ʻOku faʻa fakamānako maʻu pē ʻa e Liahoná! Koeʻuhí ʻokú ne fakaafeʻi kitautolu ke tau tokoni ʻi ha ngaahi founga kehekehe, ʻoku ou ongoʻi tatau ange mo ia mo ongoʻi ʻoku ou kau atu ki ai. ʻOku ou saiʻia ʻi he ngaahi pousitaá. ʻOku ou fakaʻesia mo tautau kinautolu ʻi hoku ʻōfisí. ʻOku ou fakamālō lahi atu ʻi hoʻo ngaahi ngāue kotoa pē.

Ko kimautolú, ʻa e kāingalotu ʻo e Kolo ʻApuakivá ʻi Kaná, naʻa mau toki kātongaʻi ʻa e taʻu taha ʻa homau koló. Naʻa mau kamata ʻaki ha kau maʻu lotu ʻe toko 50 ʻi he houalotu sākalamēnití, pea ʻi he taimi ní kuo maʻu lotu ha toko 128. ʻOku mau ʻofa ʻi homau kau takí. ʻOku mau lau mo ako ʻa e Liahoná, ʻoku mau fakatau ha ngaahi tatau kehe maʻá e kau papi uluí mo e niʻihi ʻoku ʻikai te nau maʻu iá, pea ʻoku tupu ʻa e tokolahi ʻo e kāingalotú ʻi he ʻaho kotoa pē. ʻOku mau ʻiloʻi ʻoku moʻoni ʻa e Tohi ʻa Molomoná.

ʻOku ou houngaʻia ke u maʻu ʻa e Liahoná ʻi hoku ʻapí! Ko ha maʻuʻanga mālohi ia. Ne ʻi ai ha ʻaho ʻe taha, naʻe fonu ai hoku ʻatamaí ʻi he ngaahi fakakaukau taʻefeʻungá, naʻá ku lau ʻa e Liahoná, pea mavahe ʻa e ngaahi fakakaukau ko iá meiate au. Naʻe tokoniʻi au ʻe he Liahoná ke fakamaʻa ʻeku ngaahi fakakaukaú pea hoko ko ha taula ki he nofo malu ʻi ha tahi hoú.