Pagkamasulundon ngadto sa mga Propeta

Usa ako ka kinabig sa Simbahan. Mapasalamaton kaayo ko nga gitubag sa Dios ang akong pag-ampo ug mihatag kanako og kahibalo ug lig-on nga pagpamatuod nga si Joseph Smith usa ka propeta sa Dios.

Sa wala pa ko mohimo og desisyon nga magpabunyag sa Ang Simbahan ni Jesukristo sa mga Santos sa Ulahing mga Adlaw, akong gitun-an ang mga kinutlo gikan sa kasaysayan ni Joseph Smith. Ako nag-ampo human sa mainampingong pagbasa sa matag paragraph. Kon gusto ninyong buhaton kini nga kamo mismo, mahimong dangtan kamo og 14 ka oras.

Human sa akong pagbasa, pagpamalandong, ug pag-ampo, ang Ginoo mihatag kanako og kasigurohan nga si Joseph Smith Iyang propeta. Ako mopamatuod kaninyo nga si Joseph Smith usa ka propeta, ug tungod kay ako nakadawat niini nga tubag gikan sa Ginoo, ako nasayud nga ang tanan niyang mga sumusunod mga propeta usab. Pagkadako nga panalangin niini nga makabaton og mga propeta sa atong panahon karon!

Nganong importante man nga adunay buhing mga propeta nga mogiya sa tinuod nga Simbahan ni Jesukristo ug sa mga miyembro niini?

Sa Ang Giya ngadto sa mga Kasulatan, atong makita ang kahulugan sa pulong nga propeta: “Usa ka tawo kinsa gitawag ug namulong alang sa Dios. Ingon nga usa ka sinugo sa Dios, ang usa ka propeta makadawat og mga sugo, mga panagna, ug mga pagpadayag gikan sa Dios” (“Prophet,” scriptures.lds.org; tan-awa usab sa Ang Giya ngadto sa mga Kasulatan, “Propeta”).

Dako kining panalangin nga makadawat sa pulong, mga sugo, ug giya sa Ginoo niining malisud nga mga panahon dinhi sa yuta. Ang propeta mahimong dinasig aron makita ang umaabut alang sa kaayohan sa katawhan.

Kita gisultihan nga “sa pagkatinuod ang Ginoong Dios dili magabuhat sa bisan unsa, gawas kon ang iyang tinago ipadayag niya sa iyang mga alagad ang mga propeta.” (Amos 3:7). Atong nasayran gikan niining kasulatan nga ang Ginoo mopadayag ngadto lamang sa iyang mga propeta sa bisan unsang butang nga bation Niya nga gikinahanglang mapadangat ngari kanato. Ipadayag Niya ang Iyang kabubut-on ngari kanato, ug Siya motudlo kanato pinaagi sa Iyang mga propeta.

Ang Ginoo misaad kanato nga kon kita motuo sa balaang mga propeta, kita makaangkon sa kinabuhing dayon (tan-awa sa D&P 20:26). Sa ikaunom nga artikulo sa hugot nga pagtuo, kita namahayag nga kita nagtuo sa mga propeta. Ang pagtuo nagpasabut sa pagbaton og hugot nga pagtuo ug pagsalig kanila ug sa pagsunod ug pagbuhat kon unsa ang gihangyo sa mga propeta nga atong buhaton.

Niadtong 1980, sa dihang si Presidente Ezra Taft Benson nagserbisyo isip Presidente sa Korum sa Napulog Duha ka mga Apostoles, siya mihatag og gamhanang mensahe mahitungod sa pagkamasulundon ngadto sa mga propeta atol sa usa ka debosyonal sa BYU didto sa Marriott Center. Ang iyang maanindot nga pakigpulong, nga giulohan og, “Fourteen Fundamentals in Following the Prophet [Katorse ka mga Sukaranan sa Pagsunod sa Propeta],” nakatandog sa akong kasingkasing. Nindot kaayo ang akong gibati nga nakahimo ako og desisyon sa pagsunod sa mga propeta sa tibuok nakong kinabuhi sa dihang nagpabunyag ako sa tinuod nga Simbahan sa Ginoo.

Gusto nakong ipakigbahin kaninyo ang pipila sa mga baruganan nga gitudlo ni Presidente Benson:

“Una: Ang propeta mao lamang ang tawo kinsa mamulong alang sa Ginoo sa tanang mga butang” (1980 Devotional Speeches of the Year [1981], 26).

Sa atong panahon ang propeta sa Dios misugo kanato sa pagsunod sa mga sugo, sa paghigugma sa atong isigkatawo, sa pagserbisyo, sa pag-atiman sa bag-ong henerasyon, sa pagluwas sa dili aktibo o dili kaayo aktibo—sa pagbuhat og daghang mga butang nga atong gitawag og mapanagnaong mga prayoridad. Kinahanglan nga atong sabton nga kining mga prayoridad mao ang mga prayoridad sa Dios ug ang propeta mao ang Iyang tingog sa pagpadangat niini ngadto sa tanan diha sa Simbahan ug sa kalibutan.

Kita gitambagan nga “maminaw ngadto sa tanan niya nga mga pulong ug mga sugo.” (D&P 21:4). Nakat-unan usab nato:

“Kay ang iyang pulong ikaw makadawat, ingon og gikan sa akong kaugalingon nga ba-ba, sa tanan nga pagpailub ug hugot nga pagtuo.

“Kay pinaagi sa pagbuhat niini nga mga butang ang mga ganghaan sa impyerno dili makabuntog batok kanimo; oo, ug ang Ginoong Dios mopatibulaag sa mga gahum sa kangitngit gikan sa imong atubangan, ug mohimo sa mga langit sa pagkurog alang sa imong kaayohan, ug himaya sa iyang ngalan” (D&P 21:5–6).

Ikaduhang sukaranan: “Ang buhi nga propeta mas mahinungdanon alang kanato kay sa sumbanan nga mga kasulatan” (“Fourteen Fundamentals,” 26).

Ang buhi nga propeta nagdawat og piho nga mga pagpadayag alang kanato. Akong nahinumduman sa daghang mga higayon sa dihang ako anaa aron sa pagpaminaw sa usa sa mga sulugoon sa Ginoo nga namulong mahitungod sa piho nga butang alang sa usa ka siyudad o nasud. Nakahinumdom ako sa dili mokubos og tulo ka buhi nga mga propeta, mga manalagna, ug mga tigpadayag kinsa nakapamulong kabahin sa akong nasud, ang Brazil. Usa niining mga sulugoon miingon nga ang Brazil mahimong usa ka naglambo nga ekonomiya sa kalibutan ug mahimong gawasnon sa inflation. Nianang higayuna, kami adunay two-digit inflation matag bulan. Lisud kadto alang sa daghang tawo nga motuo sa unsay gisulti sa propeta, apan ako mituo. Ang Brazil adunay mga 5 ka porsyento nga inflation matag tuig sulod sa nagsunod-sunod nga katuigan karon. Ang Brazil nahimong ikawalo sa ekonomiya sa kalibutan, ang nasud nagmalamboon!

Ikatulong sukaranan: “Ang buhi nga propeta mas importante alang kanato kay sa patay nga propeta” (“Fourteen Fundamentals,” 27).

Nakat-unan nato ang usa ka mahinungdanong leksyon kabahin niini gikan sa mga kasulatan. Sa mga panahon ni Noe mas sayon alang sa mga tawo sa pagtuo sa patay nga mga propeta, apan malisud alang kanila nga motuo ni Noe. Kita nasayud nga tungod sa ilang pagkawalay pagtuo sila nangamatay sa Lunop (tan-awa sa Genesis 6–7).

Ikaupat nga sukaranan: “Ang propeta dili gayud mopasalaag sa Simbahan” (“Fourteen Fundamentals,” 27).

Sa gihapon kita nakakat-on gikan sa buhi nga mga propeta. Si Presidente Wilford Woodruff miingon: “Ang Ginoo dili gayud motugot kanako o ni bisan kinsa nga tawo kinsa mobarug ingon nga Presidente niini nga Simbahan sa paggiya kaninyo nga mahisalaag. Kini wala sa plano. Kini wala sa hunahuna sa Dios. Kon ako mangahas niana, ang Ginoo mopapahawa kanako gikan sa akong dapit, ug busa Siya mobuhat ngadto ni bisan kinsa nga tawo kinsa mangahas sa paggiya sa mga katawhan sa paghisalaag gikan sa mga orakulo sa Dios ug gikan sa ilang katungdanan” (Opisyal nga Pahayag 1)

Ikalima nga sukaranan: “Ang propeta wala magkinahanglan nga magbaton og bisan unsang partikular nga yutan-ong pagbansay o mga kredensyal aron sa pagpamulong sa bisan unsang hilisgutan o mobuhat sa bisan unsang butang sa bisan unsang panahon” (“Fourteen Fundamentals,” 27).

Ang Ginoo mitawag og usa ka batan-on nga lalaki, si Joseph Smith, aron sa pagpahiuli sa Iyang Simbahan. Inyo ba nga gihunahuna nga ang batan-ong si Joseph Smith usa ka doktor sa teyolohiya o sa siyensya? Kita nasayud nga siya usa ka mapainubsanon ug walay nahuman nga kurso nga batan-ong lalaki. Apan siya gipili sa Ginoo, ug iyang nadawat gikan sa Ginoo ang tanan nga gikinahanglan sa pagpasidungog ug pagpalambo sa calling sa usa ka propeta sa Pagpahiuli.

Si Presidente Benson mipadayon:

“Ikaunom: Ang propeta dili kinahanglan nga mosulti, ‘Sa ingon nagsulti ang Ginoo’ nga hatagan kita og kasulatan. …

“Ikapito: Ang propeta mosulti kanato kon unsay kinahanglan natong masayran, dili kanunay kon unsay gusto natong masayran” (“Fourteen Fundamentals,” 27, 28).

Ug dayon si Presidente Benson mikutlo gikan sa 1 Nephi 16:1, 3:

“Ug karon nahinabo nga human ako, si Nephi, makahimo og panapos sa pakigpulong ngadto sa akong mga igsoon, tan-awa sila miingon kanako: Ikaw nagpahayag kanamo og malisud nga mga butang, labaw kay sa kami makalahutay. …

“Ug karon akong igsoon nga mga lalaki, kon kamo mga matarung ug andam sa pagpatalinghug sa kamatuoran, ug mosunod ngadto niini, nga kamo molakaw nga matarung atubangan sa Dios, busa kamo dili magbagulbol tungod sa kamatuoran, ug moingon: Ikaw namulong sa malisud nga mga butang batok kanamo.”

Ikawalo nga sukaranan: “Ang propeta dili mapugngan sa pangatarungan sa mga tawo. …

“… Makatarunganon ba kini sa pag-ayo sa sanglahon pinaagi sa pagsulti sa usa ka tawo nga manghugas og pito ka higayon sa usa ka partikular nga suba? Gani mao gayud kini ang gisulti ni propeta Eliseo nga angayang buhaton sa sanglahon, ug siya naayo. (Tan-awa sa 2 Mga Hari 5.)” (“Fourteen Fundamentals,” 28).

Ug si Presidente Benson mipadayon sa paghatag og laing mga baruganan kabahin sa pagkamasulundon ngadto sa propeta. Akong basahon ang katapusang unom ug dapiton kamo sa inyong sunod nga family home evening sa pagpangita niining mga baruganan diha sa mga pulong ug mga pagtulun-an sa atong buhi nga mga propeta, mga manalagna ug mga tigpadayag atol niining kinatibuk-ang komperensya.

“Ikasiyam: Ang propeta makadawat og pagpadayag sa bisan unsang butang—temporal o espirituhanon. …

“Ikanapulo: Ang propeta mahimo nga malakip sa pangpubliko nga mga butang. …

“Ikaonse: Ang duha ka mga grupo kinsa maglisud kaayo sa pagsunod sa propeta mao ang mapasigarbuhon kinsa mga maalamon ug ang mapasigarbuhon kinsa mga adunahan. …

“Ikadose: Ang propeta dili kinahanglan nga inila sa kalibutan o mga kalibutanon. …

“Ikatrese: Ang propeta ug iyang mga magtatambag naglangkob sa Unang Kapangulohan—ang labing taas nga korum sa Simbahan. …

“Ikakatorse: Ang propeta ug ang kapangulohan—ang buhi nga propeta ug ang unang kapangulohan—sunod kanila ug mapanalanginan; isalikway sila ug mag-antus” (“Fourteen Fundamentals,” 29).

Atong kahigayunan nga makabaton sa mga pulong sa atong buhi nga mga propeta, mga manalagna, ug mga tigpadayag atol niining maanindot nga kinatibuk-ang komperensya. Sila mamulong sa kabubut-on sa Ginoo alang kanato, nga Iyang katawhan. Ilang ipadangat ang pulong sa Dios ug ang Iyang tambag ngari kanato. Hatagi og pagtagad ug sunda ang ilang panudlo ug mga sugyot, ug ako mopamatuod kaninyo nga ang inyong kinabuhi hingpit nga mapanalanginan.

Si Jesus mao ang Kristo, ang atong Manluluwas ug Manunubos. Si Thomas S. Monson mao ang buhi nga propeta sa Dios, ug ang Unang Kapangulohan ug ang Korum sa Napulog Duha ka mga Apostoles mga propeta, mga manalagna, ug mga tigpadayag. Sa pangalan ni Jesukristo, amen.