Ngaahi Fakakaukau Maʻá e Efiafi Fakafāmili ʻi ʻApí

“Fakamavaheʻi ʻe ha Tāfea, Fakatahaʻi ʻe he Lotú,” peesi 14: Hili hono lau ʻo e fakamatalá, te ke fie fakamamafaʻi ʻa e ngaahi tefitoʻi moʻoni ʻo e lotú ʻaki hoʻomou lau fakataha ʻa ʻAlamā 34:18–27. Fakaafeʻi ʻa e kau mēmipa ʻo e fāmilí ke nau vahevahe ʻa e ngaahi meʻa naʻa nau aʻusiá ʻi he taimi naʻa nau lotu pea tali ai ʻenau ngaahi lotú.

“Ko e Ngāue ʻa e Tokotaha Faifakamoʻuí,” peesi 18: Hili hono lau mo aleaʻi ʻa e ngaahi konga ʻo e fakamatalá, te ke lava ʻo fakaafeʻi ho fāmilí ke nau hivaʻi ʻa e “ ʻEiki, Te u Muimui Atu” (Ngaahi Himí, 127). Mou talatalanoaʻi fakafāmili ʻa e ngaahi founga lelei te mou fai ʻi he taimi ʻoku anga-kovi atu ai ha tahá. Aleaʻi ʻa e founga ʻoku hanga ai ʻe he mahinó mo e ngāue ʻaki ʻa e Fakaleleí ʻi hoʻo moʻuí ʻo “fakamoʻui ʻa e ngaahi loto laveá, fetaʻemahinoʻakí, mo e tāufehiʻá.”

“Akoʻi ʻa e Tokāteline Mahino ʻo e Fāmilí,” peesi 32: Lolotonga hono vahevahe ʻo e pōpoaki ʻa Suli B. Pēkí, fakaafeʻi ʻa e kau mēmipa ʻo e fāmilí ke aleaʻi ʻa e mahuʻinga ʻo e tokāteline ʻo e fāmilí. Aleaʻi ʻa e ngaahi meʻa ʻoku fakatuʻutāmaki ki he fāmilí mo e founga ʻe lava ke ʻikunaʻi ai kinautolu ʻi he tuí. Tokoni ke fakaleleiʻi ha ngaahi hohaʻa pe meʻa ʻe momou ai hoʻo fānaú ʻi hono kamataʻi honau fāmili takitaha ʻi he taimi totonú.

“Tānaki Ho Ngaahi Tāpuakí,” peesi 62: Kimuʻa pea lau fakafāmili ʻa e fakamatala ko ʻení, fokotuʻu ha ngaahi meʻa ʻi he lokí ʻa ia ʻokú ne fakamanatu atu kiate koe ho ngaahi tāpuakí. ʻE lava ke kau heni ʻa e valá, meʻatokoní, folofolá, fakatātā ʻo e Fakamoʻuí, ngaahi laʻi tā ho fāmilí, mo e hā fua. Fakaafeʻi ho fāmilí ke nau fekumi ki he “ngaahi tāpuaki” ko ʻení pea vahevahe ʻa e ʻuhinga ʻoku nau houngaʻia ai ʻiate kinautolú. Te ke lava ke fakaafeʻi ʻa e kau mēmipa ʻo e fāmilí ke hiki ʻa e ngaahi meʻa ʻoku nau loto houngaʻia aí pea fokotuʻu ke nau toutou vakaiʻi ʻa e lisí.