Kabubut-on: Mahinungdanon sa Plano sa Kinabuhi

Bag-ohay pa lang nakadawat ko og sulat gikan sa usa ka higala sa kapin 50 na ka tuig kinsa dili miyembro sa atong Simbahan. Nakapadala ko niya og basahon nga may kalabutan sa ebanghelyo, diin siya mitubag: “Una sa tanan lisud alang kanako ang pagsabut sa kasagaran nga terminolohiya sa Mormon, sama sa kabubut-on. Basin makatabang ang paggamit og mubo nga pahina sa bokabularyo.”

Nasurprisa ko nga wala niya masabti unsay atong gipasabut sa pulong nga kabubut-on. Miadto ko sa diksyonaryo sa internet. Sa napulo ka mga kahulugan ug sa paggamit sa pulong nga kabubut-on, walay bisan usa nga nangahulugan sa ideya sa paghimo og mga kapilian sa paglihok. Kita nagtudlo nga ang kabubut-on mao ang abilidad ug kahigayunan nga gihatag sa Dios kanato aron sa pagpili ug sa “pagbuhat alang sa [atong mga kaugalingon] ug nga dili pagaaghaton.”¹ Ang kabubut-on mao ang pagbuhat inubanan sa tulubagon ug responsibilidad alang sa atong mga aksyon. Ang atong kabubut-on mahinungdanon sa plano sa kaluwasan. Kay aduna niini kita “gawasnon sa pagpili og kalingkawasan ug kinabuhi nga dayon, pinaagi sa halangdon nga Tigpataliwala sa tanan nga mga tawo, o sa pagpili sa pagkabihag ug sa kamatayon, sumala sa pagkabihag ug sa gahum sa yawa.”²

Ang mga pulong sa usa ka pamilyar nga himno nagtudlo niini nga baruganan nga klaro kaayo:

Sa pagtubag sa pangutana sa akong higala ug sa mga pangutana sa buotang mga lalaki ug mga babaye bisan asang dapita, tuguti nga mopaambit ako kaninyo og dugang sa unsay atong nahibaloan bahin niining kahulugan sa kabubut-on.

Sa wala pa kita moanhi sa yuta, ang Langitnong Amahan mipresentar sa Iyang plano sa kaluwasan—usa ka plano sa pag-anhi sa yuta ug pagdawat og usa ka lawas, pagpili sa paglihok tali sa maayo ug sa dautan, ug pag-uswag sa pagkahimong sama Kaniya ug mopuyo uban kaniya hangtud sa kahangturan.

Ang atong kabubut-on—ang atong abilidad ug pagbuhat alang sa atong kaugalingon—maoy usa ka mahinungdanon nga elemento niining plano. Kon wala ang kabubut-on kita dili makahimo og saktong mga pagpili ug mouswag. Apan tungod sa kabubut-on makahimo kita og sayop nga mga pagpili, makasala, ug mawad-an sa kahigayunan nga makauban og usab ang Langitnong Amahan. Tungod niini nga rason ang Manluluwas gihatag aron mag-antus alang sa atong mga sala ug motubos kanato kon kita maghinulsol. Pinaagi sa Iyang walay kinutuban nga Pag-ula, napahinabo Niya ang “plano sa kalooy, sa pagtagbaw sa mga gipangayo sa kaangayan.”⁴

Pagkahuman og presentar sa Langitnong Amahan sa Iyang plano, si Lucifer miadto sa atubangan, nga nag-ingon, “Ipadala ako, … ug ako motubos sa tanan nga mga katawhan, nga, [walay] usa ka kalag nga … mawala … ; busa ihatag kanako ang imong dungog.”⁵ Kini nga plano gisalikway sa atong Amahan, tungod kay kini mohikaw kanato sa atong kabubut-on. Sa pagkatinuod, usa kadto ka plano sa pagsukol.

Dayon si Jesukristo, ang “Hinigugma ug Pinili [nga Anak] sukad sa sinugdanan” sa Langitnong Amahan, migamit sa Iyang kabubut-on sa pag-ingon, “Amahan, ang imong pagbuot mao ang matuman, ug ang himaya imo sa kahangturan.”⁶ Siya ang mahimo natong Manluluwas—ang Manluluwas sa kalibutan.

Tungod sa pagsukol ni Lucifer, usa ka dakong kasamok sa espirituhanon ang mipuli. Matag usa sa mga anak sa Langitnong Amahan adunay kahigayunan sa paggamit sa kabubut-on nga gihatag sa Langitnong Amahan kanila. Kita mipili nga magbaton og hugot nga pagtuo sa Manluluwas nga si Jesukristo—sa pagduol ngadto Kaniya, pagsunod Kaniya, ug pagdawat sa plano sa Langitnong Amahan nga gipresentar alang sa atong kaayohan. Apan ang ikatulo nga bahin sa mga panon sa mga anak sa Langitnong Amahan walay hugot nga pagtuo sa pagsunod sa Manluluwas ug mipili hinoon sa pagsunod kang Lucifer, o ni Satanas.⁷

Ug ang Dios miingon, “Busa, tungod kay si Satanas misukol batok kanako, ug nagtinguha sa paglaglag sa kabubut-on sa tawo, diin Ako, ang Ginoong Dios, mihatag ngadto kaniya, … Ako nagsugo nga siya isalikway.”⁸ Kadtong misunod ni Satanas nawad-an sa kahigayunan sa pagdawat og mortal nga lawas, pagpuyo sa yuta, ug pag-uswag. Tungod sa pamaagi nga sila migamit sa ilang kabubut-on, nawala ang ilang kabubut-on.

Karon ang bugtong gahum nga anaa ni Satanas ug sa iyang mga sumusunod mao lang ang gahum sa pagtintal ug pagsulay kanato. Ang ilang bugtong kalipay mao ang paghimo kanato nga “mauyamot sama ngadto sa [ilang mga kaugalingon].”⁹ Ang ilang bugtong kalipay moabut kon kita magmasinupakon sa mga sugo sa Ginoo.

Apan hunahunaa kini: sa atong kahimtang sa wala pa sa kalibutan kita mipili sa pagsunod sa Manluluwas nga si Jesukristo! Ug tungod kay atong gibuhat, kita gitugtan sa pag-anhi sa yuta. Ako mopamatuod nga pinaagi sa paghimo sa samang pagpili sa pagsunod sa Manluluwas karon, samtang ania kita dinhi sa yuta, atong maangkon ang mas dako nga panalangin sa kahangturan. Apan sayri kini: kita kinahanglang mopadayon sa pagpili sa pagsunod sa Manluluwas. Ang kahangturan anaa sa kakuyaw, ug ang atong maalamong paggamit sa kabubut-on ug ang atong mga lihok mahinungdanon aron kita unta makabaton og kinabuhing dayon.

Sa Iyang tibuok kinabuhi ang atong Manluluwas mipakita kanato unsaon sa paggamit ang atong kabubut-on. Samtang bata pa didto sa Jerusalem, Siya walay pagduha-duha nga mipili sa “pagbuhat sa buluhaton sa [Iyang] Amahan.”¹⁰ Sa Iyang pangalagad, masulundon Siyang mipili “sa pagbuhat sa kabubut-on sa [Iyang] Amahan.”¹¹ Sa Getsemani, Siya mipili sa pag-antus sa tanang mga butang, sa pag-ingon “Dili ang akong pagbuot maoy matuman, kondili ang imo. Ug dihay anghel nga mitungha kaniya gikan sa langit, sa paglig-on kaniya.”¹² Diha sa krus, Siya mipili sa paghigugma sa Iyang mga kaaway, nag-ampo, “Amahan, pasayloa sila; kay wala sila makasabut sa ilang gibuhat.”¹³ Ug unya, aron Siya sa katapusan makapakita nga Siya mipili alang sa Iyang kaugalingon, Siya gibiyaang nag-inusara. “[Amahan], nganong gitalikdan mo ako?” Siya nangutana.¹⁴ Sa katapusan, Siya migamit sa Iyang kabubut-on sa paglihok, sa paglahutay sa katapusan, hangtud nga Siya nakasulti, “Natapus na.”¹⁵

Bisan tuod nga Siya “sa tanang paagi gitintal ingon kanato sa atong mga kaluyahon,”¹⁶ sa matag pagpili ug sa matag aksyon Siya migamit sa kabubut-on nga mahimo natong Manluluwas—aron sa pagbugto sa mga kadena sa sala ug sa kamatayon alang kanato. Ug pinaagi sa Iyang hingpit nga kinabuhi, Siya mitudlo kanato nga sa higayon nga kita mopili sa pagbuhat sa kabubut-on sa atong Langitnong Amahan, ang atong kabubut-on mapreserbar, ang atong mga oportunidad managhan, ug kita mouswag.

Ang ebidensya niining kamatuoran makita sa tibuok kasulatan. Si Job nawad-an sa tanang butang bisan pa man siya mipili nga magpabiling matinud-anon, ug siya nakaangkon sa mahangturon nga mga panalangin sa Dios. Sila si Maria ug Jose mipili sa pagsunod sa pasidaan sa anghel sa pagbiya ngadto sa Ehipto, ug ang kinabuhi sa Manluluwas napreserbar. Si Joseph Smith mipili sa pagsunod sa mga panudlo ni Moroni, ug ang Pagpahiuli nasugdan sumala sa gipanagna. Sa higayon nga kita mopili sa pagduol kang Kristo, modala sa Iyang pangalan ngari kanato, ug mosunod sa Iyang mga sulugoon, kita mouswag subay sa dalan ngadto sa kinabuhing dayon.

Sa atong panaw sa pagkamortal, makatabang ang paghinumdom nga ang sukwahi tinuod usab: sa higayon nga kita dili mosunod sa mga sugo o mosunod sa mga pag-aghat sa Espiritu Santo, ang atong mga oportunidad mokunhod; ang atong mga abilidad sa pagbuhat ug pag-uswag mapupos. Sa dihang si Cain mihunos sa kinabuhi sa iyang igsoong lalaki tungod kay nahigugma siya ni Satanas labaw pa kay sa Dios, ang iyang espirituhanong pag-uswag mihunong.

Sa akong kabatan-on nakat-on ko og importante nga leksyon bahin sa unsang paagi nga ang atong mga lihok makapugong sa atong kagawasan. Usa ka adlaw gipa-varnish ko sa akong amahan sa usa ka salog nga kahoy. Akong gipili nga adto mosugod sa pultahan ug padulong sa sulod sa kwarto. Sa dihang hapit na ko mahuman, nakaamgo ko nga wala na koy agianan para makagawas. Walay bintana o pultahan sa pikas nga bahin. Akong napintalan hangtud nahimutang ko sa suok. Wala na koy maagian. Natanggong ko.

Sa higayon nga kita mosupak, kita espirituhanong nagpintal sa atong kaugalingon paingon sa suok ug nangabihag sa atong mga pagpili. Bisan tuod og kita espirituhanon nga natanggong, kanunay nga adunay agianan nga makabalik. Sama sa paghinulsol, ang pagliyok ug pagtunob sa bag-ong gi-varnish nga salog nagpasabut nga dakong trabahoon—daghang pagliha ug pagpahamis pag-usab! Ang pagbalik ngadto sa Ginoo dili sayon, apan mapuslanon kini.

Samtang kita makasabut sa hagit sa paghinulsol, kita makapasalamat sa mga panalangin sa Espiritu Santo sa paggiya sa atong kabubut-on ug sa Langitnong Amahan, kinsa naghatag kanato sa mga sugo ug nagpalig-on ug nagpaluyo kanato sa pagsunod niini. Nasabtan usab nato kon sa unsang paagi nga ang pagkamasulundon sa mga sugo sa katapusan makapanalipod sa atong kabubut-on.

Sama pananglit, sa higayon nga kita mopatalinghug sa Pulong sa Kaalam, kita makalingkawas sa pagkabihag sa masakiton nga panglawas ug pagkaadik sa mga butang nga sa pagkatinuod mohikaw kanato sa atong abilidad sa paglihok alang sa atong kaugalingon.

Samtang kita magsunod sa tambag sa paglikay ug paglingkawas sa utang karon, atong magamit ang atong kabubut-on ug makaangkon og kagawasan sa paggamit sa atong kinitaan alang sa pagtabang ug pagpanalangin sa uban.

Sa higayon nga kita mosunod sa tambag sa mga propeta nga maghimo og family home evening, pamilya nga pag-ampo, ug pamilya nga pagtuon sa kasulatan, ang atong mga panimalay mamahimong usa ka dapit alang sa espirituhanon nga paglambo alang sa atong mga anak. Dinha atong matudlo kanila ang ebanghelyo, mohatag sa atong mga pagpamatuod, mopahayag sa atong gugma, ug maminaw samtang sila mopaambit sa ilang mga pagbati ug mga kasinatian. Pinaagi sa atong matarung nga mga pagpili ug mga aksyon, kita mipalingkawas kanila gikan sa kangitngit pinaagi sa pagdugang sa ilang kahanas sa paglakaw diha sa kahayag.

Ang kalibutan nagtudlo og daghang mga bakak bahin sa kabubut-on. Daghan ang naghunahuna nga kinahanglan kitang “mokaon, moinom, ug maglipay; … ug kon kini mao nga kita adunay sayop, ang Dios molatigo kanato uban sa pipila ka mga latos, ug sa katapusan kita maluwas.”¹⁷ Ang uban mihangup sa kalibutanon ug milimud sa Dios. Ilang gipatuo ang ilang mga kaugalingon nga walay “katugbang ang tanan nga mga butang”¹⁸ ug, busa, “bisan unsa ang [buhaton] sa tawo dili kalapasan.”¹⁹ Kini “naglaglag sa kaalam sa Dios ug sa iyang walay katapusan nga mga katuyoan.”²⁰

Sukwahi sa kalibutanon nga pagtudlo, ang mga kasulatan nagtudlo kanato nga kita adunay kabubut-on, ug ang atong matarung nga paggamit sa kabubut-on sa kanunay makahimo og kalainan sa mga oportunidad nga atong naangkon ug sa atong abilidad sa pagbuhat niini ug mouswag sa kahangturan.

Sama pananglit, pinaagi ni propeta Samuel, ang Ginoo mihatag og klaro nga kamandoan ngadto ni Haring Saul:

“Ang Ginoo mipadala kanako aron sa pagdihog kanimo aron mahimong hari … : busa karon pamatia ang tingog … sa Ginoo. …

“… Lakaw ug hampaka si Amalek, ug hutda paglaglag ang tanan nga anaa kanila.”²¹

Apan si Saul wala mosunod sa kamandoan sa Ginoo. Iyang gibuhat ang unsay akong gitawag og “hinagpat nga pagsunod.” Misalig sa iyang kaugalingong kaalam, wala niya patya si Haring Agag ug mibalik nga nagdala sa labing nindot nga karnero, baka, ug uban pang mga kahayopan.

Ang Ginoo mipadayag niini ngadto ni propeta Samuel ug mipadala kaniya aron sa pagtangtang ni Saul sa pagkahari. Sa pag-abut sa propeta, si Saul miingon, “Ako nakatuman sa gisugo sa Ginoo.”²² Apan ang propeta nasayud na, miingon, “Unsay kahulugan niining pagtiyabaw sa mga karnero sa akong mga dalunggan, ug ang pag-inga sa mga baka nga akong nadunggan?”²³

Si Saul nangatarungan sa iyang kaugalingon pinaagi sa pagbasol sa uban, miingon nga ang katawhan mitago sa mga kahayopan aron sa paghimog mga sakripisyo ngadto sa Ginoo. Ang tubag sa propeta klaro: “Ang Ginoo may dako bang kalipay sa mga halad nga sinunog ug sa mga halad, maingon sa pagtuman sa tingog sa Ginoo? Ania karon, ang pagsugot labi pang maayo kay sa halad, ug ang pagpamati [sa mga sugo sa Ginoo] kay sa tambok sa mga laking karnero.”²⁴

Sa katapusan, si Saul mikumpisal, sa pag-ingon “Ako nakasala: kay ako nakalapas sa sugo sa Ginoo, ug sa imong mga pulong: kay ako nahadlok sa katawhan, ug mituman sa ilang tingog.”²⁵ Tungod kay si Saul wala mopatalinghug sa hingpit—tungod kay siya mipili sa hinagpat nga pagsunod—siya nawad-an sa kahigayunan ug sa kabubut-on nga mahimong hari.

Akong mga kaigsoonan, nagpatalinghug ba kita sa hingpit ngadto sa tingog sa Ginoo ug sa Iyang mga propeta? O, sama ni Saul, nanagbuhat ba kita sa hinagpat nga pagsunod ug nagpanghadlok sa mga paghusga sa mga tawo?

Ako moangkon nga kitang tanan makahimo og kasaypanan. Ang mga kasulatan nagtudlo kanato, “Sanglit nakasala man ang tanan, ug nakabsan sa himaya sa Dios.”²⁶ Alang niadtong kinsa nakita ang ilang mga kaugalingon nga binihag sa nanglabay nga dili matarung nga mga pagpili, natanggong sa mangitngit nga suok, nawad-an sa tanang mga panalangin nga maanaa sa matarung nga paggamit sa kabubut-on, kami nagmahal kaninyo. Balik! Gawas gikan sa mangitngit nga suok ug ngadto sa kahayag. Bisan og kamo kinahanglang motunob sa bag-ong gi-varnish nga salog, mapuslanon kini. Salig nga “pinaagi sa Pag-ula ni Kristo, ang tanan nga mga katawhan [lakip ninyo ug nako] mahimo nga maluwas, pinaagi sa pagkamasulundon sa mga balaod ug mga ordinansa sa Ebanghelyo.”²⁷

Sa dihang ang takna sa Pag-ula miabut na Kaniya, ang Manluluwas mihalad sa Iyang talagsaong Matubsanong Pag-ampo ug namulong mahitungod sa matag usa kanato, nag-ingon, “Amahan, buot ko unta nga asa gani ako atua usab uban kanako sila nga imong gitugyan kanako, aron makatan-aw sila sa akong kadungganan nga imong gihatag kanako.”²⁸ “Ug ang kinabuhing dayon mao kini, ang ilang pagkaila kanimo nga mao ang bugtong tinuod nga Dios, ug kang Jesukristo, nga imong pinadala.”²⁹

Ako mohatag sa akong linain nga pagsaksi nga Sila buhi. Kon kita mogamit sa atong kabubut-on diha sa pagkamatarung, ato Silang makaila, mamahimong mas mahisama Kanila, ug maandam ang atong kaugalingon alang niana nga adlaw nga ang “matag tuhod moluhod, ug matag dila mokumpisal.” nga si Jesus mao ang atong Manluluwas.³⁰ Hinaut nga kita mopadayon sa pagsunod Kaniya ug sa atong Amahan sa Kahangturan, sama sa atong gibuhat sa sinugdanan, ako nag-ampo sa pangalan ni Jesukristo, amen.