Pagkinabuhi nga Panig-ingnan sa mga Magtutuo

Sa dili pa dugay ang gamayng Ruby natawo sa among pamilya. Samtang akong gitan-aw ang iyang nindot nga nawong, ako nahingangha sa kahibalo nga sa wala pa siya moanhi sa yuta, siya mipuyo didto sa presensya sa atong Langitnong Amahan. Siya midawat sa Iyang dakong plano sa kalipay ug mipili sa pagsunod Kaniya ug ni Jesukristo, atong Manluluwas.¹ Tungod sa iyang desisyon, gitugutan siya sa pag-anhi sa Yuta sa pagsinati og mortalidad ug pag-uswag ngadto sa kinabuhing dayon. Uban sa iyang espiritu nga nahiusa sa iyang lawas, si Ruby misulod sa panahon sa pagkat-on diin siya makatino sa iyang kaugalingon, makapili sa pagsunod ni Kristo, ug makaandam nga mahimong takus sa kinabuhing dayon.

Mianhi si Ruby sa yuta nga putli, apan isip kabahin sa plano siya makasinati og mga pagsulay ug mga pagtintal ug siya makahimo og mga sayop. Pinaagi sa Pag-ula sa atong Manluluwas, hinoon, si Ruby mapasaylo, makadawat og kahingpitan sa kalipay, ug maputli pag-usab—andam sa pagpuyo sa kahangturan diha sa presensya sa atong Langitnong Amahan.

Pipila ka oras human sa iyang pagkatawo, may pribelihiyo ako sa pagkugos niining minahal nga bata diha sa akong mga bukton. Akong gisultihan ang iyang inahan, “O, kinahanglan nga atong tudloan si Ruby kon unsaon nga mahimong mahiyason nga babaye, putli ug bililhon kaayo sama sa gisugyot sa iyang pangalan.”²

Mitubag ang iyang inahan, “Nagsugod na ako karon.”

Unsa ang buhaton sa inahan ni Ruby sa “pagsugod karon”? Unsaon nato isip mga ginikanan, mga apohan ug mga lider pagsugod ug paghupot sa atong mga anak—atong mga kabatan-onan—diha sa dalan paingon sa kinabuhing dayon? Kinahanglan kita nga “magkinabuhi … nga [panig-ingnan] sa mga magtutuo.”³

Si propeta Brigham Young miingon: “Dili gayud nato tugutan ang atong mga kaugalingon nga mobuhat og bisan unsang butang nga dili nato gustong makita nga buhaton sa atong mga anak. Kinahanglang ipakita nato ang atong ehemplo nga gusto natong ila nga masunod.”⁴ Ang matag usa kanato makasugod karon pinaagi nga mahimong maayong panig-ingnan.

Karong adlawa gusto kong dapiton kamo nga “pagkinabuhi … nga panig-ingnan sa mga magtutuo … sa pagtuo, [ug] sa kaputli”⁵ duha ka mga baruganan nga gikinahanglan alang sa kaluwasan.

Pagkinabuhi nga panig-ingnan sa mga magtutuo sa hugot nga pagtuo. Aktibong lig-una ang inyong pagtuo ug pagpamatuod kalabut ni Jesukristo, nga nag-andam sa pagpamatuod pinaagi sa pulong ug sa panig-ingnan ngadto sa inyong mga anak.

Sultihan ko kamo sa usa ka maayo kaayo nga inahan kansang kinabuhi usa ka panig-ingnan sa hugot nga pagtuo. Sa dihang si Propeta Joseph Smith usa ka gamay pa kaayo nga batang lalaki, nagtan-aw ug nagkat-on siya mahitungod sa hugot nga pagtuo diha sa Dios gikan sa iyang inahan, si Lucy Mack Smith. Si Lucy nangita og mga tubag pinaagi sa pagsiksik sa mga kasulatan,⁶ ug si Joseph usab migamit niini nga pagbansay, nagpakli sa Biblia alang sa paggiya sama sa gihimo sa iyang inahan.⁷

Gisulbad usab ni Lucy ang mga problema sa pamilya pinaagi sa tago nga pagpangayo og panabang sa Ginoo pinaagi sa pag-ampo. Usa ka adlaw, misinati og kagubot sa iyang pamilya kalabut sa relihiyon, miingon si Lucy nga siya “miadto sa kakahoyan sa nindot nga ihalas nga mga kahoy sa lumboy nga dili layo ug nag-ampo ngadto sa Ginoo.”⁸

Nag-ampo usab si Lucy uban sa dakong hugot nga pagtuo sa dihang nag-atubang og personal mga problema sa panglawas, sa dihang si Joseph hapit maputli sa iyang bitiis tungod sa osteomyelitis, ug sa dihang ang igsoon nga babaye ni Joseph, si Sophronia, hapit mamatay sa tipus. Kalabut sa sakit ni Sophronia, misulat si Lucy, “Akong gitutukan ang akong bata. … Ang akong bana ug ako naggunitay sa among mga kamot ug miluhod sa kilid sa katre ug gibu-bu ang among kaguol ug mga pangamuyo ngadto sa iyang mga dunggan.”⁹ Nabuhi si Sophronia. Ako masaligon nga ang mga anak ni Lucy kanunay nakasaksi sa iyang pag-ampo uban sa hugot nga pagtuo ug nagdawat sa mga tubag niadto nga mga pag-ampo.

Si Lucy nag-ampo uban sa hugot nga pagtuo alang sa paggiya, ug si Joseph usab miadto sa kakahoyan, diin siya nag-ampo uban sa hugot nga pagtuo, nangita og tubag gikan sa Ginoo sama sa iyang inahan.

Sama ni Lucy, kita kinahanglan gayud mopakita sa atong mga anak ug mga kabatan-onan kon unsaon sa paglig-on sa ilang pagtuo ug pagpamatuod kalabut ni Jesukristo pinaagi sa paglig-on sa atong kaugalingon pinaagi sa pagtuon sa mga kasulatan ug pinaagi sa pag-ampo, sa personal ingon man usab uban kanila.

Dili sama ni Lucy, karon kita napanalanginan nga makabaton og sobra pa sa Biblia. Kita adunay mga kasulatan sa ulahing mga adlaw ug mga pulong sa atong mga propeta sa ulahing mga adlaw, aron “luwas nga makagiya kanato”¹⁰ diha sa agianan ngadto sa kinabuhing dayon. Gikan sa Basahon ni Mormon atong nakat-unan ang mahitungod niadtong diha sa agianan kinsa “kanunay naggunit sa gunitanan nga puthaw,”¹¹ gipakisama kini ngadto “sa pulong sa Dios.”¹² Sa kalibutan karon nga puno sa mga tintasyon, ang “paggunit kanunay” makahagit, samtang si Satanas diha sa iyang malinlangon nga mga paagi naningkamot sa pagpalayo kanato gikan sa mga paagi sa Dios. Kon ang usa ka kamot nato anaa sa gunitanan ug ang usa ka kamot diha sa kalibutan, gibutang nato ang atong mga anak ug mga kabatan-onan sa peligro nga mawala sa ilang dalan. Kon ang atong panig-ingnan makalibug, sumala sa mga pulong ni Jacob kita nakapawala sa “pagsalig sa [atong] mga anak, tungod sa [atong] ngil-ad nga mga panig-ingnan.”¹³

Mga ginikanan, mga apohan, ug mga lider, ang inyong mensahe kinahanglan gayud nga klaro. Ang kaklaro moresulta lamang gikan sa pagbutang sa duha ka mga kamot diha sa gunitanan ug gikan sa pagpuyo sa mga kamatuoran nga makaplagan diha sa mga kasulatan ug sa mga pulong sa mga propeta sa ulahing mga adlaw. Tingali wala kamo magmatuto og propeta sama ni Lucy, apan sa tinuod kamo nagmatuto og mga lider sa umaabut, ug ang inyong mga lihok ingon lamang ka yano nga malambigit ngadto sa hugot nga pagtuo.

Sunod, pagkinabuhi nga panig-ingnan sa mga magtutuo diha sa kaputli. Ang bugtong paagi nga kita mahimong putli pinaagi lang sa Pag-ula sa atong Manluluwas. Alang sa matag usa kanato, ang proseso nga mahimong putli nagsugod sa hugot nga pagtuo, paghinulsol, ug sa atong unang pakigsaad sa bunyag.

Sa pagtabang sa atong mga anak nga motuman sa ilang pakigsaad sa bunyag, si Elder Robert D. Hales mitambag: “Atong itudlo nga sa higayon nga sila mokawas sa tubig, sila mikawas sa kalibutan ug ngadto padulong sa gingharian sa Dios. Pinaagi sa pakigsaad, sila miuyon sa pagsunod sa Iyang mga sugo.”¹⁴

“Ang mga pakigsaad nagbutang kanato ubos sa hugtanon nga obligasyon sa pagtamud sa atong mga pasalig ngadto sa Dios. Aron makahimo sa atong mga pakigsaad, kinahanglan natong biyaan ang mga kalihokan o mga hilig nga makapugong kanato sa pagtuman niini nga mga pakigsaad.”¹⁵

Ang Alang sa Kalig-on sa Kabatan-onan usa ka maayo kaayo nga himan sa pagtabang sa mga kabatan-onan sa pagsabut niining sagrado nga obligasyon sa paghimo og pakigsaad ug sa mga panalangin sa kaputli nga moabut gikan sa paghupot og pakigsaad. Kini naglangkub og mga pulong sa mga propeta sa ulahing mga adlaw—ang gunitanan nga puthaw nga luwas nga mogiya kanila subay sa higpit ug pig-ot nga agianan, nagpalayo kanila gikan sa mga pagbitik ni Satanas nga makalangan sa ilang pag-uswag. Dinhi niini nga basahon, inyong makita usab ang daghan nga mga panalangin nga moabut gikan sa pagkamasulundon ug sa pagpangita niana nga “mahiyason, [ug] matahum.”¹⁶

Mga ginikanan, pagbaton og personal nga kopya niini nga libro ug basaha kini kanunay. Pagpuyo sa mga sumbanan sa inyong kaugalingon mismo. Pagbaton og mahunahunaon nga panagsinultihanay sa ebanghelyo uban sa kabatan-onan nga motabang kanila sa pagpalambo sa ilang kaugalingon nga tinguha sa pagpuyo ug pagdiskobre alang sa ilang mga kaugalingon sa kahulugan ug katuyoan sa mga sumbanan.

Ang mga sumbanan nga makita diha sa mga seksyon sa “Kalingawan ug ang Medya” ug “Sinina ug Panagway” hilabihan nga makahagit tungod kay kini nag-anam-anam nga nahimong kaaway sa mga sumbanan sa kalibutan.

Kinahanglan atong ipakita kana nga “mahiyason [ug] matahum” pinaagi sa atong personal nga mga pagpili sa medya. Kinahanglan gayud natong bantayan nga ang medya nga atong gipasulod sa atong mga panimalay dili makapabugnaw sa pagbati ngadto sa Espiritu, makadaut og mga relasyon ngadto sa atong pamilya ug mga higala, o makapadayag og personal nga mga prayoridad nga wala masubay sa mga baruganan sa ebanghelyo. Pinaagi sa panig-ingnan makatabang kita sa atong mga bata sa pagsabut nga ang paghatag og dugay nga mga panahon sa paggamit og Internet, sosyal nga medya, ug mga cell phone, pagdula og video nga mga dula, o pagtan-aw og telebisyon nagpalayo kanato gikan sa mabungahon nga mga kalihokan ug bililhon nga mga pakigsulti sa uban.

Kita usab mopakita niana nga “mahiyason [ug] matahum” pinaagi sa atong sinina ug panagway. Isip mga tawo sa pakigsaad, kita adunay responsibilidad sa pag-amuma, sa pagpanalipod ug sa husto nga pagsinina sa atong mga lawas. Kinahanglan gayud nga atong tabangan ang atong mga bata ug mga kabatan-onan sa pagsabut nga kita nagtahud sa atong mga lawas isip mga templo ug isip mga gasa gikan sa Dios.¹⁷ Kita mopakita sa panig-ingnan pinaagi sa pagdili og palit o pagsul-ob og malaw-ay nga mga sinina nga huot kaayo, sihag kaayo, o nagpadayag sa bisan unsa nga paagi.

Ang mga tighupot sa pakigsaad naningkamot sa pagmasulundon diha sa “tanan nga mga panahon … ug diha sa tanan nga mga dapit”¹⁸ tungod sa ilang gugma sa Dios ug sa Iyang gisaad nga mga panalangin. Usa ka gabii, samtang naglakaw uban sa akong bana, among nalabyan ang usa ka salo-salo sa kasal nga nagpadayon diha sa gawas. Wala kami makaila niini nga mga tawhana, apan diha-diha dayon may impresyon sa hiyas. Ang ilang gipili nga mga musika ug sinina mga nindot. Ang buda sa malipayon nga kinasal nga babaye dili ikalalis ang ka yano, ingon man ang iyang mga sinina sa abay sa kasal. Kini nga pamilya mipili sa dili pagsagol sa mga paagi sa kalibutan uban sa kabalaan nianang adlawa.

Karon, pasultiha ako og pulong ngadto sa talagsaon nga mga kabatan-onan sa atong Simbahan. Salamat kaninyo alang sa inyong matarung nga mga panig-ingnan ngadto—sa inyong mga higala, mga magtutudlo, mga lider, ug mga pamilya. Akong nahibaloan nga daghan kaninyo mao lang ang miyembro sa inyong pamilya sa Simbahan.Tingali nagsimba kamo nga nag-inusara. Gidayeg ko kamo alang sa inyong pasalig ug matarung nga panig-ingnan. Pagmapailubon ug padayon sa pagpuyo sa matarung nga paagi. Adunay daghang makatabang kaninyo. Si Presidente Thomas S. Monson miingon, “Bisan ang maayog ehemplo nga pamilya … makagamit sa tanang suporta nga tabang nga ilang makuha gikan sa buotang mga lalaki [ug mga babaye] kinsa matinud-anong moamuma.”¹⁹

Pangita diha sa inyong ward ug stake og mga lider ug mga higala kinsa mga panig-ingnan sa mga magtutuo ug pagkat-on gikan kanila.

Sa diha nga ako usa ka young woman, gipangita nako ang mga panig-ingnan sa mga magtutuo. Agi og dugang sa akong mga ginikanan, ang usa mao ang akong tiya nga si Carma Cutler. Klaro kaayo nakong nahinumduman ang iyang pagpamulong sa usa ka stake Standards Night sa diha nga ako disesais pa. Gitudlo niya ang kaimportante sa kaputli ug katakus sa pagminyo sa templo. Natandog ako pag-ayo sa iyang pagpamatuod. Akong napanid-an ang iyang mahiyason nga kinabuhi sukad sa bata pa ko, ug ako nasayud nga kini subay sa iyang mga pagtudlo. Gusto ako nga mosunod sa iyang panig-ingnan.

Batan-ong mga lalaki ug batan-ong mga babaye, kamo makasugod karon pinaagi nga mahimong panig-ingnan sa mga magtutuo sa hugot nga pagtuo ug sa kaputli. Lig-una ang inyong pagtuo ug pagpamatuod matag adlaw pinaagi sa pagtuon sa kasulatan ug sa pag-ampo. Sunda ang inyong pakigsaad sa bunyag nga makapaputli ug makapatakus ninyo sa giya sa Espiritu Santo. Makasugod kamo karon nga mahimong usa ka panig-ingnan aron ang uban makasunod.

Ug dili gayud kamo mahibaloan—tingali kamo mao ang panig-ingnan nga gikinahanglan sa akong gamay nga Ruby sa umaabot nga adlaw. Sa pagkakaron, si Ruby adunay nindot kaayo nga sinugdanan diha sa agianan ngadto sa kinabuhing dayon. Ang iyang mga ginikanan nagpakita og mga sumbanan sa pagkamatarung diha sa iyang panimalay, magsugod kada adlaw sa usa ka tinguha nga magpakabuhi nga panig-ingnan sa mga magtutuo. Hinaut, mogamit sa iyang kabubut-on, si Ruby mopili sa pagsunod.

Mapasalamaton ako alang sa plano sa kalipay, ug magpamatuod ako nga kini lang ang paagi nga si Ruby—ug matag usa kanato—mahimong putli pag-usab ug makapuyo sa kahangturan diha sa presensya sa atong Langitnong Amahan. Hinaut nga ang matag usa kanato magsugod karon. Sa pangalan ni Jesukristo, amen.