Ang Makapausab nga Gahum sa Hugot nga Pagtuo ug Maligdong nga Kinaiya

Kon ang hugot nga pagtuo nasabtan ug gigamit sa husto nga paagi, kini adunay gamhanan ug malungtarong mga epekto. Ang mao nga hugot nga pagtuo makapausab sa kinabuhi sa usa ka tawo gikan sa malaay, matag adlaw nga ordinaryong mga kalihokan ngadto sa nag-uban nga hingpit nga kalipay ug kamaya. Ang paggamit sa hugot nga pagtuo mahinungdanon kaayo ngadto sa plano sa kalipay sa Amahan sa Langit. Apan ang tinuod nga hugot nga pagtuo, hugot nga pagtuo ngadto sa kaluwasan, gisentro diha kang Ginoong Jesukristo, hugot nga pagtuo sa Iyang mga doktrina ug mga pagtulun-an, hugot nga pagtuo sa mapanagnaong giya sa dinihogan sa Ginoo, hugot nga pagtuo diha sa kapasidad sa pagkaplag sa natago nga mga kinaiya ug mga hiyas nga makapausab sa kinabuhi. Sa tinuod, ang hugot nga pagtuo diha sa Manluluwas usa ka baruganan sa aksyon ug sa gahum.

Ang hugot nga pagtuo mao ang pundasyon nga mga elemento sa paglalang. Masaligon ako nga ang Manluluwas nga si Jesukristo migamit sa hugot nga pagtuo diha sa Iyang kapasidad aron sa paglihok ubos sa direksyon sa Amahan sa Langit. Ang Manluluwas migamit niini aron sa paglalang sa pinakalayo nga mga kalibutan ingon man usab sa paghan-ay og mga quark, ang labing gamay nga mga elemento sa butang nga atong nahibaloan karon. Gani ako adunay hugot nga pagtuo nga adunay mas gagmay pa nga mga elemento sa butang diha sa katingalahan nga paglalang.

Ang hugot nga pagtuo sa umaabut gipakita sa usa ka magtiayon nga na-sealed sa templo. Sila nakasabut nga pinaagi sa pagkamasulundon sa mga pagtulun-an ni Jesukristo ug sa plano sa kalipay sa atong Amahan sa Langit, sila manag-uban nga makaangkon og malipayong kinabuhi. Sila nakaamgo nga kon ang mga hagit alang sa mga kahigayunan sa pag-uswag moabut, sila mangita og mga paagi, ingon nga giaghat sa Espiritu Santo, sa pagbuntog niini diha sa mga paagi nga mabungahon ug makapalig-on sa kinaiya.

Ang hugot nga pagtuo ug kinaiya may kalabutan sa usag usa. Ang hugot nga pagtuo diha sa gahum sa pagkamasulundon sa mga sugo sa Dios magmugna og kalig-on sa kinaiya nga magamit ninyo sa mga panahon sa dinaliang panginahanglan. Ang ingon nga kinaiya dili mapalambo panahon sa hilabihang paghagit o pagtintal. Diha pa niana ang katuyoan sa paggamit niini. Ang inyong paggamit sa hugot nga pagtuo diha sa tinuod nga mga baruganan makamugna og kinaiya; ang nalig-on nga kinaiya mopalambo sa inyong kapasidad sa paggamit og mas labaw pa nga hugot nga pagtuo. Isip resulta, ang inyong kapasidad ug pagsalig sa pagbuntog sa mga pagsulay sa kinabuhi nadugangan. Kon mas nalig-on ang inyong kinaiya, mas makapahimulos kamo gikan sa paggamit sa gahum sa hugot nga pagtuo. Inyong makaplagan kon sa unsang paagi ang hugot nga pagtuo ug kinaiya magkahiusa sa paglig-on sa usag-usa. Ang kinaiya inanay nga namugna gikan sa mga lugas sa gigamit nga baruganan, doktrina, ug pagkamasuludnon.

Si Presidente Hugh B. Brown miingon: “Sa bisan unsang higayon sa kinabuhi mahinungdanong espirituhanon nga mga hiyas ang naghulat sa pagpahiangay sa tawo, hugot nga pagtuo lamang ang mopahiangay niini. Ang tawo dili mabuhi kon walay hugot nga pagtuo, tungod kay sa pagpanimpalad sa kinabuhi ang nag-una nga problema mao ang paglig-on sa kinaiya—nga dili produkto sa pangatarungan, kondili hugot nga pagtuo sa mga mithi ug mahalaron nga debosyon ngadto niini” (sa Conference Report, Okt. 1969, 105). Kita nagpalambo sa hugot nga pagtuo pinaagi sa paglihok. Si Joseph Smith miingon nga “ang hugot nga pagtuo [mao] ang baruganan sa aksyon ug gahum” (Lectures on Faith [1985], 72).

Kita nahimo sa gusto nato nga mahimo pinaagi sa makanunayon nga pagkahimo sa gusto nato nga mahimo sa matag adlaw. Ang matarung nga kinaiya usa ka bililhong pagpakita kon sa unsa kamo sa umaabut. Ang matarung nga kinaiya mas bililhon kay sa bisan unsang materyal nga butang nga inyong napanag-iya, sa bisan unsang kahibalo nga inyong naangkon pinaagi sa pagtuon, o sa bisan unsang mga tumong nga inyong nakab-ot bisan unsa pa ang pagdayeg niini sa katawhan. Sa sunod nga kinabuhi ang inyong matarung nga kinaiya pagatimbangon aron sa pagbana-bana kon giunsa ninyo paggamit og maayo ang pribilehiyo sa pagkamortal.

Dili si Satanas o bisan unsa pang gahum ang makaguba o makapaluya sa inyong naglambo nga kinaiya. Kamo lamang ang makahimo niana pinaagi sa pagkadili masulundon. Ang usa ka maanindot kaayo nga kinaiya mausab ngadto sa walay bili nga abo kon mapakunhod pinaagi sa paglimbong o paglapas.

Ang lig-ong matarung nga kinaiya moresulta tungod sa makanunayon nga hustong mga pagpili sa mga pagsulay sa kinabuhi. Ang ingon nga mga pagpili gihimo uban sa pagsalig sa mga butang nga gituohan ug kon buhaton mapamatud-an kini.

Unsa ang pipila ka makahatag og gahum nga mga baruganan diin gibase ang hugot nga pagtuo?

• Salig sa Dios ug sa Iyang pagkaandam nga motabang kon gikinahanglan, bisan unsa pa man ka mahagiton ang kahimtang.

• Magmasulundon sa Iyang mga sugo ug kinabuhi nga nagpakita nga Siya makasalig kaninyo.

• Magmabination sa hilum nga mga pag-aghat sa Balaang Espiritu.

• Magmaisugon sa pagsunod niana nga pag-aghat.

• Magmapailubon ug magmasinabtanon kon ang Dios motugot kaninyo sa pagpakigbisog aron motubo ug kon ang mga tubag moabut sa tinagsa matag higayon sulod sa gitagal nga panahon.

“Ang hugot nga pagtuo mao ang mga butang nga gilauman ug dili makita; busa, ayaw pakiglalis tungod kay kamo wala makakita, kay kamo dili makadawat og saksi hangtud human sa pagsulay sa inyong hugot nga pagtuo” (Ether 12:6). Busa, matag higayon nga inyong sulayan ang inyong hugot nga pagtuo—kana mao, nga molihok nga magpakatakus sa usa ka pagdasig—kamo makadawat sa nagpamatuod nga ebidensya sa Espiritu. Samtang kamo nagduhaduha sa inyong pagsabut, sa paggamit sa hugot nga pagtuo, kamo giyahan nga makakaplag og mga solusyon nga dili ninyo mabatunan sa laing paagi. Bisan pa gani sa inyong labing hugot nga pagtuo, ang Dios dili kanunay nga moganti dayon kaninyo sumala sa inyong mga tinguha. Hinoon, ang Dios motubag kaninyo kon unsay anaa sa Iyang mahangturong plano nga labing maayo alang kaninyo, kon kini moani og labing dako nga kaayohan. Pagmapasalamaton nga usahay ang Dios motugot kaninyo nga makigbisog sulod sa dugayng panahon sa dili pa kana nga tubag moabut. Kana ang makapadugang sa inyong hugot nga pagtuo ug makapalambo sa inyong kinaiya.

Ang pundasyon sa kinaiya mao ang kaligdong. Ang takus nga kinaiya mopalig-on sa inyong kapasidad nga makaila sa panudlo sa Espiritu ug magmasulundon niini. Ang inyong makanunayong paggamit sa hugot nga pagtuo makamugna og lig-ong kinaiya. Ang lig-on nga pundasyon alang sa inyong naglambo nga kinaiya mahan-ay pinaagi sa paghimo kang Jesukristo ug sa Iyang mga pagtulun-an nga sentro sa inyong kinabuhi.

Ang inyong kalipay dinhi sa yuta ingon man usab ang inyong mahangturong kaluwasan nagkinahanglan og daghang husto nga mga desisyon, walay usa niini nga lisud buhaton. Kon hiusahon kadto nga mga desisyon makamugna kadto og kinaiya nga mobatok sa nagkakunhod nga mga impluwensya sa sala ug kalapasan. Ang ligdong nga kinaiya susama sa gibahandi nga porselana nga hinimo sa labing maayo nga wala pa mahimo [raw] nga mga materyal, giporma uban sa hugot nga pagtuo, mainampingon nga gigama pinaagi sa makanunayong matarung nga mga buhat, ug gidauban diha sa hudno sa makabayaw nga kasinatian. Usa kini ka butang nga hilabihan ang katahum ug kabililhon. Bisan pa niana kini mahimong maguba sa usa lamang ka higayon pinaagi sa kalapasan, nagkinahanglan og masakit, malungtarong paningkamot sa paghimo og balik. Kon panalipdan pinaagi sa pagpugong sa kaugalingon, ang matarung nga kinaiya molungtad sa kahangturan.

Ang mismong materyal nga mga butang dili makamugna og kalipay ug katagbawan ug hingpit nga kalipay sa kalampusan dinhi sa yuta. Ni kini modala kanato ngadto sa kahimayaan. Ang pagkaligdong sa kinaiya, kanang kusog ug kalig-on sa pagtuo sa kahiladman ug ang konbiksyon nga giumol pinaagi sa dili maihap nga matarung nga mga desisyon, ang naghatag og direksyon sa kinabuhi. Ang makanunayon, matarung nga kinabuhi makamugna og gahum ug kalig-on sa kahiladman nga permanenteng makabatok sa nagkakunhod nga impluwensya sa sala ug kalapasan. Ang inyong hugot nga pagtuo kang Jesukristo ug ang pagkamasulundon sa Iyang mga sugo makapalig-on sa inyong kinaiya. Ang inyong kinaiya mao ang sukdanan kon unsa kamo sa umaabut. Ebidensya kini kon giunsa ninyo sa paggamit og maayo ang inyong kinabuhi dinhi sa yuta niining panahona sa mortal nga pagsulay.

Usa ka sanglitanan nga atong masabtan mao nga inyong maangkon ang unsay inyong gibayaran. Ingon usab niana ang espirituhanon nga mga butang. Inyong maangkon ang unsay inyong gibayaran diha sa pagkamasulundon, sa hugot nga pagtuo kang Jesukristo, sa pagkamakugihon nga pagsunod sa mga kamatuoran nga inyong nakat-unan. Unsa ang inyong maangkon mao ang pag-umol sa kinaiya, ang pagtubo sa kapasidad, ug ang malampuson nga pagtuman sa inyong mortal nga katuyoan nga masulayan ug makabaton og hingpit nga kalipay.

Kamo dili mahimong magpakahilum sa kinabuhi, o sa katapusan ang kinaiyanhon nga tawo moguba sa inyong mga paningkamot nga magpakabuhi nga takus. Kamo nahimo tungod sa inyong gibuhat ug sa inyong gihunahuna. Ang kahuyang sa kinaiya modala sa usa ka tawo ubos sa pamugos aron sa pagtagbaw sa kahinam o pagtinguha og personal nga interes. Dili kamo molampus sa pagsuporta sa usa ka huyang nga kinaiya pinaagi sa pagpakaaron-ingnon nga lig-on.

Moabut ang panahon nga ang usa ka tawo nga mohimo og mga desisyon nga gibase sa kahimtang sigurado gayud nga makahimo og grabe nga mga kalapasan. Walay gunitanan nga puthaw sa kamatuoran nga makapabilin nianang tawhana diha sa matarung nga dalan. Padayon siyang mag-atubang sa daghang malipaton nga mga tintasyon aron molikay sa mga sugo. Kadto nga mga pagpili gipahiangay pinaagi sa pangatarungan nga dili kini dautan, nga kini mas madawat sa katilingban ug makadapit og mas daghang mga higala. Ang usa ka abtik nga tawo nga walay pundasyon sa mga baruganan usahay makaangkon, sa temporaryo nga paagi, og madanihon nga mga kalampusan. Bisan pa niana kana nga kalampusan sama sa usa ka balas nga kastilyo. Kon ang pagsulay sa kinaiya moabut, malumpag kini, sa kasagaran moapil sa uban sa pagkahagsa niini. Bisan unsa pa ka maampingon ang usa ka makasasala sa pagtinguha nga itago ang kalapasan sa mga sugo, sa kadugayan sa kanunay inanay nga mahibaloan kini sa kadaghanan. Si Satanas mismo mosiguro niana. Siya ug ang iyang mga sakop determinado nga mohimo og labing dakong posible nga kadaut sa matag anak sa Amahan sa Langit. Usa ka grabe nga binuhatan sa pagkadili masulundon o paglapas sa pagsalig ang kanunay nga ipangutana kon aduna ba o walay laing mga buhat sa pagkadili masulundon. Ang hugot nga pagtuo ug pagsalig sa uban kabahin sa kinaiya niana nga indibidwal mokunhod.

Kining mortal nga kinabuhi mao ang dapit sa pagsulay. Kon unsa kamo kamaayo nga mosagubang sa mga hagit mao ang modeterminar kon unsa kalig-on ang inyong kinaiya. Ang inyong hugot nga pagtuo kang Jesukristo ug sa Iyang mga pagtulun-an makapalig-on sa inyong kinaiya.

Personal nakong napamatud-an nga ang mga konsepto sama sa hugot nga pagtuo, pag-ampo, gugma, ug pagkamapainubsanon dili makahatag og dako nga kamahinungdanon ug dili makamugna og mga milagro hangtud nga mahimo kining buhi nga bahin ngari kanato pinaagi sa atong kaugalingong kasinatian, nga gitabangan sa malumo nga pag-aghat sa Balaang Espiritu. Sa sayong bahin sa kinabuhi akong nakita nga makakat-on ako sa mga pagtulun-an sa ebanghelyo pinaagi sa salabutan ug, pinaagi sa gahum sa pangatarungan ug sa pag-analisar, nakaamgo nga kini adunay mahinungdanong bili. Apan ang dako kaayo nga gahum ug abilidad niini sa pag-inat kanako lapas sa mga kinutuban sa akong handurawan ug kapasidad walay katumanan hangtud nga ang mapailubon, makanunayon nga pagbansay mitugot sa Balaang Espiritu sa pagtudlo sa inanay ug sa pagpalambo sa kahulugan niini sa akong kasingkasing. Akong nakita nga samtang kinasingkasing ako nga nagserbisyo sa uban, giumol sa Dios ang akong personal nga kinaiya. Iyang gimugna ang usa ka nagtubo nga kapasidad sa pag-ila sa panudlo sa Espiritu. Ang pagkamaalamon sa plano sa ebanghelyo mao nga pinaagi sa pagbuhat niadtong mga butang nga gitambag sa Ginoo nga atong buhaton, gihatagan kita sa matag salabutan ug sa matag kahanas nga gikinahanglan sa pagsangkap og kalinaw ug buhong nga katagbawan niining kinabuhi. Ingon man usab, atong mabatunan ang pagpangandam nga gikinahanglan alang sa mahangturon nga kalipay diha sa presensya sa Ginoo.

Ang usa ka pagpamatuod malig-on pinaagi sa espirituhanon nga mga pag-agni nga mokumpirmar sa pagkatinuod sa usa ka panudlo, sa usa ka matarung nga buhat. Kasagaran ang ingon nga paggiya giubanan og gamhanang mga pagbati nga makadala og mga luha sa mga mata ug makapalisud sa pagsulti. Apan ang pagpamatuod dili usa ka pagbati. Kini mao gayud ang pinakamahinungdanon sa kinaiya nga gimugna gikan sa dili maihap nga hustong mga desisyon. Kini nga mga pagpili gihimo tungod sa masaligong hugot nga pagtuo sa mga butang nga gituohan ug, hinoon sa sinugdanan, dili makita. Ang lig-on nga pagpamatuod maghatag og kalinaw, kahupayan, ug kasiguroan. Kini makamugna og konbiksyon nga samtang ang mga pagtulun-an sa Manluluwas kanunay nga gisunod, ang kinabuhi maanindot, ang umaabut sigurado, ug adunay kapasidad sa pagbuntog sa mga hagit nga mobabag sa atong agianan. Ang usa ka pagpamatuod motubo tungod sa pagsabut sa kamatuoran nga inanayng moabut tungod sa pag-ampo ug sa pagpamalandong sa doktrina sa kasulatan. Kini giamumahan pinaagi sa pagsunod niadtong mga kamatuoran uban sa hugot nga pagtuo nga gibase sa lig-on nga pagsalig nga ang gisaad nga mga resulta matuman.

Ang inyong pagpamatuod malig-on pinaagi sa mauyunon nga pagsunod sa balaod sa ikapulo ug sa paghatag og mga halad sa puasa, ug ang Ginoo mopanalangin kaninyo sa buhong nga paagi tungod niini. Samtang ang inyong pagpamatuod nalig-on, si Satanas maningkamot og maayo sa pagtintal kaninyo. Batuki ang iyang mga paningkamot. Kamo mahimong mas malig-on ug ang iyang impluwensya kaninyo mas mohuyang.

Ang nagkadugang nga impluwensya ni Satanas sa kalibutan gitugotan aron sa paghatag og usa ka kahimtang diin masulayan ang atong mga kaugalingon. Samtang nagmugna siya og kaguliyang karon, ang katapusang pagadangatan ni Satanas gipaniguro na ni Jesukristo pinaagi sa Iyang Pag-ula ug Pagkabanhaw. Ang yawa dili molampus. Gani karon siya kinahanglan gayud nga mobuhat sulod sa mga utlanan nga gitakda sa Ginoo. Dili siya makakuha sa bisan unsang panalangin nga nahatag. Dili siya makausab sa kinaiya nga naumol tungod sa matarung nga mga desisyon. Siya walay gahum sa pagguba sa mahangturong mga bugkos nga gimugna sulod sa balaan nga templo tali sa bana, asawa, ug mga anak. Dili niya mapalong ang tinuod nga hugot nga pagtuo. Dili niya makuha ang inyong pagpamatuod. Oo, kini nga mga butang mahimong mawala pinaagi sa pagnunot ngadto sa iyang mga pagtintal. Apan siya walay gahum sa sulod ug sa iyang kaugalingon sa pagguba niini.

Sa pag-summarize:

• Ang Dios naggamit sa inyong hugot nga pagtuo aron sa pag-umol sa inyong kinaiya.

• Ang kinaiya mao ang pagpakita kon unsa kamo sa umaabut.

• Ang lig-on nga kinaiya mao ang mga resulta sa makanunayong husto nga mga pagpili.

• Ang pundasyon sa kinaiya mao ang kaligdong.

• Kon mas nalig-on ang inyong kinaiya, mas makasarang kamo sa paggamit sa gahum sa hugot nga pagtuo.

Ang pagkamapainubsanon mao kanang kinaiya nga motugot kanato nga matudloan gikan sa kahitas-an pinaagi sa Espiritu o matudloan gikan sa mga tinubdan kansang gigikanan mao ang inspirasyon nga gikan sa Ginoo, sama sa mga kasulatan ug sa mga pamahayag sa mga propeta. Ang pagkamapainubsanon mao ang bililhong tambok nga yuta sa matarung nga kinaiya. Diha niini ang mga binhi sa personal nga pagtubo mogitib. Kon amumahon pinaagi sa paggamit sa hugot nga pagtuo, pul-ongan pinaagi sa paghinulsol, ug palig-onon pinaagi sa pagkamasulundon ug maayong mga buhat, ang ingon nga mga binhi mamunga sa gihambin nga bunga sa espirituhanong direksyon. Ang balaanong inspirasyon ug gahum moresulta dayon—inspirasyon nga masayud sa kabubut-on sa Ginoo, gahum sa paghatag og kahanas sa pagtuman nianang gidasig nga kabubut-on.

Mahimo ba nga mopakigbahin ako og upat ka mga baruganan nga nakahatag og hilabihan ka lawom nga mga pagbati sa kalinaw ug kalipay sa akong kaugalingong kinabuhi? Ang Ginoo miestablisar niining mga tukurang bato diha sa Iyang mahangturong plano, ug ang matag usa mahinungdanon. Ang tanan manag-uban nga magtrabaho diha sa panag-angay ug naglig-on sa usag usa. Kon gamiton kini uban sa kakugi ug pagkamakanunayon, makamugna kini og kalig-on sa kinaiya, nagkadugang nga kahanas sa pag-usab sa mga hagit sa kinabuhi ngadto sa tikanganang mga bato sa kalipay karon ug hangtud sa kahangturan. Kini mao ang:

• Hugot nga pagtuo kang Ginoong Jesukristo ug sa Iyang programa sa pagbaton og gahum sa paglampus.

• Paghinulsol aron sa pagtul-id sa mga sangputanan sa mga sayop sa wala pagbuhat o sa pagbuhat.

• Pagsunod sa mga sugo sa Ginoo aron makahatag og kalig-on ug direksyon sa atong mga kinabuhi.

• Dili hinakog nga serbisyo aron sa pagpalambo sa mga kinabuhi sa uban.

Kon determinado na kamo nga magpuyo sa matarung nga paagi, ayaw pagpakawala sa paglaum. Ang kinabuhi daw malisud karon, apan hugti ang paggunit nianang puthaw nga gunitanan sa kamatuoran. Kamo makahimo og mas maayo pa nga paglambo kay sa inyong gituohan. Ang inyong mga pakigbisog nagtino sa kinaiya, disiplina, ug pagsalig sa mga saad sa inyong Amahan sa Langit ug sa Manluluwas samtang kamo makanunayon nga nagsunod sa Ilang mga sugo. Hinaut nga ang Espiritu Santo moaghat kaninyo nga mohimo kanunay og mga desisyon nga molig-on sa inyong kinaiya ug moani og daghang hingpit nga kalipay ug kamaya. Sa pangalan ni Jesukristo, amen.