Dawata ang Espiritu Santo

Niadtong Disyembre 1839, samtang didto sila sa Washington D.C., nangita og husay sa dili maayong gibuhat ngadto sa mga Santos sa Missouri, si Joseph Smith ug si Elias Higbee misulat kang Hyrum Smith: “Sa among pag-interbyu uban sa Presidente [sa Estados Unidos], gipangutana kami niya kon diin kita nagkalahi sa atong relihiyon gikan sa ubang mga relihiyon niana nga panahon. Si Brother Joseph miingon nga kita nagkalahi sa pamaagi sa bunyag, ug sa gasa sa Espiritu Santo pinaagi sa pagpandong sa mga kamot. Atong giisip nga ang tanan pang uban nga mga konsiderasyon anaa diha sa gasa sa Espiritu Santo” (Teachings: Joseph Smith [2007], 114).

Ang Espritu Santo mao ang ikatulo nga sakop sa Dios nga Kapangulohan; siya usa ka personahe nga espiritu ug magsaksi sa tanang kamatuoran. Sa mga kasulatan ang Espiritu Santo mao ang gipasabut nga Maghuhupay (tan-awa sa Juan 14:16–27; Moroni 8:26), usa ka Magtutudlo (tan-awa sa Juan 14:26; D&P 50:14), ug usa ka Tigpadayag (tan-awa sa 2 Nephi 32:5). Ang mga pagpadayag gikan sa Amahan ug sa Anak ihatag pinaagi sa Espiritu Santo. Siya ang mensahero ug ang saksi sa Amahan ug sa Anak.

Ang Espiritu Santo maanaa sa mga lalaki ug sa mga babaye sa yuta isip usa ka gahum ug gasa sa Espiritu Santo. Ang gahum mahimong moabut nganha sa tawo sa dili pa ang bunyag; mao kana ang makakombinsir nga saksi nga si Jesukristo ang atong Manluluwas ug Manunubos. Pinaagi sa gahum sa Espiritu Santo, ang sinsero nga mga investigator makaangkon og konbiksyon sa katinuod sa ebanghelyo sa Manluluwas, sa Basahon ni Mormon, sa katinuod sa Pagpahiuli, ug sa mapanagnaon nga calling ni Joseph Smith.

Ang gasa sa Espiritu Santo itugyan lamang human sa tukma ug awtorisado nga pagbunyag pinaagi sa pagpatong sa mga kamot niadtong nanaghupot sa Melchizedek Priesthood. Ang Ginoo namahayag:

“Oo, paghinulsol ug pagpabunyag, matag usa kaninyo, alang sa kapasayloan sa inyong mga sala; oo, magpabunyag gani sa tubig, ug unya moabut ang pagbunyag sa kalayo ug sa Espiritu Santo. …

“Ug kinsa kadto nga adunay hugot nga pagtuo kamo mokumpirma diha sa akong simbahan, pinaagi sa pagpandong sa mga kamot, ug Ako motugyan sa gasa sa Espiritu Santo diha kanila” (D&P 33:11, 15).

Si Apostol Pablo mihimo niini nga buhat nga klaro ngadto sa mga taga-Efeso dihang siya nangutana:

“Nakadawat na ba kamo sa Espiritu Santo sa diha nga mituo na kamo? Ug sila miingon kaniya, Wala, wala man gani kami makadungog nga aduna diay Espiritu Santo.

“Ug siya nangutana kanila, Ngadto ba diay sa unsa ang pagbautismo kaninyo? Sila mitubag kaniya, Ngadto sa bautismo ni Juan.

“Ug si Pablo miingon, Si Juan nagbautismo sa bautismo sa paghinulsol, nga nag-agda sa katawhan sa pagsalig niadtong moabut sa ulahi kaniya, sa ato pa, kang Kristo Jesus.

“Ug sa ilang pagkadungog niini, sila gipangbautismohan sa ngalan ni Ginoong Jesus.

“Ug sa napandungan na sila ni Pablo sa iyang mga kamot, ang Espiritu Santo mikunsad kanila” (Mga Buhat 19:2–6).

Ang bunyag pinaagi sa pagpaunlod mao ang “pasiuna nga ordinansa sa ebanghelyo, ug kinahanglang pagasundan sa bunyag sa Espiritu aron makompleto kini” (Ang Giya Ngadto sa mga Kasulatan, “Bunyag,”). Si Propeta Joseph Smith mipasabut nga ang “bunyag usa ka balaang ordinansa nga igpapangandam sa pagdawat sa Espiritu Santo; mao kini ang pamaagi ug yawe diin ang Espiritu Santo mapangalagad. Ang gasa sa Espiritu Santo pinaagi sa pagpatong sa mga kamot, dili madawat sa bisan unsa nga pamaagi sa lain nga baruganan kay sa baruganan sa pagkamatarung” (Teachings: Joseph Smith, 112–13)

Ang ordinansa sa pagkumpirma sa usa ka bag-ong miyembro sa Simbahan ug ang pagtugyan sa gasa sa Espiritu Santo pareho nga yano ug lawom. Ang takus nga mga naghupot sa Melchizedek Priesthood mopandong sa ilang mga kamot sa ulo sa indibidwal ug tawagon siya sa iyang ngalan. Dayon, sa katungod sa balaang priesthood ug sa ngalan sa Manluluwas, ang indibidwal kumpirmahan nga sakop sa Ang Simbahan ni Jesukristo sa mga Santos sa Ulahing mga Adlaw, ug kining importante nga hugpong sa pulong ang litukon: “Dawata ang Espiritu Santo.”

Ang pagkayano niini nga ordinansa maoy hinungdan nga mataligam-an ang kahulugan niini. Kining upat ka mga pulong—“Dawata ang Espiritu Santo”—dili usa ka lumalabay lamang nga pahayag; hinoon, naglangkob kini og usa ka mando sa priesthood—usa ka awtorisado nga awhag sa paglihok nga dili pagaaghaton (tan-awa sa 2 Nephi 2:26). Ang Espiritu Santo wala himoa nga kanunayng maglihok sa atong kinabuhi tungod lamang kay gipandungan na kita sa mga kamot sa atong ulo ug gipamulong na kadtong importanting mga pulong. Sa atong pagdawat niini nga ordinansa, ang matag usa kanato midawat og usa ka sagrado ug padayong responsibilidad sa pagtinguha, sa pagtrabaho, ug sa pagkinabuhi nga kita sa pagkatinuod “nakadawat sa Espiritu Santo” ug sa espirituhanong mga gasa nga anaa. “Kay unsa ang makuha sa usa ka tawo kon ang gasa itugyan diha kaniya, ug siya wala modawat sa gasa? Tan-awa, siya wala malipay niana nga gihatag ngadto kaniya, ni malipay diha kaniya kinsa mao ang naghatag sa gasa” (D&P 88:33).

Unsa may atong buhaton aron kini nga awtorisadong awhag sa pagtinguha sa pakig-uban sa Dios nga Kapangulohan mahimong usa ka padayon nga reyalidad? Akong isugyot nga atong gikinahanglan ang (1) tinuoray nga pagtinguha sa pagdawat sa Espiritu Santo, (2) ang tukma nga pagdapit sa Espiritu Santo sa atong kinabuhi; ug (3) matinud-anon nga pagtuman sa mga sugo sa Dios.

Una kinahanglan kitang magtinguha, mangandoy, ug tinguhaon ang pakig-uban sa Espiritu Santo. Ikaw ug ako makakat-on og usa ka talagsaong leksyon mahitungod sa matarung nga mga tinguha gikan sa matinud-anong mga disipulo sa Agalon nga gihulagway sa Basahon ni Mormon:

“Ug ang napulog duha mitudlo sa pundok sa mga katawhan; ug tan-awa, sila misugo sa pundok sa mga katawhan nga moluhod sa yuta, ug kinahanglan nga mag-ampo ngadto sa Amahan sa ngalan ni Jesus. …

“Ug sila nag-ampo alang niana diin sila labing nagtinguha; ug sila nagtinguha nga ang Espiritu Santo kinahanglang ihatag ngadto kanila” (3 Nephi 19:6, 9).

Kita ba usab nahinumdom sa pag-ampo nga matinguhaon ug kanunay alang sa labaw natong gitinguha, gani ang Espiritu Santo? O kita nalinga ba sa kalibutanong mga kabalaka ug sa inadlawng panginabuhi ug gikalimtan o wala na matagad kining pinakabililhon sa tanang mga gasa? Ang pagdawat sa Espiritu Santo magsugod sa atong sinsero nga tinguha ug sa padayon nga tinguha alang sa Iyang pakig-uban sa atong kinabuhi.

Mas andam kitang modawat ug moila sa Espiritu sa Ginoo kon tukma ang atong pagdapit Kaniya sa atong kinabuhi. Dili kita makapugos, o makamando sa Espiritu Santo. Hinoon, atong gikinahanglan ang pagdapit Kaniya sa atong kinabuhi uban sa sama nga kalumo ug kaaghop sama sa Iyang pagtagad kanato (tan-awa sa D&P 42:14).

Ang atong mga pagdapit alang sa pakig-uban sa Espiritu Santo mahitabo sa daghang paagi: pinaagi sa paghimo ug paghupot sa mga pakigsaad; pinaagi sa sinsero nga pag-ampo isip mga indibidwal ug sa pamilya; pinaagi sa makugihong pagsiksik sa mga kasulatan; pinaagi sa paglig-on sa tukma nga pakigrelasyon sa mga sakop sa pamilya ug mga higala; pinaagi sa pagtinguha og limpyo nga hunahuna, mga buhat, ug pinulongan; ug sa pag-ampo sa atong mga panimalay, sa balaang templo, ug sa simbahan. Sa laing bahin, ang pagbaliwala o ang pagsupak sa mga pakigsaad ug mga panaad, ang kapakyas sa pag-ampo ug pagtuon sa mga kasulatan, ug dili angay nga mga hunahuna, mga buhat, ug pinulongan mopalayo sa Espiritu o malayo kanatong tanan.

Sumala sa gitudlo ni Haring Benjamin sa iyang katawhan: “Ug karon, ako moingon nganha kaninyo, akong mga kaigsoonan, nga human kamo masayud ug matudloan sa tanan niini nga mga butang, kon kamo makalapas ug makasupak ngadto niana nga gipamulong na, nga kamo mopahilayo sa inyong mga kaugalingon gikan sa Espiritu sa Ginoo, nga kini mahimo nga wala nay dapit diha kaninyo aron sa pag-agak kaninyo diha sa mga agianan sa kaalam aron kamo mapanalanginan, mouswag, ug matunhay” (Mosiah 2:36).

Ang matinud-anon nga pagtuman sa mga sugo sa Dios gikinahanglan sa pagdawat sa Espiritu Santo. Gipahinumduman kita kabahin niini nga kamatuoran matag semana samtang atong gipaminaw ang mga pag-ampo sa sakrament ug takus nga pag-ambit sa pan ug sa tubig. Samtang nanaad kita sa pagdala sa atong kaugalingon sa ngalan ni Jesukristo, sa kanunay nga paghinumdom Kaniya, ug sa paghupot sa Iyang mga sugo, gisaaran kita nga unta sa kanunay makabaton kita sa Iyang Espiritu uban kanato (tan-awa sa D&P 20:77). Sa ingon, ang tanan nga gitudlo sa ebanghelyo sa Manluluwas nga atong buhaton ug makab-ot gituyo alang sa pagpanalangin kanato sa pakig-uban sa Espiritu Santo.

Ikonsidera ang mga rason sa atong pag-ampo ug pagtuon sa mga kasulatan. Oo, atong gihandom ang pagpakigsulti sa Langitnong Amahan sa pangalan sa Iyang Anak. Ug oo, atong tinguha ang pag-angkon sa kahayag ug kahibalo nga anaa sa sumbanang mga basahon. Apan palihug hinumdumi nga kining balaan nga mga naandang buhaton una sa tanan maoy mga paagi diin kita kanunay nga makahinumdom sa Langitnong Amahan ug sa Iyang Hinigugma nga Anak ug kini mga kinahanglanon alang sa umaabut nga pakig-uban sa Espiritu Santo.

Pamalandungi ang mga hinungdan nganong magsimba kita sa balay sa Ginoo ug sa atong mga miting sa Igpapahulay. Oo, nagserbisyo kita sa templo alang sa atong mga kaliwatan nga patay na—ug sa atong mga pamilya ug mga higala sa mga ward ug mga branch diin kita nagpuyo. Ug oo, atong gitagamtam ang matarung nga pagpakig-uban nga atong nakita tali sa atong mga kaigsoonan. Apan una sa tanan kita nagpundok diha sa panaghiusa sa pagtinguha sa mga panalangin ug panudlo gikan sa Espiritu Santo.

Ang pag-ampo, pagtuon, pagpundok, pagsimba, pagserbisyo, ug pagtuman dili bulag ug dili independente nga mga butang diha sa listahan sa ebanghelyo sa mga butang nga buhatunon. Apan hinoon, ang matag usa niining matarung nga mga buluhaton mao ang importante nga elemento sa hilabihan ka kurbadahon nga espirituhanong pagpangita aron pagtuman sa sugo sa pagdawat sa Espiritu Santo. Ang mga sugo sa Dios nga atong gituman ug ang dinasig nga mga tambag gikan sa mga lider sa Simbahan nga atong gisunod sa kasagaran nagtumong alang sa pag-angkon og pakig-uban sa Espiritu. Labaw sa tanan, ang tanang pagtulun-an sa ebanghelyo ug mga kalihokan gitumong alang sa umaabut natong pagdawat sa Espiritu Santo sa atong kinabuhi.

Ikaw ug ako kinahanglang maningkamot nga mahimong sama sa mga batan-ong manggugubat nga gihulagway sa basahon ni Mormon kinsa “mibuhat sa matag pulong sa sugo nga walay pagkasayop niini; oo, ug gani sumala sa ilang hugot nga pagtuo kini nahimo ngadto kanila. …

“… ug sila higpit sa paghinumdom sa Ginoo nga ilang Dios adlaw-adlaw; oo, sila naninguha sa paghupot sa iyang mga balaod, ug sa iyang mga paghukom, ug sa iyang mga sugo sa kanunay” (Alma 57:21; 58:40).

Ang Ginoo mipahayag nga ang Simbahan ni Jesukristo sa mga Santos sa Ulahing mga Adlaw mao lamang “ang matuod ug buhi nga simbahan diha sa ibabaw sa tibuok yuta” (D&P 1:30). Kini nga gipahiuli nga Simbahan tinuod tungod kay Simbahan man kini sa Manluluwas; Siya ang “dalan, ang kamatuoran, ug ang kinabuhi” (Juan 14:6). Ug buhi kini nga simbahan tungod sa mga buhat ug mga gasa sa Espiritu Santo. Kadako sa atong panalangin nga makapuyo sa panahon nga anaa sa yuta ang priesthood ug makadawat kita sa Espiritu Santo.

Pipila ka tuig human gimartir si Propeta Joseph Smith, mipakita siya kang Presidente Brigham Young ug mipaambit niining walay sukod sa panahon nga tambag: “Ingna ang mga tawo sa pagpaubos ug pagmatinud-anon, ug siguroa nga huptan nila ang Espiritu sa Ginoo ug kini mogiya kanila sa husto. Pag-amping ug dili mobaliwala sa hinay ligdong nga tingog; motudlo kini [unsay inyong] buhaton ug asa paingon; makahatag kini sa mga bunga sa gingharian. Sultihi ang mga kaigsoonan sa pagbukas kanunay sa ilang mga kasingkasing alang sa konbiksyon, aron kon ang Espiritu Santo moabut kanila, andam na ang ilang mga kasingkasing sa pagdawat niini. Ilang masultihan ang Espiritu sa Ginoo sa uban pang mga espiritu. Mohunghong kini og kalinaw ug kamaya sa ilang mga kalag, tangtangon niini ang malisya, kapungot, kasina, panagbingkil, ug tanang dautan gikan sa ilang kasingkasing; ug ang tanan nilang tinguha mao ang paghimo og maayo, pagdala sa kamatarung ug pagtukod sa gingharian sa Dios. Sultihi ang mga kaigsoonan nga kon sila mosunod sa Espiritu sa Ginoo, magalakaw sila sa husto, (Teachings: Joseph Smith, 115).

Akong giampo nga kita tinuoray nga magtinguha og tukma nga pagdapit sa Espiritu Santo sa atong inadlawng pagkinabuhi. Usab akong iampo nga ang matag usa kanato matinud-anong motuman sa mga sugo sa Dios ug sa tinuoray makadawat sa Espiritu Santo. Akong isaad nga ang mga panalangin nga gihulagway ni Propeta Joseph Smith ngadto kang Brigham Young magamit ug makab-ot sa matag indibidwal kinsa makadungog o makabasa niini nga mensahe.

Akong ihatag ang akong pagsaksi sa buhing reyalidad sa Amahan ug sa Anak. Akong ipamatuod nga ang Espiritu Santo mao ang tigpadayag, usa ka maghuhupay, ug ang mahinungdanong magtutudlo diin kita angay nga magkat-on. Ug ako mosaksi nga amg panalangin ug mga gasa sa Espiritu anaa naglihok sa gipahiuli, sa matuod, ug sa buhi nga Simbahan ni Jesukristo niining ulahing mga adlaw. Busa ako mopamatuod sa sagradong pangalan ni Ginoong Jesukristo, amen.