Mga Salamin sa Templo sa Kahangturan: Usa ka Pagpamatuod kabahin sa Pamilya

Minahal kong mga kaigsoonan, sa dihang ang among anak nga lalaki diha pa sa Provo Missionary Training Center, si Sister Gong mipadala og bag-ong luto nga pan ngadto kaniya ug sa iyang kaubang mga misyonaryo. Ania ang pipila sa mga sulat pasalamat sa mga misyonaryo nga nadawat ni Sister Gong: “Sister Gong, kana nga pan pareho og lami sa pan nga akong kaunon didto sa balay.” “Sister Gong, ang akong masulti mao ra ang wow. Kana nga pan mao ang pinakalami nga akong nakaon sukad sa mga enchilada ni mama.” Apan mao kini ang akong paborito: “Sister Gong, ang pan lamian. Dayon nagkomedya siya nga mipadayon, “Ingna lang ko kon magbuwag mo ni Mr. Gong.”

Among gimahal ang atong mga misyonaryo—matag elder, sister, ug senior nga magtiayon. Mapasalamaton kami hangtud sa hangtud ngadto nianang espesyal nga misyonaryo kinsa unang midala sa gipahiuli nga ebanghelyo ni Jesukristo ngari sa among pamilya. Mapasalamaton akong mopamatuod nga ang mahangturong panglantaw sa pagkakabig sa ebanghelyo ug mga pakigsaad sa templo makatabang kanato nga makita ang daghang mga panalangin sa matag henerasyon sa atong mahangturong mga pamilya.

Ang unang kinabig sa among pamilya nga Gong sa Ang Simbahan ni Jesukristo sa mga Santos sa Ulahing mga Adlaw mao ang among inahan, si Jean Gong. Isip tin-edyer sa Honolulu, Hawaii, siya naminaw; siya nasayud; siya nabunyagan ug nakumpirmahan; siya nagpadayon diha sa pagtuo. Ang matinud-anong mga miyembro sa Simbahan mitabang sa akong inahan aron siya adunay mga higala sa ebanghelyo, mga calling sa Simbahan, ug padayon nga maamumahan sa maayo nga pulong sa Dios. Sa laktud nga pagkasulti, ang matag bag-ong kinabig, young single adult, kadtong mibalik sa pagkaaktibo sa Simbahan, ug ang uban nakapanalangin sa mga henerasyon sa dihang sila nahimong isigka Santos diha sa panimalay sa Dios.¹

Ang usa ka pamilya nga miamuma sa akong inahan mao ang pamilya ni Gerrit de Jong, Jr. Usa ka batid sa pinulongan kinsa nahigugma sa pinulongan sa kasingkasing ug sa Espiritu, si Lolo de Jong milingaw sa akong imahinasyon sa gamay pa ko nga bata pinaagi sa mga panultihon sama sa, “Ang mga blackberry kon pula hilaw.” Karon, namulong mahitungod sa elektronik nga mga gamit, ako moingon sa batan-ong mga higala, “Ang mga blackberry kon basahon diha sa Simbahan makapaguol sa bag-ong mga bishop.”

Ang akong mga ginikanan, sila si Walter ug Jean Gong, naminyo sa tulo ka higayon: usa ka Inintsik nga seremonya alang sa pamilya, usa ka Amerikanhong seremonya alang sa mga higala, ug usa ka sagrado nga seremonya diha sa balay sa Ginoo alang sa karon ug sa kahangturan.

Ang atong mga bata sa Primary manganta: “Ganahan kong makita ang templo. Moadto ko didto sa umaabut nga adlaw.² Ang atong mga kabatan-onan misaad sa “pagdawat sa mga ordinansa sa templo.”³

Bag-ohay lang kong mibarug sa balay sa Ginoo uban sa takus nga magtiayon didto aron modawat sa mga panalangin pinaagi sa pakigsaad. Ako silang gidapit sa paghimo sa ilang unang honeymoon nga molungtad og 50 ka tuig, dayon, human sa 50 ka tuig sugdan ang ilang ikaduhang honeymoon.

Akong nakita ang akong kaugalingon nga nagtan-aw uban niining nindot nga magtiayon ngadto sa mga salamin sa templo—ang usa ka salamin anaa dinhi nga bahin, ang usa ka salamin anaa didto nga bahin. Ang duha ka salamin sa templo mianinag sa mga hulagway ngadto ug ngari nga daw miabut hangtud ngadto sa kahangturan.

Ang mga salamin sa templo sa kahangturan nagpahinumdom kanato nga ang matag tawo adunay “kinaiya sa pagkadios ug kalagmitan nga mahimong usa ka dios;” nga ang “sagradong mga ordinansa ug mga pakigsaad nga anaa sa balaang mga templo mihimo niining posible alang sa tagsa-tagsa sa pagbalik ngadto sa atubangan sa Dios ug alang sa pamilya nga magkahiusa sa kahangturan”;⁴ ug, dungan nga magtubo diha sa gugma ug pagkamatinud-anon, kita makahatag sa mga anak og lig-ong pundasyon ug inspirasyon.

Sa mga salamin sa templo sa kahangturan, ako namalandong ni Unang Dragon Gong, nga natawo niadtong a.d. 837. (kaulahian sa Tang dynasty) sa Habagatang China ug ang nagsunod nga mga henerasyon sa pamilya Gong ngadto na sa akong amahan, ang ika-32 nga narekord nga henerasyon sa pamilya. Ang akong igsoong lalaki, igsoong babaye, ug ako anaa na sa ika-33 nga henerasyon sa among pamilya; ang akong mga anak nga lalaki ug ang ilang mga ig-agaw, ang ika-34 nga henerasyon; ang among apo nga lalaki, ang ika-35 nga narekord nga henerasyon sa pamilya Gong. Sa mga salamin sa templo sa kahangturan, wala ko makakita og sinugdanan o katapusan sa mga henerasyon.

Nahunahunaan dayon nako nga dili lamang ang sunod-sunod nga henerasyon, apan ang sunod-sunod usab nga mga relasyon sa pamilya. Sa usa ka direksyon, akong nakita ang akong kaugalingon isip usa ka anak, apo, apo sa tuhod, balik ngadto ni Unang Dragon Gong. Sa mga salamin sa laing direksyon, akong nakita ang akong kaugalingon isip amahan, apohan, apohan sa tuhod. Nakita nako ang akong asawa, si Susan, isip anak, apo, apo sa tuhod ug, sa laing direksyon, isip inahan, apohan, apohan sa tuhod.

Sa mga salamin sa templo sa kahangturan, nagsugod ako sa pagsabut sa akong asawa ug ako isip mga anak sa among mga ginikanan ug mga ginikanan sa among mga anak, isip mga apo sa among mga apohan ug mga apohan sa among mga apo. Ang mahinungdanong leksyon sa mortalidad hinay-hinay nga mituhop sa among mga kalag samtang kami nagkat-on ug nagtudlo sa mahangturong mga tahas lakip na isip anak ug ginikanan, ginikanan ug anak.

Ang kasulatan naghulagway sa atong Manluluwas isip “ang Amahan ug ang Anak.”⁵ Nagpuyo diha sa lawas apan ingon nga ulipon ang lawas ngadto sa kabubut-on sa Amahan, ang atong Manluluwas nasayud kon unsaon pagtabang kanato, nga Iyang mga katawhan, diha sa atong mga kasakit, mga kalisdanan, mga pagtintal, mga balatian, bisan sa kamatayon.⁶ Kay “nakasinati sa tanang mga butang,”⁷ ang atong Manluluwas makapas-an sa atong mga kasakitan ug modala sa atong mga kasub-anan. “Ginasamaran Siya tungod sa atong mga kalapasan, … napangos tungod sa atong mga kasal-anan … ; [tungod sa mga labod sa atong Manluluwas] kita nangaayo.”⁸

Gikan sa mga konseho sa langit, ang atong Manluluwas nagtinguha lamang sa pagbuhat sa kabubut-on sa Iyang Amahan. Kini nga sumbanan sa Amahan ug Anak makatabang sa pagpasabut sa daw-sumpaki “ang magawagtang sa iyang kinabuhi tungod kanako, makakaplag ra niini.”⁹ Ang kalibutan nagpadayon sa gidan-agan nga kaugalingong interes. Sa gihapon ang gahum wala kanato sa pagluwas sa atong kaugalingon. Apan anaa kini Kaniya. Walay kinutuban ug walay katapusan,¹⁰ ang Pag-ula lamang sa atong Manluluwas ang molabaw sa takna, ug ang panahon sa pagbuntog sa kamatayon, gidugayon, kasuko, kayugot, kawalay kaangayan, kagul-anan, ug kasakit.

Usahay ang mga butang mahitabo nga dili maayo bisan kon atong gihimo ang atong pinakamaayo. Ang usa ka Kordero nga walay lama ug putli, ang atong Manluluwas naghilak uban kanato ug alang kanato. Kon kita kanunay nga mohinumdom Kaniya,¹¹ makabarug Siya uban kanato “sa tanan nga mga panahon ug diha sa tanan nga mga butang, ug diha sa tanan nga mga dapit nga [kita] mahimo nga maanaa.”¹² Ang Iyang “pagkamatinud-anon labaw pa kalig-on kay sa mga higot sa kamatayon.”¹³ Sa pagpaduol kanato ngadto Kaniya, ang atong Manluluwas mopaduol usab kanato ngadto sa atong Amahan sa Langit. Samtang ang ubang mga butang dili hingpit dinhi sa yuta, makasalig kita sa atong Langitnong Amahan sa pagkompleto sa “mahinungdanong plano sa katubsanan, diin ang kaangayan, gugma, ug kalooy mag-abut diha sa balaanong panag-uyon!”¹⁴

Ang milagro sa mga hulagway nga among nahunahuna sa mga salamin sa templo sa kahangturan mao nga sila—kita—mahimong mag-usab. Sa dihang sila si Jean ug Walter Gong misulod sa bag-o ug walay katapusan nga pakigsaad, ilang giablihan ang agianan alang sa mga katigulangan sama ni Unang Dragon Gong nga ma-sealed ug alang sa kaliwatan nga matawo diha sa pakigsaad. Palihug hinumdumi: sa atong pagtabang sa matag igsoong babaye o igsoong lalaki, nakapanalangin kita og mga henerasyon.

Ang kalibutan nagkaguliyang,¹⁵ apan diha sa Iyang “bugtong tinuod ug buhi nga Simbahan,”¹⁶ adunay hugot nga pagtuo ug walay kahadlok. Sa mga pulong ni Apostol Pablo, ako usab tinud-anay nga mopamatuod:

“Kay masaligon ako, nga walay kamatayon, o kinabuhi, …

“O kahabugon, o giladmon, o bisan unsa diha sa tibuok kabuhatan, nga arang makapahimulag kanato gikan sa gugma sa Dios, sa gugma nga anaa kang Kristo Jesus nga atong Ginoo.”¹⁷

Ako mapainubsanong mosaksi: ang Dios buhi. Iyang “pagapahiran ang tanang luha gikan sa [atong] mga mata”¹⁸—gawas sa mga luha sa kalipay kon kita motan-aw lahus sa mga salamin sa templo sa kahangturan ug makita ang atong kaugalingon nga nakauli, putli ug limpyo, nga ang atong mga henerasyon sa pamilya na-sealed pinaagi sa awtoridad sa priesthood diha sa gugma, mosinggit og “Hosanna, hosanna, hosanna.” Sa pangalan ni Jesukristo, amen.