Ko e Hā ʻA e Kātaki?

Ko e ongo meʻa māʻolunga taha ke fakamuʻomuʻa ʻi he moʻuí ko e ʻofa ki he ʻOtuá mo e ʻofa ki hotau kaungāʻapí. ¹ ʻOku fakakau atu ki ai e kaungāʻapi ʻi hotau ngaahi fāmili tonú, ʻi hotau tukui koló, hotau puleʻangá, mo hotau māmaní. ʻOku hanga ʻe he talangofua ki he fekau hono uá ʻo fakahoko ʻa e talangofua ki he ʻuluaki fekaú. “ ʻO ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá” (Mōsaia 2:17).

ʻOku tānaki mai ʻa e kakai faivelenga ʻi he konitinēniti kotoa mo e ngaahi motu ʻo e tahí ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku ʻikai mahuʻinga ʻa e ngaahi faikehekehe ʻi he puipuituʻa ʻo e anga fakafonuá, leá, tangata pe fefine, pe fōtunga ʻo e matá ʻi he femoʻuekina ʻa e kāingalotú he tauhi ki honau Fakamoʻui ʻofeiná.

Ko ʻene toki mahino pē ʻa e tuʻunga fakaetamai moʻoni ʻo e ʻOtuá pea lava leva ke maʻu ʻa e houngaʻia kakato ʻo e feohi fakatokoua moʻoni ʻa e tangatá. ʻOku fakatupu ʻe he mahino ko iá ʻa e holi ʻo e lotó ke langa ha ngaahi halafakakavakava ʻo e ngāue fakatahá kae ʻikai ko ha ngaahi ʻā vahevahe.

ʻOku tupu ʻa e fekeʻikeʻí mei he ʻikai ha kātakí; ʻoku ikunaʻi ʻe he kātakí ʻa e fekeʻikeʻí. Ko e kātakí ʻa e kī ʻokú ne fakaava ʻa e matapā ki he femahinoʻakí mo e ʻofá.

Tuku ke u ʻoatu ha fakatokanga mahuʻinga. ʻE lava ke maʻu ha fakakaukau hala ʻi he pehē kapau ʻoku lelei ha meʻa siʻisiʻi, kuo pau ke lelei ange haʻane lahi. ʻIkai! ʻE lava ke fakatuʻutāmaki hano fakaʻaongaʻi ʻo fuʻu lahi ha faitoʻo ʻoku fie maʻu. Ka ʻikai fakangatangata ʻa e ʻaloʻofá ʻe lava ke fepaki ia mo e fakamaau totonú. Ko ia, ko e kātaki taʻefakangatangatá, ʻe lava ke loto vaivai ai ʻo fakaʻatā e meʻa kotoa pē.

Naʻe fokotuʻu ʻe he ʻEikí ha ngaahi laine fakangatangata ke fakaʻilongaʻi e fakangatangata ʻo e kātaki ʻoku talí. ʻOku fakatuʻutāmaki ʻa e taimi ʻoku talangataʻa ai ki he ngaahi fakangatangata fakalangi ko iá. Naʻe akoʻi kiate kitautolu ʻe he Fakamoʻuí ʻa e fie maʻu ko ia ke ʻoua naʻa tau kātakiʻi e koví, ʻo hangē pē ko hono akoʻi ʻe he mātuʻá e fānau īkí ke ʻoua naʻa nau lele mo vaʻinga he halá. “Pea hū ʻa Sīsū ki he fale lotu lahi ʻo e ʻOtuá, … ʻo ne fulihi ʻa e ngaahi palepale ʻo e kau fetongi paʻangá” (Mātiu 21:12; vakai foki, Maʻake 11:15). Neongo naʻe ʻofa e ʻEikí ʻi he tokotaha faiangahalá, ka naʻá Ne folofola “ ʻoku ʻikai [te Ne] lava ke mamata ki he angahalá ʻo momoʻi fakaʻatuʻi ia” (T&F 1:31).

Ko e ʻofa moʻoni ki he tokotaha faiangahalá te ne fakamālohia kita ke lea hangatonu ki ai—kae ʻikai ko hano tali lelei pē ʻo e angahalá ʻo ʻikai ha toe lau ki ai! ʻOku ʻikai ke poupou ʻa e ʻofa moʻoní ki he ʻulungāanga ʻe ʻauha ai ha tahá.

ʻOku hanga ʻe heʻetau tauhi ki he Fakamoʻuí ʻo ʻai ke tau fehiʻa ki he faiangahalá ka tau tokanga ki Heʻene fekau ke ʻofa ki hotau kaungāʻapí. ʻOku tau moʻui fakataha ʻi he māmaní, ʻa ia ʻoku fie maʻu ke tokangaʻi, tauhi, pea vahevahe ʻi he loto-fakafetaʻi.² ʻE lava ke tau takitaha tokoni ke fakafiefia ange ʻa ʻetau moʻui ʻi he māmaní.

Te u lau atu mei ha lea naʻe fai ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá:

“ ʻOku hala fakaeangamaʻa ke fakaʻikaiʻi ʻe ha taha pe ha kulupu ʻa e ngeia ʻo ha tangata pe fefine ʻi he ʻuhinga fakamamahi mo fakafehiʻanekina ʻo e laulanú pe pehē ko e fonua fē ʻoku lelei angé.

“ ʻOku mau kōlenga ki he kakai hono kotoa ʻi he feituʻu kotoa pē ke nau toe fakatukupaaʻi ange kinautolu ki he ngaahi sīpinga lāngilangiʻia ʻo e kātakí mo e fefakaʻapaʻapaʻakí ʻa ia ʻoku fakaʻapaʻapaʻi ʻi he kuonga kotoa pē. ʻOku mau tui fakamātoato ka tau fefakaʻatuʻiʻaki mo manavaʻofa, te tau ʻiloʻi ʻe lava pē ke tau nofo melino fakataha neongo e lahi hotau ngaahi faikehekehé.”³

Te tau ala tuʻu fakataha ʻo ʻikai kātakiʻi e maumaufonó kae kātakiʻi hotau kaungāʻapi ʻoku toputapu kiate kinautolu honau ngaahi faikehekehé. Ko e fānau kotoa ʻa e ʻOtuá ʻa hotau ngaahi tokoua mo e tuofāfine ʻofeina ʻi he māmaní. Ko ʻetau Tamaí Ia. Ko e Kalaisí ʻa Hono ʻAlo ko Sīsuú. Kuo toe fakafoki mai ki he māmaní Hono Siasí ʻi he ngaahi ʻaho kimui ní ke faitāpuekina kotoa e fānau ʻa e ʻOtuá.