Naʻe tanupou ʻe Palesiteni Tōmasi S. Monisoni ʻa e Temipale Loma ʻĪtalí ʻi he ʻaho 23 ʻo ʻOkatopa, 2010. Ne fanongonongo ʻi he taʻu ʻe ua kimuʻá, ʻe hoko ʻa e temipale fungavaka tolú, sikuea fute ʻe 40,000 (sikuea mita ʻe 3,700) ko hono hongofulu mā ua ia ʻi ʻIulopé ka ko e ʻuluaki ia ʻi ʻĪtalí. ʻI he taimi ʻe ʻosi aí, te ne fai fatongia ki he kāingalotu ʻi ʻĪtalí mo e ngaahi fonua kaungāʻapí. ʻE hoko ʻa e konga kelekele ʻeka ʻe 15 (hekitea ʻe 6) ko ha senitā fakalotu mo fakafonua ʻa ia ʻoku kau ai ha falelotu, senitā takimamata, senitā hisitōlia fakafāmili, mo e nofoʻanga maʻá e kau pataloní.

Naʻe tanupou ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e kelekele maʻá e temipale ʻi Kōtopa, ʻĀsenitiná, ʻi he ʻaho 30 ʻo ʻOkatopa 2010. Naʻe hoko ʻa e kelekelé ko e feituʻu ia naʻe tuʻu ai ʻa e taha ʻo e ngaahi falelotu fuoloa ʻi ʻĀsenitiná. Naʻe pehē ʻe ʻEletā ʻEnitaseni, “Ko ha meʻa fakaofo ia ke ne hoko ko e feituʻu ʻe tuʻu ai ʻa e fale ʻo e ʻEikí.” ʻE hoko ia ko e temipale hono ua ʻi ʻĀsenitiná. ʻOku toe ʻi ai foki mo ha temipale ʻi Puenosi ʻAealesi.

Naʻe tanupou ʻe ʻEletā Kolotiō R. M. Kositā ʻo e Kau Palesitenisī ʻo e Kau Fitungofulú ʻa e Temipale Kilipati ʻAlesoná ʻi he ʻaho 13 ʻo Nōvema 2010. ʻI hono fanongonongo ʻo e ongo Temipale Teleʻa Heila Veli ʻAlesoná mo Kilipati ʻAlesoná ʻi he ʻaho 26 ʻo ʻEpeleli 2008, ko e ongo fuofua temipale ia naʻe fanongonongo ʻe Palesiteni Tōmasi S. Monisoni hili ʻene hoko ko e palesiteni ʻo e Siasí. ʻE hoko ʻa e Temipale Kilipati ʻAlesoná ko e temipale hono fā ia ʻi ʻAlesoná. ʻOku kei palani ʻa e fika nimá, ʻa e Temipale Fīniki ʻAlesoná.