Ko e hā ʻOku Fie Maʻu ai e Ongo Tohi Tuʻutuʻuní?

ʻOku tokoni ʻa e ongo tohi tuʻutuʻuní ke tauhi ʻa e totonu ʻo e ngaahi tuʻutuʻuní, founga ngāué, mo e ngaahi polokalama ʻo ha Siasi ʻokú ne aʻusia ʻa e tupu vave ʻi he tapa kotoa pē ʻo māmaní.

Naʻe pehē ʻe Palesiteni Tōmasi S. Monisoni lolotonga ʻa e fakataha ako fakatakimuʻa fakamāmani lahi ʻi Nōvema 2010, “Kuo tupu hotau mēmipasipí talu mei hono fokotuʻu e Siasí he 1830. Pea ʻe hoko atu pē ʻene tupú ʻi ha ngaahi ʻiuniti ʻe lauiafe he māmaní. Mahalo he ʻikai mei malava ke tauhi e tuʻunga haohaoa ʻo e ngaahi tuʻutuʻuní, founga ngāué mo e ngaahi polokalama ʻo e Siasí taʻe kau ai e ongo tohi tuʻutuʻuni ko ʻení.”

ʻOku tokoni ʻa e ongo tohi tuʻutuʻuní ke fakasiʻisiʻi e mafasia ʻa e Kau Palesitenisī ʻUluakí ʻi hono tali e ngaahi fehuʻi fekauʻaki mo e ngaahi tuʻutuʻuní mo fakatonutonu e ngaahi founga ngāue ʻoku fehālākí.

Naʻe pehē ʻe Palesiteni Monisoni, “ʻI heʻemau fakataha ko e Kau Palesitenisī ʻUluakí, ʻi heʻemau taimi angamahení he ʻaho takitaha ʻo e uiké, kuo pau pea ʻoku fie maʻu ke mau vakai pea fakatonutonu e ngaahi fehālāki. ʻE lava pē ke fai ha fakaʻehiʻehi mei he konga lahi ʻo e ngaahi fehālākí ni ʻo kapau … ʻe maheni e kau taki peheé mo e Tohi Tuʻutuʻuní pea nau muimui ki he ngaahi tuʻutuʻuni mo e founga ngāue kuo fakamatalaʻi aí.”

Naʻe pehē ʻe Palesiteni Monisoni ʻoku faʻa fai ʻe ha kau taki lelei ʻa ia ʻoku ʻikai ke nau maheni mo e ongo tuʻutuʻuní mo e founga ngāué ha ngaahi tuʻutuʻuni ʻoku lava ke hoko ai ha ngaahi palopalema lahi ʻi he ngaahi polokalama ʻo e Siasí.

Naʻe pehē ʻe Palesiteni Monisoni, “ ʻOku tatau ai pē pe ko e mēmipa fuoloa koe ʻo e Siasí pe toki kau foʻou mai, vakai ki he tohi tuʻutuʻuní ʻi he taimi ʻokú ke taʻepauʻia ai ʻi ha tuʻutuʻuni pe founga ngāue. ʻOkú ke malu ange ʻi hoʻo fakaʻaongaʻi e tohi tuʻutuʻuní.”

ʻOku tokoni ʻa e ongo tohi tuʻutuʻuní ki he maʻu fakahaá ʻi he fekumi ʻa e kau taki fakalotofonuá ki he tataki ʻa e Laumālié ʻi hono fakahoko ʻa e ngaahi ngāue ʻa e Siasí.

Naʻe pehē ʻe ʻEletā Kueniteni L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he fakataha ʻi Nōvema 2010, “ ʻI he ʻiloʻi ʻe he kau taki ʻo e Siasí honau ngaahi fatongiá mo muimui ki he ngaahi founga ngāue kuo fokotuʻú, ʻoku nau fakaafeʻi ʻa e Laumālie Māʻoniʻoní ke ueʻi fakalaumālie kinautolu mo e kakai ʻoku nau tokangaʻí.”

Naʻe fakamahino ʻe Misa Tēvita M. Makongikī, ko e tokoni ʻuluaki ʻi he kau palesitenisī lahi ʻo e Lautohi Faka-Sāpaté, ʻa e mahuʻinga ʻo e ongo tohi tuʻutuʻuní ʻi he konifelenisi lahi ʻo ʻOkatopa 2010.

Lolotonga hono akoʻi ʻo ha palesiteni fakasiteiki foʻou ʻe ha Fitungofulu Faka-ʻĒlia, naʻe fai ʻe Misa Makongikī ha ngaahi fehuʻi, ʻa ia naʻe tali kotoa pē ʻi he ongo tohi tuʻutuʻuní.

Naʻe pehē ʻe Misa Makongikī, “Naʻe ʻikai te u toe hoko atu ʻa hono fai ʻo e ngaahi fehuʻí. Naʻá ku fakakaukau ko e lelei tahá ke u lau ʻa e tohi tuʻutuʻuní. ʻOku kehe ʻaupito ia mo e fokotuʻutuʻu ʻi hēvaní ke toutou fakahā mai kiate kitautolu fakafoʻituitui ʻe he ʻEikí ʻa ia kuó Ne ʻosi fakahā mai kiate kitautolu fakatokolahí” (“Ko Hono Ako mo Akoʻi ʻo e Ongoongoleleí,” Liahoná mo e Ensign, Nōvema 2010, 13).

Ke fekumi ki he vitiō, fakamatala, mo e hiki ʻo e ongo fakataha fakatakimuʻa fakamāmanilahi ʻi Nōvema 2010 mo Fēpueli 2011 ʻi he ngaahi lea fakafonua ʻe 40, ʻaʻahi ki he konga ko e Serving in the Church ʻi he LDS.org.