Ang Priesthood ni Aaron

Sa dihang ako namulong sa komperensya mga 25 ka tuig nang milabay, migamit ako og visual aid nga gipabarug tapad kanako. Siya mao ang akong kinamagulangang apo nga lalaki. Siya bag-ohay lang nga nakadawat sa Aaronic Priesthood ug naordinahan isip usa ka deacon. Akong gigamit ang higayon niadtong okasyuna sa pagtumong sa akong mga gipamulong ngadto kaniya kabahin sa kaimportante sa pagdawat sa Aaronic Priesthood.

Miingon ako sa akong apo:

“Wala kaayo ko malipay sa kalibutanong kondisyon nga imong napanunod ug sa ubang batan-ong mga lalaki sa dihang inyong gisugdan ang tahas sa pagpadulong paingon sa pagkahamtong. Samtang kami nga mas magulang anaa na sa edad ug posisyon sa pag-impluwensya sa kalibutan, nagtuo ko nga kamo among gipakyas sa hilabihan tungod kay among gipasagdan nga mamahimong ingon niini ang kondisyon sa kalibutan. Kini nagbutang kaninyo sa usa ka posisyon diin daghan niadtong gikinahanglan unta ninyong ikauban wala maamumahi og usa ka panabut o pagtahud sa tradisyonal nga mga mithi. Mao nga, ang pagpamugos sa kaedad [peer pressure] nahimong mas lisud ug mas grabe pa.

“Kita nagbutang diha sa atong mga panimalay og mga radyo, mga record player, ug mga telebisyon. Samtang ang matag usa kanato adunay potensyal sa pagsangkap og limpyo nga kalingawan, daghan sa gipanghimo nga makalingaw nga atong mapaminaw ug matan-aw nga walay mga kalidad sa pagdasig ug pag-awhag sa batan-ong mga lalaki. Sa pagkatinuod, kadaghanan sa gipanghimo makapakubos. Ang pagpislit sa switch diha sa inyong kaugalingong panimalay adunay potensyal sa pagguba sa sulod kaninyo sa usa ka pagbati kon unsa ang husto ug unsa ang sayop” (“I Confer the Priesthood of Aaron, Ensign, Nob. 1985, 46).

Kon mas daghang butang ang mausab, mao usab kadaghan ang magpabiling mao lang gihapon—gawas lang sa teknolohiya. Naagni ako sa pagpangutana sa batan-ong mga lalaki sa Aaronic Priesthood kon sila ba nasayud kon unsa ang record player. Niadtong wala, kini usa ka butang nga atong adtoon sa family room ug ipatugtog aron kita makapaminaw og musika. Hunahunaa nga, kita kinahanglang moduol niini, imbis nga dalhon nato kini bisan asa kita.

Gitudloan usab nako ang akong apo, si Terry, og upat ka leksyon nga gibase sa istorya ni Daniel sa Daang Tugon. Giingnan nako siya (1) sa pagpabilin sa iyang lawas nga himsug ug limpyo, (2) sa pagpalambo sa iyang hunahuna ug pagmaalamon, (3) sa pagmalig-on ug pagbatok sa tintasyon sa usa ka kalibutan nga napuno niini, ug (4) sa pagsalig sa Ginoo, ilabi na kon ikaw nagkinahanglan sa Iyang proteksyon.

Akong gitapos ang akong pagtambag kang Terry uban niini nga mga pulong: “Kini nga mga istorya sa mga kasulatan dili gayud matigulang. Kini mahimong ingon ka makahinam alang kaninyo kon kamo magbasa niini isip usa ka deacon, teacher, priest, usa ka misyonaryo, usa ka home teacher, presidente sa elders quorum, o sa bisan unsa nga gitawag sa Ginoo nga ipabuhat kaninyo. Kini makatudlo kaninyo sa pagbaton og hugot nga pagtuo, kaisug, paghigugma sa inyong isigkatawo, pagsalig sa kaugalingon, ug pagsalig sa Ginoo” (Ensign, Nob. 1985, 48).

Malipayon ko nga moreport nga si Terry nagmatinud-anon sa buluhaton nga akong gihatag kaniya mga 25 ka tuig nang milabay. Sa wala madugay nadawat niya ang Melchizedek Priesthood, mialagad og matinud-anong misyon, sa kasamtangan nagserbisyo isip elders quorum president, ug dayag lang amahan sa usa ka matahum nga anak.

Daghan ang nausab sa katapusang quarter sa siglo. Lain pang butang nga nahitabo mao nga daghan sa akong mga apo ang dagko na ug duna nay ilang kaugalingong mga anak. Niining ting-init aduna koy oportunidad sa pagbarug kauban sa sirkulo sa mga tighupot sa priesthood ug nagpandong sa akong mga kamot diha sa ulo sa akong apo sa tuhod samtang ang iyang amahan mikumpirma kaniya sa Aaronic Priesthood. Bisan tuod kon ang akong apo sa tuhod wala aron sa pagbarug sa akong kiliran karon, ganahan kong itumong ang akong pamulong ngadto kaniya ug kaninyong tanan nga mga talagsaong batan-ong mga lalaki kinsa naghupot sa Aaronic Priesthood.

Kini usa gayud ka talagsaon nga panalangin ang makadawat sa Aaronic Priesthood. Ang kasaysayan nagrekord sa mahimayaong adlaw sa dihang ang priesthood gipahiuli sa yuta, naghatag sa mga lalaki sa katungod sa paglihok og usab isip mga tinugyanan sa Dios samtang ilang gipahigayon ang sagradong mga ordinansa sa priesthood. Abril 5, 1829 kadto, nga si Oliver Cowdery miabut sa panimalay ni Joseph Smith sa Harmony, Pennsylvania. Si Oliver nangutana ni Propeta Joseph Smith kabahin sa iyang buhat sa paghubad sa usa ka karaang rekord, ang Basahon ni Mormon. Nakombinser sa sagradong matang sa buhat, si Oliver miuyon sa paglihok isip tagasulat sa pagkompleto sa paghubad. Ang buhat sa paghubad paspas nga milambo sa dihang si Oliver mipasalig sa paglihok isip maoy tagasulat.

Pagka Mayo 15, 1829, si Joseph ug Oliver miabut na sa 3 Nephi. Ang kasaysayan sa nabanhaw nga Manluluwas nga mibisita sa Kasadpang Bahin sa Kalibutan ug ang Iyang mga pagtulun-an kabahin sa bunyag nakapahinam kanila. Samtang sila nagbasa sa 3 Nephi, nagsugod sila sa paghunahuna kabahin sa bunyag. Unsa ang husto nga paagi sa bunyag, ug si kinsa ang adunay katungod sa pagpahigayon niining sagradong, makaluwas nga ordinansa? Nangita sila sa tubag niining mahinungdanong pangutana nga doktrinal. Sila mihukom sa pagpangita og tubag pinaagi sa pag-ampo, ug sila miadto sa duol nga dapit sa daplin sa Susquehanna River. Ilang gibu-bu ang tinuod nga gibati sa ilang mga kasingkasing, ug ang kalangitan miabli ngadto kanila. Usa ka anghel ang mipakita, nga nagpaila-ila sa iyang kaugalingon nga si Juan Bautista, ug siya miingon kang Joseph ug Oliver nga siya naglihok ubos sa direksyon nila ni Pedro, Santiago, ug Juan kinsa naghupot sa mas taas nga priesthood (tan-awa sa Joseph Smith—Kasaysayan 1:72).

Mipatong sa iyang mga kamot nganha sa ilang mga ulo, siya miingon: “Diha kaninyo nga akong kauban nga mga sulugoon, sa nganha sa Mesiyas ako motugyan sa Pagkapari ni Aaron, nga naghupot sa mga yawe sa pagpangalagad sa mga anghel, ug sa ebanghelyo sa paghinulsol, ug sa bunyag pinaagi sa pagpaunlod alang sa kapasayloan sa mga sala; ug kini dili na pagakuhaon pag-usab gikan sa yuta, hangtud nga ang mga anak ni Levi maghalad pag-usab og halad ngadto sa Ginoo diha sa pagkamatarung” (D&P 13:1).

Sa wala madugay, si Oliver misaysay og balik niini nga hitabo uban niini nga mga pulong: “Apan … hunahunaa, hunahunaa og dugang sa makadiyut, unsa nga kalipay ang mipuno sa among mga kasingkasing, ug sa unsa nga katingala kami nakayukbo, … sa diha nga kami nakadawat ubos sa Iyang kamot sa Balaan nga Priesthood” (Joseph Smith—Kasaysayan 1:71, footnote).

Human sa paghulat sa katawhan sulod sa daghang siglo nga mapahiuli ang awtoridad sa Dios, ang gahum ug himaya sa balaang Aaronic Priesthood nahibalik na sa yuta. Sa seksyon 107 sa Doktrina ug mga Pakigsaad, kita nakakat-on ngano nga ang mas ubos nga priesthood gitawag og Aaronic Priesthood:

“Ang ikaduha nga priesthood gitawag og Pagkapari ni Aaron, tungod kay kini gitugyan ngadto ni Aaron ug sa iyang binhi, sulod sa ilang tibuok nga mga kaliwatan.

“Nganong gitawag kini og ubos nga pagkapari tungod kay kini usa ka sumpay sa labaw, o sa Melchizedek nga Pagkapari, ug adunay gahum sa pagpangalagad sa dayag nga mga ordinansa. …

“Ang gahum ug pagtugot sa ubos, o Aaronic nga Pagkapari, mao ang paghupot sa mga yawe sa pagpangalagad sa mga anghel, ug sa pagpangalagad diha sa dayag nga mga ordinansa, ang sulat sa ebanghelyo, ang bunyag sa paghinulsol alang sa kapasayloan sa mga sala, nga nahiuyon sa mga pakigsaad ug mga sugo” (D&P 107:13–14; 20).

Dili lang ang batan-ong mga lalaki sa Aaronic Priesthood ang makadawat sa gahum ug katungod nga mahimong mga tinugyanan sa Ginoo sa pagbuhat sa ilang mga responsibilidad sa priesthood, apan sila makadawat sa yawe sa pagpangalagad sa mga anghel.

Batan-ong mga lalaki sa Aaronic Priesthood, mopamatuod ako kaninyo nga ang Ginoo mapugos ubos sa maligdong nga pakigsaad sa pagpanalangin sa inyong kinabuhi sumala sa inyong kamatinud-anon. Kon inyong patalinghugan ang tingog sa pasidaan sa Espiritu Santo ug magsunod sa Iyang direksyon, kamo mapanalanginan uban sa sa pagpangalagad sa mga anghel. Kini nga panalangin makadugang og kaalam, kahibalo, gahum ug himaya sa inyong kinabuhi. Kini usa ka tinuod nga panalangin nga gisaad diha kaninyo sa Ginoo.

Mga pipila ka bulan ang milabay aduna akoy oportunidad sa pagtambong og miting sa puasa ug pagpamatuod sa ward. Usa sa mibarug aron sa pagpamatuod mao ang adviser sa Aaronic Priesthood. Ang iyang pagpamatuod naghatag kanako og bag-ong pagdayeg kon unsa ang ipasabut alang sa usa ka tighupot sa Aaronic Priesthood sa paghupot sa mga yawe sa pagpangalagad sa mga anghel.

Kini nga adviser mihulagway og pipila sa iyang mga kasinatian uban sa Aaronic Priesthood sa ward nianang buntaga. Samtang naglakaw siya padulong sa simbahan iyang namatikdan ang duha ka deacon nga naay mga sobre sa halad sa puasa paingon sa mga balay sa mga miyembro. Siya nakadayeg sa gisul-ob nilang sinina nga pang-Dominggo ug giunsa nila paghimo ang ilang buluhaton uban sa kaligdong. Iya dayong giubanan ang duha ka priest sa pagpahigayon sa sakrament sa panimalay sa mga lalaki nga may kakulangan sa panglawas ug sa pangisip. Kini ang unang opurtunidad niining duha ka batan-ong lalaki sa pagbisita niini nga panimalay, ug ang ilang adviser nakakita sa matinahuron ug mabination nila nga paghimo sa ilang buluhaton sa priesthood.

Dayon, ang adviser mipakigbahin og pipila ka kasinatian nga nakapatandog gayud sa iyang kasingkasing, tungod kay usa sa mga priest mipahinumdom kaniya kon unsa gayud ang kahulugan nga mahimong tinuod nga alagad ni Jesukristo—sa tinuod, usa ka tigpangalagad nga anghel. Ang batan-on nga priest kinsa nagpasa sa tubig ngadto sa kongregasyon miadto sa usa ka lalaki nga adunay seryuso nga sakit nga Down Syndrome. Ang kondisyon sa lalaki nakapugong kaniya sa pagkuha sa tasa gikan sa tray aron moinom gikan niini. Kining batan-on nga priest dali nga mitubag sa sitwasyon. Iyang gibutang ang iyang wala nga kamot sa luyo sa ulo sa lalaki aron siya maanaa sa posisyon sa pag-inom, ug gamit ang tuo nga kamot siya mikuha sa tasa gikan sa tray ug hinay-hinay nga gibutang sa ngabil sa lalaki. Usa ka ekspresyon sa pagpasalamat ang makita sa nawong sa lalaki—ang ekspresyon sa usa ka tawo ngadto sa lain kinsa nakapangalangad ngadto kaniya. Kining talagsaon nga, batan-ong priest mipadayon dayon sa iyang buluhaton sa pagpasa sa gipanalanginan nga tubig ngadto sa ubang miyembro sa kongregasyon.

Ang adviser mipahayag sa mga pagbati nga diha kaniya niadtong malumo nga higayon sa iyang pagpamatuod. Miingon siya nga siya hilum nga mihilak tungod sa hingpit nga kalipay, ug siya nasayud nga ang Simbahan anaa sa maayong mga kamot uban niining mga batan-on, maamumahon, masulundong mga tighupot sa Aaronic Priesthood.

Si Presidente Ezra Taft Benson kausa miingon: “Hatagi ko og usa ka batan-ong lalaki kinsa nagpabilin sa iyang kaugalingon nga limpyo sa moral nga paagi ug matinud-anong mitambong sa iyang mga miting sa Simbahan. Hatagi ko og usa ka batan-ong lalaki kinsa mipalambo sa iyang priesthood ug nakakuha og Ganti sa Katungdanan ngadto sa Dios ug nga usa siya ka Eagle Scout. Hatagi ako og usa ka batan-ong lalaki kinsa nakagradwar og seminary ug adunay hugot nga pagpamatuod sa Basahon ni Mormon. Hatagi ko og ingon ana nga batan-ong lalaki, ug hatagan ko kamo og usa ka batan-ong lalaki kinsa makahimo og mga milagro alang sa Ginoo diha sa mission field ug sa iyang tibuok kinabuhi” (“To the ‘Youth of the Noble Birthright,’” Ensign, Mayo 1986, 45).

Sa mga ginikanan niining talagsaon nga batan-ong mga lalaki ug mga babaye, kami mosangon kaninyo niining sagradong responsibilidad sa pagtudlo sa inyong mga anak sa mga doktrina sa balaang priesthood. Ang inyong mga anak kinahanglang makat-on sa sayong edad kabahin sa panalangin sa pagbaton sa mahangturong priesthood sa Ginoo ug unsa ang ilang kinahanglang buhaton sa tinagsa-tagsa aron makasarang niini nga mga panalangin.

Mga bishop, kamo adunay mga yawe sa priesthood sa pagdumala sa batan-ong mga lalaki sa Aaronic Priesthood, sa paglingkod sa konseho uban kanila, ug sa pagtudlo kanila sa ilang mga katungdanan sa priesthood. Palihug siguroha nga ang matag batan-ong lalaki kinsa takus sa pagdawat sa Aaronic Priesthood nakasabut sa mga obligasyon ug mga panalangin nga moabut kaniya isip usa ka tighupot sa priesthood. Tabangi sila nga makakat-on sa pagpalambo sa priesthood karon pinaagi sa paghatag kanila og importanting mga buluhaton ug sa pagtabang kanila nga moserbisyo ug mangalagad ngadto sa uban.

Batan-ong mga lalaki, mohagit ako kaninyo sa pagtukod sa inyong kinabuhi sa pundasyon sa kamatuoran ug pagkamatarung. Kini mao lamang ang pundasyon nga makabarug sa mga kalisdanan niining kinabuhia ug makalahutay hangtud sa kahangturan. Ang priesthood nga inyong gihuptan usa ka espesyal nga gasa, kay ang tighatag mao ang Ginoo mismo. Gamita kini, palamboa kini, ug pagkinabuhi nga takus niini. Gusto nakong ipahibalo kaninyo nga ako adunay espesyal ug personal nga pagpamatuod sa gahum niini. Kini nakapanalangin sa akong kinabuhi sa daghang mga paagi.

Gihagit ko usab kamo sa pagtino karon nga kamo mopasidungog niining dakong panalangin ug sa pag-andam nga ma-advance ngadto sa matag katungdanan [office] sa Aaronic Priesthood—deacon, teacher, ug priest. Andama ang inyong mga kaugalingon alang sa dakong panalangin sa pagdawat sa Melchizedek Priesthood, diin kamo kinahanglang takus sa pagdawat sa dili pa kamo moserbisyo isip usa ka full time nga misyonaryo. Gikinahanglan sa Ginoo nga kamo mangandam sa inyong kaugalingon alang sa Iyang pagpangalagad, ilabi na sa dakong responsibilidad nga maanaa kaninyo sa pagsangyaw sa Iyang ebanghelyo ngadto sa kalibutan. Mosaad ako kaninyo nga kon kamo mangandam sa pagdawat sa Iyang balaang priesthood, Siya sa pagkatinuod mobu-bu sa mga panalangin diha sa inyong mga ulo. Kini nga pagsaksi akong ibilin diha kaninyo sa ngalan sa atong Ginoo ug Manluluwas, gani si Jesus ang Kristo, amen.