Samtang Kita Nagkatigum Pag-usab
Ang misyonaryo nga pagserbisyo usa ka katungdanan sa priesthood—usa ka obligasyon nga gipaabut sa Ginoo kanato kinsa gihatagan og hilabihan ka daghan.
Akong minahal nga mga kaigsoonan, gi-welcome mo namo sa kinatibuk-ang komperensya, nga madungog ug makita pinaagi sa nagkalainlaing nga pamaagi sa tibuok kalibutan. Among ipahayag ang among pasalamat sa tanan kinsa mitabang sa komplikado nga pagpahigayon niining dako nga buluhaton.
Sukad niadtong Abril sa katapusan natong panagtigum, ang buhat sa Simbahan nagpadayon nga wala mabalda. Akong pribilehiyo ang pagpahinungod sa upat ka bag-ong mga templo. Inubanan sa akong mga magtatambag ug sa ubang mga General Authority, mibiyahe ko sa Gila Valley, Arizona; sa Vancouver, British Columbia; sa Cebu City sa Pilipinas; ug sa Kiev, Ukraine. Ang mga templo sa matag usa niini nga mga dapit hilabihan gayud ka nindot. Ang matag usa nagpanalangin sa kinabuhi sa atong mga miyembro ug usa ka positibong impluwensya ngadto niadtong dili pareha nato og tinuohan.
Sa gabii sa wala pa ang matag pagpahinungod sa templo, kami adunay pribilehiyo nga kinaugalingon. og cultural celebration, nga gisalmutan sa atong mga kabatan-onan ug pipila sa atong dili kaayo mga batan-on. Kini nga mga kalihokan sa kasagaran gipahigayon sa dagko nga mga estadyum, bisan tuod nga sa Kiev nagtigum kami sa usa ka nindot nga palasyo. Ang pagsayaw, pagkanta, mga pasundayag sa musika, ug mga presentasyon talagsaon kaayo. Akong ipahayag ang akong pagdayeg ug gugma ngadto sa tanang miapil.
Ang matag pagpahinungod sa templo usa ka espirituhanong pagbusog. Among gibati ang espiritu sa Ginoo sa tanan niini.
Sunod bulan atong ipahinungod pag-usab ang Laie Hawaii Temple, usa sa atong labing karaan nga mga templo, nga napaubos sa grabe kaayo nga mga renovation sulod sa daghang mga bulan. Nagpaabut kita nianang sagrado nga okasyon.
Nagpadayon kita sa pagtukod og mga templo. Karong buntaga malipayon akong mopahibalo sa dugang lima ka mga templo diin ang mga luna napalit na ug diin, sa umaabut nga mga bulan ug mga tuig, pagatukuron sa mosunod nga mga lokasyon: Lisbon, Portugal; Indianapolis, Indiana; Urdaneta, Philippines; Hartford, Connecticut; ug Tijuana, Mexico.
Ang mga ordinansa nga gipahigayon sa atong mga templo mahinungdanon sa atong kaluwasan ug sa kaluwasan sa atong namatay na nga mga minahal sa kinabuhi. Unta padayon kitang magmatinud-anon sa atong pagtambong sa mga templo, nga gipangtukod nga mas nagkaduol sa atong mga miyembro.
Karon, sa dili pa kita maminaw sa atong mga mamumulong karong buntaga, akong hisgutan ang usa ka butang nga duol sa akong kasingkasing ug nagkinahanglan sa atong seryusong pagtagad. Mamulong ko mahitungod sa misyonaryo nga buhat.
Una, ngadto sa batan-ong mga lalaki sa Aaronic Priesthood ug nganha kaninyo batan-ong mga lalaki nga mahimo nang mga elder: akong balikon ang dugay nang gitudlo sa mga propeta—nga ang matag takus, makahimo nga batan-ong lalaki kinahanglan nga mangandam sa pagserbisyo og misyon. Ang misyonaryo nga pagserbisyo usa ka katungdanan sa priesthood—usa ka obligasyon nga gipaabut sa Ginoo kanato kinsa gihatagan og hilabihan ka daghan. Batan-ong mga lalaki, gi-awhag ko kamo sa pagpangandam alang sa pagserbisyo isip misyonaryo. Ipabilin ang inyong kaugalingon nga limpyo ug putli ug takus nga morepresentar sa Ginoo. Imintinar ang inyong kahimsug ug kalig-on. Pagtuon sa mga kasulatan. Kon kini anaa, apil sa seminary o institute. Himoa nga kamo mapamilyar sa handbook sa misyonaryo nga Isangyaw ang Akong Ebanghelyo.
Usa ka tambag alang kaninyo batan-ong mga sister: ingon nga kamo wala sa samang responsibilidad sa priesthood sama sa batan-ong mga lalaki sa pagserbisyo isip full-time nga mga misyonaryo, makahimo usab kamo og bililhong kontribusyon isip mga misyonaryo, ug among gihangup ang inyong pagserbisyo.
Ug karon nganha kaninyong hingkod nga mga kaigsoonan: nagkinahanglan kita og daghan, daghan pang senior nga mga magtiayon. Ngadto sa matinud-anong mga magtiayon nga nagserbisyo karon o nakaserbisyo sa nangagi, nagpasalamat kami sa inyong pagtuo ug debosyon sa ebanghelyo ni Jesukristo. Nagserbisyo kamo sa maandamon ug sa maayong paagi ug nakahimo og dakong kaayohan.
Ngadto kaninyo kinsa wala pa ang panahon sa kinabuhi nga kamo makaserbisyo og misyon isip magtiayon, gi-awhag ko kamo sa pagpangandam karon alang sa adlaw nga kamo ug ang inyong kapikas makahimo sa ingon. Kutob sa itugot sa inyong kahimtang, ingon nga kamo angayan na nga moretiro, ug ingon nga mahimo sa inyong panglawas, himoa nga kamo andam nga mobiya sa panimalay ug mohatag og full-time nga misyonaryo nga pagserbisyo. Adunay pipila ka mga higayon sa inyong kinabuhi nga matagamtaman ninyo ang nindot nga diwa ug katagbawan nga moabut tungod sa paghatag og full-time nga pagserbisyo nga manag-uban diha sa buhat sa Manluluwas.
Karon, akong mga kaigsoonan, unta kamo nahiangay ngadto sa espiritu sa Ginoo samtang maminaw kita sa Iyang mga sulugoon atol sa mosunod nga duha ka adlaw. Nga kini mahimo unta nga panalangin sa matag usa, ako nag-ampo, sa pangalan ni Jesukristo, amen.