaw siya tuguti nga iya kamong makubit gamit sa iyang mga artipisyal nga paon nga dali makaadik.

Karon, mga kaigsoonan, palihug ayaw saypa pagsabut ang akong gisulti. Wala ako magkwestyon sa mga gipangresita nga mga tambal alang niadtong nag-antus sa pwede matambalan nga sakit o hilabihan kasakit nga pisikal. Kini sa tinuod usa ka panalangin. Ang akong gisulti mao nga kita kinahanglan nga maampingon nga mosunod sa mga doses nga giresita sa mga doktor. Ug atong ibutang ang mao nga mga tambal sa usa ka luwas nga lugar diin ang mga batan-on o si bisan kinsa dili makahilabut niini.

Adunay dako nga kabalaka kabahin sa pipila ka mga makadaut, makaadik nga binuhatan sama sa sugal ug dautan nga pornograpiya nga makapalaglag kaayo sa kaugalingon ug naghitak sa atong katilingban. Hinumdumi, mga kaigsoonan, ang bisan unsa nga matang sa pagkaadik mao ang pagtugyan ngadto sa usa ka butang, sa ingon niini mabiyaan ang kabubut-on ug magpangita na niini. Mao nga ang pakigdula sa video ug ang pagtext sa cell phones kinahanglan nga idugang sa listahan. Pipila ka mga tigdula niangkon nga migahin og hangtud 18 ka oras sa usa ka adlaw sa pagdula sa lain-laing level sa video games, napasagdan ang tanang aspeto sa ilang kinabuhi. Ang pagtext sa cell phones mahimong makaadik nga maoy hinungdan nga ang mga importanting personal nga tawhanong komunikasyon mawala. Dili pa lang dugay usa ka bishop misulti kanako nga ang duha sa iyang mga batan-on nagtupad og barug nga nagtext sa usag-usa imbis magsultianay.

Ang medikal nga research naghulagway sa pagkaadik isip “usa ka sakit sa utok.”⁴ Tinuod kini, apan nagtuo ako nga kon magunitan na ni Satanas ang usa ka tawo, kini usab usa na ka sakit sa espiritu. Pero bisan unsa nga pagkaadik ang naggumon sa usa, anaa kanunay ang paglaum. Si propeta Lehi mitudlo sa iyang mga anak niining mahangturon nga kamatuoran: “Busa, ang mga tawo gawasnon sumala sa unod; ug ang tanan nga mga butang gihatag kanila diin angay ngadto sa tawo. Ug sila gawasnon sa pagpili sa kalingkawasan ug sa kinabuhi nga dayon, pinaagi sa halangdon nga Tigpataliwala sa tanan nga mga tawo, o pagpili sa pagkabihag ug sa kamatayon, sumala sa pagkabihag ug sa gahum sa yawa” (2 Nephi 2:27).

Kon adunay tawo nga naadik nga adunay tinguha sa pagbuntog, kana adunay paagi alang sa espirituhanong kagawasan—usa ka paagi nga makalingkawas sa pagkaulipon—usa ka paagi nga napamatud-an na. Kini magsugod sa pag-ampo—sinsero, mainiton ug makanunayon nga komunikasyon uban sa Tiglalang sa atong mga espiritu ug mga lawas, ang atong Langitnong Amahan. Mao gihapon kini nga baruganan unsaon pagputol sa dautan nga kinaiya o sa paghinulsol sa bisan unsa nga matang sa sala. Ang pormula alang sa kausaban sa atong kasingkasing, atong lawas, atong hunahuna, ug atong espiritu makita diha sa mga kasulatan.

Si propeta Mormon mitambag kanato: “Busa, akong hinigugma nga mga kaigsoonan, pag-ampo ngadto sa Amahan uban sa tibuok kusog sa kasingkasing, nga kamo unta mapuno niini nga gugma … aron mahimo kamo nga mga anak sa Dios; … aron mahimo kita nga putli ingon nga siya putli” (Moroni 7:48).

Kini ug daghan pang uban nga mga kasulatan nagpamatuod kanato nga adunay paglaum alang sa mga naadik ug kini nga paglaum miabut pinaagi sa Pag-ula ni Jesukristo ug sa pagpaubos sa kaugalingon atubangan sa Dios, mangamuyo aron makalingkawas sa pagkaulipon sa pagkaadik ug sa paghalad sa atong tibuok kalag ngadto Kaniya sa hugot nga pag-ampo.

Ang mga lider sa priesthood makatabang samtang kadtong adunay mga pagkaadik mangayo og tambag gikan kanila. Kon gikinahanglan, sila moduso kanila ngadto sa lisensyado nga kwalipikadong mga magtatambag ug sa LDS Family Services. Ang programa sa pagkaayo sa pagkaadik, nga gisunod gikan sa orihinal nga napulog duha ka pamaagi sa Alcoholics Anonymous, andam nga magamit pinaagi sa LDS family services.

Alang niadtong kinsa nag-atubang sa personal nga pagkaadik o diha sulod sa inyong pamilya, ako mosubli, nga ang mainiton nga pag-ampo mao ang yawe sa pag-angkon og espirituhanong kusog sa pagpangita og kalinaw ug pagbuntog sa makaadik nga tinguha. Ang Langitnong Amahan nahigugma sa tanan Niyang mga anak, busa pasalamati Siya ug ipahayag ang tinuoray nga hugot nga pagtuo Kaniya. Pangayo Kaniya og kalig-on nga mabuntog ang pagkaadik nga inyong nasinati. Ipadaplin ang inyong tanang garbo ug itumong ang inyong kinabuhi ug kasingkasing ngadto Kaniya. Paghangyo nga mapuno sa gahum sa putling gugma ni Kristo. Mahimong buhaton ninyo kini sa makadaghang higayon, apan akong ipamatuod kaninyo nga ang inyong lawas, hunahuna ug espiritu mahimong mausab, malimpyo ug mamaayo ug kamo mahimo nga gawasnon. Si Jesus miingon, “Ako mao ang kahayag alang sa kalibutan: siya nga mosunod kanako dili gayud magalakaw sa kangitngit, hinonoa magabaton siya sa kahayag nga magahatag og kinabuhi” (Juan 8:12).

Tungod kay atong tumong mao man ang pakamahimong sama sa atong Manluluwas ug sa katapusan mahimong takus nga mopuyo uban sa atong Langitnong Amahan, ang matag usa kanato nagkinahanglan nga makasinati og dako nga kausaban sa atong mga kasingkasing nga gihulagway ni propeta Alma sa Basahon ni Mormon (tan-awa sa Alma 5:14). Ang atong gugma alang sa atong Amahan sa Langit ug ni Ginoong Jesukristo kinahanglan nga makita sa atong matag adlaw nga mga pagpili ug mga buhat. Nagsaad kini og kalinaw, hingpit nga kalipay, ug kalipay ngadto sa motuman sa Ilang mga sugo.

Mga kaigsoonan, kita unta makamatngon sa artipisyal nga mga paon nga gipaila kanato sa malinglahon nga mangingisda og tawo, si Lucifer. Kita unta adunay kaalam ug espirituhanong panan-aw sa pag-ila ug sa pagbalibad sa daghan niyang makuyaw nga mga tanyag.

Ug alang kaninyo nga nahimong bihag sa bisan unsang matang sa pagkaadik, adunay paglaum tungod kay ang Dios nahigugma sa tanan Niya nga mga anak ug tungod kay ang Pag-ula ni Ginoong Jesukristo naghimo nga posible sa tanang butang.

Akong nakita ang talagsaong panalangin sa pagkaayo nga maghimo sa usa ka tawo nga gawasnon gikan sa mga kadena sa pagkaadik. Ang Ginoo mao ang atong Tigbalantay, ug walay makulang kanato samtang kita mosalig sa gahum sa Pag-ula. Ako nasayud nga ang Ginoo makahimo ug mohimo nga gawasnon sa nangaadik gikan sa pagkaulipon, kay si Apostol Pablo mipahayag, “Mahimo ko ang tanang butang pinaagi kang Kristo nga nagapalig-on kanako” (Mga Taga-Filipos 4:13). Akong iampo, mga kaigsoonan, nga unta kini mahitabo ngadto sa nakigbisog uban niini nga hagit niining panahuna sa ilang kinabuhi, ug sa kamapainubsanon mohimo niini sa pangalan ni Jesukristo, amen.