Kapahulayan alang sa Inyong mga Kalag

Sa downtown sa Gothenburg, Sweden, adunay usa ka halapad nga dalan nga may mga matahum nga kahoy sa matag daplin niini. Usa ka adlaw niana nakakita ako og lungag sa punoan sa usa sa mga dagko kaayo nga kahoy, busa ako masusihon nga mitan-aw sa sulod ug nakita nga ang kahoy hingpit nga haw-ang sa ilawom. Haw-ang oo, apan walay sulod dili! Kini napuno sa nagkadaiyang mga sagbot.

Ako natingala nga ang kahoy nakabarug gihapon. Busa ako mihangad ug nakakita sa usa ka halapad nga asiro nga gibakus libot sa ibabaw nga bahin sa punoan. Nakahigot sa bakus ang pipila ka mga asiro nga alambre, ug kini usab gihigot ug gitaud ngadto sa duol nga mga building. Gikan sa layo sama kini tan-awon sa ubang mga kahoy; sa pagtan-aw lamang sa ilawom niini nga ang usa makamatikud nga kini haw-ang imbes nga adunay solido, lig-on nga punoan. Daghang mga katuigan na ang milabay adunay nakapasugod sa proseso sa anam-anam nga pagkahuyang sa punoan. Wala kini mahitabo sa diha-diha dayon. Apan, sama sa usa ka linghud nga kahoy nga miinanay paglambo ngadto sa usa ka lig-on nga kahoy, mao usab kita motubo sa hinay-hinay sa atong kapasidad nga mamahimong solido ug puno gikan sa sulod paingon sa gawas, sukwahi niadtong haw-ang nga kahoy.

Pinaagi sa makaayo nga Pag-ula ni Jesukristo kita makaangkon og kusog sa pagbarug nga ligdong ug lig-on ug ang atong mga kalag mapuno—sa kahayag, pagpanabut, hingpit nga kalipay, ug gugma. Ang iyang pagdapit gihatag ngadto sa “tanan sa pagduol ngadto kaniya ug sa pag-ambit sa iyang kaayo; ug siya wala maglimud kang bisan kinsa nga moduol ngadto kaniya” (2 Nephi 26:33). Ang iyang saad mao nga:

“Umari kanako, kamong tanan nga nabudlay ug nabug-atan, ug papahulayon ko kamo.

Isangon ninyo ang akong yugo diha kaninyo, ug pagtuon kamo gikan kanako; kay ako maaghop ug mapaubsanon sa kasingkasing: ug makakaplag kamo og pahulay alang sa inyong mga kalag” (Mateo 11:28–29).

Niini nga kapahulayan, si Joseph F. Smith nag-ingon: “Sa akong hunahuna, kini nagpasabut sa pagsulod ngadto sa kahibalo ug gugma sa Dios, adunay hugot nga pagtuo sa iyang katuyoan ug sa iyang plano, hangtud nga kita makahibalo nga kita husto, ug nga wala kita magpangita ug lain pa, wala kita mahasol sa matag hangin sa doktrina, o sa pagkamaliputon ug pagkamalimbungon sa mga tawo kinsa nagahulat aron sa pagpanglingla. Nakahibalo kita sa doktrina nga kini iya sa Dios, ug wala kita magpangutana kang bisan kinsa kalabut niini; sila welcome sa ilang mga opinyon, sa ilang mga hunahuna ug sa pagpatuyang nila sa ilang hunahuna. Ang tawo nga moabut na sa ingon niana nga hugot nga pagtuo sa Dios diin ang tanang pagduha-duha ug kahadlok wala na kaniya, siya nakasulod ngadto sa ‘kapahulayan sa Dios’” (Teachings of Presidents of the Church: Joseph F. Smith [1998], 56).

Ang pagkaplag og kapahulayan alang sa atong mga kalag naglakip og kalinaw sa hunahuna ug sa kasingkasing, nga maoy resulta sa pagkat-on ug pagsunod sa doktrina ni Kristo, ug ang pagkahimo nga abag nga mga kamot ni Kristo sa pagserbisyo ug pagtabang sa uban. Ang hugot nga pagtuo kang Jesukristo ug ang pagsunod sa Iyang mga pagtulun-an maghatag kanato og hugot nga paglaum, ug kini nga paglaum mamahimo nga solido nga angkla sa atong mga kalag. Kita mamahimo nga makanunayon ug dili matarug. Kita makabaton og malungtaron nga kalinaw sa sulod; kita makasulod ngadto sa kapahulayan sa Ginoo. Lamang kon kita mopalayo gikan sa kahayag ug kamatuoran nga ang usa ka haw-ang nga pagbati, sama niadto nga kahoy, mopuli sa pinaka-ilawom nga bahin sa atong mga kalag, ug basin unya kita mosulay og puno nianang kahaw-ang uban sa mga butang nga walay malungtarong bili.

Sa atong pagpakabuhi isip espirituhanong mga anak sa wala pa kita moanhi sa kalibutan ug pagka-imortal sa sunod kinabuhi, kining kalibutanong kinabuhi sa pagkatinuod usa ka hamubo kaayo nga tipik sa panahon.

Kini, hinoon, mao ang adlaw sa pagsulay, pero kini usab adlaw sa mga oportunidad kon kita mopili sa pagsunod sa pagdapit nga dili pag-usik usik sa mga adlaw sa atong pagsulay (tan-awa sa 2 Nephi 9:27). Ang mga hunahuna nga atong gipundo sa atong alimpatakan, ang mga pagbati nga atong gisagop sulod sa atong kasingkasing, ug ang mga lihok nga atong gipili nga buhaton tanan adunay dako nga epekto sa atong kinabuhi, karon ug sa sunod kinabuhi.

Usa ka makatabang nga kinaiya mao ang pagpataas sa atong talan-awon matag adlaw aron sa pagmintinar og mahangturon nga panglantaw sa mga butang nga atong giplano ug gibuhat, ilabi na kon makamatikod kita og kalagmitan sa paghulat sa “umaabut nga ugma” aron pagbuhat sa butang nga kinahanglan natong buhaton karon samtang ania kita sa kasamtangan nga adlaw.

Sa atong pagpadayon, kita giabagan sa atong mga pagpili pinaagi sa nagpaluyong impluwensya sa Espiritu. Karon, kon kita mopili sa pagbuhat og sukwahi sa kahayag ug panabut nga anaa kanato, makasinati kita og dili maayo nga konsensya, nga sa pagkatinuod lain pamation. Apan ang dili maayo nga konsensya usa ka panalangin kay sa diha-diha kita gipahinumduman nga panahon na sa paghinulsol. Kon kita mapaubsanon ug magtinguha sa paghimo unsa ang matarung, mahinamon kita sa diha-diha nga pag-usab sa atong mga pamaagi, samtang kadtong mga mapahitas-on ug kinsa tingali nagtinguha “nga mahimo nga usa ka balaod ngadto sa [ilang kaugalingon]” (D&P 88:35) motugot kang Satanas sa paggiya “kanila pinaagi sa liog uban sa linino nga pisi, hangtud nga siya makahigot kanila uban sa iyang malig-on nga mga pisi sa kahangturan” (2 Nephi 26:22) gawas lamang kon ang espiritu sa paghinulsol mosulod sa ilang mga kasingkasing. Ang pagsunod sa dautang mga impluwensya dili gayud mosangput sa malinawon nga pagbati tungod kay ang kalinaw usa ka gasa sa Dios ug moabut lamang kini pinaagi sa Espiritu sa Dios. “Ang pagkadautan dili mahitabo nga mahimo nga kalipay” (Alma 41:10).

Sa atong pang adlaw-adlaw nga mga buhat, sa kanunay ang mga gagmay ug yano nga mga butang ang adunay malungtaron nga dako og epekto (tan-awa sa Alma 37:6–7). Ang atong gipanulti, ang atong gipangbuhat, ug ang atong gipili nga reaksyon mo-impluwensya dili lamang ngari kanato, apan ngadto usab sa nagpalibut kanato. Makahimo kita sa pagtukod, o makahimo kita sa pagguba. Usa ka yano ug positibo nga ehemplo mao ang istorya nga gisugilon kanako sa akong lola. Siya misugo sa usa sa iyang mga batan-ong anak sa pagpalit og pipila ka itlog. Ang gisaligan nga bata siguro malipayon nga naglakaw sa pagpauli subay sa dalan, apan ang kadaghanan sa mga itlog nangabuak na sa pag-abut niya sa balay. Usa ka higala sa pamilya anaa didto ug iyang gitambagan ang akong lola sa pagkasaba sa maong bata tungod sa dili maayong lihok. Hinoon, si lola kalma ug maalamon nga miingon, “Dili, kana nga paagi dili makapabalik sa pagkatibuok sa mga itlog. Himoon lang nato kon unsay atong mahimo ug maghimo og mga pancake aron duyog kitang magtagbaw.”

Kon makakat-on kita sa pag-atubang sa ginagmay ug yano sa inadlaw nga mga butang pinaagi sa usa ka maalamon ug dinasig nga paagi, ang resulta niini mao ang usa ka positibo nga impluwensya nga molig-on sa panag-uyon sa atong mga kalag ug motukod ug molig-on sa mga nanaglibut kanato. Kini tungod kay ang tanan nga nag-agni kanato sa pagbuhat og maayo, “gipadala pinaagi sa gahum ug gasa ni Kristo; busa [kita] mahimo nga masayud uban sa usa ka hingpit nga kasayuran nga kini gikan sa Dios” (Moroni 7:16).

Karon, ang haw-ang nga kahoy nga akong gisulti kaninyo wala na magbarug. Pipila ka mga batan-on mibutang og mga pabuto ngadto sa haw-ang nga luna, nga maoy hinungdan nga ang kahoy nasunog. Dili na kadto maluwas pa ug kinahanglan na nga putlon. Pagbantay nianang mga butang nga makaguba gikan sa sulod hangtud sa gawas, bisan kon dako man o gamay! Kini adunay makabungol nga epekto ug mosangput sa espirituhanong kamatayon.

Atoa hinoon nga hatagan og gibug-aton kadtong mga butang nga makahatag og malungtaron nga kalinaw sa hunahuna ug kasingkasing. Unya ang atong “pagsalig [mo] samot pagkalig-on diha sa atubangan sa Dios” (D&P 121:45). Ang saad sa pagsulod ngadto sa kapahulayan sa Ginoo, sa pagdawat sa gasa sa kalinaw, halayo ra sa usa ka temporaryo, kalibutanhon nga katagbawan. Kini sa tinuod usa ka langitnon nga gasa: “Kaninyo ibilin ko ang kalinaw, kaninyo ihatag ko ang akong kalinaw: hatagan ko kamo niini dili sama sa hinatagan sa kalibutan. Kinahanglan dili magkaguol ang inyong kasingkasing, ni magtalaw” (Juan 14:27). Siya adunay gahum sa pag-ayo ug sa pagpalig-on sa kalag. Siya si Jesukristo, kang kinsa ako magpamatuod sa pangalan ni Jesukristo, amen.