Salig sa Dios, Dayon Lakaw ug Buhata

Akong minahal nga mga kaigsoonan, usa kini ka pasidungog nga mamulong nganha kaninyo niining adlaw sa Igpapahulay. Nagmapainubsanon ko sa buluhaton nga mamulong sa minilyon ka mga Santos sa Ulahing mga Adlaw ug sa atong mga higala sa tibuok kalibutan. Agi og pagpangandam alang niining sagrado nga oportunidad, ako nag-ampo ug namalandong nga masayud sa inyong personal nga mga panginahanglan ug unsa ang mensahe nga gusto sa Ginoo nga akong ihatag.

Ang inyong mga panginahanglan daghan kaayo ug nagkalain-lain. Matag usa kaninyo talagsaon nga anak sa Dios. Ang Dios nakaila sa matag usa kaninyo. Siya nagpadala og mga mensahe sa pagdasig, pagkorihir, ug paggiya, nga haum kaninyo ug sa inyong mga panginahanglan.

Aron masayran kon unsa ang gusto sa Dios nga ipamulong nako niini nga komperensya, akong gibasa ang mga mensahe sa Iyang mga sulugoon diha sa kasulatan ug sa miagi nga mga komperensya. Nakadawat ko og tubag sa akong pag-ampo samtang akong gibasa ang mga pulong ni Alma, usa ka bantugan nga sulugoon sa Ginoo diha sa Basahon ni Mormon:

“O nga ako unta usa ka anghel, ug makaangkon sa pangandoy sa akong kasingkasing, nga ako makalakaw ug makasulti uban sa trumpeta sa Dios, uban sa tingog nga makapakurog sa yuta, ug mosinggit og paghinulsol ngadto sa matag katawhan!

“Oo, ako mopadayag ngadto sa matag kalag, ingon sa tingog sa dugdog, sa paghinulsol ug sa laraw sa katubsanan, nga sila kinahanglan maghinulsol ug moduol ngadto sa atong Dios, nga aron unta wala nay dugang pa nga kasubo diha sa ibabaw sa tibuok yuta.

“Apan tan-awa, ako usa ka tawo, ug nakasala diha sa akong pangandoy; kay ako unta angay nga matagbaw sa mga butang diin ang Ginoo naghatag ngari kanako.”¹

Ug dayon akong nakaplagan diha sa pagpamalandong ni Alma ang direksyon nga akong giampo: “Kay tan-awa, ang Ginoo mitugot ngadto sa tanan nga mga kanasuran, sa ilang kaugalingon nga nasud ug pinulongan, sa pagtudlo sa iyang pulong, oo, diha sa kaalam, ang tanan nga siya nakakita nga angay nga sila kinahanglang makabaton; busa kita nakakita nga ang Ginoo nagtambag diha sa kaalam, sumala niana nga makiangayan ug tinuod.”²

Samtang nagbasa ko niana nga mensahe gikan sa usa ka sulugoon sa Dios, ang akong katuyoan alang karon nahimong klaro. Ang Dios nagpadala og mga mensahe ug may katungod nga mga mensahero ngadto sa Iyang mga anak. Kinahanglan nakong palig-unon og maayo ang pagsalig diha sa Dios ug sa Iyang mga sulugoon nga kita molakaw ug mosunod sa Iyang tambag. Gusto Niya kana tungod kay Siya nahigugma kanato ug nagtinguha sa atong kalipay. Ug nasayud Siya nga ang kakulang sa pagsalig diha Kaniya makadala og kagul-anan.

Kanang kakulang sa pagsalig nakapasubo ngadto sa mga anak sa Langitnong Amahan gikan sa wala pa malalang ang kalibutan. Nasayud kita pinaagi sa mga pagpadayag sa Dios ngadto ni Propeta Joseph Smith nga daghan sa atong mga kaigsoonan didto sa kalibutan sa wala pa dinhi sa yuta ang misalikway sa plano alang sa atong mortal nga kinabuhi nga gipresentar sa atong Langitnong Amahan ug sa Iyang kinamagulangan nga Anak, si Jehova.³

Wala kita masayud sa tanang mga rason sa terible nga kalampusan ni Lucifer sa pagdasig niadtong rebelyon. Hinoon, usa ka rason ang klaro. Kadtong kinsa nawad-an sa panalangin sa pag-anhi sa pagkamortal nagkulang og igong pagsalig sa Dios aron malikayan ang mahangturon nga kaalautan.

Ang makapaguol nga sumbanan sa kakulang sa pagsalig diha sa Dios nagpadayon sukad sa paglalang. Mag-amping ko sa paghatag og mga sanglitanan gikan sa kinabuhi sa mga anak sa Dios kay ako wala masayud sa tanan nga mga rason sa ilang kakulang og igo nga pagtuo sa pagsalig diha Kaniya. Daghan kaninyo nakatimbang-timbang sa mga panahon sa krisis sa ilang kinabuhi.

Si Jonas, pananglitan, wala lamang mosalikway sa mensahe gikan sa Ginoo sa pag-adto sa Nineve apan miadto sa laing dalan. Si Naaman dili makasalig sa pahimangno sa propeta sa Ginoo nga maligo sa usa ka sapa aron tugutan ang Ginoo sa pag-ayo sa iyang sangla, mibati nga ang simpleng buluhaton makapaubos sa iyang dignidad.

Ang Manluluwas midapit ni Pedro sa pagkanaog sa sakayan aron molakaw padulong Kaniya ibabaw sa tubig. Bation nato ang iyang kasakit ug makita ang atong kaugalingong mga panginahanglan sa mas dako nga pagsalig diha sa Dios samtang maminaw kita sa asoy:

“Ug sa ikaupat nga hugna sa bantay sa kagabhion si Jesus miadto kanila, nga naglakaw ibabaw sa tubig nga lanaw.

“Apan sa ilang pagkakita kaniya nga naglakaw sa ibabaw sa tubig, ang mga tinun-an nangalisang ug nanag-ingon, Naay kalag; ug naniyagit sila sa kalisang.

“Apan diha-diha kanila misulti si Jesus nga nag-ingon, Salig kamo; ako kini; ayaw kamo kalisang.

“Ug kaniya mitubag si Pedro nga nag-ingon, Ginoo, kon ikaw man ugaling, paanhaa ako diha kanimo sa ibabaw sa tubig.

“Ug siya miingon kaniya, Umari ka. Busa si Pedro mikawas sa sakayan, ug milakaw ibabaw sa tubig, ug miadto kang Jesus.

“Apan sa pagkakita niya sa hangin, siya nahadlok; ug sa nagkatidlom siya, misinggit nga nag-ingon, Ginoo, luwasa ako.

“Diha-diha gituyhad ni Jesus ang iyang kamot, ug iyang gikuptan siya, ug miingon kaniya, O tawong diyutayg pagtuo, nganong nagduhaduha ka man?”⁴

Makakuha kita og kaisug gikan sa katinuod nga si Pedro igo nga misalig sa Ginoo sa pagpabilin nga matinud-anon sa pagserbisyo Kaniya hangtud na gayud sa Iyang pagmartir.

Ang batan-on nga si Nephi sa Basahon ni Mormon nagdasig kanato og usa ka tinguha sa pagpalambo sa pagsalig diha sa Ginoo sa pagsunod sa Iyang mga sugo, bisan unsa pa man kini kalisud tan-awon. Si Nephi miatubang og kakuyaw ug posible kamatayon sa dihang siya misulti niining mga pulong sa pagsalig nga kita makabati ug kinahanglang mobati og kalig-on sa atong kasingkasing: “Ako moadto ug mobuhat sa mga butang nga ang Ginoo nagsugo, kay ako nasayud nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila.”⁵

Kana nga pagsalig nagagikan sa pagkaila sa Dios. Labaw kay ni bisan kinsa nga mga tawo dinhi sa yuta, kita, pinaagi sa mahimayaon nga mga panghitabo sa pagpahiuli sa ebanghelyo, makabati sa kalinaw nga gitanyag sa Ginoo sa Iyang mga katawhan uban sa mga pulong “Humilom kamo, ug ilhon nga ako mao ang Dios.”⁶ Ang akong kasingkasing napuno sa pasalamat alang sa unsay gipadayag sa Dios mahitungod sa Iyang kaugalingon nga kita unta mosalig Kaniya.

Alang kanako nagsugod kini niadtong 1820 sa usa ka batang lalaki diha sa kakahoyan sa usa ka umahan sa estado sa New York. Ang batang lalaki, si Joseph Smith, Jr. naglakaw taliwala sa mga kakahoyan ngadto sa usa ka mingaw nga dapit. Miluhod siya aron sa pag-ampo uban sa hingpit nga pagsalig nga ang Dios motubag sa iyang pangamuyo nga masayud kon unsa ang iyang angayang buhaton aron malimpyohan ug maluwas pinaagi sa Pag-ula ni Jesukristo.⁷

Matag higayon nga basahon nako ang iyang asoy, ang akong pagsalig sa Dios ug sa Iyang mga sulugoon molig-on:

“Ako nakakita og usa ka dako nga gilis sa kahayag ibabaw gayud sa akong ulo, labaw sa kahayag sa adlaw, nga nag-anam og paubos hangtud kini midapat kanako.

“Diha-diha nga kini mipakita ako nakakaplag sa akong kaugalingon nga giluwas gikan sa kaaway nga migapos kanako. Sa diha nga ang kahayag midapat kanako ako nakakita og duha ka Personahe, kansang kahayag ug himaya dili mahulagway, nagtindog ibabaw kanako diha sa kawanangan. Usa kanila misulti ngari kanako, nagtawag kanako sa akong ngalan ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya!”⁸

Ang Amahan mipadayag kanato nga buhi Siya, nga si Jesukristo mao ang Iyang Bugtong Anak, ug Siya igo nga nahigugma kanato nga gipadala kana nga Anak aron sa pagluwas kanato, kinsa Iyang mga anak. Ug tungod kay ako adunay pagpamatuod nga Iyang gitawag kanang walay grado nga batang lalaki isip Apostol ug Propeta, misalig ko sa Iyang mga Apostoles ug mga Propeta karon ug niadtong ilang gitawag aron moserbisyo sa Dios.

Kana nga pagsalig nakapanalangin sa akong kinabuhi ug sa kinabuhi sa akong pamilya. Mga katuigan na ang milabay nakadungog ko ni Presidente Ezra Taft Benson nga namulong sa usa ka komperensya nga sama niini. Siya mitambag kanato nga buhaton ang tanan kutob sa atong mahimo sa paglingkawas ug paglikay sa pagpangutang. Gihisgutan niya ang mga pagdata-data og mga balay. Miingon siya tingali dili posible, apan labing maayo gayud kon mabayran nato ang tanan natong mga utang sa pagdata-data.⁹

Milingi ko sa akong asawa human sa miting ug nangutana, “Sa imong hunahuna aduna bay paagi nga mahimo nato kana?” Sa sinugdanan dili namo mahimo. Ug dayon pagkagabii naghunahuna ko sa usa ka kabtangan nga among naangkon didto sa laing estado. Sulod sa mga katuigan naningkamot kami sa pagbaligya niini apan wala molampus.

Apan tungod kay kami misalig sa Dios ug sa pipila ka mga pulong sa tunga-tunga sa mensahe sa Iyang sulugoon, mitawag kami pagka Lunes sa buntag ngadto sa tawo didto sa San Francisco kinsa adunay listahan sa among kabtangan nga ibaligya. Natawagan na nako siya pipila ka semana ang milabay, ug miingon siya, “Walay nagpakita og interes sa inyong kabtangan sulod sa katuigan.”

Apan pagka Lunes human sa komperensya, akong nadungog ang tubag nga hangtud niining adlawa nakapalig-on sa akong pagsalig diha sa Dios ug sa Iyang mga sulugoon.

Ang lalaki diha sa telepono miingon, “Nasurprisa ko sa imong tawag. Usa ka tawo mianhi karon nga nangutana kon mahimo ba niyang paliton ang imong kabtangan.” Sa kahibulong nangutana ko, “Pila man ang iyang tanyag sa pagpalit?” Pipila kadto ka dolyares nga sobra pa sa kantidad sa among gidata-datahan.

Ang usa ka tawo tingali moingon nga sulagma lang kadto. Apan ang among gidata-datahan nabayran ang tanan. Ug ang among pamilya padayon gihapon sa pagpaminaw sa mensahe sa propeta nga tingali gipadala aron sa pagsulti kon unsa ang angay natong buhaton aron makaplagan ang seguridad ug kalinaw nga gusto sa Dios alang kanato.

Ang ingon nga pagsalig diha sa Dios makapanalangin sa mga komunidad ingon man usab sa mga pamilya. Nagdako ko sa usa ka gamay nga lungsod sa New Jersey. Ang among branch sa Simbahan adunay mas diyutay pa sa 20 ka miyembro nga kanunayng motambong.

Usa kanila mao ang usa ka babaye—usa ka mas edaran, mapaubsanon kaayo nga kinabig sa Simbahan. Usa siya ka imigrante kinsa misulti og gahi nga tono sa Norwegian. Siya lang ang miyembro sa Simbahan diha sa iyang pamilya ug mao lang ang miyembro sa Simbahan diha sa siyudad nga iyang gipuy-an.

Pinaagi sa akong amahan, kinsa mao ang presidente sa branch, ang Ginoo mitawag kaniya isip presidente sa Relief Society sa branch. Siya walay handbook nga makapahayag kaniya kon unsay angayang buhaton. Walay laing miyembro sa Simbahan ang nagpuyo duol niya. Ang nahibaloan lang niya nga ang Ginoo nagpakabana niadtong nanginahanglan ug ang pipila ka mga pulong sa motto sa Relief Society: “Ang gugma nga putli dili mopakyas.”

Panahon kadto sa unsay atong gitawag nga “Dakong Depresyon [Great Depression].” Liboan ang nawad-an og trabaho ug walay panimalay. Busa, mibati nga siya nakaangkon sa iyang buluhaton gikan sa Ginoo, nangayo siya sa iyang mga silingan og daan nga mga sinina. Gilabhan niya ang mga sinina, giutaw kini, ug gibutang sa mga karton sa iyang luyo nga beranda. Kon ang mga tawo nga walay kwarta nagkinahanglan og sinina ug mangayo og tabang sa iyang mga silingan, moingon sila, “Adto sa balay sa unahan. Adunay babaye nga Mormon nga nagpuyo diha nga mohatag ninyo sa unsay inyong gikinahanglan.”

Ang Ginoo wala modumala sa siyudad, apan Siya miusab sa usa ka bahin niini alang sa kaayohan. Gitawag niya ang gamayng babaye kinsa—nag-inusara—nga misalig Kaniya og igo aron masayud unsay gusto Niya nga ipabuhat kaniya ug dayon mibuhat niini. Tungod sa iyang pagsalig diha sa Ginoo, nakatabang siya niana nga siyudad sa gatusan ka mga anak sa Langitnong Amahan nga nanginahanglan.

Kanang sama nga pagsalig diha sa Ginoo makapanalangin sa mga kanasuran. Akong nasayran nga kita makasalig sa Dios sa pagtuman sa saad ni Alma nga, “tan-awa, ang Ginoo mitugot ngadto sa tanan nga mga kanasuran, sa ilang kaugalingon nga nasud ug pinulongan, sa pagtudlo sa iyang pulong, oo, diha sa kaalam, ang tanan nga siya nakakita nga angay nga sila kinahanglan makabaton.”¹⁰

Ang Dios dili magmando diha sa mga kanasuran, apan Siya naghunahuna kanila. Makabutang ug nagbutang Siya og mga tawo diha sa mahinungdanong mga posisyon kinsa nagtinguha sa unsay labing maayo alang sa mga tawo ug kinsa nagsalig sa Ginoo.¹¹

Nakita ko kini sa akong mga pagbiyahe sa tibuok kalibutan. Sa usa ka siyudad sa sobra sa 10 ka milyon nga mga tawo, namulong ko ngadto sa mga Santos sa Ulahing mga Adlaw nga nagtigum sa liboan diha sa komperensya. Gipahigayon kini didto sa usa ka dakong estadyum nga dulaanan.

Sa wala pa magsugod ang miting, akong namatikdan ang usa ka gwapo nga batan-ong lalaki nga naglingkod sa atubangan nga lingkuranan. Gilibutan siya sa uban pa, kinsa sama niya, mas nindot og gipangsul-ob kay sa kadaghanan niadtong anaa sa ilang palibut. Nangutana ko sa General Authority sa Simbahan nga duol nako kon si kinsa kadto nga mga lalaki. Mihunghong siya nga mao kadto ang mayor sa siyudad ug iyang mga kawani.

Samtang naglakaw ko paingon sa akong sakyanan human sa miting, nasurprisa ko sa akong pagkakita sa mayor nga naghulat kanako aron sa pagtimbaya kanako, nga gilibutan sa iyang mga kawani. Miduol siya, gitunol ang iyang kamot ngari kanako, ug miingon, “Mopasalamat ko kanimo sa imong pag-anhi sa among siyudad ug sa among nasud. Mapasalamaton kami sa unsay imong gibuhat aron sa paglig-on sa imong mga tawo. Uban sa ingon nga mga tawo ug sa ingon nga mga pamilya, makamugna kami og panaghiusa ug kalamboan nga gusto namo alang sa among mga katawhan.”

Akong nakita nianang higayuna nga usa siya sa matinuoron og kasingkasing nga gibutang sa Dios diha sa katungdanan taliwala sa Iyang mga anak. Kita diyutay lamang kaayo taliwala sa mga lumulupyo nianang dakong siyudad ug nasud. Ang mayor nasayud og gamay mahitungod sa atong doktrina ug sa pipila sa atong mga tawo. Apan ang Dios mipadala kaniya sa mensahe nga ang mga Santos sa Ulahing mga Adlaw, ubos sa pakigsaad nga mosalig sa Dios ug sa Iyang adunay katungod nga mga sulugoon, mahimong kahayag ngadto sa iyang mga katawhan.

Nakaila ko sa mga sulugoon sa Dios kinsa mamulong kaninyo niining komperensya. Gitawag sila sa Dios sa paghatag sa mga mensahe ngadto sa Iyang mga anak. Ang Ginoo naghisgut kabahin nila: “Unsa nga Ako ang Ginoo namulong, Ako namulong, ug Ako dili mangayo og pasaylo alang sa akong kaugalingon; ug bisan pa ang mga langit ug ang yuta mahanaw, ang akong mga pulong dili mahanaw, apan ang tanan matuman, bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra.”¹²

Kamo nagpakita sa inyong pagsalig Kaniya kon kamo maminaw uban sa tinguha sa pagkat-on ug paghinulsol ug dayon moadto ug mobuhat sa bisan unsay Iyang gihangyo. Kon kamo igo nga mosalig sa Dios sa pagpaminaw sa Iyang mensahe sa matag pagpamulong, awit, ug pag-ampo dinhi niini nga komperensya, makaplagan ninyo kini. Ug kon kamo moadto ug mobuhat dayon sa unsay gusto Niyang ipabuhat kaninyo, ang inyong gahum sa pagsalig Kaniya motubo, ug moabut ang panahon diin kamo mapuno sa pagpasalamat nga masayud nga Siya misalig kaninyo.

Ako mopamatuod nga ang Dios namulong karon pinaagi sa Iyang pinili nga mga sulugoon sa Ang Simbahan ni Jesukristo sa mga Santos sa Ulahing mga Adlaw. Si Thomas S. Monson mao ang propeta sa Dios. Ang atong Langitnong Amahan ug ang Iyang Anak, si Jesukristo, buhi ug nahigugma kanato. Ako mopamatuod sa pangalan ni Jesukristo, amen.