Ko Hono Tūtuuʻi ʻo e Ngaahi Tenga ʻo e Moʻui Fakafalala Pē Kiate Kitá ʻi he Ngaahi Feituʻu Īkí

Lolotonga e nofo ʻa Nōeli Kamipeli, ʻo Hiusitoni, Tekisisi, ʻAmeliká, ʻi ha kiʻi feleti siʻisiʻi ʻi he loto koló, naʻá ne ʻiloʻi ai ko e lahi taha ʻo e ngaahi nāunau naʻá ne fie maʻu ke tō ʻaki haʻane ngoué naʻe maʻu pē ʻi hono ʻapí. ʻI he fakafaletoló, naʻá ne kamata tō e vesitapoló ʻi ha ngaahi kane kuo ʻosi ngāue ʻaki—kau ai ʻa e ngeʻesi kane koa foó mo e ngeʻesi kane maʻá e fanga pusí.

Naʻá ne ofo ʻi he lahi ʻo e meʻakai naʻá ne lava ke maʻu ʻi he fanga kiʻi kané. Naʻá ne fakalahi leva ʻene ngoué, ʻo ne kei ngāue ʻaki e ngaahi nāunau pē naʻá ne tānaki ʻi hono ʻapí. Naʻe hoko e ngaahi tukuʻanga tohi mo e kapa motuʻá ko ha ngoue. ʻOku fakaʻaongaʻi he taimí ni e meʻa punopuna motuʻá ke fakakaka ai e pīní, pīsí mo e ngaahi ʻakau totolo kehe pē. Naʻá ne toe ngāue ʻaki foki ʻa e ngaahi meʻa papakiu motuʻá ke fakahangatonu ʻaki ʻene tematá.

ʻOku pehē ʻe Nōeli, “ ʻOku ou saiʻia ʻi he pole ke tō ngoue ʻi he ngaahi ngeʻesi kapá, heʻeku sio ʻoku liliu hoku fakafaletoló mei ha kiʻi konga sima fute 8 tapafā tatau (mita ʻe 2.5 tapafā tatau) ki ha ngoue lanu mata, maʻuiʻui, mo fua.”

ʻI ʻAlapeta, Kānatá, ʻoku ʻiloʻi ʻe Seli Mātini mei he meʻa naʻá ne aʻusiá ʻe lava ke tupu ha faʻahinga ʻakau pē ʻi he faʻoʻanga meʻa hangē ko e ngeʻesi hina inu sota pe inu fuaʻiʻakaú. ʻOkú ne pehē ko e kī ki he tō ngoue lelei ʻi he ngeʻesi faʻoʻanga meʻá ko e ʻi ai e maama feʻunga, ʻo tatau ai pē pe ko ha matapā sioʻata pe ko ha maama kuo ngaohi ke tokoni ke tupu e ʻakaú, mo hono fuʻifuʻi ʻo toe lahi angé, koeʻuhí ʻoku mōmoa vave ʻa e kapa faʻoʻanga meʻá ʻi he kelekelé.

ʻOku pehē ʻe Seli, “ ʻI he taʻu ní, ʻoku tō ʻeku ngoué ʻi peito ʻi ha fanga kiʻi kulo ʻi he laʻi simá ʻa ia ʻoku kau ai ʻa e ʻakau fakanamuleleí, lētisí, tematá, onioní, lauʻiʻakau fakaifo meʻatokoní (chives) mo ha polo. ʻOku lahi e ngaahi meʻa te ke lava ʻo faí.”

Naʻe fuofua fakakaukau ʻa Kuani Uā Kami ʻo Hongo Kongó ke ne tō ha ngoue ke tānaki atu ki heʻene uelofea tānaki ʻi ʻapí. Naʻe teʻeki ke ne ʻahiʻahi tō ʻene meʻakai pē ʻaʻaná ka naʻá ne fakakaukau te ne lava ke ako e meʻa kotoa pē ʻe fie maʻu ke ne ʻiló ʻaki ʻene lau tohí.

Neongo ko e fakamatala naʻá ne maʻú naʻe tokoni, ka naʻe vave ke ʻiloʻi ʻe Kuani ko e ngaahi lēsoni lelei tahá naʻá ne ako ia ʻi he founga ʻo hono tō ʻo e ngoué. ʻI he taʻu takitaha, kuó ne ako ʻo toe lahi ange ki he kelekele lelei taha ke fakaʻaongaʻi ki he ngaahi tengaʻi ʻakau kehekehé, founga ʻo hono fakafaikehekeheʻi ʻa e ngaahi tengaʻi ʻakau leleí mei he koví, ngaahi founga kehekehe ki hono fuʻifuʻi mo fafanga ʻa e ʻakaú, pea mo e faʻahitaʻu lelei taha ke tō ai ʻa e ngaahi vesitapolo kehekehé.

Ko e ngaahi lēsoni naʻe ako ʻe Kuaní naʻe ʻikai fakangatangata pē ki he ngoué. ʻI ha efiafi ʻe taha, naʻe tō ha matangi ʻo hangē ʻe maumau ai ʻene ngoué. ʻI he pongipongí, naʻá ne ʻohovale ke ʻiloʻi naʻe ʻikai maumau ʻa e ʻakaú, ka ʻi he taimi tatau pē, naʻe tupu mālohi ange mei hono fakalahi atu ʻo e vaí.

ʻOku pehē ʻe Kuani, “Mei he meʻa ko ia naʻá ku aʻusiá, kuó u ako ko e tui pē ki he ʻOtuá, te tau lava ai ʻo mālohi ange ʻi heʻetau fehangahangai loto-toʻa mo hotau ngaahi ʻahiʻahí mo e ngaahi faingataʻá. Ko e ngaahi tāpuaki kuó u maʻu mei he tō ngoué ʻoku fakatou fakatuʻasino mo fakalaumālie.”