Hugot nga Pagtuo—ang Pagpili Inyo

Kita nagpuyo sa usa sa labing mahinungdanon nga mga dispensasyon sa tanang panahon—usa ka panahon nga gipaabut sa karaan nga mga propeta, gipanagna, ug, sa akong pagtuo, gipangandoy. Bisan pa niana, uban sa tanang langitnong mga panalangin nga gihatag kanato, si Satanas, nga tinuod gayud, hilabihan gayud ka aktibo, ug makalibog nga mga mensahe ang nagpadayon sa pagsamok natong tanan. Ang anghel nga si Moroni mipasidaan sa batan-ong Propeta Joseph Smith nga ang iyang ngalan pagagamiton alang sa maayo ug sa dautan sa tibuok kalibutan (tan-awa sa Joseph Smith—Kasaysayan 1:33), ug wala pa sukad ang katumanan sa usa ka panagna nga mas napamatud-an. Ang Propeta mitugyan sa iyang kinabuhi tungod sa iyang pagpamatuod, ug ang mga pag-ataki nagpadayon karon batok sa Simbahan ug gani sa Manluluwas mismo. Ang pagkatinuod sa Manluluwas, sa Iyang maulaon nga sakripisyo, ug sa malukupon nga paggamit niini alang kanatong tanan gihagit ug sa kanunay gipagawas nga usa ka minaomao o walay basihan nga paglaum sa usa ka huyang ug dili edukado nga hunahuna. Dugang pa niana, ang kamatuoran sa Pagpahiuli sa ebanghelyo niining ulahing mga adlaw padayon nga gihagit. Ang padayon nga pagpangataki sa ingon nga mga mensahe makahimo og kalibog, pagduhaduha, ug pagka-negatibo, ang matag usa nag-ataki sa sukaranang mga kamatuoran nga atong gituohan, sa atong hugot nga pagtuo sa Dios, ug sa atong paglaum sa umaabut.

Tingali mao kini ang kamatuoran sa atong kalibutan, apan makahimo gihapon kita sa pagpili kon unsa ang atong reaksyon niini. Kon ang atong sagrado nga doktrina ug mga gituohan gihagit, kini mao ang atong kahigayunan nga masinati ang Dios sa labing pribado ug suod nga paagi. Kini mao ang atong kahigayunan sa pagpili.

Tungod sa mga panagbingkil ug mga hagit nga atong giatubang sa kalibutan karon, gusto ko nga mosugyot og usa ka pagpili—usa ka pagpili sa kalinaw ug panalipod ug usa ka pagpili nga angay alang sa tanan. Kana nga pagpili mao ang hugot nga pagtuo. Timan-i nga ang hugot nga pagtuo dili libre nga gasa nga gihatag sa walay paghunahuna, tinguha, o paningkamot. Dili kini moabut nga sama sa yamog nga matagak gikan sa langit. Ang Manluluwas miingon, “Umari kanako” (Mateo 11:28) ug “Pangayo, ug kamo paga[hatagan]” (Mateo 7:7). Kini mga pulong sa paglihok—duol, tuktok. Kini mga pagpili. Mao nga ako moingon, pilia ang hugot nga pagtuo. Pilia ang hugot nga pagtuo kay sa pagduhaduha, pilia ang hugot nga pagtuo kay sa kahadlok, pilia ang hugot nga pagtuo kay sa wala maila ug sa wala makita, ug pilia ang hugot nga pagtuo kay sa pagka-negatibo.

Ang walay paglubad nga paghisgot ni Alma kabahin sa hugot nga pagtuo, ingon sa girekord diha sa ika-32 nga kapitulo sa Alma sa Basahon ni Mormon, mao ang nagsunod-sunod nga mga kapilian aron sa pagsiguro sa pagpalambo ug pagpatunhay sa atong hugot nga pagtuo. Si Alma mihatag kanato og direktiba sa pagpili. Ang iya mao ang mga pulong sa paglihok nga gipasiugdahan pinaagi sa pagpili. Iyang gigamit ang mga pulong pagmata, pagbangon, pagsulay, pagbansay, pagtinguha, pagtrabaho, ug pagtanom. Dayon si Alma mipasabut nga kon kita mohimo niini nga mga pagpili ug dili molabay sa binhi pinaagi sa pagkawalay pagtuo, dayon “kini mosugod sa pagtubo diha sulod sa [atong] mga dughan” (Alma 32:28).

Oo, ang hugot nga pagtuo usa ka pagpili, ug kini kinahanglan gayud nga pagatinguhaon ug palamboon. Sa ingon, responsable kita sa atong kaugalingong hugot nga pagtuo. Responsable usab kita sa atong kakulang sa hugot nga pagtuo. Ang pagpili inyo.

Daghan pa ang wala nako mahibaloi. Wala ako makahibalo sa mga detalye sa pag-organisar sa butang ngadto sa nindot nga kalibutan nga atong gipuy-an. Wala ako makasabut sa mga kalisud sa Pag-ula, sa unsang paagi nga ang sakripisyo sa Manluluwas makalimpyo sa tanang mahinulsulon nga katawhan, o giunsa sa Manluluwas pag-antus sa “kasakit sa tanan nga mga tawo” (D&P 18:11). Wala ako mahibalo kon asa ang siyudad sa Zarahemla, nga gisulti diha sa Basahon ni Mormon. Wala ako mahibalo kon ngano nga ang akong mga gituohan usahay mosukwahi sa gituohang siyentipikanhon o kalibutanon nga kahibalo. Tingali kini mao ang mga butang nga gihulagway sa atong Amahan sa Langit nga “mga tinagoan … sa langit” (D&P 107:19) nga ipadayag sa umaabut nga panahon.

Apan samtang wala ako masayud sa tanang butang, ako nasayud kon unsay importante. Ako nasayud sa yano ug simple nga mga kamatuoran sa ebanghelyo nga mogiya ngadto sa kaluwasan ug kahimayaan. Ako nasayud nga ang Manluluwas miantus gayud sa kasakit sa tanang mga tawo ug nga ang tanang mahinulsulon nga katawhan mahimong malimpyohan sa sala. Ug kon unsa ang wala nako masayri o wala hingpit nga masabti, uban sa gamhanang tabang sa akong hugot nga pagtuo, akong masumpay ang kal-ang ug mopadayon, moambit sa mga saad ug mga panalangin sa ebanghelyo. Ug unya, sama sa gitudlo ni Alma, ang atong hugot nga pagtuo moresulta ngadto sa hingpit nga kasayuran (tan-awa sa Alma 32:34). Ang pagpadayon ngadto sa wala pa mailhi, nga gisangkapan lamang og paglaum ug tinguha, nagpakita kita og ebidensya sa atong hugot nga pagtuo ug debosyon ngadto sa Ginoo.

Ug mao nga, sa pagsunod sa pormula ni Alma, magpili kita. Atong pilion ang hugot nga pagtuo.

• Kon ang pagkalibog ug pagkawalay paglaum mohatag og kabug-at sa inyong hunahuna, pilia ang “pagmata ug pagdasig sa inyong mga galamhan” (Alma 32:27). Mapainubsanong moduol sa Ginoo uban sa masulub-on nga kasingkasing ug mahinulsulon nga espiritu mao ang agianan sa kamatuoran ug ang pamaagi sa Ginoo sa kahayag, kahibalo, ug kalinaw.

• Kon ang inyong pagpamatuod wala pa molambo, wala masulayi, ug walay kasigurohan, pilia ang “pagbansay [bisan] sa usa ka tipik sa hugot nga pagtuo”; pilia ang “pagsulay sa [Iyang] mga pulong.” (Alma 32:27). Ang Manluluwas mipasabut, “Kon tuyoon ni bisan kinsa ang pagbuhat sa kabubut-on sa Dios, nan, iyang mahibaloan kon ang akong gitudlo gikan ba sa Dios, o magsulti ba lamang ako sa kinaugalingon kong pagbulot-an” (Juan 7:17).

• Kon ang pangatarungan, hinungdan, o personal nga salabutan mosukwahi sa sagrado nga mga pagtulun-an ug dokrina, o nagkasumpaki nga mga mensahe moataki sa inyong mga tinuohan sama sa nagadilaab nga mga pana nga gihulagway ni Apostol Pablo (tan-awa sa Mga Taga-Efeso 6:16), pilia nga dili ilabay ang binhi sa inyong kasingkasing tungod sa pagkawalay pagtuo. Hinumdumi, nga kita dili makadawat og saksi hangtud human sa pagsulay sa atong hugot nga pagtuo (tan-awa sa Ether 12:6).

• Kon ang inyong hugot nga pagtuo nasulayan ug nahingkod na, pilia ang pag-amuma niini “uban sa tumang pag-amping” (Alma 32:37). Ingon nga lig-on ang atong pagtuo, tungod sa nagkalainlaing mga mensahe nga nag-ataki niini, mahimo usab kini nga hilabihan ka delikado. Nagkinahanglan kini og kanunay nga pag-amuma pinaagi sa padayong pagtuon sa kasulatan, pag-ampo, ug sa paggamit sa Iyang pulong.

Sa dihang ang mga tinun-an nangutana ni Jesus kon nganong dili sila makapapahawa sa yawa sama sa bag-o pa nilang nakita nga gihimo sa Manluluwas, si Jesus mitubag, “Kon may pagtuo kamo nga ingon og liso sa mustasa, makaingon kamo niining bukid, Bumalhin ka gikan dinhi ngadto didto; ug kini mobalhin” (Mateo 17:20). Wala gayud ako makasaksi sa pagbalhin og usa ka tinuod nga bukid. Apan tungod sa hugot nga pagtuo ako nakakita og usa ka bukid sa pagduhaduha ug pagkawalay paglaum nga gibalhin ug gipulihan og paglaum ug pagka-positibo. Tungod sa hugot nga pagtuo personal akong nakasaksi og bukid sa sala nga gipulihan og paghinulsol ug pagpasaylo. Ug tungod sa hugot nga pagtuo personal ako nga nakasaksi og bukid sa kasakit nga gipulihan og kalinaw, paglaum, ug pagpasalamat. Oo, ako nakakita og mga bukid nga nabalhin.

• Tungod sa akong hugot nga pagtuo akong napalihok ang gahum sa priesthood nga akong gihuptan ug nahimong usa ka tig-ambit sa kaanindot sa ebanghelyo ug midawat sa makaluwas nga mga ordinansa.

• Tungod sa akong hugot nga pagtuo akong gisagubang ang mga pakigbisog ug mga kalisdanan sa kinabuhi uban sa kalinaw ug pagsalig.

• Tungod sa akong hugot nga pagtuo nakahimo ako sa pagbali sa mga pangutana ug gani sa mga pagduhaduha ngadto sa mga pagsalig ug pagsabut.

• Tungod sa akong hugot nga pagtuo akong giduol ang wala pa mailhi, wala pa makita, ug wala mapasabut uban sa dili mapangutana nga pagsalig.

• Ug tungod sa akong hugot nga pagtuo—bisan kon sa daw hilabihan ka lisud nga mga panahon—akong naamgohan uban sa kalinaw ug pasalamat nga sa pagkatinuod mao kini ang labing maayo sa mga panahon.

Ug kon kita mopili sa hugot nga pagtuo ug dayon amumahon kana nga hugot nga pagtuo ngadto sa usa ka hingpit nga kasayuran sa mga butang sa Ginoo, ato dayong gamiton ang mga pulong “ako mopamatuod” o “ako nasayud.” Ako personal nga nakatanom sa binhi sulod mismo sa akong kasingkasing, ug sa tibuok nakong kinabuhi misulay ako sa pag-amuma niana nga binhi ngadto sa usa ka hingpit nga kasayuran. Ug karon, samtang ako nagbarug sa luyo niining pulpito, ako mopamatuod nga si Jesus mao ang Kristo, ang Manunubos sa kalibutan. Ako dugang nga mopamatuod nga si Joseph Smith usa ka propeta sa Dios ug ang buhi nga instrumento nga gigamit sa Ginoo aron sa pagdala og balik dinhi sa yuta sa hingpit ug tinuod nga ebanghelyo ni Jesukristo. Ako mopamatuod nga si Presidente Thomas S. Monson mao ang propeta sa Ginoo karon. Ingon man usab, ang pagpili sa hugot nga pagtuo inyo, kini ako. Atong pilion ang hugot nga pagtuo. Sa pangalan ni Jesukristo, amen.