Ko e Ngaahi Ola Lelei ʻo e Uʻu ʻa ha Kulī

ʻI he faʻahitaʻu māfana ʻo e 2009, ne uʻu ai hoku matá ʻe he kulī hoku kaungāmeʻá. Meʻapango he naʻe lavea hoku loungutú pea fie maʻu ke tuitui.

Naʻá ku fuʻu loto-mamahi hili ʻeku laveá. Ne u tuku ke puleʻi ʻe he faingataʻá ʻeku ngaahi fakakaukaú, peá u ongoʻi ai kuo fakaʻauha ʻeku moʻuí. Ne u maaʻi hoku loungutú ʻo ʻikai ke u toe fie ʻalu ki ha feituʻu ʻoku ʻi ai ha kakai. Ne u fakakaukau kuo maumauʻi ʻeku ngaahi palani tā pianó, volipoló, ʻalu ki he lotú, kaukau tahí, mo e akó ʻe heʻeku laveá.

Ka ʻi he taimi kotoa pē ne u lotu aí, maʻu e ngaahi tāpuaki ʻo e lakanga fakataulaʻeikí, talanoa mo ʻeku mātuʻá, pe ʻeva ange hoku fāmilí mo e kaungāmeʻá, naʻe tokoni ia ke langaki hake au peá u ongoʻi fiefia ʻi ha taimi ʻo e mamahí. Ne vave ʻene mahino kiate au kapau naʻe fakakaukau mai e kakaí ki hoku laveá, ko ʻenau ongoʻi manavaʻofa pē.

Ne tokoni e meʻa ko ʻeni ne hokó ki hoku ʻulungāangá, peá u ako ke ʻoua naʻá ku hohaʻa ki he fakakaukau ʻa e kakai kehé kiate aú. Ne u monūʻia he ne tokoni ʻeku laveá ke u ʻiloʻi ai ʻoku totonu ke fakasiʻisiʻi ʻeku siokitá kae tokanga ange ki he niʻihi kehé. Ne fakamālohia lahi ʻaupito hoku laumālié lolotonga e taimi ko ʻení.

Ne u ʻilo ko e faingataʻá ko e konga pē ia ʻo e palani ʻa e Tamai Hēvaní maʻatautolú. Kapau te tau fekumi ki he leleí kae ʻikai ko e koví, te tau lavaʻi e faingataʻá, hoko ko ha tokotaha lelei ange, pea tuku ke fakamālohia kitautolu ʻe he ngaahi meʻa ʻoku tau aʻusiá.