Ang Ato Gayud nga Pagpakabuhi

Ang tingtugnaw sa 1848 malisud ug mahagiton alang sa nag-unang mga lumulupyo sa Walog sa Salt Lake. Atol sa ting-init sa 1847 si Brigham Young mideklarar nga ang mga Santos sa katapusan miabut na sa ilang destinasyon. “Kini ang sakto nga lugar,”¹ matud ni Brigham Young, ang gipakitaan sa panan-awon kon asa ipahimutang ang mga Santos. Ang unang mga miyembro sa Simbahan nakalahutay og grabe nga kasakit sa dihang gisugdan na ang Pagpahiuli sa ebanghelyo. Sila gipapahawa sa ilang mga panimalay, gilutos, ug gihasi. Ilang giantus ang wala damha nga mga kalisud samtang ilang gitabok ang kapatagan. Apan karon sila sa katapusan anaa na sa “sakto nga lugar.”

Ug sa gihapon, ang tingtugnaw sa 1848 hilabihan gayud kapintas. Ang tingtugnaw labihan ka bugnaw nga ang mga tiil sa pipila ka mga tawo mikaging. Ang diwa sa kalisud misugod na sa pagkuyanap diha sa mga Santos. Ang pipila sa mga miyembro sa Simbahan namahayag nga dili sila magtukod sa ilang mga panimalay sa walog. Gusto nilang magpabilin sa ilang mga karwahe, tungod kay nakasiguro sila nga ang pamunuan sa Simbahan moagak nila ngadto sa lain pang mas maayong dapit. Nagdala sila og mga binhi ug mga tanum nga mamunga, apan wala gayud nila kini usiki pinaagi sa pagtanum diha sa panas nga disyertong yuta. Si Jim Bridger, usa ka inilang explorer niana nga panahon, miingon kang Brigham Young nga mohatag siya og usa ka libo ka dolyares alang sa unang gantang sa mais nga motubo dinha sa Walog sa Salt Lake tungod kay, matud niya, dili kini mahimo.²

Ang nakapalisud pa gayud, ang bulawan bag-o lang nadiskobrehan didto sa California. Ang pipila sa mga miyembro sa Simbahan naghunahuna nga ang kinabuhi mahimong mas sayon ug mas abunda kon mopadayon sila ngadto sa California sa pagpangita og mga bahandi ug mas maayo nga klima.

Niining panahona sa pagkadili kontento, si Brigham Young namulong sa mga miyembro sa Simbahan. Siya namahayag:

“[Kining walog] mao ang lugar nga gipili sa Dios alang sa Iyang katawhan.

“Gipapahawa kita sa kalisdanan paingon sa tumang kalisud, gikan sa kalisud paingon sa kamingawan, ug ania na kita ug dinhi kita mopuyo. Gipakita sa Dios kanako nga mao kini ang dapit nga mapahiluna ang Iyang mga tawo, ug dinhi sila molambo; Siya mopaangay sa mga elemento alang sa kaayohan sa Iyang mga Santos; Siya mopaundang sa katugnaw ug kabantuk sa yuta, ug ang yuta mahimong magmabungahon. Kaigsoonan, lakaw, karon, ug pananum … sa inyong … mga liso.”

Agi og dugang sa pagsaad niini nga mga panalangin, si Presidente Young namahayag nga ang Walog sa Salt Lake mamahimong inila isip dalan nga halapad alang sa tanang mga nasud. Ang mga hari ug mga emperador moduaw sa dapit. Ang pinakanindot sa tanan, usa ka templo sa Ginoo matukod.³

Talagsaon kini nga mga saad. Daghang mga miyembro sa Simbahan adunay hugot nga pagtuo sa mga panagna ni Brigham Young, samtang ang uban nagpabilin nga madudahon ug mibiya tungod sa unsay ilang gituohan nga mas maayong kinabuhi. Apan ang kasaysayan nagpakita nga matag panagna nga gipamahayag ni Brigham Young nahinabo. Ang walog milambo ug nagmabungahon. Ang mga Santos miuswag. Ang tingtugnaw sa 1848 maoy gigamit nga paagi sa Ginoo aron sa pagtudlo sa Iyang mga tawo og usa ka bililhon nga leksyon. Sila nakat-on—ingon nga kinahanglan gayud nga makat-unan natong tanan—nga ang bugtong kasiguroan ug siguradong dalan sa pagpanalipod niining kinabuhi mahitabo pinaagi sa pagsalig ug pagsunod sa tambag gikan sa mga propeta sa Dios.

Sa pagkatinuod ang usa sa labing dako nga mga panalangin sa pagkamiyembro niini nga Simbahan mao ang panalangin sa pagkaginiyahan sa buhi nga mga propeta sa Dios. Ang Ginoo namahayag, “Wala gayud gawas sa usa sa ibabaw sa yuta sa matag higayon kang kinsa kini nga gahum ug mga yawe niini nga pagkapari natugyan.”⁴ Ang propeta ug Presidente sa Simbahan karon, si Thomas S. Monson, nakadawat sa pulong sa Dios alang sa kinatibuk-ang miyembro sa Simbahan ug alang sa kalibutan. Agi og dugang, atong gipaluyohan isip mga propeta, mga manalagna, ug mga tigpadayag ang mga magtatambag sa Unang Kapangulohan ug ang mga sakop sa Korum sa Napulog Duha ka mga Apostoles.

Sa mikaging nga mga tiil ug panas nga yuta, kadtong nag-unang mga Santos sa pagkatinuod nagkinahanglan gayud og hugot nga pagtuo sa pagsalig sa ilang propeta. Ang ila gayud nga padayon nga pagpakabuhi ug mga kinabuhi nameligro. Bisan pa niana ang Ginoo miganti sa ilang pagkamasulundon ug mipanalangin ug mipauswag niadtong kinsa misunod sa Iyang tigpama-ba.

Ug ang Ginoo naghimo gihapon niana karon alang kaninyo ug kanako. Kini nga kalibutan puno sa daghan kaayong mga libro nga makatabang sa kaugalingon, daghan kaayong mga miproklamar sa ilang kaugalingon nga mga eksperto, daghan kaayong mga teyorista, mga magtutudlo, ug mga batid sa pangatarungan kinsa adunay ikahatag nga tambag sa tanang mga hilisgutan. Gamit ang teknolohiya karon, sa usa lang ka klik sa keystroke maanaa dayon ang kasayuran sa walay kinutuban nga mga hilisgutan. Dali ra nga malit-ag pinaagi sa pagsalig sa “gahum sa tawo”⁵ alang sa tambag sa tanan nga mga butang gikan sa unsaon pagpadako sa mga anak hangtud sa unsaon sa pagpangita sa kalipay. Samtang ang ubang kasayuran adunay bili, isip mga miyembro sa Simbahan maka-access kita sa tinubdan sa tiunay nga kamatuoran, gani ang Dios mismo. Kaayohan nato ang pagpangita og mga tubag sa atong mga problema ug mga pangutana pinaagi sa pagsusi unsa ang gipadayag sa Ginoo pinaagi sa Iyang mga propeta. Nianang sama nga teknolohiya karon, sayon na kaayo nga maka-access sa mga pulong sa mga propeta sa hapit bisan unsang hilisgutan. Unsay gitudlo sa Dios kanato pinaagi sa Iyang mga propeta kabahin sa kaminyoon ug sa pamilya? Unsay Iyang gitudlo kanato pinaagi sa Iyang mga propeta kabahin sa edukasyon ug sa pagpuyo nga madaginuton? Unsay Iyang gitudlo kanato pinaagi sa Iyang mga propeta kabahin sa kaugalingong kalipay ug kalampusan?

Kon unsa ang gitudlo sa mga propeta tingali sa uban ingon og daan na, dili sikat, o gani imposible. Apan ang Dios usa ka Dios sa kahapsay ug naka-establisar og sistema diin atong masayran ang Iyang kabubut-on. “Sa pagkatinuod ang Ginoong Dios dili magabuhat sa bisan unsa, gawas kon ang iyang tinago ipadayag niya sa iyang mga alagad ang mga propeta.”⁶ Sa sinugdanan niini, ang dispensasyon sa kahingpitan sa mga panahon, gipamatud-an pag-usab sa Ginoo nga Siya makigsulti kanato pinaagi sa Iyang mga propeta. Siya namahayag, “Ang akong mga pulong … ang tanan matuman, bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra.”⁷

Ang pagsalig ug pagsunod sa mga propeta labaw pa sa usa ka panalangin ug usa ka pribilehiyo. Si Presidente Ezra Taft Benson mipahayag nga, “ang ato [gayud] nga kaluwasan nag-agad sa” pagsunod sa propeta.” Iyang gihulagway ang unsay iyang gitawag og “Fourteen Fundamentals in Following the Prophet [Katorse ka mga Sukaranan sa Pagsunod sa Propeta].” Sa sesyon niining buntaga, si Elder Claudio Costa sa Kapangulohan sa Seventy larino kaayong mipahimangno kanato niining 14 ka mga sukaranan. Tungod kay kini dako kaayo og importansya sa ato gayud nga kaluwasan, ako kining sublion.

“Una: Ang propeta mao lang ang tawo kinsa mamulong alang sa Ginoo sa tanang butang.

“Ikaduha: Ang buhi nga propeta mas mahinungdanon alang kanato kay sa sumbanan nga mga kasulatan.

“Ikatulo: Ang buhi nga propeta mas importante alang kanato kay sa patay nga propeta.

“Ikaupat: Ang propeta dili gayud mopahisalaag sa Simbahan.

“Ikalima: “Ang propeta wala magkinahanglan nga magbaton og bisan unsang partikular nga yutan-ong pagbansay o mga kredensyal aron sa pagpamulong sa bisan unsang hilisgutan o mobuhat sa bisan unsang butang sa bisan unsang panahon.”

“Ikaunom: Ang propeta dili kinahanglan nga moingon, ‘Ang Ginoo namulong’ aron ihatag kanato ang kasulatan.

“Ikapito: Ang propeta mosulti kanato kon unsay kinahanglan natong masayran, dili kanunay kon unsay gusto natong masayran.”

“Ikawalo: “Ang propeta dili mapugngan sa pangatarungan sa mga tawo.

“Ikasiyam: Ang propeta makadawat og pagpadayag sa bisan unsang butang, temporal man o espirituhanon.

“Ikanapulo: Ang propeta mahimo nga malakip sa pangpubliko nga mga butang.

“Ikaonse: Ang duha ka mga grupo nga maglisud kaayo sa pagsunod sa propeta mao ang mapasigarbuhon kinsa mga maalamon ug ang mapasigarbuhon kinsa mga adunahan.

“Ikadose: Ang propeta dili kinahanglan nga inila sa kalibutan o sa kalibutanon.

“Ikatrese: Ang propeta ug iyang mga magtatambag naglangkob sa Unang Kapangulohan—ang labing taas nga korum diha sa Simbahan

“Ikakatorse: [Sunda] … ang buhi nga propeta ug ang Unang Kapangulohan … ug mapanalanginan; isalikway sila ug mag-antus.”⁸

Mga kaigsoonan, sama sa mga Santos sa 1848, kita makapili nga mosunod sa propeta, o makasalig kita sa gahum sa tawo. Hinaut nga maanaa kanato ang kaalam sa pagsalig ug pagsunod sa tambag sa buhi nga mga propeta ug mga apostoles. Ako usa ka saksi sa ilang kabuotan. Ako mopamatuod nga sila gitawag sa Dios. Ako mopamatuod usab nga walay laing mas luwas nga paagi sa pag-atubang sa kinabuhi, pagpangita og mga tubag sa atong mga problema, pag-angkon og kalinaw ug kalipay niining kalibutan, ug pagpanalipod sa ato gayud nga kaluwasan kay sa pagsunod sa ilang mga pulong. Ako mohatag niini nga pagsaksi sa sagrado nga pangalan ni Ginoong Jesukristo, amen.