Ko e Tali ki he ʻAho ʻEkitivitií

Toki ʻaho fakataʻeoli moʻoni! Naʻe ʻikai ke u talanoa mo ha taha ʻi ʻapiako he ʻahó ni, ʻikai ke u vaʻinga mo ha taha he taimi mālōloó, pea ʻikai ke ma tangutu mo ha taha he kai hoʻataá. Ko e uike ua ʻeni e nofo homau fāmilí ʻi he kolo foʻoú ni mo e ʻikai pē haku ngaahi kaungāmeʻa!

ʻI heʻeku lue atu ki homau fale foʻoú, ne u sio ʻoku vaʻinga hoku kiʻi tehiná mo e taʻahine mei he kauhala ʻe tahá. Naʻá ne taʻataʻalo mai, “Mālō e lelei, Losa!”

Ne u tafoki fakalongolongo pē ʻo sio atu. ʻOku toʻu hoku kiʻi tehiná mo e fānau fefine ʻe toko tolu ʻi he hala ne mau nofo aí. Ko e fānau fefine ʻe toko fiha ʻoku mau toʻú? Hala. Hala ha taha!

Ne u tekeʻi atu e matapā muʻá ʻo haʻaki hifo ʻeku kató he falikí.

Naʻe pehē mai e fineʻeikí, “Naʻe tā mai ʻa Sisitā Kāsia mei he Palaimelí ʻo fakamanatu hoʻomou ʻaho ʻekitivitií he ʻahó ni.”

Ne u lāunga ange, “ ʻOku ʻikai ke u fie ʻalu au ki he ʻaho ʻekitivitií. Ne u toki fakamoleki ʻeni e ʻaho kakato mo ha tamaiki ʻoku ʻikai ke u ʻiloʻi. ʻOku ʻikai ke u fie fakamoleki ha toe houa ʻe taha mo ha tamaiki fefine ʻoku ʻikai ke u ʻiloʻi!” Mahalo pē ʻoku faingofua ki ha niʻihi ke talanoa ki ha kakai ʻoku ʻikai ke nau maheni ka ʻoku ʻikai faingofua ia kiate au.

Naʻe pehē mai e fineʻeikí, “ ʻOku ou ʻiloʻi ko e meʻa faingataʻa hoʻo hiki mai ki heni kae tuku kotoa ho ngaahi kaungāmeʻa motuʻá. Ne u lotu pē ke vavé ni ha ʻi ai hatau ngaahi kaungāmeʻa foʻou.”

Ne u pehē ange, “Mo au pē. ʻOku ou lotua ia ʻi he pō hono kotoa ka kuo teʻeki ai pē tali mai ʻe he Tamai Hēvaní ʻeku ngaahi lotú. Hangē ʻoku ʻikai ke Ne fanongo maí.”

Ne kuku ʻe heʻeku faʻeé hoku nimá. Naʻá ne pehē mai, “Mahalo ko hoʻo talí ē ʻa e telefoni meia Sisitā Kāsiá”.

Ne u ʻeke ange, “ ʻE lava fēfē ke hoko ia ko e tali ki heʻeku ngaahi lotú?”

Pehē mai ʻe he fineʻeikí, “ ʻI he taimi ʻe niʻihi ʻoku tau lotu aí, ʻoku ʻamanaki mai e Tamai Hēvaní ke tau fai ha meʻa ke tokoni ki hono tali ʻetau ngaahi lotú. ʻOku ui ia ko e ngāue ʻaki ʻa e tuí. ʻOku fie maʻu ke tau fai ha meʻa lahi ange ʻi haʻatau lotu ʻataʻatā pē. Taimi ʻe niʻihi ʻoku fie maʻu ke tau ngāue ʻaki ʻa e tuí pea tau toki maʻu e tāpuakí.”

Ne u fakakaukau, “ ʻE lava nai ke hoko? ʻE hoko moʻoni ʻeku ʻalu ki he ʻaho ʻekitivitií ko e tali ki heʻeku ngaahi lotú?”

Naʻe toki ʻeke mai ʻe he fineʻeikí ki mui pe te ne ʻave au ki he ʻekitivitií. Ne ʻai ʻeku fuʻu mānava loloa peá u kamo ange. Neongo naʻá ku ilifia ka ne u ongoʻi ko e meʻa totonu pē ia ke faí.

Ne tā vave hoku mafú ʻi heʻema aʻu atu ki ʻapi Siasí. Naʻe talitali lelei au ʻe Sisitā Kāsia peá ne taki atu au ki ha sea ʻi he tēpilé. Ne tokoni hono leʻo ʻofá mo ʻene malimali loto-māfaná ke u ongoʻi fiemālie ange.

Ne fakalea mai ha taʻahine he tafaʻaki tēpile ʻe tahá. “Mālō e lelei, ko Telesa au. Ko hoʻo hiki mai?”

Naʻe ʻikai ke u lava ʻo lea peá u kamo ange pē.

Naʻe pehē mai ʻe Telesa, “Hangē pē ne u sio ʻia koe ʻi ʻapiakó. ʻOkú ke ʻi he kalasi ʻa hai?”

Ne u folo hoku fāvaí ʻi heʻeku manavasiʻí. Naʻá ku talaange “Kalasi ʻa Mīsisi Lií.”

“ ʻOku ou ʻi he kalasi hoko atú pē!” ko ia mai ia.

Naʻá ma talanoa ki heʻema ngaahi kalasí mo e ngaahi lēsoni naʻá ma saiʻia aí. ʻI heʻema talanoá, ne u ʻohovale ʻi he lahi ʻo e ngaahi meʻa ne ma faitatau aí. Ne aʻu ki he sikeití ʻema fakatou saiʻia aí!

ʻI he haʻu ʻa e fineʻeikí ke ʻave au hili e ʻekitivitií, ne u heka fakavavevave ki loto kā.

“Fineʻeiki, ʻe lava ke u vaʻinga mo hoku kaungāmeʻa foʻou ko Telesá?” Naʻá ku taʻataʻalo kia Telesa peá ne taʻataʻalo mai.

Ne pehē ʻe he fineʻeikí ko ha fakakaukau lelei ia, ko ia naʻá ma sikeiti takai ʻi homau halá mo hoku kaungāmeʻa foʻoú ʻi he toenga ʻo e efiafi ko iá.

Ne u tūʻulutui ʻi hoku veʻe mohengá he pō ko iá ʻo fakamālō ki he Tamai Hēvaní ʻi hono tali ʻeku ngaahi lotú. ʻI he kamataʻangá ne u ilifia ke ʻalu ki he ʻaho ʻekitivitií, ka ʻoku ou fiefia ne u ʻalu. ʻOku ou fiefia heʻeku loto-toʻa feʻunga ke ngāue ʻaki ʻa e tuí.