Pagserbisyo uban sa Espiritu

Mapasalamaton ako niini nga oportunidad nga makig-uban kaninyo, nga gipasidunggan sa Dios pinaagi sa paghupot sa priesthood. Gitawag kita sa paggamit sa balaan nga gahum sa pagserbisyo sa mga anak sa atong Langitnong Amahan. Kon unsa man kamaayo ang atong paghimo niana nga obligasyon kini adunay mahangturong mga sangputanan ngadto sa mga tawo nga kita gitawag sa pagserbisyo ug ngari kanato ug sa mga henerasyon nga wala pa matawo.

Anaa kanako ang sagradong panumduman kabahin sa duha ka naghupot sa priesthood kinsa nahimong sarang sa Espiritu sa Dios nga mouban kanila sa buluhaton nga gipabuhat kanila sa Ginoo. Ilang nakaplagan ang gipahiuli nga ebanghelyo sa ilang kaugalingon mismo sa Amerika. Mga sinugo sila sa Dios kinsa unang namulong mahitungod niana nga ebanghelyo ngadto sa duha sa akong nga mga katigulangan nga taga-Europe.

Usa niadto nga mga katigulangan mao ang usa ka batang babaye nga nagpuyo sa gamay nga uma didto sa Switzerland. Ang lain usab mao ang usa ka batan-ong lalaki, usa ka ilo ug usa ka langyaw sa Estados Unidos gikan sa Germany, nga nagpuyo sa St. Louis, Missouri.

Silang duha nakadungog sa usa ka naghupot sa priesthood nga nagpamatuod sa gipahiuli nga ebanghelyo—ngadto sa batang babaye nga didto duol sa abohan sa iyang gamay nga balay sa Switzerland, ug ngadto sa batang lalaki nga didto naglingkod sa balkonahe sa usa ka inabangan nga lawak sa Amerika. Silang duha nasayud pinaagi sa Espiritu nga ang mensahe niadto nga mga elder nga gidala ngadto kanila tinuod.

Ang batang lalaki ug ang batang babaye mipili nga magpabunyag. Silang duha nagkita sa unang higayon didto sa abugon nga dalan sa mga katuigan nga milabay, nga naglakaw gatusan ka mga milya ngadto sa mga kabukiran sa kasadpang Amerika. Nag-istoryahanay sila samtang naglakaw. Unsay ilang giistoryahan mao ang kabahin sa milagroso nga panalangin nga taliwala sa tanang tawo sa tibuok kalibutan, nakaplagan sila sa mga sulugoon sa Dios ug ang labaw pa ka milagroso, nga sila nasayud nga ang ilang mensahe tinuod.

Nagkahigugmaay sila ug nagminyo. Ug tungod sa pagpamatuod sa Espiritu, nga nagsugod sa dihang nadungog nila ang mga pulong sa mga naghupot sa priesthood ubos sa impluwensya sa Espiritu Santo, na-sealed sila sa kahangturan pinaagi sa gahum sa priesthood. Usa ako sa napulo ka liboan sa mga kaliwatan niana nga batang lalaki ug batang babaye kinsa mipanalangin sa mga ngalan sa duha ka naghupot sa priesthood kinsa midala sa pagpangalagad sa Espiritu sa Dios ngadto kanila samtang gikatkat nila ang bungtod sa Switzerland ug mibarug sa pagpamulong niana nga miting didto sa St. Louis.

Kana nga malipayong sugilanon ug minilyon pa nga sama niini gibalik-balik libut sa kalibutan ug hangtud pa sa mga henerasyon. Para sa uban kini mahimong mahitungod sa istorya sa usa ka batan-ong home teacher kinsa misulti og mga pulong nga nakahatag og tinguha sa inyong apohang lalaki sa pagbalik sa Simbahan. Para sa uban kini mahimong mahitungod sa pulong sa kahupayan ug panalangin gikan sa usa ka patriarch nga mihupay sa inyong inahan sa dihang ang trahedya hapit na mibuntog kaniya.

Adunay usa ka komon nga tema sa tanan niadto nga mga istorya. Kini mao ang gahum sa priesthood diha sa naghupot kansang gahum sa pagserbisyo napalambo pinaagi sa Espiritu Santo.

Ug mao nga ang akong mensahe alang kanato karong gabhiona mao kini: buhaton nato ang bisan unsa nga gikinahanglan aron mahimong sarang sa Espiritu Santo isip atong kauban, ug unya magpadayon kita sa walay kahadlok aron mahatagan kita sa mga gahum sa paghimo sa bisan unsa nga ipahimo kanato sa Ginoo. Kana nga kalamboan sa gahum sa pagserbisyo tingali anam-anam nga moabut, kini tingali moabut sa ginagmay nga lakang nga lisud ninyong makit-an, apan kini moabut.

Karong gabhiona mohimo ako og pipila ka mga sugyot aron mahimong sarang sa pagdawat sa Espiritu Santo isip kauban diha sa inyong pagserbisyo sa priesthood. Dayon mohatag ako og pipila ka mga ehemplo sa pagserbisyo sa priesthood diin makalaum kamo nga makita ang inyong mga gahum sa pagserbisyo nga nalig-on pinaagi sa impluwensya sa Espiritu.

Karon, nasayud kitang tanan nga ang pagkumpirma ngadto sa Simbahan naghatag kanato sa gasa sa Espiritu Santo. Apan ang pakig-uban sa Espiritu Santo, ang pagpakita niini sa atong kinabuhi ug ang pagserbisyo, nagkinahanglan nga atong hapsayon ang atong kinabuhi aron mahimong sarang.

Nag-ugmad kita og espirituhanong mga gasa pinaagi sa pagsunod sa mga sugo ug pagpaningkamot sa pagpuyo og usa ka walay lama nga kinabuhi. Nagkinahanglan kana og hugot nga pagtuo kang Jesukristo sa paghinulsol ug malimpyohan pinaagi sa Iyang Pag-ula. Busa isip mga naghupot sa priesthood dili gayud nato palabyon ang kahigayunan sa pagsalmot uban sa tibuok natong kasingkasing diha sa saad nga gitanyag sa matag miting sa sakrament alang sa mga miyembro sa gipahiuli nga Simbahan sa “pagdala nganha kanila sa ngalan sa Anak [sa Dios], ug sa kanunay mohinumdom kaniya ug maghupot sa iyang mga sugo diin siya mihatag kanila; nga sila unta sa kanunay makabaton sa iyang Espiritu uban kanila.”¹

Ingon nga kita kinahanglan gayud nga malimpyohan sa sala aron makabaton sa Espiritu ngari kanato, kinahanglan gayud nga igo ang atong pagpaubos sa atubangan sa Dios aron sa pag-ila sa atong panginahanglan alang niini. Ang mga disipulo sa nabanhaw nga Manluluwas mipakita niana nga pagpaubos, sigun sa narekord sa Basahon ni Mormon.

Ang Manluluwas nag-andam kanila alang sa ilang pangalagad. Nangluhod sila sa yuta aron sa pag-ampo. Mao kini ang asoy; “Ug sila nag-ampo alang niana diin sila labing nagtinguha; ug sila nagtinguha nga ang Espiritu Santo kinahanglan ihatag ngadto kanila.”² Gibunyagan sila sama sa inyong pagbunyag. Ug ang rekord nag-ingon nga agi og tubag sa ilang pangamuyo, sila napuno sa Espiritu Santo ug uban sa kalayo.

Ang Manluluwas nag-ampo sa kusog nga tingog sa pagpasalamat sa Iyang Amahan gumikan sa paghatag sa Espiritu Santo ngadto sa Iyang mga gipili tungod sa ilang pagtuo Kaniya. Ug dayon ang Manluluwas nag-ampo alang sa espirituhanong panalangin alang niadtong ilang giserbisyohan. Ang Ginoo nangamuyo sa Iyang Amahan: “Ako mag-ampo kanimo nga ikaw motugyan sa Espiritu Santo ngadto kanilang tanan nga motuo diha sa ilang mga pulong.”³

Isip mapaubsanong mga sulugoon sa Manluluwas, kita kinahanglang mag-ampo alang sa mga pagpakita sa Espiritu Santo nga moduol kanato sa atong pagserbisyo ug sa atong giserbisyohan. Ang mapaubsanon nga pag-ampo ngadto sa atong Langitnong Amahan, sa hugot nga pagtuo kang Jesukristo, mahinungdanon aron sa pagpasarang kanato alang sa pakig-uban sa Espiritu Santo.

Ang atong kamapainubsanon ug ang atong hugot nga pagtuo nga nagdapit og espirituhanong mga gasa mapalambo pinaagi sa atong pagbasa, pagtuon, ug pagpamalandong sa mga kasulatan. Kitang tanan nakadungog niadto nga mga pulong. Apan kita mahimong nagbasa og pipila ka linya o mga pahina sa kasulatan matag adlaw ug nanghinaut nga unta paigo na kana.

Apan ang pagbasa, pagtuon, ug pagpamalandong dili pareho. Mahimo kitang mobasa sa mga pulong ug tingali makakuha og mga ideya. Magtuon kita ug tingali makadiskobre og mga sundanan ug mga koneksyon diha sa kasulatan. Apan kon kita mamalandong, atong gidapit ang pagpadayag pinaagi sa Espiritu. Ang pagpamalandong, alang kanako, mao ang paghunahuna ug pag-ampo nga akong buhaton human sa mainampingon nga pagbasa ug pagtuon sa mga kasulatan.

Alang kanako, si Joseph F. Smith mipakita og ehemplo kon sa unsang paagi ang pagpamalandong makadapit og kahayag gikan sa Dios. Narekord kini sa ika-138 nga seksyon sa Doktrina ug mga Pakigsaad. Nagbasa siya ug nagtuon sa daghang mga kasulatan, naningkamot sa pagsabut kon sa unsang paagi nga ang mga epekto sa Pag-ula sa Manluluwas moabut niadtong kinsa nangamatay na nga wala makadungog sa Iyang mensahe. Ania ang iyang asoy kon sa unsang paagi miabut ang pagpadayag: “Samtang ako namalandong diha niini nga mga butang nga nahisulat, ang mga mata sa akong salabutan nabuksan, ug ang Espiritu sa Ginoo nagpabilin ngari kanako, ug ako nakakita sa mga panon sa mga patay, dili bantugan ug bantugan.”⁴

Ang paghinulsol, pag-ampo, ug pagpamalandong sa mga kasulatan mga importante nga bahin sa atong pagkahimong sarang alang sa mga gasa sa Espiritu diha sa atong pagserbisyo sa priesthood. Ang dugang nga pagpalambo sa atong gahum sa pagserbisyo moabut kon mosanong kita uban sa hugot nga pagtuo nga magpadayon sa atong mga calling uban sa Espiritu Santo nga motabang kanato.

Si Presidente Thomas S. Monson mihimo sa ingon niini nga paagi alang kanato: “Unsay ipasabut sa pagpalambo sa [inyong] calling? Nagpasabut kana sa pagtukod niini uban sa pagtamud … , sa pagpatubo ug sa paglig-on niini sa pagpasanag sa kahayag sa langit lahus niini aron makita sa ubang mga tawo. Ug unsaon man sa usa ka tawo sa pagpalambo og calling? Pinaagi lamang sa paghimo og serbisyo nga may kalabutan niini.”⁵

Mosugyot ako og duha ka mga serbisyo diin kitang tanan gitawag. Sa paghimo niini ubos sa impluwensya sa Espiritu, kamo ug ang uban makakita sa inyong gahum sa pagserbisyo, paglig-on, ug pagpalambo.

Ang una isip Iyang tinugyanan sa pagtudlo ug pagpamatuod ngadto sa uban mahitungod Kaniya. Ang Ginoo milakip sa pinakabata ug may kinagamyan og kasinatian nga mga naghupot sa Aaronic Priesthood niana nga tawag sa pagserbisyo. Human sa paghulagway sa mga katungdanan sa mga naghupot sa Aaronic Priesthood, Siya miingon:

“Apan ni mga magtutudlo ni mga deakono adunay pagtugot sa pagbunyag, pagpangalagad sa sakramento, o pagpandong sa mga kamot;

“Sila, bisan pa niana, magpasidaan, magpatin-aw, mag-awhag, ug magtudlo, ug magdapit sa tanan sa pagduol ngadto kang Kristo.”⁶

Sa bisan asa nga dapit sa kalibutan niining semanaha adunay usa ka deacon nga hangyoon sa iyang presidente sa korum sa pagdapit og usa ka sakop sa ilang korum nga wala pa gayud niya igkita sa miting. Ang 13 anyos nga presidente tingali dili mogamit sa mga pulong nga “pasidaan, awhag, ug tudlo,” apan mao kana ang gilauman sa Ginoo sa usa ka deacon nga gisangunan sa pag-adto aron sa pagluwas.

Ngadto sa deacon nga nakadawat sa tawag sa pag-adto sa sakop sa korum, mohimo ako og tulo ka mga saad. Una, samtang mag-ampo kamo alang sa panabang, ang Espiritu mohupay sa inyong mga kahadlok. Ikaduha, mahingangha kamo nga nahibalo kamo unsay isulti inig abut ninyo sa iyang balay ug atol sa paglakaw uban kaniya padulong sa simbahan. Unsay inyong isulti daw dili maayong pagkahan-ay alang kaninyo. Apan inyong bation nga ang mga pulong ihatag kaninyo sa higayon gayud nga inyo kining gikinahanglan. Ug ang ikatulo, inyong bation ang pagtugot sa Ginoo, kinsa mitawag kaninyo pinaagi sa inyong presidente, bisan unsa man ang resulta.

Dili ako makasaad kon unsa nga kalampusan ang moabut kay ang matag tawo gawasnon man kon unsaon niya sa pagsanong ang sulugoon sa Dios. Apan ang deacon nga inyong gipakigsultihan alang sa Ginoo mahinumdom nga kamo miadto kaniya. Nakaila ako og usa ka batang lalaki, nga karon hingkod na apan layo gihapon sa pagkaaktibo sa Simbahan, kinsa ang usa ka deacon gipadala aron sa pagpangita kaniya, ug siya miasoy ngadto sa iyang apohang lalaki mahitungod niana nga pagbisita 20 ka tuig na ang milabay. Ug kini daw walay epekto, ug iya pang ginganlan ang deacon nga mibisita kaniya. Ang apohang lalaki mihangyo kanako sa pagpangita ug sa pagpasalamat sa deacon kinsa gitawag sa pagdapit, sa pag-awhag, ug sa pagtudlo. Usa lamang kadto ka adlaw sa kinabuhi sa batang lalaki, apan ang apohang lalaki ug ang Ginoo nahinumdom sa mga pulong nga ang batang lalaki nadasig sa pagsulti ug sa pangalan sa batang lalaki.

Ako moawhag kanatong tanan, batan-on ug tigulang, kinsa gitawag sa pagpamulong sa usa ka miting sa ngalan sa Ginoo nga wagtangon ang mga pagbati sa pagduha-duha ug pagkadili angayan. Dili kinahanglan nga mogamit kita og makahingangha nga mga pulong o mohatag og lawom nga mga ideya. Ang yano nga mga pulong sa pagpamatuod mahimo na. Ang Espiritu mohatag kaninyo sa mga pulong nga inyong isulti ug modala niini sulod sa mga kasingkasing sa mapaubsanong mga tawo kinsa nangita sa kamatuoran gikan sa Dios. Kon padayon kitang maningkamot sa pagpamulong alang sa Ginoo, matingala na lamang unya kita nga makahibalo nga kita mipasidaan, miawhag, mitudlo, ug midapit uban sa tabang sa Espiritu sa pagpanalangin og mga kinabuhi, uban sa gahum lapas pa sa bisan unsang gahum sa atong kaugalingon.

Agi og dugang sa tawag sa pagtudlo, tanan kita ipadala sa Ginoo sa pagtabang niadtong nanginahanglan. Lain usab kana nga pagserbisyo sa priesthood diin atong bation ang impluwensya sa Espiritu nga mopalambo sa atong gahum sa pagserbisyo. Inyong makaplagan ang inyong kaugalingon nga mas makaila sa kasakit ug kabalaka diha sa mga panagway sa mga tawo. Ang mga ngalan o mga panagway sa mga tawo sa inyong korum mosulod sa inyong hunahuna uban sa pagbati nga sila anaa sa panginahanglan.

Ang mga bishop aduna niana nga pagbati nga moabut kanila panahon sa kagabhion ug sa matag higayon nga maglingkod sila diha sa atubangan nga magtan-aw sa mga miyembro sa ilang ward o naghunahuna niadtong kinsa wala didto. Mahitabo kini kanila kon anaa sila duol sa ospital o sa sentro sa pag-amuma. Labaw sa kausa nga ako nakadungog sa mga pulong sa dihang ako misulod sa pultahan sa ospital: “Nahibalo ko nga moabut ka.”

Dili kita angay nga mabalaka kabahin pagkasayud sa tukmang mga butang nga isulti o buhaton kon kita moabut na didto. Ang gugma sa Dios ug ang Balaang Espiritu igo na. Sa batan-on pa ko ang akong gikahadlokan nga basin og dili ako masayud unsay buhaton o isulti ngadto sa mga tawo nga anaa sa dakong panginahanglan.

Kausa didto ko sa ospital tapad sa akong amahan nga ingon og hapit na siya mamatay. Akong nadungog ang kaguliyang sa mga nurse dapit sa agianan. Sa kalit lang, si Presidente Spencer W. Kimball misulod sa kwarto ug milingkod sa lingkuranan sa akong atbang. Naghunahuna ko sa kaugalingon, “Karon ang akong higayon sa pagpaniid ug sa pagpaminaw sa usa ka hanas kon unsay isulti alang niadtong anaa sa kasakit ug pag-antus.”

Si Presidente Kimball mihatag og pipila ka mga pulong sa pagpangumusta, gipangutana ang akong amahan kon nakadawat na ba siya og panalangin sa priesthood, ug unya, sa dihang miingon si Papa nga human na, ang propeta milingkod og balik sa iyang lingkuranan.

Akong gipaabut ang usa ka pagpakita sa makahupay nga kahanas nga gibati nako nga maoy akong kulang ug gikinahanglan kaayo. Human tingali sa mga lima ka minutos sa pagpaniid nilang duha nga nagpahiyumay lang sa hilom, akong nakita si Presidente Kimball nga mibarug ug miingon, “Henry, moadto na lang ko una ka mapul-an namo.”

Abi nako og wala nako makuha ang leksyon, apan miabut kini sa wala madugay. Sa hilom nga panagsultihanay namo ni Papa sa dihang may igo na siyang kalagsik sa pagpauli, ang among panag-istorya miabut niadtong pagbisita ni Presidente Kimball. Si Papa hilum nga miingon, “Sa tanang mga pagbisita, kadtong iyang pagbisita ang hilabihan nga midasig sa akong espiritu.”

Si Presidente Kimball walay daghang gisulti nga mga pulong sa paghupay, nga madungog man lang nako, apan miadto siya uban sa Espiritu sa Ginoo isip iyang kauban sa paghatag og kahupayan. Akong nahibaloan karon nga gipakita niya ang leksyon nga gitudlo ni Presidente Monson: “Unsaon man sa usa ka tawo sa pagpalambo og calling? Pinaagi lamang sa paghimo sa serbisyo nga may kalabutan niini.”

Tinuod kana bisan kon kita gitawag man sa pagtudlo sa ebanghelyo pinaagi sa Espiritu o moadto uban sa Espiritu Santo ngadto sa mga tuhod nga mahuyang ug sa mga kamot nga nawad-an og paglaum.⁷ Ang atong pagserbisyo sa priesthood malig-on, ang mga tawo mapanalanginan, ug ang kahayag sa langit maanaa. Ang kahayag sa langit maanaa alang kanato ingon man usab sa atong giserbisyohan. Tingali maluya kita. Ang mga kasamok sa atong kaugalingon ug sa atong pamilya tingali mopabalaka kanato. Apan adunay panalangin sa pagdasig alang niadtong kinsa nagserbisyo ubos sa impluwensya sa Espiritu.

Si Presidente George Q. Cannon adunay hilabihan ka daghan nga kasub-anan, oposisyon, ug mga pagsulay sa iyang mga katuigan sa pagserbisyo sa priesthood. Nakasinati usab siya sa Espiritu Santo isip iyang kauban sa lisud nga mga panahon ug grabe nga pagserbisyo. Kini ang iyang pasalig ngari kanato diha sa atong pagserbisyo sa priesthood, diha sa Simbahan ug sa atong mga pamilya. Alang kanako ang saad tinuod sa dihang ako mibati sa Espiritu sa akong pagserbisyo sa priesthood. “Kon ang kangitngit motabon sa atong mga hunahuna, masayud kita nga wala sa sulod kanato ang Espiritu sa Dios … Kon mapuno kita sa Espiritu sa Dios mapuno kita sa hingpit nga kalipay, sa kalinaw, ug sa kamaya, bisan unsa pa ang atong mga kahimtang; kay kini mao ang diwa sa kamadasigon ug kamaya. Ang Ginoo mihatag kanato sa gasa sa Espiritu Santo. Ato kini nga pribilehiyo nga makabaton sa Espiritu Santo nga mopuyo sulod kanato, aron gikan sa buntag hangtud sa gabii ug gikan sa gabii hangtud sa buntag mabatunan nato ang hingpit nga kalipay, ang kahayag ug ang pagpadayag niini.”⁸

Atong mapaabut kana nga panalangin sa kamaya ug hingpit nga kalipay nga moabut kon kini atong gikinahanglan atol sa malisud nga mga panahon sa matinud-anon natong pagserbisyo sa priesthood.

Akong ipamatuod nga gitawag kita sa Dios pinaagi sa pagpanagna. Mao kini ang tinuod nga Simbahan ni Jesukristo, nga gipahiuli pinaagi ni Propeta Joseph Smith. Ang Dios buhi ug maminaw sa atong matag pag-ampo. Si Jesus mao ang nabanhaw nga Kristo ug ang atong Manluluwas. Mahimo kamo nga masayud nga kining mga butanga tinuod pinaagi sa gahum sa Espiritu Santo, nga moabut kaninyo diha sa inyong pagserbisyo. Sa pangalan ni Jesukristo, amen.